« 29 nō Tiunu–5 nō Tiurai. Alama 23–29 : ’Aita roa atura rātou i tāiva’ », Mai, pe’e mai—nō te Paraimere : Buka a Moromona 2020 (2020)
« 29 nō Tiunu–5 nō Tiurai. Alama 23–29 », Mai, pe’e mai—nō te Paraimere : 2020
Mau Aniti-Nephi-Lehi e huna ra i tā rātou mau mauiha’a tama’i, nā Jody Livingston
29 nō Tiunu–5 nō Tiurai
Alama 23–29
« ’Aita roa atura rātou i tāiva »
E tuatāpapa nā roto i te pure i te Alama 23–29, ma te ’imi i te fa’aurura’a nō ni’a i te mau mea tā te mau tamari’i e hina’aro, ’e nāhea ’ia tauturu ia rātou.
Pāpa’i i te mau mana’o e tae mai
Tītau i te mana’o
E pāpa’i i te hō’ē hōho’a mata ’oa’oa i ni’a i te hō’ē ’api parau, ’e e vaiiho i te mau tamari’i tāta’itahi ’ia tāpe’a i te reira. ’A tāpe’a ai rātou i te ’api parau, e ani ia rātou ’ia fa’a’ite mai i te hō’ē mea tā rātou e ’apo mai nei i roto i te Buka a Moromona o te hōro’a mai i te ’oa’oa ia rātou.
Ha’api’i i te ha’api’ira’a tumu : Mau tamari’i ’āpī
E ha’amaita’ihia vau ’ia ha’apa’o ana’e au i tā’u mau fafaura’a.
E aha tā ’outou i ’apo mai i roto i tā ’outou tuatāpapara’a i te Alama 24:6–24 o te nehenehe e tauturu i te mau tamari’i ’ia hāro’aro’a i te faufa’a o te ha’apa’ora’a i te hō’ē fafaura’a ti’a ?
Mau ’ohipa e nehenehe e rave
-
E tai’o i te tahi mau ’īrava ’e ’aore rā, mau pereota i roto i te Alama 24:6–24 nō te ha’api’i i te mau tamari’i nō ni’a i te mau Aniti-Nephi-Lehi, te fafaura’a tā rātou i rave, ’e e mea nāhea tō rātou ha’apa’ora’a i te fafaura’a. E nehenehe ato’a ’outou e fa’a’ohipa i te hōho’a i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’e ’aore rā, « Pene 26 : Te nuna’a o Amona » (Te mau ’ā’amu o te Buka a Moromona, 73–74).
-
E fa’ata’a e mea nāhea tō te mau Aniti-Nephi-Lehi tāpe’ara’a i tā rātou fafaura’a ma te hunara’a i tā rātou mau mauiha’a tama’i. E ani i te mau tamari’i ’ia pāpa’i i te hōho’a o te hō’ē ’o’e ’e i muri iho, e fa’ahua e ’ō i te hō’ē ’āpo’o ’e e huna i tā rātou ’o’e. E tauturu i te mau tamari’i ’ia feruri i te mau fafaura’a tā rātou e rave. Nō te aha e mea faufa’a ’ia tāpe’a i te mau fafaura’a ? E fa’ata’a ē, ’ia bāpetizo-ana’e-hia tātou, tē fafau ra tātou ’e te Atua ’e e fafau mai ’oia ’e o tātou. E parauhia te reira e mau fafaura’a. E fa’a’ite pāpū ē, e ha’amaita’ihia tātou ’ia tāpe’a ana’e tātou i tā tātou mau fafaura’a ’e te Atua.
E hōro’a mai te ’evanelia i te ’oa’oa iā’u, ’e e nehenehe au e fa’a’ite i te reira ’oa’oa ia vetahi ’ē.
Amona, tei tauturu i te ha’api’ira’a i te ’evanelia i te mau Aniti-Nephi-Lehi, ’ua fāri’i i te ’oa’oa rahi nō te porora’a i te ’evanelia. Alama, tei ha’api’i ato’a i te ’evanelia i te mau ta’ata e rave rahi, ’ua fāri’i ato’a i taua ’oa’oa ra. E nehenehe tātou e ’ite i taua ā ’oa’oa ra ’ia fa’a’ite ana’e tātou i tō tātou ’itera’a pāpū ia vetahi ’ē.
