Tā fakatātaaʻi ʻo ʻAlamā mo ʻAmuleki ʻi hono fakahaofi kinaua mei pilīsoné, tā fakatātaaʻi ʻe Andrew Bosley

15–21 Sune

ʻAlamā 13–16

“Hū ki he Mālōlōʻanga ʻo e ʻEikí”

ʻOkú ke fakataha pē mo e fānau ʻi hoʻo kalasí ʻi ha kiʻi taimi nounou he uike kotoa pē. Te ke tāpuekina lahi ʻenau moʻuí ʻo kapau te ke lava ʻo ueʻi fakalaumālie kinautolu ke hokohoko atu ʻenau ako mei he Tohi ʻa Molomoná ʻi tuʻa ʻi he kalasí—kae tautautefito ki honau ngaahi fāmilí.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Tuku ki he fānaú ha ngaahi faingamālie ke nau vahevahe e meʻa kuo nau ʻosi ʻilo fekauʻaki mo e ngaahi talanoa ʻi he ʻAlamā 13–16. Ke tokoni kiate kinautolú, fakaʻaliʻali ha ngaahi fakatātā hangē ko ia ʻoku ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pe “Vahe 22: Ko e Ngāue Fakafaifekau ʻa ʻAlamā ki ʻAmonaihaá” (Ngaahi Talanoa ʻo e Tohi ʻa Molomoná, 58–63).

Akoʻi e Tokāteliné: Fānau Iiki Angé

ʻAlamā 13:1–2, 6, 16

ʻOku tokoniʻi au ʻe he lakanga fakataulaʻeikí keu haʻu kia Kalaisi.

Fakalaulauloto ʻi he faʻa lotu ki he meʻa ʻoku fie maʻu ke mahino ki he fānau ʻi hoʻo kalasí mei he meʻa naʻe akoʻi ʻe ʻAlamā fekauʻaki mo e lakanga fakataulaʻeikí ʻi he ngaahi veesi ko ʻení.

Ngaahi ʻEkitivitī ʻe Ala Fakahokó

• Kole ki he fānaú ke nau toutou lea ʻaki ha fakaʻuhinga faingofua ʻo e lakanga fakataulaʻeikí, hangē ko e “ko e lakanga fakataulaʻeikí ʻa e mālohi ʻo e ʻOtuá.”

• Kumi ʻi he folofolá ki he ʻAlamā 13:2, pea talaange ki he fānaú ʻoku uiuiʻi ʻe he ʻOtuá ʻa e kau maʻu lakanga fakataulaʻeikí “ke ʻiloʻi ai ʻe he kakaí … ʻenau sio ki hono ʻAló.” Ke fakatātaaʻi e founga ʻoku fakahoko ai ʻeni ʻe he kau maʻu lakanga fakataulaʻeikí, fakaʻaliʻali ʻa e ngaahi fakatātā ʻo e founga ʻoku ngāue ai ʻa e kau maʻu lakanga fakataulaʻeikí (vakai, Tohi Fakatātā ʻo e Ongoongoleleí, fika 38–41, 103–9), pea vahevahe leva ʻa e ngaahi talanoa fekauʻaki mo e founga naʻe ngāue ai ʻa Sīsuú (vakai, Mātiu 26:26–28; Maʻake 5:22–24, 35–43).

• Kumi ʻa e ʻAlamā 13:6, pea fakamatalaʻi ʻoku “akonaki ʻaki [ʻe he kau maʻu lakanga fakataulaʻeikí e] ngaahi fekau [ʻa e ʻOtuá] ki he fānau ʻa e tangatá.” Tokoniʻi e fānaú ke nau fakakaukau ki ha kau maʻu lakanga fakataulaʻeiki ʻoku nau ʻilo. ʻOku founga fēfē ʻenau akoʻi e ngaahi fekaú? Fakaafeʻi e fānaú ke nau tā ha fakatātā ʻo ha maʻu lakanga fakataulaʻeiki ʻoku nau ʻilo, ʻokú ne akoʻi e ngaahi fekau ʻa e ʻOtuá ki ha taha.

ʻOku tokoniʻi kitautolu ʻe he ngaahi ouau lakanga fakataulaʻeikí ke tau vakai kia Sīsū Kalaisi ke maʻu e huhuʻí.

