ʻAho Taha, Pō Taha, mo e ʻAho Taha, tā ʻe Jorge Cocco

7–13 Sepitema

3 Nīfai 1–7

“Hanga Hake Ho Matá Pea Fiefia”

Kapau ʻokú ke fie maʻu ha toe ngaahi fakakaukau makehe lolotonga hoʻo teuteu ke akoʻí, vakai ki he “Maʻuʻanga Tokoni Makehe ki hono Akoʻi ʻo e Fānaú” mo e “Ko Hono Feau ʻo e Ngaahi Fie Maʻu ʻa e Fānau Iiki Angé” ʻi he kamataʻanga ʻo e maʻuʻanga tokoni ko ʻení.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Fakaafeʻi ʻa e fānaú ke nau vahevahe e meʻa ʻoku nau manatuʻi naʻa nau ako ʻi he uike kuo ʻosí fekauʻaki mo e ngaahi fakaʻilonga naʻe pehē ʻe he tangata Leimana ko Samuelá ʻe tokoni ke ʻiloʻi ʻe he kakaí kuo ʻaloʻi ʻa Sīsū. Talaange ki he fānaú te nau talanoa ʻi he ʻahó ni fekauʻaki mo e kakai naʻa nau mamata ki he hoko ʻa e ngaahi fakaʻilonga ko iá.

Akoʻi e Tokāteliné: Fānau Iiki Angé

3 Nīfai 1:4–15, 19–21

Naʻe hā mai ha fetuʻu foʻou ʻi he taimi ne ʻaloʻi ai ʻa Sīsū Kalaisí.

ʻOku ʻiloa ʻa e talanoa ʻi he Fuakava Foʻoú ki he ʻaloʻi ʻo e Fakamoʻuí, pea ʻoku ʻiloʻi foki ʻe he fānaú. Ko e uiké ni ko ha faingamālie lelei ia ke akoʻi ai ʻa e fānau ʻi hoʻo kalasí fekauʻaki mo e ngaahi mana naʻe mamata ki ai ʻa e kakai Nīfaí ʻi he taimi naʻe ʻaloʻi mai ai ʻa Sīsuú.

Ngaahi ʻEkitivitī ʻe Ala Fakahokó

• Tautau ha foʻi fetuʻu ʻi he holisí, kimuʻa pea kamata ʻa e kalasí. Fakaafeʻi ʻa e fānaú ke nau kumi ʻi he holisí ki ha meʻa ʻoku ʻikai faʻa angamaheni ke ʻi ai. Talaange ki he fānaú naʻe mamata ʻa e kau Nīfaí ki ha fetuʻu foʻou ʻi he langí ʻi he taimi naʻe ʻaloʻi ai ʻa Sīsuú. Fakamatala fakanounouʻi ʻa e talanoa ʻi he 3 Nīfai 1:4–15, mo e 19–21. Te ke lava foki ʻo fakaʻaongaʻi ʻa e “Vahe 41: Ko e Ngaahi Fakaʻilonga ʻo Hono ʻAloʻi Mai ʻo Kalaisí” (Ngaahi Talanoa ʻo e Tohi ʻa Molomoná, 114–16, pe ko e vitiō kaunga ki ai ʻi he ChurchofJesusChrist.org).

• Fakaʻaliʻali ki he fānaú ha fakatātā ʻo e ʻaloʻi ʻo e Fakamoʻuí (vakai ki he Tohi Fakatātā ʻo e Ongoongoleleí, fika 30), pea hivaʻi ha foʻi hiva Kilisimasi manako, hangē ko e “Ko e Hiva ʻAloʻí” (Tohi Hiva ʻa e Fānaú, 32–33). Tokoniʻi ʻa e fānaú ke mahino kiate kinautolu naʻe mamaʻo ʻa e kau Nīfaí mei he feituʻu naʻe ʻaloʻi ai ʻa Sīsuú, ka naʻa nau ʻiloʻi kuo ʻaloʻi Ia koeʻuhi ko e ngaahi fakaʻilonga naʻa nau mamata ki aí. Fakamoʻoni ange neongo naʻe ʻikai ke tau mamata ki he ʻaloʻi ʻo e Fakamoʻuí, ka ʻoku lava ke tokoniʻi kitautolu ʻe he Laumālie Māʻoniʻoní ke tau ʻiloʻi ʻoku moʻoni ʻa e ngaahi talanoa ʻi he folofolá.