Mau ’ohipa e nehenehe e rave
-
E mā’iti i te tahi mau pereota i roto i te Alama 26 ’e ’aore rā 29 ’o tē parau ra nō te ’oa’oa, ’e e tai’o atu i te reira i te mau tamari’i (hi’o, ’ei hi’ora’a, Alama 26:11, 13 ’e ’aore rā, Alama 29:13–14). E ani i te mau tamari’i ’ia ti’a mai i ni’a i te mau taime ato’a e fa’aro’o rātou i te ta’o « ’oa’oa ». E tauturu i te mau tamari’i ’ia hāro’aro’a ē, ’ua ’oa’oa o Alama ’e o Amona i te fa’a’itera’a i te ’evanelia. E fa’a’ite atu i te hō’ē ’itera’a i te taime ’a fa’atupu ai te fa’a’itera’a i te ’evanelia i te ’oa’oa i roto ia ’outou.
-
E ani i te mau tamari’i ’ia pāpa’i i te mau hōho’a nō te mau mea e hōro’a mai i te ’oa’oa ia rātou. E ani i te tamari’i tāta’itahi ’ia hōro’a i tāna hōho’a pāpa’i i te tahi atu tamari’i ’e ’ia fa’ata’a i te reira. E ha’apāpū ē, ’ia hōro’a ana’e mai hō’ē mea i te ’oa’oa ia tātou — mai te ’evanelia — e tupu tō tātou ’oa’oa i te rahi ’ia fa’a’ite ana’e tātou i te reira.
-
E hōro’a i te hō’ē Buka a Moromona i te hō’ē tamari’i, ’e e fa’aue iāna ’ia ha’api’i i te fa’a’ite i te reira i te tahi atu tamari’i o te piha ha’api’ira’a. E fa’aitoito i te mau tamari’i ’ia fa’ata’a e aha tō rātou mana’o nō ni’a i te Buka a Moromona. Nō te aha tātou e fa’a’ite ai i te Buka a Moromona ia vetahi ’ē ?
E nehenehe au e tauturu i tō’u mau hoa ’ia ora i te ’evanelia.
’Ua pāruru te ’āti Nephi i te mau Aniti-Nephi-Lehi i tō rātou mau ’enemi ’e ’ua tauturu ia rātou ’ia tāpe’a i te mau fafaura’a tā rātou i rave i te Fatu.
Mau ’ohipa e nehenehe e rave
-
E fa’ati’a i te mau tamari’i te ’ā’amu o te mau Aniti-Nephi-Lehi i te ravera’a i te hō’ē fafaura’a ’eiaha e ’aro fa’ahou (hi’o Alama 27:20–30). E fa’ata’a ē, nō te fafaura’a a te mau Aniti-Nephi-Lehi, ’aita i ti’a ia rātou ’ia pāruru ia rātou iho i tō rātou mau ’enemi. E tai’o Alama 27:23, ’e e fa’ata’a ē, ’ua mā’iti tō rātou mau hoa i roto i te mau ’āti Nephi ’ia pāruru i te mau Aniti-Nephi-Lehi ’ia nehenehe ia rātou ’ia tāpe’a i tā rātou fafaura’a. Nāhea e ti’a ai ia tātou ’ia tauturu i tō tātou mau hoa ’ia tāpe’a i tā rātou fafaura’a ? E fa’ati’a i te hō’ē taime ’ua tauturu mai te hō’ē hoa ia ’outou ’ia tāpe’a i tā ’outou fafaura’a i te Atua.
-
E ha’uti ta’ata ora ’e te mau tamari’i i te tahi mau hi’ora’a i reira e ti’a ai ia rātou, ma te rāve’a marū, ’ia tauturu ia vetahi ’ē ’ia mā’iti i te parau-ti’a. ’Ei hi’ora’a, e aha te ti’a ia tātou ’ia parau i te hō’ē hoa ’o tē hina’aro nei e ha’avare ’e ’aore rā, e fa’a’ite i te huru ’ino ?