ʻAlamā 14:18–29

ʻOku fakamālohia au ʻe he Tamai Hēvaní ʻo fakatatau ki heʻeku tuí.

ʻE lava ke ueʻi fakalaumālie ʻe he talanoa ʻo hono fakahaofi ʻo ʻAlamā mo ʻAmuleki mei he fale fakapōpulá e fānaú, ke nau tafoki ki he ʻEikí ʻi heʻenau fie maʻu tokoní.

Ngaahi ʻEkitivitī ʻe Ala Fakahokó

• Fakaʻaliʻali e fakatātā ʻo ʻAlamā mo ʻAmuleki ʻi he peesi ʻekitivitī ʻo e uike ní ʻi hoʻo fai e talanoa ʻi he ʻAlamā 14:18–29. Te ke lava foki ʻo vakai ki he “Vahe 22: Ko e Ngāue Fakafaifekau ʻa ʻAlamā ki ʻAmonaihaá” (Ngaahi Talanoa ʻo e Tohi ʻa Molomoná, 58–63; pe vitiō fakafekauʻakí ʻi he ChurchofJesusChrist.org). Tuku ki he fānaú ke nau taufetongi ʻi hono fakaʻaongaʻi e ongo fakatātaá ke fai e talanoá. Fakamamafaʻi ange naʻe foaki kia ʻAlamā mo ʻAmuleki e mālohi ke na hola mei he fale fakapōpulá “fakatatau ki [heʻena] tui ʻoku tuʻunga ʻia Kalaisí” ({35}ʻAlamā 14:26).

• Tokoni ki he fānaú ke nau lava ʻo sioloto ki he anga e meʻa naʻe mei ongoʻi ʻe ʻAlamā mo ʻAmuleki lolotonga ʻena ʻi he fale fakapōpulá, pea fakaafeʻi kinautolu ke nau fakatātaaʻi e ngaahi ongo ko ʻení (vakai, veesi 22). Fakamatala ange naʻe kole tokoni ʻa ʻAlamā ki he ʻEikí (vakai, veesi 26). Fakamoʻoniʻi ange ʻe fakamālohia kitautolu ʻe he ʻOtuá ʻi heʻetau lotu ʻi he tuí.

• Fakaʻaongaʻi e peesi ʻekitivitī ʻo e uike ní ke akoʻi e fānaú fekauʻaki mo ha ngaahi founga ʻoku fakamālohia ai ʻe he ʻOtuá ʻa kinautolu ʻoku nau maʻu e tuí. Talaange e valivali ʻe he fānaú e peesi ʻekitivitī valivalí, talanoa ki ha taimi naʻe foaki atu ai ʻe he ʻOtuá ha mālohi kiate koe.

ʻAlamā 16:1–8

ʻOku tāpuekina au ʻi heʻeku muimui ki he palōfitá.

Naʻe ʻiloʻi ʻe Sōlami, ko e ʻeikitau pule ʻo e kau tau ʻo e kau Nīfai, ko ha palōfita ʻa ʻAlamā peá ne fekumi ki heʻene fakahinohinó. Naʻe lavameʻa ʻa Sōlami koeʻuhí ko ʻeni.

Ngaahi ʻEkitivitī ʻe Ala Fakahokó

• ʻI hoʻo lea pē ʻaʻau, vahevahe ʻa e talanoa ʻi he ʻAlamā 16:1–8. Fakamamafaʻi ange naʻe tupu ʻi he muimui ʻa Sōlami mo e kau Nīfaí ki he palōfita ko ʻAlamaá, hono lava ʻe he kau Nīfaí ʻo fakahaofi honau ngaahi kaungāmeʻa naʻe tuku pe ʻave pōpula ʻe he kau Leimaná. Vahevahe ha aʻusia ki ha taimi naʻe tāpuekina ai koe koeʻuhí ko hoʻo muimui ki he palōfitá.

• Fakaʻaliʻali ha fakatātā ʻo e Palesiteni ʻo e Siasí, pea vahevahe ha kiʻi meʻa siʻi kuó ne akoʻi mai ke tau fai. Tokoniʻi e fānaú ke nau fakakaukau ki ha ngaahi founga te nau lava ai ʻo muimui kia Sīsū ʻaki ʻenau fai e meʻa ʻoku akoʻi mai ʻe Heʻene palōfitá kiate kitautolú.

