Ko Hono Akoʻi e Tokāteline Moʻoní, tā fakatātaaʻi ʻe Michael T. Malm

8–14 Sune

ʻAlamā 8–12

ʻE Hāʻele Mai ʻa Sīsū Kalaisi ke Huhuʻi Hono Kakaí

ʻI hoʻo lau e meʻa naʻe akoʻi ʻe ʻAlamā mo ʻAmuleki ki he kakai ʻo ʻAmonaihaá, ko e hā ʻoku ongo mahuʻingamālie ki he fānau ʻokú ke akoʻí?

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaafeʻi e fānaú ke nau fakamatalaʻi e meʻa ʻoku fai ʻe he kau faifekaú pea talanoa fekauʻaki mo ha taha ʻoku nau ʻiloʻi ʻoku lolotonga ngāue fakafaifekau. Ko e hā ʻoku akoʻi ʻe he kau faifekaú ki he kakaí? Tokoniʻi e fānaú ke nau ʻilo naʻe hoko ʻa ʻAlamā mo ʻAmuleki ko ha ongo faifekau naʻá na vahevahe e ongoongoleleí ki he kakai ʻo ʻAmonaihaá.

Akoʻi e Tokāteliné: Fānau Iiki Angé

ʻAlamā 8

Te u lava ʻo vahevahe ʻa e ongoongoleleí.

Naʻe fononga ʻa ʻAlamā ʻi hono kotoa ʻo e funga ʻo e fonuá ke malanga ʻaki e ongoongoleleí, pea naʻe malanga ʻa ʻAmuleki ʻi hono kolo ʻoʻoná ki hono ngaahi kaungāmeʻá mo e kaungāʻapí. Te ke fakaʻaiʻai fēfē ʻa e fānaú ke nau muimui ki heʻena sīpinga ke vahevahe ʻa e ongoongoleleí mo e niʻihi kehé?

Ngaahi ʻEkitivitī ʻe Ala Fakahokó

• Lau fakataha e konga ʻuluaki ʻo e “Vahe 22: Ko e Ngāue Fakafaifekau ʻa ʻAlamā ki ʻAmonaihaá” (Ngaahi Talanoa ʻo e Tohi ʻa Molomoná, 58–63; vakai foki ki he vitiō ʻoku fekauʻaki mo iá ʻi he ChurchofJesusChrist.org). Fakaafeʻi e fānaú ke nau tauhoa ʻo fepikinima ʻo fakangalingali pē ko ʻAmuleki mo ʻAlamā kinautolu ʻoku nau akoʻi fakataha e ongoongoleleí, lolotonga ia ʻenau hivaʻi ha foʻi hiva fekauʻaki mo e ngāue fakafaifekaú, hangē ko e “ ʻOku ou Fie Hoko Leva ko ha Faifekau” (Tohi Hiva ʻa e Fānaú, 90).

• Tokoniʻi e fānaú ke nau toutou lea ʻaki ha moʻoni ʻi he ongoongoleleí hangē ko e “ʻOku fakamoʻoniʻi ʻe he Tohi ʻa Molomoná ʻa Kalaisi” pe “ʻOku ou ʻilo ʻoku ʻofa ʻa Sīsū ʻiate au.” Hili iá pea fakaafeʻi e tokotaha kotoa ke nau akoako vahevahe e moʻoni ko ʻení mo ha taha kehe ʻi he kalasí. Te ke lava ʻo tokoniʻi e fānaú ke nau fakakakato e peesi ʻekitivitī ʻo e uike ní ko ha konga ʻo e ʻekitivitī ko ʻení.

