« 13–19 nō Tiurai. Alama 32–35 : ‘E tanu ’outou i teie nei parau i roto i tō ’outou ’ā’au’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 13–19 nō Tiurai. Alama 32–35 », Mai, pe’e mai—nō te ta’ata hō’ē ’e te ’utuāfare : 2020
13–19 nō Tiurai
Alama 32–35
« E tanu ’outou i teie nei parau i roto i tō ’outou ’ā’au »
Pāpa’i i te mau mana’o pae vārua tā ’outou e fāri’i ’a tuatāpapa ai i te Alama 32–35. E aha te mana’o i fa’auruhia mai nā roto i te mea tā ’outou i ha’api’i mai ?
Pāpa’i i te mau mana’o e tae mai
Te pure a te mau ’āti Zorama, ’o te mana’o-noa-ra’a ïa iāna iho, e ’ohipa mātaro ’o tē tupu hō’ē noa taime i te hepetoma hō’ē. ’O te ti’ara’a ïa i te vāhi e ’ite mai te mau ta’ata ato’a ’e te fa’ahiti-noa-ra’a i te mau parau faufa’a ’ore ’e te fa’atietie iāna iho. Te mea ’ino roa atu paha, tē ’ere ra te mau ’āti Zorama i te fa’aro’o ia Iesu Mesia—’ua pāto’i roa ato’a tē vai ra ’oia—’e ’ua hāmani ’ino i te feiā veve (hi’o Alama 31:9–25). I te tahi pae, ’ua ha’api’i itoito Alama ’e Amuleka ē e mea tū’ati rahi a’e te pure i te ’ohipa e tupu ra i roto i tō tātou ’ā’au, i te hō’ē ’ohipa i ni’a i te hō’ē pa’epa’e i mua i te ta’ata. ’E mai te peu e’ita te reira e arata’i i te aumihi nō te feiā i roto i te ’ati, e « mea ma’ama’a [ïa] ’e te faufa’a ’ore » (Alama 34:28). Te mea faufa’a roa atu, e fa’a’itera’a te reira nō te fa’aro’o ia Iesu Mesia, ’ōna tē pūpū nei i te ora nā roto i tāna « tūsia rahi ’e te hope’a » (Alama 34:10). ’Ua fa’ata’a mai Alama ē, terā fa’aro’o, nō roto mai ïa i te ha’eha’a ’e te hō’ē « hina’aro i te fa’aro’o » (Alama 32:27). E tupu marū noa mai ’oia, mai te tumu rā’au te huru, ’e e tītau te reira i te fa’a’amura’a tāmau. ’Ia tai’o ’outou i te Alama 32–35, e nehenehe e feruri i tō ’outou iho fa’aro’o ’e tā ’outou mau pure ; tē ’ite ra ānei ’outou i te tahi peu ’āti Zorama e ne’e mai ra i ni’a ia ’outou ? Nāhea ’outou i te fa’a’amu i tō ’outou fa’aro’o ia Iesu Mesia ’ia riro mai te reira ’ei « rā’au tupu noa ai i ni’a ē ’ia tae’a te ora mure ’ore »? (Alama 32:41).
Mau mana’o nō tā ’oe iho tuatāpapara’a pāpa’ira’a mo’a
E ti’a iā’u ’ia mā’iti i te fa’aha’eha’a.
’Ua ’ite iho Alama ē, e mea ha’eha’a te mau ’āti Zorama veve ’e « ’ua ineine ho’i rātou i te fa’aro’o i te parau » (Alama 32:6). ’Ia tai’o ’oe i te Alama 32:1–16, ’a feruri nō ni’a i te huru ’oe e fa’aineine ai nō te fa’aro’o i te parau a te Atua.
E aha te mau ’ohipa i tupu tei fa’aha’eha’a ia ’oe ? E aha tā ’oe i rave nō te fa’aha’eha’a atu ā ? E ti’a i teie mau ’īrava e ha’api’i ia ’oe nāhea ’ia mā’iti i te ha’eha’a ’eiaha rā ’ia fa’ahepohia ’ia fa’aha’eha’a. ’Ei hi’ora’a, e aha te ta’a-’ē-ra’a i roto i te « vevera’a i te mau mea o teie nei ao » ’e te « [vevera’a] i te ’ā’au » ? (’īrava 3). E aha te aura’a te parau e « fa’aha’eha’a mai [ia ’oe iho] nō te parau » ? (’īrava 14).