3 Nīfai 1:20

ʻOku fakahoko maʻu pē ʻa e ngaahi lea ʻa e kau palōfitá.

Naʻe folofola ange ʻe he ʻEikí kia Nīfai, “Te u haʻu ki māmani, ke fakahā ki he māmaní te u fakahoko ʻa e meʻa kotoa pē kuó u fekau ke lea ʻaki ʻi he ngutu ʻo ʻeku kau palōfita māʻoniʻoní” (3 Nīfai 1:13).

Ngaahi ʻEkitivitī ʻe Ala Fakahokó

• Fakaʻaliʻali ha ngaahi fakatātā ʻokú ne fakahaaʻi ʻa e founga kuo folofola ai ʻa e ʻOtuá ʻo fakafou ʻi he kau palōfita hangē ko Noá (Tohi Fakatātā ʻo e Ongoongoleleí, fika 7–8; vakai ki he Sēnesi 6–7) mo e tangata Leimana ko Samuelá (Tohi Fakatātā ʻo e Ongoongoleleí, fika 81; vakai ki he Hilamani 14:1–7). Fakaafeʻi ʻa e fānaú ke vahevahe e meʻa ʻoku nau ʻilo fekauʻaki mo e ngaahi talanoa ko ʻení.

• Lau ki he fānaú ʻa e 3 Nīfai 1:20, pea vahevahe hoʻo fakamoʻoni ʻoku fakahoko maʻu pē ʻa e ngaahi lea ʻa e kau palōfitá. Fakaafeʻi ʻa e fānaú ke nau fanongo ki he palōfitá ʻi he konifelenisi lahi ka hokó.

3 Nīfai 5:13

Te u lava ʻo muimui ʻia Sīsū Kalaisi.

Naʻe pehē ʻe Molomona, “Ko ha ākonga au ʻo Sīsū Kalaisi.” Te ke tokoni fēfē ki he fānaú ke nau ʻiloʻi ko ha kau ākonga foki kinautolu?

Ngaahi ʻEkitivitī ʻe Ala Fakahokó

• Lau ʻa e 3 Nīfai 5:13, pea fakaafeʻi ʻa e fānaú ke nau toutou lau ʻa e “Ko ha ākonga au ʻa Sīsū Kalaisi.” Akoʻi kiate kinautolu ʻoku feinga ʻa e ākonga ʻo Sīsū Kalaisí ke muimui kiate Ia. Vahevahe ha ngaahi meʻa ʻe niʻihi naʻe fai ʻe Molomona ke hangē ai ko Sīsuú, hangē ko hono akoʻi e folofola ʻa e ʻOtuá mo talangofua ki Heʻene ngaahi fekaú (vakai ki he 3 Nīfai 5:13–18). Tokoniʻi ʻa e fānaú ke nau fakakaukau ki ha ngaahi founga te nau lava ai ʻo hoko ko ha kau ākonga.

• Tokoniʻi e fānaú ke nau tā honau laʻinimá ʻi ha laʻipepa pea kosi ʻo toʻo. Tohiʻi ʻa e “Ko ha ākonga au ʻa Sīsū Kalaisi” ʻi he tafaʻaki ʻe taha, pea fakaafeʻi kinautolu ke nau tā ʻi he tafaʻaki ʻe tahá ha meʻa te nau lava ʻo fai ke nau hoko ai ko ha ākonga (mahalo ʻe fie maʻu ke ke tokoniʻi kinautolu ke nau fakakaukau ki ha ngaahi fakakaukau). Hivaʻi fakataha ha foʻi hiva fekauʻaki mo e muimui ki he Fakamoʻuí, hangē ko e “ ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41).