• Kole ki he fānaú ke nau fakamatala atu kau ki ha meʻa kuo nau vahevahe mo ha mēmipa ʻo e fāmilí pe ha kaungāmeʻa—hangē ko ha meʻavaʻinga pe lole. Tokoniʻi ke nau lisi ha ngaahi meʻa mahuʻinga te tau lava ʻo vahevahe mo e niʻihi kehé fekauʻaki mo Sīsū Kalaisi. Fakamatalaʻi ange koeʻuhí ko e fuʻu mahuʻinga ʻo e ongoongoleleí, naʻe fononga ʻa ʻAlamā ke vahevahe ia mo e kakai ʻi he tukui kolo kehé koeʻuhí ke nau lava ʻo ako e founga ke nau fiefia aí.

ʻAlamā 8:18–22

Te u lava ʻo hoko ko ha kaungāmeʻa lelei.

ʻOku hoko e tokoni ʻa ʻAmuleki kia ʻAlamaá ko ha sīpinga lelei ki he fānaú fekauʻaki mo e founga te nau lava ai ʻo ʻofa mo tokoni ki he niʻihi kehé.

Ngaahi ʻEkitivitī ʻe Ala Fakahokó

• Fakaafeʻi ha tokotaha ke fakangalingali pē ko ʻAmuleki ia pea mo ha taha ke fakangalingali pē ko ʻAlamā ia ʻi hoʻo fai e talanoa ʻi he ʻAlamā 8:18–22. Tuku ke tokoni e fānaú ʻi hono fai e talanoá, pea fakaafeʻi mo e fānau kehekehe ke nau hoko ko ʻAlamā mo ʻAmuleki. Naʻe hoko fēfē ʻa ʻAmuleki ko ha kaungāmeʻa lelei ʻo ʻAlamaá? Kole ki he fānaú ke nau talanoa fekauʻaki mo ha taha kuó ne hoko ko ha kaungāmeʻa lelei kiate kinautolu. Ko e hā ʻa e ongo ne nau maʻu mei he aʻusia ko iá? Ko e hā ʻoku finangalo ai e ʻOtuá ke tau hoko ko ha kaungāmeʻa lelei ki he niʻihi kehé?

• Kumi pe tā ha fakatātā ʻokú ne fakafofongaʻi e vā fakakaungāmeʻá (hangē ko ha toko ua ʻokú na fāʻofua pe ko ha foʻi haati), pea kosi ia ki ha kongokonga pāsolo. ʻI he tafaʻaki ʻe taha ʻo e kongokonga pāsolo kotoa pē, tohi ha meʻa naʻe fai ʻe ʻAlamā mo ʻAmuleki ke na hoko ai ko ha ongo kaungāmeʻa lelei pe ngaahi meʻa te tau lava ʻo fai ke tau hoko ai ko ha kaungāmeʻa leleí. Fakaafeʻi e fānaú ke nau taufetongi ʻi hono fili ha konga pea tānaki atu ia ki he pāsoló lolotonga hoʻo lau e meʻa ʻoku tohi ʻi mui aí. Tokoniʻi ke nau fakakaukau ki ha kakai te nau lava ʻo hoko ko hanau kaungāmeʻa. Fakamoʻoni ko Sīsū Kalaisi ʻa e kaungāmeʻa maʻongoʻonga taha te tau lava ʻo maʻú.

Te tau lava ʻo hoko ko ha kaungāmeʻa lelei ki he niʻihi kehé.

ʻAlamā 11:43–44

Hili e maté, te u toetuʻu.

Naʻe akoʻi ʻe ʻAmuleki e kakai ʻo ʻAmonaihaá fekauʻaki mo e Toetuʻú. Te ke tokoniʻi fēfē e fānau ʻokú ke akoʻí ke mahino kiate kinautolu e ʻuhinga ʻo e toetuʻú?