• Fakaʻaliʻali ha ngaahi fakatātā ʻo e kau palōfitá (vakai, Tohi Fakatātā ʻo e Ongoongoleleí, fika 6–9, 14, 18, 26–27) ʻi hoʻo hivaʻi mo e fānaú ha hiva fekauʻaki mo e kau palōfitá, hangē ko e “Muimui he Palōfitá” (Tohi Hiva ʻa e Fānaú, 58). Fakamamafaʻi ʻa e ngaahi kupuʻi lea ʻi he hivá ʻoku nau akoʻi e ʻuhinga ʻoku totonu ai ke tau muimui he palōfitá.

Akoʻi e Tokāteliné: Fānau Lalahi Angé

ʻAlamā 13:1–19

ʻOku tokoniʻi au ʻe he lakanga fakataulaʻeikí keu haʻu kia Kalaisi.

ʻI hoʻo lau e ʻAlamā 13:1–19, ko e hā ʻokú ke ʻilo ʻokú ne fakaloloto hoʻo loto ʻapasia ki he lakanga fakataulaʻeikí? Ko e hā ʻokú ke ongoʻi ke vahevahe mo e fānau ʻokú ke akoʻí? ʻE lava ke tokoni e ngaahi fakakaukau ko ʻení.

Ngaahi ʻEkitivitī ʻe Ala Fakahokó

• Lau mo e fānaú e ʻAlamā 13:10 mo e 13, ʻo fekumi ki he ngaahi ʻulungaanga ʻoku totonu ke maʻu ʻe he lakanga fakataulaʻeikí. Kole ange ke nau fakakaukau ki ha kakai ʻoku nau ʻilo ʻa ia ko ha sīpinga lelei ʻo e ngaahi ʻulungaanga ko ʻení.

• Tokoni ki he fānaú ke nau faʻu ha lisi ʻo e ngaahi ouau ʻoku tau maʻu ʻo fakafou ʻi he lakanga fakataulaʻeikí (vakai, “Ngaahi Ouaú” ʻi he Tuʻu Maʻu ʻi he Tuí, 109–10). Kole ki ha taha ke ne lau e ʻAlamā 13:16. ʻOku tokoni fēfē e ngaahi ouau ko ʻení ke tau “sio ki muʻa [kia Sīsū Kalaisi] ke maʻu ha fakamolemole ʻo [ʻetau] angahalá”?

• Fehuʻi ki he fānaú pe ʻoku nau ʻilo ki he founga naʻe maʻu ai e hingoa ʻo e Lakanga Taulaʻeiki Faka-Melekisētekí. Tokoniʻi kinautolu ke nau maʻu e talí ʻi he ʻAlamā 13:14–19 mo e Tokāteline mo e Ngaahi Fuakava 107:1–4. Ko e hā ʻoku tau ako meia Melekisēteki fekauʻaki mo e founga ke fakaʻaongaʻi ai e lakanga fakataulaʻeikí?

ʻAlamā 14:18–29

ʻOku fakamālohia au ʻe he Tamai Hēvaní ʻo fakatatau ki heʻeku tuí.

Naʻe ʻi he fale fakapōpulá ʻa ʻAlamā mo ʻAmuleki ʻi ha ngaahi ʻaho lahi kimuʻa pea fakatauʻatāinaʻi kinaua ʻe he ʻEikí. ʻE lava ke tokoni e talanoa ko ʻení ki he fānaú ke nau ako he ʻikai maʻu ha solovaʻanga vave pe faingofua ki heʻenau ngaahi faingataʻaʻiá, ka ʻe fakamālohia kinautolu ʻe he ʻEikí “ʻo fakatatau ki [heʻenau] tuí” ( ʻAlamā 14:26).