Akoʻi e Tokāteliné: Fānau Lalahi Angé

3 Nīfai 1:4–21

ʻOku fakahoko maʻu pē ʻa e ngahai talaʻofa ʻa e ʻOtuá ʻoku fakafou mai ʻi Heʻene kau palōfitá.

ʻE lava ke tokoni ʻa e 3 Nīfai 1:4–21 ke langaki e tui ʻa e fānaú, ʻoku tauhi maʻu pē ʻe he ʻOtuá ʻEne ngaahi talaʻofá.

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau fakatauhoa ʻa e kikite ʻa e tangata Leimana ko Samuelá ʻi he Hilamani 14:1–7 mo hono fakahoko e kikite ko iá ʻi he 3 Nīfai 1:19–21. Fakamoʻoniʻi ange ʻoku fakahoko maʻu pē ʻa e ngaahi talaʻofa ʻa e ʻOtuá ʻoku lea ʻaki ʻe Heʻene kau palōfitá.

• Lau mo e fānaú ʻa e talanoa ʻoku maʻu ʻi he 3 Nīfai 1:4–10. Fehuʻi ki he fānaú pe naʻa nau mei ongoʻi fēfē kapau ko e taha kinautolu ʻo e niʻihi tuí ʻi he taimi ko iá. Fakaafeʻi ʻa e fānaú ke nau lau ʻa e toenga ʻo e talanoa ʻi he veesi 11–15 pea ke fokotuʻu ha ngaahi founga ke fakakakatoʻaki ʻa e sētesi ko ʻení: “Ko e lēsoni ʻo e talanoa ko ʻení ko e …” Te tau fakahaaʻi fēfē ʻetau falala ki he ʻOtuá ʻi he taimi ʻoku tau loto hohaʻa mo loto-foʻi aí?

• Vahevahe ha meʻa kuo talaʻofa mai ʻe hotau palōfita moʻuí. Ko e hā e meʻa te tau lava ʻo fai ke fakahaaʻiʻaki ʻetau tui ko e ngaahi lea ʻa e kau palōfitá, ko e ʻomi mei he ʻOtuá?

3 Nīfai 2:11–12; 3:13–14, 24–26

ʻOku tau mālohi ange ʻi he taimi ʻoku tau fakatahataha aí.

Naʻe pau ke fakatahataha ʻa e kau Nīfaí ke maʻu ha malu fakatuʻasino. Te ke tokoniʻi fēfē ʻa e fānaú ke nau ʻiloʻi ʻe lava foki ke ʻomi ʻe he tānaki fakataha mo ha ngaahi kaungāmeʻa angatonú, ha mālohi fakalaumālie kiate kinautolu?

Ngaahi ʻEkitivitī ʻe Ala Fakahokó

• Lau mo e fānaú ʻa e ngaahi veesi ko ʻení, pea fakaafeʻi kinautolu ke nau kumi ki he ngaahi ʻuhinga naʻe fakatahataha ai ʻa e kau Nīfaí mo e ngaahi tāpuaki naʻe haʻu kiate kinautolú: 3 Nīfai 2:11–12 mo e 3:13–14, 24–26. Ko e hā e ʻuhinga ʻoku mahuʻinga ai kiate kitautolu ke tau “fakatahataha” he kuongá ni mo hotau ngaahi fāmilí pe ʻi he siasí? ʻE founga fēfē hano ngaohi ʻe he fakatahatahá ke tau mālohi fakalaumālie lahi ange?

