13–19 nō Tiurai

Alama 32–35

« E tanu ’outou i teie nei parau i roto i tō ’outou ’ā’au »

E ha’amana’o noa i te mau tamari’i tā ’outou e ha’api’i ra ’a tuatāpapa ai ’outou nā roto i te pure i te Alama 32–35. ’A nā reira ai ’outou, e tae mai te mau ferurira’a ’e te mau ’āehuehu nāhea ’ia ha’api’i ia rātou. Pāpa’i ’e fa’a’ohipa i teie mau ’āehuehu.

Pāpa’i i te mau mana’o e tae mai

Tītau i te mana’o

E tu’u i te i’oa o te tamari’i tāta’itahi i roto i te hō’ē fa’ari’i. E ani i te hō’ē tamari’i ’ia huti mai hō’ē o te mau i’oa, ’e e ani i te reira tamari’i ’ia fa’a’ite mai i te hō’ē mea tāna i ’apo mai i roto i te Buka a Moromona ’aita i maoro a’e nei. E tāmau noa e hope roa atu te mau tamari’i ato’a i te fa’a’ite mai, ’eiaha rā e fa’ahepo i te hō’ē tamari’i ’ia fa’a’ite mai.

Ha’api’i i te ha’api’ira’a tumu : Mau tamari’i ’āpī

Alama 32:28–43

E ti’a iā’u ’ia tauturu i tō’u fa’aro’o ia Iesu Mesia ’ia tupu i te rahi.

Te mau huero, te mau tumu rā’au, ’e te hotu, e mau tao’a mātarohia ’o te nehenehe e tauturu i te mau tamari’i ’ia hāro’aro’a i te mau parau tumu mai te fa’aro’o ’e te ’itera’a pāpū. ’A feruri nāhea ’outou ’ia fa’a’ohipa i te fa’ahōho’ara’a a Alama nō te ha’api’i i te mau tamari’i.

Mau ’ohipa e nehenehe e rave

• Fa’a’ite poto i te Alama 32:28–43 ; e ti’a ia ’outou ’ia fa’a’ohipa « Pene 29 : ’Ua ha’api’i Alama nō ni’a i te fa’aro’o ’e te parau a te Atua » (Te mau ’ā’amu o te Buka a Moromona, 81). E fa’a’ite i te mau hōho’a o te hō’ē rā’au tupu i roto i te mau fāito rau o tōna tupura’a, ’e e ani i te mau tamari’i ’ia tauturu ia ’outou ’ia pānaho i te mau hōho’a nā roto i te ’āna’ira’a tano (hi’o i te mau hōho’a i roto i te ’api ’ohipara’a o teie hepetoma). E fa’ata’a ē, ’a ora ai tātou i te ’evanelia, e tupu tō tātou ’itera’a pāpū i te rahi — mea na’ina’i ’oia ’ia ha’amata mai te hō’ē huero, e nehenehe te reira e rarahi mai te hō’ē tumu rā’au.

• Fa’a’ite i te hō’ē huero i te mau tamari’i, ’e e tai’o atu ia rātou i te tahi mau rēni mātāmua o te Alama 32:28. E parau i te mau tamari’i ē, e au te parau a te Atua mai te hō’ē huero. E ui atu nāhea tātou ’ia tauturu i te hō’ē huero ’ia tupu i te rahi. E vaiiho i te mau tamari’i ’ia fa’ahua tanu i te hō’ē huero, ’ia pipi i te pape, ’e ’ia tauturu ’ia tupu mai te reira. E parau ē, e’ita tātou e ’ite i te huero i muri a’e i tō tātou tanura’a, ’ua ’ite rā tātou ē, tei i’ō nei ’e tē tupu ra te reira ; ’aita ato’a tātou i ’ite i te Metua i te ao ra ’e ia Iesu Mesia, ’ua ’ite rā tātou ē, tē vai mau ra rāua ’e ’ua here rāua ia tātou. E tauturu i te mau tamari’i ’ia feruri i te mau mea e nehenehe rātou e rave nō te tauturu i tō rātou fa’aro’o ia Iesu Mesia ’ia tupu i te rahi.

• E pāpa’i hōho’a i te hō’ē tumu rā’au i ni’a i te tāpura ’ere’ere, ’e e vaiiho i te mau tamari’i ’ia tu’u i te hō’ē rao’ere ’e ’aore rā, i te hō’ē hotu i te mau taime ato’a e feruri rātou i te hō’ē mea tā rātou e nehenehe e rave nō te tauturu i tō rātou fa’aro’o ia Iesu Mesia ’ia tupu i te rahi. E ani ia rātou ’ia rave i te mau ’ohipa ’ōhie ’ei fa’a’itera’a i te mau mea tā rātou i feruri.

Alama 33:2–11; 34:17–27

E fa’aro’o te Metua i te ao ra iā’u ’ia pure ana’e au.