Ha’api’i i te ha’api’ira’a tumu : Mau tamari’i pa’ari
Te mau fafaura’a ’o te mau parau fafau ïa tā’u e rave ’e te Atua ’e tāna e rave ’e o vau.
’Ua huna te mau Aniti-Nephi-Lehi i tā rātou mau mauiha’a tama’i ’e ’ua fafau e ’ore roa rātou e taparahi pohe fa’ahou. ’Oia ato’a te mau tamari’i tā ’outou e ha’api’i nei, e nehenehe rātou e tāpe’a i tā rātou mau fafaura’a.
Mau ’ohipa e nehenehe e rave
-
E hōro’a i te mau ’ōfa’i na’ina’i i te mau tamari’i ato’a, ’e e ani ia rātou ’ia pāpa’i i ni’a i te ’ōfa’i i te ta’o ra fafaura’a. E fa’ata’a ē, te hō’ē fafaura’a ’o te hō’ē ïa parau fafau i rotopū i te Metua i te ao ra ’e tāna mau tamari’i. Nāhea tā tātou mau fafaura’a e ha’apūai ai ia tātou ’e ’aore rā, e « ’āueue ’ore » ai mai te hō’ē ’ōfa’i ? (Alama 24:19). E tai’o ’āmui i te Alama 24:16–25 nō te ’apo mai e aha te fafaura’a tā te nuna’a o Amona i rave ’e mea nāhea tō rātou fa’aturara’a i tā rātou fafaura’a. E ani i te mau tamari’i ’ia ’āfa’i i te mau ōfa’i i te fare ’ei fa’aha’amana’ora’a ’ia tāpe’a i tā rātou mau fafaura’a.
-
E tai’o ’e te mau tamari’i i te Alama 24:16–19, ’e e ’āparau e aha tā te mau Aniti-Nephi-Lehi i rave nō te fa’a’ite i te Atua ’ua tātarahapa rātou. E aha tā rātou i fafau e’ita rātou e rave ? E fa’ata’a ē, te mau fafaura’a tā tātou i rave, ’o te hō’ē ïa « fa’a’itera’a pāpū i te Atua » ē, tē hina’aro nei tātou e pe’e i te mau fa’auera’a a te Atua (’īrava 18). E aha te mau fafaura’a tā te mau tamari’i i rave ?
-
E ani i te mau tamari’i ’ia pāpa’i i te mau hōho’a o te mau mauiha’a tama’i a te mau Aniti-Nephi-Lehi. I muri iho, e ani ia rātou ’ia pāpa’i i te pae i muri o te mau mauiha’a, i te hō’ē mea tā rātou e mana’o ra, e ti’a ia rātou ’ia taui nō te pe’e maita’i a’e ia Iesu Mesia. E vaiiho ia rātou ’ia fa’ahua huna i tā rātou mau mauiha’a ’e ’ia rave i te hō’ē fa’anahora’a nō te ha’a i ni’a i te mea tā rātou i pāpa’i.
Alama 24:7–10; 26: 23–34; 27: 27–30
Nō te aroha o te Metua i te ao ra, e nehenehe tātou e tātarahapa ’e e taui.
’Aita i maoro a’e nei ’ua ’apo mai te mau tamari’i nō ni’a ia Alama, ia Amona, ’e te mau Aniti-Nephi-Lehi. Nāhea ’outou i te fa’a’ohipa i te reira mau ’ā’amu nō te fa’ahōho’a, e aroha tō te Metua i te ao ra nō te feiā e tātarahapa ma te ’ā’au tae mau ?