Ngaahi ʻEkitivitī ʻe Ala Fakahokó

• Ngāue ʻaki ho nimá ke ne fakafofongaʻi ha laumālie, pea fakaʻaongaʻi ha kofunima ke ne fakafofongaʻi ha sino. Toʻo ho nimá mei he kofunimá ke fakaʻaliʻali ki he fānaú ʻe fakamavahevaheʻi hotau laumālié mei he sinó ʻi he maté. Hili iá pea toe tui ho nimá ki he kofunimá ke fakahaaʻi ʻe toe fakatahaʻi hotau laumālié mo e sinó ʻi he Toetuʻú. Tuku ke taufetongi e fānaú ʻi hono tui mo vete ʻa e kofunimá lolotonga hoʻo lau kiate kinautolu ʻa e ʻAlamā 11:43. Fakaʻaliʻali e fakatātā ʻo Mele mo Sīsū Kalaisi kuo Toetuʻú (Tohi Fakatātā ʻo e Ongoongoleleí, fika 59), pea fakamoʻoni ʻoku tuʻunga ʻia Sīsū Kalaisi ʻa e malava ʻa e tokotaha kotoa pē ke toetuʻú.

• Fakaafeʻi e fānaú ke nau tā ha fakatātā ʻo honau ngaahi kaungāmeʻá pe mēmipa ʻo e fāmilí, ʻo kau ai e kāinga ofí. Lolotonga e vahevahe ʻe he fānaú ʻenau fakatātaá, tuhu ki he kaungāmeʻa pe fāmili takitaha naʻa nau taá pea fakamatalaʻi ange ʻe toetuʻu ia. Fakamoʻoni naʻe tuʻunga ʻia Sīsū ʻetau lava ʻo nofo fakataha mo hotau ngaahi fāmilí ʻo taʻengatá.

Akoʻi e Tokāteliné: Fānau Lalahi Angé

ʻAlamā 8–10

Te u lava ʻo vahevahe ʻa e ongoongoleleí.

Naʻe vahevahe ʻe ʻAlamā mo ʻAmuleki e ongoongoleleí, neongo naʻe ʻikai faingofua. ʻE fēfē nai hano ueʻi fakalaumālie heʻena loto-toʻá mo e tuí ʻa e fānau ʻokú ke akoʻí?

Ngaahi ʻEkitivitī ʻe Ala Fakahokó

• Fakamatalaʻi fakanounou ʻi hoʻo lea pē ʻaʻau e ngaahi meʻa naʻe hoko ʻi he ʻAlamā 8–10. Fili ha ngaahi tefitoʻi moʻoni ʻe niʻihi mei he ngaahi meʻa naʻe hoko ko ʻení ʻa ia ʻe ala tokoni ki he fānaú ke nau vahevahe e ongoongoleleí, hangē ko e faʻa kātakí (vakai, ʻAlamā 8:8–13), fakamoʻoni kia Kalaisí (vakai, ʻAlamā 9:26–27), mo e ʻi ai ha hoá (vakai, ʻAlamā 10:7–11). Fakaafeʻi e fānaú ke nau lau e ngaahi veesi filí pea tala atu e meʻa naʻa nau ako fekauʻaki mo hono vahevahe ʻo e ongoongoleleí. Ko e hā ʻoku mahuʻinga ai ke vahevahe e ongoongoleleí mo e niʻihi kehé?

• Fakaafeʻi e fānaú ke nau vahevahe ha ngaahi aʻusia ʻi he taimi ne nau vahevahe ai e ongoongoleleí mo ha taha, pe vahevahe haʻo aʻusia pē ʻaʻau. Fakaafeʻi e fānaú ke nau fanongo ki ha ngaahi founga te nau lava ai ʻo teuteu ke vahevahe e ongoongoleleí ʻi heʻenau hivaʻi ha foʻi hiva fekauʻaki mo e ngāue fakafaifekaú, hangē ko e “ ʻOmi Ki Māmani ʻEne Moʻoní” (Tohi Hiva ʻa e Fānaú, 92). Ko e hā ʻoku finangalo ai e Tamai Hēvaní ke tau vahevahe e ongoongoleleí? Tokoniʻi e fānaú ke nau palani ha ngaahi founga ke vahevahe ai e ongoongoleleí mo honau ngaahi kaungāmeʻá, hangē ko hano ʻoange ha tatau ʻo e Tohi ʻa Molomoná pe fakaafeʻi kinautolu ki ha ʻekitivitī ʻa e Siasí. Tuku ange ha taimi ke nau fakafaivaʻi ai e meʻa te nau lava ʻo lea ʻaki pe fai ʻi he ngaahi tūkunga ko ʻení.

