« 29 nō Tiunu–5 nō Tiurai. Alama 23–29 : ‘’Aita roa atura rātou i tāiva’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
29 nō Tiunu–5 nō Tiurai. Alama 23–29 », Mai, pe’e mai—nō te ta’ata hō’ē ’e te ’utuāfare : 2020
Aniti-Nephi-Lehi e huna i tā rātou mau mauiha’a tama’i, nā Jody Livingston
29 nō Tiunu–5 nō Tiurai.
Alama 23–29
« ’Aita roa atura rātou i tāiva »
’A tuatāpapa ai ’outou i te Alama 23–29, e aha te mau poro’i tā ’outou e ’apo mai nei nō ’outou iho ’e nō tō ’outou ’utuāfare ? E aha te mea tā ’outou e nehenehe e fa’a’ite i roto i te piha ha’api’ira’a ?
Pāpa’i i te mau mana’o e tae mai
Tē uiui nei ānei tō ’outou mana’o i te tahi taime ē, e ti’a mau ānei i te ta’ata ’ia taui ? Penei a’e tē ha’ape’ape’a nei ’outou ē, e ti’a ānei ia ’outou ’ia upo’oti’a i ni’a i te mau mā’itira’a hape ’aore rā te mau peu hape tā ’outou i fa’atupu, ’aore rā tē ha’ape’ape’a nei ’outou i te reira nō te tahi ta’ata tā ’outou i here. ’O te reira ānei ra, e ti’a i te ’ā’amu o te mau Aniti-Nephi-Lehi e tauturu ia ’outou. E mau ’enemi pāpū teie mau ta’ata nō te mau ’āti Nephi. I te fa’aotira’a Amona ’e tōna nau taea’e e poro i te ’evanelia ia rātou, ’ua « tāhitohito [te mau ’āti Nephi ia rātou] ». E au ē, ’o te taparahi-pohe-ra’a i te ’āti Lamana te rāve’a maita’i a’e ’eiaha rā te fa’afāriura’a mai ia rātou. (Hi’o Alama 26:23–25.)
’Ua taui roa maira te mau ’āti Lamana—nā roto i te mana fa’afāriu o te Fatu. Nā mua a’e rātou, e mea « ’eta’eta ’e te taehae ra » (Alama 17:14), ’ua riro mai rā ’ei ta’ata « ’ua ’itea-ato’a-hia rātou nō tā rātou itoito i tā te Atua » (Alama 27:27). ’Oia mau, « ’aita roa atura rātou i taivā » (Alama 23:6).
Penei a’e tē vai ra te tahi mau peu hape e fa’aru’e ’aore rā e mau « mauha’a tama’i » e fa’aru’e atu (Alama 23:7). Penei a’e tītau-noa-hia ’ia itoito atu ā ’outou i roto i tō ’outou ’itera’a pāpū ’e fa’aea ri’i mai i te fa’aātea ’ē atu ia ’outou. Ta’a ’ē noa atu te mau tauira’a i tītauhia, e ti’a i te Alama 23–29 ’ia hōro’a mai i te tīa’ira’a ē, nā roto i te mana tāra’ehara a Iesu Mesia e ti’a ai te tauira’a vai maoro ’ia tupu.
Mau mana’o nō tā ’oe iho tuatāpapara’a pāpa’ira’a mo’a
’Ia fāri’i ana’e te mau tamari’i a te Atua i te ’evanelia, e mau ha’amaita’ira’a rahi te tae mai.
I te fa’auera’a te ari’i o te ’āti Lamana i tōna mau ta’ata ē, ’eiaha te parau a te Atua « ’ia pāto’ihia » (hi’o Alama 23:1–5), ’ua ha’amatara ’oia i te mau ha’amaita’ira’a rahi ia rātou. ’Ia tai’o ’oe i te Alama 23–29, e ’imi i te reira mau ha’amaita’ira’a. Nāhea ’oe i te hi’o maita’i ē, ’eiaha te parau a te Atua « ’ia pāto’ihia » i roto i tō ’oe orara’a ’aore rā i roto i tō ’oe ’utuāfare ?
Nā roto i tō’u fa’afāriura’a ia Iesu Mesia ’e i tāna ’evanelia, ’ua taui tō’u orara’a.
