« 20–26 nō Tiurai. Alama 36–38 : ‘E hi’o i te Atua, e ora’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 20–26 nō Tiurai. Alama 36-38 », Mai, pe’e mai—nō te ta’ata hō’ē ’e te ’utuāfare : 2020
Faʼahōhoʼaraʼa nā Joshua Dennis
20–26 nō Tiurai
Alama 36–38
« E hi’o i te Atua, e ora »
« ’A ’ite ai ’oe i te ’oa’oa ’o tē tae mai nā roto i tō ’oe māramarama i te ’evanelia, e mea pāpū ē e hina’aro ’oe i te fa’a’ohipa i te mea ’o tā ’oe i ha’api’i » (Poro Haere i Tā’u Nei ’Evanelia [2004], 21). Pāpa’i i te mau mea tā ’outou e feruri ’e te mau mana’o e tae mai nō ni’a i te huru e fa’a’ohipa i te mau parau mau tā ’outou e ’apo mai nei.
Pāpa’i i te mau mana’o e tae mai
I te ’itera’a Alama i te ’ino ’ati a’e iāna, ’ua « teiaha ’oia i te mihi », i te « pohe » ’e i te « taiā o te ’ā’au » (Alama 8:14). ’Ua nā ’ō ’oia nō te mau ’āti Zorama ē : « Tē māuiui nei ta’u vārua i te ’ohipa ’ino i roto i teie nei feiā » (Alama 31:30). Hō’ē ā tōna mana’o i te ho’ira’a ’oia mai tāna misiōni i rotopū i te mau ’āti Zorama—’ua hi’o ’oia i te « ’ā’au ’eta’eta o te mau ta’ata ra, ’e i riri ho’i rātou i te parau-ti’a ra » ’e « i ’oto hua ai tōna ’ā’au » (Alama 35:15). E aha tā Alama i rave nō ni’a i tāna i ’ite ’e i mana’o ? ’Aita ’oia i ha’aparuparu noa i te mana’o ’aore rā i ha’apuri i te mana’o nō ni’a i te vaira’a o te ao. ’Aita, « i ha’aputuputu ai ’oia i tāna mau tamaiti ato’a, ’ia poro’i tāta’itahi ’oia ia rātou i te mau mea o te parau-ti’a ra » (Alama 35:16). ’Ua ha’api’i ’oia ia rātou ē « ’aita atu e rāve’a e fa’aorahia ai te ta’ata, maori rā nā roto i te Mesia… Inaha, ’o te parau mau ïa ’oia, ’e te parau-ti’a ato’a ho’i » (Alama 38:9).
Mau mana’o nō tā ’oe iho tuatāpapara’a pāpa’ira’a mo’a
E ti’a iā’u ’ia fānauhia e te Atua ra.
’Aita e rahi te ta’ata e rātere nā roto i te mau ’ohipa rahi i tupu nō te fa’afāriura’a o Alama. E mau parau tumu rā i reira tātou e nehenehe ai e ’apo mai nō te fa’a’ohipa atu, inaha tītau-roa-hia ia tātou ’ia « fānauhia e te Atua » (Alama 36:23). ’Ia tai’o ’oe i te Alama 36, ’a hi’o i te mau parau tumu e nehenehe e fa’a’ohipa. ’Ei hi’ora’a, nō te hō’ē ta’ata tei fānauhia e te Atua, e aha tōna mana’o i te hara ? E aha tōna mana’o ia Iesu Mesia ? E nehenehe ato’a ’oe e ’imi mai i te mau tauira’a tā ’oe e tīa’i ra i roto i te mau ti’aturira’a ’e te mau ’ohipa a te hō’ē ta’ata tei fānauhia e te Atua.
Hi’o ato’a Mosia 5:7; 27:25–26; Alama 5:14; 22:15; Helamana 3:35; « Fa’afāriura’a », Gospel Topics, topics.ChurchofJesusChrist.org.
’Ua ’aufau Iesu Mesia nō te mau hara o te ao nei.
