Faʼahōhoʼaraʼa nā Joshua Dennis

20–26 nō Tiurai

Alama 36–38

« E hi’o i te Atua, e ora »

’A tuatāpapa ai ’outou nā roto i te pure i te Alama 36–38, e tae mai paha te mau mana’o i roto ia ’outou nō ni’a i te mau tamari’i tā ’outou e ha’api’i ra. E pāpa’i i te reira mau mana’o ; e nehenehe te reira e hōro’a mai i te mau mana’o nō te mau ’ohipa ’apora’a mai.

Pāpa’i i te mau mana’o e tae mai

Tītau i te mana’o

E ani i te mau tamari’i ato’a ’ia fa’a’ite mai i te hō’ē mea tā tō rātou mau metua i ha’api’i ia rātou. E ui atu ia rātou, ’ua ’ite ānei rātou e aha tā Alama i ha’api’i i tāna mau tamaiti.

Ha’api’i i te ha’api’ira’a tumu : Mau tamari’i ’āpī

Alama 36:6, 20, 24

E hōro’a mai te tātarahapa i te ’oa’oa iā’u.

Te ha’api’ira’a i te mau tamari’i nō ni’a i te ’oa’oa o te tātarahapa i tō rātou ’āpīra’a, e nehenehe te reira e fa’auru ia rātou ’ia tātarahapa ’a haere ai rātou i te pa’arira’a.

Mau ’ohipa e nehenehe e rave

• E tai’o i te Alama 36:20 i te mau tamari’i, ’e e ui ia rātou ’ia fa’aro’o e aha te mana’o o Alama. E ani ia rātou ’ia fa’a’ite mai i te tahi mau mea ’o tē hōro’a mai i te ’oa’oa ia rātou. E fa’a’ite i te hō’ē hōho’a o te Fa’aora, ’e e fa’ata’a ē, ’ua tupu te ’oa’oa i roto ia Alama nō te mea ’ua fa’a’ore Iesu Mesia i tāna mau hara.

• E hōro’a i te mau tamari’i tāta’itahi i te hō’ē ’āpī parau ’e te hō’ē hōho’a mata ’oa’oa i ni’a i te hō’ē pae, ’e hō’ē hōho’a mata ’oto i te tahi pae. E ani ia rātou ’ia fa’aro’o ’a tai’o ai ’outou i te Alama 36:6, ’e ’ia mā’iti e aha te hōho’a mata tā rātou e ’āfa’i i ni’a. E fa’ata’a ē, ’ua tātarahapa o Alama ’e ’ua fāri’i i te ’oa’oa nō te mea ’ua fa’a’ore Iesu Mesia i tāna hapa nō te ravera’a i te mau mā’itira’a ’ino. E ani i te mau tamari’i ’ia fa’aro’o ’a tai’o ai ’outou i te Alama 36:24 nō ni’a i te mau mā’itira’a maita’i tāna i rave i muri a’e ’e ’ia ’āfa’i te hōho’a mata tano i ni’a.

• E hīmene ’āmui i te hō’ē hīmene nō ni’a ia Iesu Mesia, mai te « Il envoya son fils aimé » (Chants pour les enfants,20–21). E fa’a’ite i tō ’outou ’itera’a pāpū ē, ’ua haere mai Iesu i te fenua nei nō te fa’aora ia tātou i te hara ’e nō te hōro’a i te ’oa’oa ia tātou.

Alama 37:6–7

« Nā roto i te mau mea iti ’e tē pāpū ra e fa’atupuhia ai te mau mea rarahi ».

Nāhea e nehenehe ai ia ’outou ’ia ha’api’i i te mau tamari’i ’ia ’ite ē, e fa’a’ohipa te Fatu i te mau mea iti ’e ’aore rā, ’ōhie nō te fa’atupu i tāna ’ohipa ?

Mau ’ohipa e nehenehe e rave

• E tai’o Alama 37:6–7, ’e e ani i te mau tamari’i ’ia pi’o i raro i te mau taime ato’a e tai’o ’outou i te ta’o ra « ha’iha’i ». E fa’a’ite atu ia rātou i te hō’ē mea iti ha’iha’i ’o te nehenehe e fa’atupu i te mau mea rarahi ’e ’aore rā e fa’atere i te mau mea rarahi, mai te putu uira [batterie] ’e ’aore rā, te hō’ē tāviri pere’o’o. E aha te mau mea rarahi e tupu ’e ’aore rā, e tere nō teie mau mea ha’iha’i ? E tauturu i te mau tamari’i ’ia feruri i te tahi mau mea ha’iha’i ’e ’aore rā, ’ōhie tā te Atua e hina’aro ’ia rave tātou. E aha te mau mea rarahi e nehenehe e tupu nō teie mau fa’auera’a ha’iha’i ’e ’aore rā, ’ōhie ?