’Ua pure te āti Zorama hō’ē noa taime i te hepetoma, ma te fa’a’ohipa i taua ā mau parau nei i te mau taime ato’a (hi’o Alama 31:22–23). ’Ua ha’api’i Alama ’e o Amuleka ē, e nehenehe tātou e pure i te mau taime ato’a nō tō tātou mau hina’aro i te pae vārua ’e ’aore rā, i te pae tino.

Mau ’ohipa e nehenehe e rave

• E tai’o i te mau pereota tā ’outou i mā’iti i roto i te Alama 33:4–11 ’o tē fa’ata’a nei i te mau vāhi e nehenehe tātou e pure, ’e e tauturu i te mau tamari’i ’ia feruri i te mau vāhi e nehenehe rātou e pure. I muri iho e ani ia rātou ’ia pāpa’i hōho’a ia rātou iho e pure ra i roto i taua mau vāhi ra. E fa’a’ite pāpū ē, e nehenehe rātou e pure i te mau vāhi ato’a, noa atu ē, tē pure ra rātou ma te muhu ’ore.

• E mā’iti i te mau pereota i roto i te Alama 34:17–27 ’o tē fa’ata’a ra i te mau mea tā tātou e nehenehe e pure, ’e e tai’o atu i te reira i te mau tamari’i. E tauturu ia rātou ’ia feruri i te mau mea tā rātou e nehenehe e parau i te Metua i te ao ra ’ia pure ana’e rātou, ’e e ani ia rātou ’ia pāpa’i hōho’a i te reira mau mea. E fa’a’ite pāpū ē, e nehenehe rātou e paraparau i te Metua i te ao ra nō ni’a i te mau mea ato’a tā rātou e feruri ra ’e ’aore rā, tā rātou e ’āehuehu ra. E fa’a’ite i te hō’ē ’itera’a i reira te Metua i te ao ra fa’aro’ora’a i tā ’outou mau pure.

• E hīmene i te hō’ē hīmene ’o tē ha’api’i nei i te mau tamari’i nō ni’a i te pure, mai te « La prière d’un enfant » ’aore rā « Le front baissé »(Chants pour les enfants, 6–7, 18). E tauturu ia rātou ’ia ’ite e aha tā te hīmene e ha’api’i nei nō ni’a i te pure.

Ha’api’i i te ha’api’ira’a tumu : Mau tamari’i pa’ari

Alama 32:1–16, 27–28

’Ia ha’eha’a vau, e nehenehe te Fatu e ha’api’i iā’u.

’Ua manuia Alama ’e o Amuleka i te ha’api’ira’a i te ’āti Zorama tei ha’eha’a ’e tei ineine nō te fa’aro’o i te parau a te Atua. ’A feruri nāhea ’outou ’ia fa’aitoito i te mau tamari’i ’ia mā’iti ’ia fa’a’ite i te ha’eha’a.

Mau ’ohipa e nehenehe e rave

• E ani i te mau tamari’i e aha tā rātou e ha’amana’o ra tā rātou i ’apo mai i te hepetoma i ma’iri nō ni’a i te ’āti Zorama (hi’o Alama 31:8–24). E fa’aha’amana’o ia rātou ē, te tumu hō’ē i ha’ape’ape’a ai Alama nō ni’a ia rātou, nō tō rātou ïa te’ote’o (hi’o Alama 31:24–28). E tai’o ’āmui Alama 32:1–5, ’e e ani i te mau tamari’i ’ia fa’a’ite poto mai i te ’ohipa i tupu i ni’a i te ’āti Zorama veve. I muri iho, e ani i te mau tamari’i ’ia tai’o i te mau ’īrava 12–13 nō te ’ite nō te aha Alama i mana’o ai e mea maita’i te hurira’ahia teie mau ’āti Zorama i rāpae i tō rātou mau sunago (’e ’aore rā, ’ēkālesia). E aha te tahi mau ha’amaita’ira’a e tae mai nā roto i te fa’a’itera’a i te ha’eha’a ?

• E tauturu i te mau tamari’i ’ia ’imi i te hō’ē tātarara’a nō te parau fa’aha’eha’a ’e ’aore rā ha’eha’a i roto i te Arata’i nō te mau pāpa’ira’a mo’a ’e ’aore rā, i te buka fa’atoro parau. E aha te tahi mau tāpa’o nō ni’a i te aura’a o teie mau ta’o e ti’a ia rātou ’ia ’ite i roto i te Alama 32:13–16 ? E ani ia rātou ’ia feruri i te mau rāve’a rau nō te fa’a’ī i te hō’ē pereota mai teie « E vai ha’eha’a vau ’ia ».

Alama 32:26–43

E tupu tō’u ’itera’a pāpū nō Iesu Mesia i te rahi ’a ’atu’atu ai au i te reira.

E tauturu i te mau tamari’i tā ’outou e ha’api’i ra ’ia ’imi e aha tā rātou e nehenehe e rave nō te « tanu » i te parau a te Atua i roto i tō rātou ’ā’au.