Hi’o ato’a « Ha’eha’a », Gospel Topics, topics.ChurchofJesusChrist.org.
Tē fa’a’ohipa nei au i te fa’aro’o ia Iesu Mesia nā roto i te tanura’a ’e te fa’a’amura’a i tāna parau i roto i tō’u ’ā’au.
Ia mana’o ’oe, nō te aha Alama i paraparau ai nō te tanura’a i te hō’ē huero ’ei pāhonora’a i te mau uira’a a te mau ’āti Zorama nō ni’a i te parau nō te ha’amorira’a ? E aha te huero tā Alama e parau nei ? (hi’o Alama 32:28 ; 33:22–23). ’Ia tai’o ’oe i te Alama 32:17–43, ’a pāpa’i i te mau ta’o ’e te mau pereota e tauturu ia ’oe ’ia māramarama nāhea i te fa’a’ohipa i te fa’aro’o ia Iesu Mesia ’e i tāna parau. E aha tā ’oe e ’apo mai nei nō ni’a i te parau e aha te fa’aro’o ’e e aha te mea e ’ere i te fa’aro’o ? I muri mai, ’ia tai’o ’oe i te mau pene 33–34, ’a ’imi i te mau pāhonora’a i te uira’a a te mau ’āti Zorama ē « nāhea [tātou] i te tanu i te huero ? » (Alama 33:1).
Teie fa’ahou te tahi rāve’a nō te tuatāpapa i te Alama 32–34 : E pāpa’i i te hōho’a nō te mau tuha’a tupura’a o te hō’ē huero. I muri mai e topa i te hōho’a tāta’itahi i te hō’ē parau i roto i te Alama 32:28–43 ’o tē tauturu ia ’oe ’ia māramarama nāhea i te tanu ’e i te fa’a’amu i te parau i roto i tō ’oe ’ā’au.
Hi’o ato’a Mataio 13:3 – 8, 18 – 23 ; Hebera 11 ; Neil L. Andersen, « ’Aita te fa’aro’o e topa noa mai, e au rā i te mā’itira’a », Ensign ’aore rā Liahona, Novema 2015, 65 – 68 ; « Fa’aro’o ia Iesu Mesia », Gospel Topics, topics.ChurchofJesusChrist.org.
E ti’a iā’u ’ia ha’amori i te Atua nā roto i te pure, noa atu te taime ’e noa atu te vāhi.
’Ua hōro’ahia te parau a’o a Alama ’e a Amuleka nō ni’a i te ha’amorira’a ’e te pure nō te fa’atītī’aifaro i te hāro’aro’a hape a te mau ’āti Zorama (hi’o Alama 31:13–23). ’Āre’a rā e nehenehe i te mau parau mau tā rāua i ha’api’i i te tauturu ia tātou ’ia māramarama maita’i a’e nō ni’a i te pure ’e te ha’amorira’a. Penei a’e e nehenehe tā ’oe e tāpura i te mau parau mau nō ni’a i te pure tā ’oe e ’ite ra i roto i te Alama 33:2–11 ’e te 34:17–29. I pīha’i iho i terā tāpura, e tāpura ato’a i te mau mana’o hape nō ni’a i te pure tā teie mau parau mau e fa’atītī’aifaro nei (hi’o Alama 31:12–23). Nāhea te mau mea tā ’oe e ha’api’i mai nei i roto i teie mau ’īrava e taui i te huru ’oe e pure ’e e ha’amori ?
’O vai Zenosa ’e Zenoka ?
E mau peropheta Zenosa ’e Zenoka tei fa’a’ite pāpū nō Iesu Mesia i te tau o te Faufa’a Tahito, ’aita rā tā rāua mau ha’api’ira’a e ’itehia nei i roto i te Faufa’a Tahito. ’Ua roa’a i te mau ’āti Nephi te mau ha’api’ira’a a teie mau peropheta, e mea pāpū ē, nō roto mai i te mau ’api veo tā Nephi i roa’a mai ia Labana ra. Tē fa’ahitihia nei rāua i roto i te 1 Nephi 19:10–12 ; Iakoba 5:1 ; ’e te Helamana 8:19–20.