• E fa’a’ite atu i te hō’ē hōho’a ’e ’aore rā, e piti, nō te mau mea ha’iha’i ’o te ha’aputu i te mau mea rarahi, mai te matie ri’i ’e hō’ē ’āua, ’e ’aore rā, hō’ē tōpata ua ’e te hō’ē roto pape. E fa’a’ite pāpū ē, noa atu te ha’iha’i ’e te ’ōhie o te ’ohipa, e nehenehe te reira e fa’atupu i te hō’ē ta’a-’ē-ra’a rahi i roto i tō tātou orara’a ’e i roto i te orara’a o vetahi ’ē. E fa’aitoito i te mau tamari’i ’ia paraparau nō ni’a i te tahi mau ’ohipa ’ōhie ’e te maita’i tā rātou e rave i te mau mahana ato’a, ’e ’aore rā, ’a fa’a’ite atu i tō ’outou iho mau ’itera’a. E ani i te mau tamari’i ’ia rave hō’ē mea ’ōhie ’e te maita’i tā rātou e nehenehe e rave i teie hepetoma ’e, ’ia pāpa’i i te hō’ē hōho’a nō rātou iho tē rave ra i te reira. E ani ia rātou ’ia ’āfa’i i tā rātou mau hōho’a i te fare ’e ’ia fa’a’ite i te reira i tō rātou ’utuāfare.

Alama 37:38–47

E nehenehe te mau pāpa’ira’a mo’a e tauturu ia tātou i te mau mahana ato’a.

Noa atu ē, e rave rahi mau tamari’i ri’i ’aita e tai’o ra, e nehenehe ’outou e tauturu ia rātou ’ia noa’a te hō’ē ’itera’a pāpū nō te mana o te mau pāpa’ira’a mo’a nō te arata’i i tō rātou orara’a i te mau mahana ato’a.

Mau ’ohipa e nehenehe e rave

• E fa’a’ite i te hō’ē hōho’a o te Liahona (mai te Buka hōho’a o te ’evanelia, nūmera 68), ’e ’aore rā, e ani i te mau tamari’i ’ia pāpa’i hōho’a hō’ē ’a fa’a’ite ai rātou i te mea tā rātou e ha’amana’o ra nō ni’a i te reira (hi’o 1 Nephi 16:10, 28–29). E ’āfa’i i te mau pāpa’ira’a mo’a i ni’a, ’e e ani i te mau tamari’i ’ia fa’a’ite nāhea te mau pāpa’ira’a mo’a e riro ai mai te Liahona. E fa’a’ohipa Alama 37:38–47 ’e te ’api ’ohipara’a nō teie hepetoma nō te ’āmui atu i teie ’āparaura’a.

• E hīmene ’āmui i te hō’ē hīmene nō ni’a iho i te tuatāpapara’a i te pāpa’ira’a mo’a, mai te « Quand je lis l’écriture sainte » ’e ’aore rā, « ’Ia tai’o vau i te parau mo’a » (Chants pour les enfants, 66 ; Te mau hīmene, nūmera 169). E aha te mau ha’amaita’ira’a nō te tuatāpapara’a i te pāpa’ira’a mo’a i fa’ahitihia i roto i te hīmene ?

  

  E ha’api’i te mau pāpa’ira’a mo’a ia tātou nāhea ’ia pe’e i te Atua.

Ha’api’i i te ha’api’ira’a tumu : Mau tamari’i pa’ari

Alama 36

E nehenehe au e « fānau-vārua-hia i tā te Atua ra » ’ia pe’e au ia Iesu ’e ’ia tātarahapa i tā’u mau hara.

« Te fa’afāriura’a… ’o te hō’ē ïa tauira’a i roto i tō tātou huru mau. E tauira’a rahi mau i parau ai te Fatu ’e tōna mau peropheta i te reira mai te hō’ē fānau-fa’ahou-ra’a ».

Mau ’ohipa e nehenehe e rave

• E hi’o fa’ahou ’e te mau tamari’i i te ’ā’amu o te fa’afāriura’a o Alama tamaiti i roto i te Alama 36:6–21. E pāpa’i i ni’a i te mau tuha’a ’api parau te mau ta’o ’e te mau pereota nō roto mai i teie mau ’īrava ’o tē fa’a’ite ra i te mea tā Alama i fāri’i, ’e e tu’u i te reira i ni’a i te tāpura ’ere’ere. E ani i te mau tamari’i ’ia fa’ata’a i te mau ’api parau nā roto e piti ’āpapara’a : te mau mea tā Alama i fāri’i hou ’oia ’a ha’amana’o ai i te mau mea tā tōna metua tāne i ha’api’i nō ni’a i te Fa’aora, ’e te mau mea tāna i fāri’i i muri a’e i tōna ha’amana’ora’a. E tai’o ’āmui Alama 36:17–20, ’e e fa’a’ite pāpū i te mau tamari’i ē, e fa’a’ore Iesu Mesia i tā tātou mau hapa ’ia tātarahapa ana’e tātou.