’Ia hi’ohia, e au ē, e’ita te mau ’āti Lamana tā Amona ’e tōna mau taea’e i haere atu e nehenehe e fa’afāriuhia—’ua mau roa rātou i roto i te mau peu a tō rātou nau metua ’e i roto i tō rātou iho ’ino. E rave rahi rā o rātou tei fāri’i i te ’evanelia a Iesu Mesia ’e tei rave i te mau tauira’a rahi i roto i tō rātou orara’a. ’Ei tāpa’o nō tō rātou fa’afāriura’a, ’ua pi’i teie mau ’āti Lamana ia rātou ’ei Aniti-Nephi-Lehi. (Te aura’a o te parau « aniti » i’ō nei e ’ere hō’ē ā ’e te « aneti » i roto i te parau « aneti Mesia »)
’Ia feruri ’oe i te fa’afāriura’a o teie mau ’āti Lamana, e feruri ato’a paha ’oe i tō ’oe iho fa’afāriura’a « i te Fatu » (Alama 23:6). Hō’ē rāve’a nō te tuatāpapa i teie mau pene, ’o te hi’ora’a ïa nāhea te fa’afāriura’a o te mau Aniti-Nephi-Lehi i taui i tō rātou orara’a. E nehenehe e ha’amata nā ni’a i teie mau ’īrava i muri nei.
’Ia feruri ’oe i te mau tauira’a i ni’a i te mau Aniti-Nephi-Lehi, ’a feruri ato’a i te huru tō ’oe iho fa’afāriura’a i te Mesia e taui nei ia ’oe. ’Ia mana’o ’oe, e aha te mea e toe ra ’ia taui ’ia pūai atu ā te mana o te ’evanelia i roto i tō ’oe orara’a ?
E mea aroha te Atua ia tātou.
Noa atu te ta’a ’ē o te mau hara tā Amona ’e te mau Aniti-Nephi-Lehi i ’aro ’e te mau mea i roto i tō ’oe orara’a, tātou pā’āto’a e tūru’i nei i ni’a i te aroha o te Atua. E aha tā ’oe e ’ite ra i roto i te Alama 24:7–19 ’e te 26:17–22 ’o tē tauturu nei ia ’oe e māramarama i tōna aroha ? ’Ia tai’o ’oe i te reira, e nehenehe e feruri i te mau mea i muri nei : te huru ’oe i anihia ’ia tātarahapa, te ’ohipa i tupu i tō ’oe tātarahapara’a, nāhea ’oe i te tāmatara’a ’eiaha e hara fa’ahou ā ’e te mau ha’amaita’ira’a i tae mai ia ’oe nā roto i te tātarahapara’a. ’Ia tai’o ’oe mai te reira i teie mau ’īrava, e aha tā ’oe e ’apo mai nei nō ni’a i te aroha o te Atua i roto i tō ’oe orara’a ?
E tae mai te ’oa’oa nō te tāvinira’a i te Fatu.
Ta’a ’ē noa atu te mau ’ohipa i tupu nō Amona ’e Alama, tē fa’a’ite nei rāua i te hō’ē ā mau mana’o nō ni’a i tā rāua ’ohipa misiōnare. E nehenehe e tai’o i te Alama 26 ’e te 29 nō te fa’aau ia rāua. E aha te mau ’ohipa e tū’ati ra ? E aha te mau tāʼo ʼe te mau pereota tei fa’ahiti-noa-hia ? E aha tā ’oe e nehenehe e ’apo mai nā roto ia Amona ’e Alama nō ni’a i te ’imira’a i te ’oa’oa mau noa atu ā te mau tāmatara’a ? (Nō te hi’o i te mau tāmatara’a a Alama, hi’o i te mau upo’o pene nō Alama 5–16. Nō te hi’o i te mau tāmatara’a a Amona ’e tōna mau taea’e, hi’o i te mau upo’o pene nō Alama 17–28.)
E aha te mau ruru sitona ’e te mau fare vaira’a mā’a ?