E haru mai paha ’oe i te tahi mau parau tei fa’ahiti-noa-hia i roto i tā Alama fa’ati’ara’a i tōna fa’afāriura’a i roto i teie pene. Nō te mea ho’i e hi’ora’a rahi te Alama 36 nō te hō’ē huru pehepehe Hebera tei parauhia te « Chiasme », ’oia ho’i e pāpa’ihia te mau ta’o ’e te mau mana’o ma te hō’ē ’āna’ira’a e arata’i i te mana’o tumu, i muri iho e fa’ahiti-fa’ahou-hia te reira ma te huri i te ’āna’ira’a. I roto i te Alama 36, te fa’ahiti-fa’ahou-hia nei te mana’o o te ’īrava 3 i roto i te ’īrava 27, ’e te mana’o o te ’īrava 5 i roto i te ’īrava 26, ’a nā reira noa ai. ’O te mana’o tumu te poro’i faufa’a rahi roa i roto i te Chiasme. E hi’o e ti’a ānei ia ’oe ’ia ’ite mai i te mana’o tumu i roto i te mau ’īrava 17–18. E hi’o maita’i na i te huru te tāpe’ara’a tōna ’ā’au « i taua mana’o ra » i taui ia Alama ’e i taui i tōna orara’a. E mea nāhea teie parau mau i te tauira’a ia ’oe ? E aha te tahi atu mau mana’o tei fa’ahiti-noa-hia i roto i teie tuha’a ?
E aha tā teie fa’ati’ara’a nō te tātarahapara’a ’e nō te fa’a’orera’a hara e fa’auru nei ia ’oe ’ia rave nō te pe’e i te hi’ora’a o Alama ’e nō te fāriu i ni’a i te Fa’aora ?
Nō te tahi atu mau ha’amāramaramara’a nō ni’a i te chiasme, hi’o Book of Mormon Student Manual (Church Educational System manual [2009], 232–33).
’Ua fa’ahereherehia te mau pāpa’ira’a mo’a « nō te mea pa’ari ho’i ».
’Ua feruri a’enei ’oe i te temeio ’e te ha’amaita’ira’a nō te fāna’ora’a i te mau pāpa’ira’a mo’a i teie mahana ? « Nā te Atua i tu’u mai i teie nei mau mea mo’a ia [tātou nei] » (Alama 37:14). ’Ia tai’o ’oe i te Alama 37, ’a ’imi i te mau ha’amaita’ira’a nō te fāna’ora’a i te mau pāpa’ira’a mo’a. Mea nāhea ’oe i te ’itera’a i teie mau ha’amaita’ira’a ? Nāhea tātou e nehenehe ai e fa’a’ohipa i te mau pāpa’ira’a mo’a nō te tauturu ’ia « fa’a’ite mai i tōna ra mana i te mau u’i a muri atu »? (Alama 37:18).
I roto i te Alama 37:38–47, tē fa’aau nei Alama i « te parau a te Mesia ra » i te Liahona. ’A feruri ai ’oe i teie fa’aaura’a, ’a feruri i te huru ’oe e ’ite ai i te temeio ’e te mana o te mau ha’api’ira’a a te Mesia « i terā mahana i terā mahana » (Alama 37:40).
Hi’o ato’a D. Todd Christofferson, « Te ha’amaita’ira’a o te pāpa’ira’a mo’a », Ensign ’aore rā Liahona, Mē 2010, 32–35.
Tē ha’api’i nei te mau pāpa’ira’a mo’a ia tātou nāhea ’ia pe’e i te Atua.