« Tei teie nei orara’a te taime ’ia fa’aineine… ’ia fārerei i te Atua. »
’Ia tai’o ’oe i te Alama 34:30–41, ’a feruri nāhea tā ’oe e nehenehe e « rave māite i te ’ohipa ’a pārahi ai [’oe] i te ao nei » (’īrava 33). Nāhea te tātarahapara’a ’e te fa’a’oroma’i e nehenehe e fa’aineine ia ’oe ’ia fārerei i te Atua ? E mau tauira’a ānei tei tītauhia tā ’oe i fa’aroaroa ? E hi’o maita’i ē ’ia ’ohipa i ni’a i te mau mana’o pae vārua ato’a e tae mai.
Hi’o ato’a Alama 12:24 ; Larry R. Lawrence, « E aha iho ā tei toe iā’u ? » Ensign ’aore rā Liahona, Nov. 2015, 33–35.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Alama 32:9–11 ; 33:2–11 ; 34:38–39
E aha te huru mai te peu e fa’ati’a-noa-hia tātou ’ia ha’amori ’e ’ia pure i te sābati ana’e ? ’A tai’o ’āmui ai ’outou i teie mau ’īrava, e nehenehe te mau melo o te ’utuāfare e ’āparau nāhea e ti’a ai ia rātou ’ia ha’amori i te mau mahana ato’a ’e nō te aha rātou e māuruuru ai nō te reira.
Alama 32:28–43
E hōho’a nō te hō’ē tumu rā’au i roto i teie arata’i ha’api’ira’a ; e nehenehe tā ’outou e fa’a’ohipa i te reira nō te fa’ahōho’a i te mau parau a Alama i roto i teie mau ’īrava. ’Aore rā e nehenehe tō ’outou ’utuāfare e haere e hāhaere nō te hi’o mai i te tahi mau tumu ri’i fāito pa’ari ta’a ’ē ’a tai’o atu ai i te mau ’īrava i roto i te Alama 32 e fa’aau nei i tō tātou fa’aro’o i te hō’ē rā’au tupu. Penei a’e e nehenehe te melo tāta’itahi o te ’utuāfare e tanu i te hō’ē huero ma te ’āparau e aha tei tītauhia nō te fa’atupu i te reira. I roto i te mau hepetoma i muri mai, e nehenehe tā ’outou e hi’ohi’o i tā ’outou mau huero nō te ha’amana’o i te tītaura’a e fa’a’amu tāmau i tō ’outou ’itera’a pāpū nō Iesu Mesia.
Alama 33:2–11 ; 34:17–29
E aha tā teie mau ’īrava e parau nei nō ni’a i te huru e ha’amaita’i i tā tātou pure ta’ata hō’ē ’e te pure ’utuāfare ?
Alama 34:31
E aha te mau ’ohipa i tupu tei fa’a’ite mai ia tātou ē, ’ia tātarahapa ana’e tātou, te ha’amata « vave » nei tātou i te ’ite i te mau ha’amaita’ira’a o te rāve’a nō te ora ?
Alama 34:33–35
’Ua ’ite ānei tō ’outou ’utuāfare i te aura’a o te parau fa’aroaroa ? Penei a’e e nehenehe te hō’ē ta’ata e fa’a’ite i te tahi mau hi’ora’a nō te fa’aroaroara’a ’e tō te reira mau fa’ahope’ara’a ’ino. E aha te aura’a te parau « fa’aroaroa i te mahana o tā [tātou] tātarahapa » ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’ira’a i tā tātou ha’api’ira’a
Pāpa’i i te mau hōho’a. E nehenehe e vaiiho i te mau melo o te ’utuāfare e pāpa’i i te hōho’a nō te mau mea tā rātou e ha’api’i nei i roto i te mau pāpa’ira’a mo’a. ’Ei hi’ora’a, e au paha rātou i te pāpa’i i te hōho’a nō te huero e tupu ra ’ei tumu rā’au ’a tuatāpapa ai rātou i te Alama 32.
« Nō tō ’outou itoito, ’e tō ’outou fa’aro’o, ’e tō ’outou fa’a’oroma’i i te parau i te fa’a’apura’a… inaha, ’aita e maoro e fa’ifa’i ’outou i te mā’a nōna, e faufa’a rahi tō te reira » (Alama 32:42).