Mau ’ohipa e nehenehe e rave

• E fa’a’ite i te hō’ē tao’a pa’ari (mai te hō’ē ’ōfa’i) ’ei fa’ahōho’a i te hō’ē ’ā’au pa’ari ’e ’aore rā, te’ote’o ’e te hō’ē tao’a marū (mai te repo) nō te fa’ahōho’a i te hō’ē ’ā’au marū ’e ’aore rā, ha’eha’a. E vaiiho i te mau tamari’i ’ia tāpe’ape’a i nā tao’a to’opiti. I muri iho e fa’a’ite i te hō’ē huero i te mau tamari’i nō te fa’ahōho’a i te parau a te Atua. E ani ia rātou ’ia tāmata i te tūra’i i te huero i roto i te tao’a pa’ari ’e i roto i te tao’a marū. E tai’o ’āmui i te Alama 32:27–28, ’e e paraparau nō ni’a i te aura’a o te parau ra « i te fāri’i » (’īrava 27) i te parau a te Atua i roto i tō tātou ’ā’au.

• ’A tai’o ’āmui ai ’outou i te Alama 32:26–43, e fa’aea i te tahi taime ’e e ani i te mau tamari’i ’ia pāpa’i i te hō’ē hōho’a o te huero ’e ’aore rā, o te hō’ē rā’au tupu i fa’ata’ahia—’ei hi’ora’a, hō’ē huero ’e hō’ē rā’au tupu ’āpī (’īrava 28), hō’ē rā’au tupu e rarahi ra (’īrava 30), ’e hō’ē rā’au tupu pa’ari e hotu ra (’īrava 37). E fa’aitoito ia rātou ’ia tāpa’o i tā rātou mau hōho’a i te mau fa’ahorora’a nō roto mai i te Alama 32. Nāhea te ’atu’atura’a i te hō’ē huero e fa’aauhia i te ’atu’atura’a i tō tātou ’itera’a pāpū ia Iesu Mesia ? Nāhea tātou i te ’atu’atu i tō tātou ’itera’a pāpū ? E ani i te mau tamari’i ’ia feruri māmū noa i te huru o te tupura’a o tō rātou ’itera’a pāpū ’e e aha tā rātou e rave nō te ’atu’atu i te reira.

Alama 33:2–11 ; 34:17–27

E fa’aro’o te Metua i te ao ra iā’u ’ia pure ana’e au.

E mau mana’o hape tō te mau ’āti Zorama nō ni’a i te pure, ’o tā tātou e ’ite noa nei ā i teie mahana. ’Ua ha’api’i Alama ’e o Amuleka i te mau parau mau pūai nō te upo’oti’a i ni’a i teie mau mana’o hape.

Mau ’ohipa e nehenehe e rave

• Tauturu i te mau tamari’i ’ia ’imi Alama 33:2–11 nō te mau ta’o ’e te mau pereota faufa’a e tū’ati i te pure tei fa’ahiti-fa’ahou-hia. E aha tā teie mau ta’o ’e te mau pereota e ha’api’i nei ia tātou nō ni’a i te pure ?

• Tauturu i te mau tamari’i ’ia hāmani i te hō’ē tāpura nō te mau ’ohipa e tupu nei o tā rātou e ti’a e pure, te tahi mai tei fa’a’itehia i roto i te Alama 33:4–10 ’e te 34:17–27 ’e tae noa atu i te mau ’ohipa e tupu ra i roto i tō rātou orara’a. E ani i te mau tamari’i ’ia feruri ’e ’aore rā, ’ia fa’a’ite mai i te mau ’itera’a ’a pure ai ’e ’a fāri’i ai rātou ē, ’ua pāhono te Atua i tā rātou mau pure.

Fa’aitoito i te ha’api’ira’a mai i te fare

Mai te peu e nehenehe, e hōro’a i te tamari’i tāta’itahi i te mau huero e hōpoi i te fare ’e ’ia tanu nō te fa’aha’amana’o ia rātou ’ia tauturu i tō rātou ’itera’a pāpū ia Iesu ’ia tupu i te rahi. E fa’aitoito ia rātou ’ia parau i tō rātou ’utuāfare e aha tā rātou i ’apo mai nō ni’a i te fa’a’ohipara’a i tō rātou fa’aro’o ia Iesu Mesia.

Haʼamaitaʼiraʼa i tā tātou haʼapiʼiraʼa

E fa’a’ite pāpū nō te mau ha’amaita’ira’a i fafauhia mai. ’Ia ani ana’e ’outou i te mau tamari’i ’ia ora i te hō’ē parau tumu o te ’evanelia, e parau ia rātou nō te mau fafaura’a a te Atua i te feiā e ora i te reira parau tumu (hi’o Te ha’api’ira’a mai tā te Fa’aora, 35).