• E pāpa’i fānau-vārua-hia i tā te Atua ra ’e te mau fa’ahorora’a pāpa’ira’a mo’a i muri nei i ni’a i te tāpura ’ere’ere : 1 Ioane 4:7; Mosia 5:7; 27:25–26; Alama 5:14; 22:15. E tauturu i te mau tamari’i ’ia tai’o i te mau ’īrava ’e ’ia ’imi i te mau pereota e fa’ata’a ra i te aura’a o te parau fānau-vārua-hia i tā te Atua ra. E aha tā te hō’ē ta’ata e rave i muri a’e i tōna fānau-vārua-ra’a-hia i tā te Atua ra ? Nāhea tātou e fa’a’ite ai ē, ’ua fānau-vārua-hia tātou i tā te Atua ra ?

Alama 37:6–9, 38–47

« Nā roto i te mau mea iti ’e tē pāpū ra e fa’atupuhia ai te mau mea rarahi ».

E tauturu i te mau tamari’i tā ’outou e ha’api’i ra ’ia ’ite ē, te tai’ora’a i te mau pāpa’ira’a mo’a noa atu e taime poto roa i te mau mahana ato’a, e hōro’a mai te reira i te mau ha’amaita’ira’a rahi.

Mau ’ohipa e nehenehe e rave

• E pāpa’i hōho’a ’e ’aore rā, e fa’a’ite i te hō’ē pātete. E hia rahira’a topata pape e ’ī ai te pātete ? E tauturu i te mau tamari’i ’ia ’ite ē, e tītauhia e rave rahi topata pape nō te fa’a’ī i te pātete. E aha tō teie tū’atira’a i te Alama 37:6–7 ? Nāhea te tai’ora’a i te mau pāpa’ira’a mo’a e au ai i te tu’ura’a i te topata iti pape i roto i te hō’ē pātete ?

• E ani i te mau tamari’i ’ia ’imi i roto i te Alama 37:6–9 i te mau ha’amaita’ira’a e roa’a nā roto mai i te « mau parau », ’e ’aore rā te mau pāpa’ira’a mo’a. ’Ei piha ha’api’ira’a, e hāmani i te hō’ē tāpura nō te mau mea tei ’itehia ia rātou. Nāhea te tai’ora’a i te mau pāpa’ira’a mo’a i te ha’amaita’ira’a i tō tātou orara’a ? E fa’a’ite atu i tō ’outou ’itera’a pāpū nō ni’a i te mau pāpa’ira’a mo’a, ’e e fa’aitoito i te mau tamari’i ’ia nā reira ato’a.

• E fa’a’ite i te hō’ē hōho’a o te Liahona (mai te Buka hōho’a o te ’evanelia, nūmera 68), ’e e ani i te mau tamari’i ’ia hi’o fa’ahou e aha tā rātou e ha’amana’o ra nō ni’a i te Liahona i roto i te 1 Nephi 16:10, 28. Tauturu i te mau tamari’i ’ia tai’o i te Alama 37:38–42. Nāhea te Liahona ’ia ’ohipa ? Nāhea te reira e tū ai i te terera’a o te mau pāpa’ira’a mo’a ? E tai’o ’āmui i te ’īrava 43–47 nō te tauturu i te pāhono i teie uira’a. E ani i te mau tamari’i ’ia fa’a’ī i te ’api ’ohipara’a ’ei tuha’a nō teie ’ohipara’a.

Fa’aitoito i te ha’api’ira’a mai i te fare

E fa’aitoito i te mau tamari’i ’ia fa’a’ite mai i te hō’ē tumu, tē māuruuru nei rātou nō te mau pāpa’ira’a mo’a, ’e ’ia ani i te mau melo o tō rātou ’utuāfare ’ia nā reira ato’a.

Haʼamaitaʼiraʼa i tā tātou haʼapiʼiraʼa

E tauturu i te mau tamari’i ’ia riro ’ei mau pīahi maita’i a’e. Tā ʼoutou fā i roto i te haʼapiʼiraʼa i te mau tamariʼi e ʼere i te hōroʼa-noa-raʼa i te parau mau ia rātou. E tiʼa atoʼa ia ʼoutou ’ia tauturu ia rātou ’ia riro ʼei mau ta’ata ’imi i te parau mau nā roto ia rātou iho. ’Ei hi’ora’a, ’eiaha e parau noa i te mau tamari’i i te mau parau mau e ’itehia i roto i te ’ā’amu o te fa’afāriura’a o Alama, e nehenehe ’outou e fa’anaho i te mau ’ohipara’a i reira rātou e ’ite ai nā roto ia rātou iho i te mau parau mau i roto i te ’ā’amu.