Ngaahi ʻEkitivitī ʻe Ala Fakahokó

• Tohi ha ngaahi fehuʻi ʻi he palakipoé ke tokoni ki he fānaú ke fekumi ki ha ngaahi fakaikiiki mei he ʻAlamā 14:18–29, hangē ko e Ko e hā naʻe fai ʻe he kau fakamāú kia ʻAlamā mo ʻAmuleki ʻi he fale fakapōpulá? pe Naʻe anga fēfē ʻena fakahā ʻena tui kia Sīsū Kalaisí? ʻOange ki he tokotaha takitaha ha veesi ʻe taha pe ua ke ne lau, ʻo fekumi ki he tali ki he ngaahi fehuʻí.

• Fakaafeʻi e fānaú ke nau tā ha ngaahi fakatātā ʻo e ngaahi meʻa ne hoko he ʻAlamā 14:18–29, pea tuku ke nau fakaʻaongaʻi ʻenau ngaahi fakatātaá ke fai e talanoá. ʻE founga fēfē haʻatau hangē ko ʻAlamā mo ʻAmulekí?

• Vahevahe ha aʻusia ʻa ia naʻá ke fakahaaʻi ai e tui ki he ʻEikí peá Ne foaki atu ha mālohi ke ikunaʻi pe kātakiʻi ha faingataʻa. Fakalotolahiʻi e fānaú ke nau vahevahe ha ngaahi aʻusia pehē kuo nau maʻu.

ʻAlamā 15:3–12

ʻE lava ke liliu ʻe he ongoongoleleí e ngaahi lotó.

Naʻe longomoʻui ʻa Sisolome ʻi hono fakafepakiʻi ʻo ʻAlamā mo ʻAmuleki ʻi he kamataʻangá, ka naʻe ongo ʻena fakamoʻoní ki hono lotó pea ueʻi ia ke ne fakatomala. ʻI hoʻo ako e ngaahi veesi ko ʻení, fakakaukau ki he founga ʻe lava ai e aʻusia ʻa Sisolomé ʻo ueʻi e fānau ʻokú ke akoʻí.

Ngaahi ʻEkitivitī ʻe Ala Fakahokó

• Toe vakaiʻi mo e fānaú e meʻa naʻa nau ako he uike kuoʻosí fekauʻaki mo Sisolomé. Lau fakataha e ʻAlamā 15:3–12 ke ʻilo e founga naʻe liliu aí.

• Fakaafeʻi e fānaú ke nau pehē pē naʻa nau fetaulaki mo Sisolome kimuʻa peá ne fakatomalá. Ko e hā e meʻa te nau lea ʻaki ke tokoniʻi ia ke ne tui ki he ongoongoleleí? Te nau lava ʻo fakafehoanaki e meʻa te nau mei lea ʻakí mo e meʻa naʻe akoʻi ʻe ʻAlamā mo ʻAmuleki kia Sisolomé (vakai, ʻAlamā 11:40–46; 15:6–11). Ko e hā e ʻuhinga ʻe lava ʻe hono ʻiloʻi e ngaahi moʻoni ko ʻení ʻo tokoniʻi ha taha ʻokú ne fie maʻu ke liliu?

Poupouʻi e Akó ʻi ʻApi

Fakaafeʻi e fānaú ke nau fakakaukau ki ha meʻa te nau lava ʻo fai he uiké ni ke fakahaaʻi ʻenau tui ki he ʻEikí. Poupouʻi kinautolu ke nau vahevahe ʻenau ngaahi planí mo e aʻusiá mo honau ngaahi fāmilí.

Fakatupulaki ʻEtau Akoʻí

Ako ke ʻiloʻi e fakahaá. “ʻOku faʻa hoko mai e fakahaá ʻi he ‘ʻotu lea ki he ʻotu lea’ (2 Nīfai 28:30kae ʻikai fakaʻangataha pē. … “ʻI hoʻo fakakaukau ki he founga ʻe faitāpuekina ai hoʻo kalasí ʻe he ngaahi tefitoʻi moʻoni ʻo e ongoongoleleí, ʻe haʻu kiate koe ha ngaahi fakakaukau ʻi hoʻo moʻui fakaʻahó—ʻi hoʻo ʻalu ki he ngāué, fai hoʻo ngāue fakaʻapí pe fengāueʻaki mo ho fāmilí mo e kaungāmeʻá” (Faiako ‘i he Founga ‘a e Fakamoʻuí, 12).