• Fakaʻaongaʻi ha lēsoni ʻoku fakaʻaongaʻi ai ha meʻa ke akoʻi, ʻoku tau mālohi ange ʻi hono fakataha kitautolú kae ʻikai ʻi he mavahevahé. Hangē ko eʻní, fakaafeʻi ʻa e fānaú ke nau feinga ke motuki ha vaʻakau ʻe taha pea hoko atu ki ha haʻinga vaʻakau ʻe niʻihi pe feinga ke hae ha laʻipepa ʻe taha pea feinga leva ke hae ha fokotuʻunga laʻipepa. ʻOku tau hangē fēfē nai ko e ngaahi vaʻakaú pe ko e laʻipepá? Te tau lava fēfē ʻo fefakamālohiaʻaki ʻi he taimi ʻoku tau fakatahataha fakataha ai ʻi hotau ngaahi fāmilí pe ʻi he siasí?

• Fakamatalaʻi ange ʻoku tānaki fakataha ʻe Sīsū ʻa Hono kakaí ki he Siasí ʻi he kuongá ni ʻo fakafou ʻi he ngāue fakafaifekaú (vakai ki he 3 Nīfai 5:24–26). Fakaafeʻi ha faifekau taimi kakato pe ko ha faifekau fakauooti ke nau vahevahe ha ngaahi aʻusia ʻoku fakahaaʻi ai hono fakamālohia ʻa e kakaí ʻe hono tānaki mai ki he Siasí.

3 Nīfai 4:30–33; 5:12–26; 6:14; 7:15–26

Ko ha ākonga au ʻo Sīsū Kalaisi.

Te ke tokoniʻi fēfē ke ʻiloʻi ʻe he fānaú ko ha kau ākonga kinautolu ʻo Sīsū Kalaisi ʻo hangē ko ia naʻe fai ʻe Molomoná? (vakai ki he 3 Nīfai 5:13).

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo Molomona (hangē ko e Tohi Fakatātā ʻo e Ongoongoleleí, fika 73). Fakaafeʻi ʻa e fānau takitaha ke nau taufetongi ʻi hono toe lea ʻaki e lea naʻe fai ʻe Molomona ʻi he 3 Nīfai 5:13: “Ko ha ākonga au ʻa Sīsū Kalaisi.” Ko e hā hono ʻuhinga ʻo e hoko ko ha ākonga ʻo Sīsū Kalaisí? (vakai ki he TF 41:5).

• Vahevahe ʻa e kalasí ki ha ngaahi kulupu iiki, pea vahe ki he kulupu takitaha ke nau lau kau ki ha taha ʻo e ngaahi sīpinga ko ʻeni ʻo e kau ākongá: ko e kau Leimana kuo fakauluí (vakai ki he 3 Nīfai 4:30–33; 6:14), Molomona (vakai ki he 3 Nīfai 5:12–26), mo Nīfai (vakai ki he 3 Nīfai 7:15–26). Naʻe hoko fēfē ʻa e niʻihi ko ʻení ko ha kau ākonga moʻoni ʻa Sīsū Kalaisi? Ko e hā te tau lava ʻo fai ke tau muimui ai ʻi heʻenau ngaahi sīpingá?

Poupouʻi e Ako ʻi ʻApí

Fakaafeʻi ʻa e fānaú ke nau fakakaukau ki ha meʻa te nau fai ʻi he uiké ni ke nau hoko ai ko ha kau ākonga ʻa Kalaisi. Poupouʻi kinautolu ke nau hikiʻi hifo ia pea vahevahe mo honau ngaahi fāmilí.

Fakatupulaki ʻEtau Akoʻí

Fakaʻaliʻali ha potufolofola. Fili ha veesi ʻokú ke pehē ʻoku ʻuhingamālie (pe fakaafeʻi ʻa e fānaú ke nau fili ha taha), pea tuku ia ʻi hoʻo loki akó ʻi ha feituʻu ʻe sio maʻu pē ki ai ʻa e fānaú. ʻE lava ke ke fakaʻaliʻali ia ʻi ha ngaahi uike pea toutou vakai ki ai ʻi ha ngaahi taimi ʻe niʻihi.