« Nā roto i te mau mea iti ’e te pāpū ra e fa’atupuhia ai te mau mea rarahi. »
I te tahi taime e tae mai paha te mana’o ē, ’ua rahi roa ’e e mea rave ’atā tō tātou mau fifi ’e nō reira tītauhia te mau rāve’a rahi a’e ’e te rave ’atā. Teie rā, fa’ahou ’e fa’ahou ā, tē mā’iti nei te Fatu i te fa’a’ohipa i « te mau mea iti ’e te pāpū ra » (Alama 37: 6) nō te fa’atupu i tāna ’ohipa ’e nō te ha’amaita’i i te orara’a o tāna mau tamari’i. ’Ia tai’o ’oe i te Alama 37:6–7, ’a feruri ’e ’a pāpa’i i te mau taime ’ua ’ite ’oe i teie parau tumu i te ’ohipara’a i roto i tō ’oe orara’a. E aha te tahi mau mea iti ’e te pāpū tā te Fatu e fa’a’ohipa nei nō te ha’amaita’i ia ’oe ’e nō te fa’atupu i tāna ’ohipa ?
Hi’o ato’a Alama 37:41–46; Dallin H. Oaks, « Te mau mea iti ’e te ’ōhie », Ensign ’aore rā Liahona, Mē 2018, 89–92.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Alama 36:5–26
Noa atu ā te maere rahi o te ’ohipa i tupu nō Alama, tē fa’ahōho’a nei tōna fa’afāriura’a i te mau parau tumu e rave rahi e tano nō tātou pā’āto’a. Ani i te melo tāta’itahi o te ’utuāfare ’ia mā’iti i te hō’ē ’īrava i roto i te Alama 36:5–26 ’o tē ha’api’i nei nō ni’a i te ti’ara’a « fānauhia e te Atua ». ’E aha tā tātou e ’apo mai i roto i teie mau ’īrava ? Penei a’e e nehenehe te mau melo o te ’utuāfare e fa’a’ite nāhea rātou i te fa’a’ohipara’a i te mau parau tumu tā Alama i fa’a’ite mai.
Alama 36:18–21, 24
Nāhea tātou i te fa’a’ohipa i teie mau ’īrava nō te tauturu i te tahi ta’ata ’ia ’ite ē, e ’ohipa ’oa’oa mau te tātarahapara’a, e ’ere i te mea ri’ari’a ? Nāhea te tātarahapara’a i te fa’auru ia tātou ’ia fa’a’ite i te ’evanelia i te ta’ata ?
Alama 37:6–7, 38–46
E aha te tahi mau « mea iti ’e te pāpū » (Alama 37:6) ’o te fa’atae mai i te mau mea rarahi i roto i tō ’outou orara’a ? Mai te aha te huru e riro ai te mau parau a te Mesia mai te Liahona te huru ? Nāhea tātou i te tauturu i te tahi ’e te tahi ’ia tuatāpapa itoito atu ā i te mau pāpa’ira’a mo’a ?
Alama 37:35
Nō te aha tātou e ha’api’i ai i te pa’ari i te ha’apa’ora’a i te mau fa’auera’a « i [tō tātou] ’āpīra’a » ?
Alama 38:12
’Ua ’ite ānei tō ’oe ’utuāfare e aha te hō’ē tāvaha ? Penei a’e e nehenehe e fa’a’ite i te hōho’a nō te reira ’a ’āparau atu ai nāhea te reira i te fa’a’ohipahia nō te ha’avī i te hō’ē ’ānimara. E aha te aura’a e « [tāvaha] i tō te tino hina’aro » ? Nāhea te tāvahara’a i tō tātou mau hina’aro e tauturu ia tātou ’ia « fa’a’īhia… i te aroha » ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Tāpa’o i te mau mana’o e tae mai. ’Ia tāpa’opa’o ana’e ’outou i te mau mana’o pae vārua, tē fa’a’ite ra ïa ’outou i te Fatu ē tē ha’afaufa’a nei ’outou i Tāna arata’ira’a, ’e e ha’amaita’i mai ’Oia ia ’outou i te tahi atu ā heheura’a pinepine. ’A tuatāpapa ai ’outou, ’a pāpa’i ato’a i tō ’outou mau mana’o. (Hi’o Ha’api’ira’a mai tā te Fa’aora, 12, 30.)
Tē fā ra te melahi ia Alama ’e i te mau tamaiti a Mosia, nā Clark Kelley Price