ʻAlamā 11–12

Ko e palani ʻa e ʻOtuá ko ha palani ia ʻo e huhuʻí.

Te ke fakaʻaongaʻi fēfē ʻa e ʻAlamā 11–12 ke “fakahā [ki he fānaú] ʻa e palani ʻo e huhuʻí”? ( ʻAlamā 12:30).

ʻEkitivitī ʻe Ala Fakahokó

• Tohi ʻi he palakipoé ha niʻihi ʻo e ngaahi tefitoʻi moʻoni felāveʻi mo e palani ʻo e huhuʻí ʻa ia ʻoku maʻu ʻi he ʻAlamā 11–12, hangē ko e Hinga ʻa ʻĀtama mo ʻIví, ko e Fakalelei ʻa Sīsū Kalaisí, fakatomalá, maté, toetuʻú, mo e fakamāú. Lau ha ngaahi veesi ʻe niʻihi mei he ʻAlamā 11 pe 12 ʻokú ne akoʻi fekauʻaki mo e ngaahi tefitoʻi moʻoní, pea tuku ha taimi ki he fānaú ke nau tā ha fakatātā ke fakafofongaʻi e tefitoʻi moʻoni takitaha. Ko e hā e fatongia ʻo e Fakamoʻuí ʻi he palani ko ʻení? Hili iá pea fakaafeʻi e fānaú ke nau fakaʻaongaʻi ʻenau ʻū fakatātaá ke nau fakafaivaʻi hono akoʻi ki ha kaungāmeʻa fekauʻaki mo e palani ʻa e ʻOtuá.

ʻAlamā 12:10

Kapau he ʻikai ke u fakafefeka hoku lotó, te u lava ʻo maʻu lahi ange mei he folofola ʻa e ʻOtuá.

ʻI hono ako e ngaahi moʻoni fakalaumālié, ʻoku mahuʻinga tatau pē ʻa e tūkunga ʻo hotau lotó mo e ngaahi meʻa ʻoku malava ʻe hotau ʻatamaí.

Ngaahi ʻEkitivitī ʻe Ala Fakahokó

• Lau fakataha e ʻAlamā 12:10, pea aleaʻi e ʻuhinga ʻo e “fakafefeka” hotau lotó. Ko e hā ʻoku hoko ai ʻa e loto fefeká ke faingataʻa ange ʻa e ako mei he ʻOtuá?

• Ke fakatātaaʻi e tefitoʻi moʻoni ko ʻení, fakaʻaliʻali ki he fānaú ha vavae mo ha foʻi maka pea fehuʻi ange pe ko e fē meʻa ʻe lelei ange ʻene mimisi e vaí. Te tau fakahaaʻi fēfē nai ki he ʻEikí ʻoku tau fie maʻu ke vaivai hotau lotó hangē ko e vavaé?

Poupouʻi e Ako ʻi ʻApí

Fakaafeʻi e fānaú ke nau fekumi ki ha ngaahi faingamālie ke vahevahe e ongoongoleleí pea tokoni ki ha taha kehe he uiké ni.

Fakatupulaki ʻEtau Akoʻí

Vahevahe hoʻo fakamoʻoní ki hoʻo kalasí. ʻE lava ke faingofua ha fakamoʻoni ʻo hangē ko e “ʻOku ou ʻilo ʻoku ʻofa ʻa e Tamai Hēvaní kiate kimoutolu kotoa” pe “ʻOku ou ongoʻi fiefia ʻi heʻeku ako kau kia Sīsū Kalaisí.” (Vakai foki, Faiako ʻi he Founga ʻa e Fakamoʻuí, 11.)