Mau ’ohipa e nehenehe e rave
-
E pāpa’i nā mua a’e ’e i muri a’e i ni’a i te tāpura ’ere’ere. E ani i te tahi mau tamari’i ’ia tai’o i te mau ’īrava i muri nei nō te ’ite mai, e aha te huru o te mau ’āti Lamana nā mua a’e ’a ha’api’i ai Amona ’e tōna mau taea’e ia rātou : Alama 17:14–15; 26: 23–24. E ani i te tahi atu mau tamari’i ’ia tai’o i te mau ’īrava i muri nei nō te ’ite mai, e mea nāhea te mau ’āti Lamana i te tauira’a : Alama 26: 31–34; 27: 27–30. E ani i te mau tamari’i ’ia tāpura i raro a’e i te mau tumu parau i te mau mea tei ’itehia mai ia rātou. I muri iho e ani ia rātou ’ia ’imi mai i roto i te Alama 24:7–10, nāhea i ti’a ai i teie mau ’āti Lamana ’ia taui hope roa. E fa’a’ite i tō ’outou ’itera’a pāpū nō ni’a i te mana o te Atua nō te fa’a’ore i tā tātou mau hara ’e ’ia tauturu ia tātou ’ia tātarahapa ’e ’ia taui.
-
E ani i te mau tamari’i ’ia tai’o ’āmui Alama 26:21–22, ma te ’imi i te mau ha’amaita’ira’a o te tae mai i te feiā e tātarahapa. E ani i te mau tamari’i ’ia fa’ata’a mai i te tahi o teie mau ha’amaita’ira’a i roto i tā rātou iho mau parau.
E hōro’a mai te ’evanelia i te ’oa’oa iā’u, ’e e nehenehe au e fa’a’ite i te reira ’oa’oa ia vetahi ’ē.
’Ua ’ī teie nā pene i te mau hi’ora’a o te ’oa’oa e tae mai nā roto i te orara’a ’e te fa’a’itera’a i te ’evanelia. Nāhea e ti’a ai ia ’outou ’ia fa’a’ohipa i te Alama 26 ’e te 29 nō te fa’auru i te mau tamari’i ’ia ’imi i te reira ’oa’oa ?
Mau ’ohipa e nehenehe e rave
-
E tauturu i te mau tamari’i ’ia ’ite mai i te mau ta’o « ’oa’oa » ’e « fa’a’oa’oa » i roto i te Alama 26 ’e te 29. E tai’o ’āmui i te tahi o te mau ’īrava tei ’itehia ia rātou, ’e e ’āparau e aha tā teie mau ’īrava e ha’api’i nei nō ni’a i te ’oa’oa. E aha te mea i hōpoi mai i te ’oa’oa ia Amona ’e ia Alama ? E fa’a’ite i te hō’ē ’itera’a nō te taime ’a ’ite ai ’outou i te ’oa’oa nō te orara’a ’e ’aore rā, te fa’a’itera’a i te ’evanelia, ’e ’aore rā, e ani i te mau tamari’i ’ia fa’a’ite mai i tō rātou iho ’itera’a.
-
E ani e piti tamari’i ’ia fāriu te tahi i ni’a i te tahi ’e ’ia ’ite o vai te nehenehe e fa’a’ata i te tahi tamari’i nā mua. E aha te tahi mau rāve’a e ti’a ia tātou ’ia ha’aparare i te ’oa’oa i roto ia vetahi ’ē ? Nāhea te fa’a’itera’a i te ’evanelia i te ha’aparare i te ’oa’oa ? E tauturu i te mau tamari’i ’ia feruri i te mau rāve’a tā rātou e ti’a ’ia fa’a’ite i te ’oa’oa o te ’evanelia i tō rātou mau hoa ’e te ’utuāfare.
Fa’aitoito i te ha’api’ira’a mai i te fare
E ani i te mau tamari’i ’ia tāpe’a i tā rātou mau fafaura’a mai tā te mau Aniti-Nephi-Lehi i rave.
Ha’amaita’ira’a i tā tātou ha’api’ira’a
’Apo mai i te hō’ē pāpa’ira’a mo’a. E mā’iti i te hō’ē pereota o te pāpa’ira’a mo’a ’e ’aore rā, i te hō’ē tuha’a parau tā ’outou i feruri, e nehenehe e tauturu i te mau tamari’i i roto i tā ’outou piha ha’api’ira’a, ’e e tauturu ia rātou ’ia tāmau ’ā’au i te reira. E nehenehe ato’a te mau rāve’a ’ite-mata-hia ’e te ’aparimara’a e tauturu.