I te tau ’ō’otira’a, pinepine te mau mā’a e tā’amuhia ’e e pi’ihia te reira te ruru sitona ’e e tu’uhia i roto i te mau fare vaira’a e pi’ihia i te tahi taime te mau fare vaira’a mā’a. ’Ua fa’a’ite mai Elder David A. Bednar i te tahi tātarara’a nō te aura’a tāpa’o i roto i te Alama 26:5 : « Te mau ruru sitona i roto i teie ’ā’amu ’ua fa’aauhia ïa i te mau melo bāpetizo-’āpī-hia o te ’Ēkālesia. Te mau fare vaira’a mā’a ra ’o te mau hiero mo’a ïa » (« Mau ma te tura i te hō’ē i’oa ’e te ti’ara’a », Ensign ’aore rā Liahona, Mē 2009, 97). E feruri e aha tā te fa’aaura’a i roto i te Alama 26:5–7 e ha’api’i nei ia ’oe nō ni’a i te faufa’a rahi o te mau fafaura’a hiero.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Alama 24:6–19
Nō te aha te mau Aniti-Nephi-Lehi i huna ai i tā rātou mau mauha’a tama’i « i roto roa i te repo » ? (Alama 24:16). Penei a’e e ’ana’anatae mai te mau melo o te ’utuāfare e pāpa’ipa’i i ni’a i te tahi pāpie i te mau mea tā rātou e hina’aro e upo’oti’a ’aore rā e fa’aru’e. I muri iho e ’ō rātou i te hō’ē ’āpo’o nō te huna i tā rātou mau pāpie.
Alama 24:7–12
E tauturu te tuatāpapara’a i teie mau ’īrava i tō ’outou ’utuāfare ’ia māramarama i te mau hōro’a fa’ahiahia nō te tātarahapara’a. E aha tā te mau Aniti-Nephi-Lehi i rave nō te tātarahapa i tā rātou mau hara ? Nāhea te Fatu i te tauturura’a ia rātou ’ia tātarahapa ? E aha tā tātou e nehenehe e ’apo mai i roto i teie hi’ora’a ?
Alama 24:20–27
E aha tā tātou i ’ite ’o tē fa’a’ite nei i te parau mau o te parau a Moromona : « ’Ua ’ite tātou ē, tē ’ohipa ra te Fatu nā roto i te mau rāve’a e rave rahi i te fa’aorara’a i tōna feiā » ? (Alama 24:27).
Alama 26:2
E aha te pāhonora’a a tō ’outou ’utuāfare i te uira’a a Amona i roto i te Alama 26:2 ? Penei a’e e nehenehe tā ’outou e pāpa’i i tā rātou mau pāhonora’a i ni’a i te hō’ē pāpie rahi nō te fa’atautau i te hō’ē vāhi e ’ite te mau ta’ata ato’a i te reira. Fa’aitoito i te mau melo o te ’utuāfare ’ia tu’u i te tahi atu mau ha’amaita’ira’a tā rātou e mana’o nei ’ua « tu’u aroha mai [te Atua] i ni’a iho ia tātou nei ».
Alama 29:9
Nāhea ’o Amona ’e ’o Alama i te rirora’a ’ei mauiha’a i roto i te rima o te Atua ? E nehenehe e hi’o i te tahi mau mauiha’a i roto i tō ’outou fare ’a paraparau atu ai e aha tā te reira e tauturu nei i tō ’outou ’utuāfare. Nāhea te reira e tauturu ai ’ia māramarama nāhea tātou e nehenehe ’ia riro mai ’ei « mauiha’a i roto i te rima o te Atua » ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’ira’a i tā tātou ha’api’ira’a
Fa’a’ohipa i te mau rāve’a huru rau. ’Ia fa’a’ohipa ’outou i te mau rāve’a huru rau nō te tuatāpapara’a pāpa’ira’a mo’a a te ’utuāfare, e vai ’ana’anatae noa mai te mau melo o te ’utuāfare ’e e ’āmui mai rātou. ’Ei hi’ora’a, ’ia tai’o hō’ē melo o te ’utuāfare i te hō’ē ’īrava, e nehenehe tāna e ani i te tahi mau pu’era’a ’ia fa’ahiti fa’ahou mai i te reira nā roto i tā rātou iho mau parau.
Fa’ahōho’ara’a nō te mau Aniti-Nephi-Lehi e huna ra i tā rātou mau mauiha’a tama’i nā Dan Burr