Ko Au ʻa e Maama ʻo Māmaní, tā ʻe James Fullmer

14–20 Sepitema

3 Nīfai 8–11

“Tuʻu Hake pea ʻUnuʻunu Mai Kiate Au”

Lau ʻa e 3 Nīfai 8–11 lolotonga hoʻo fakakaukau ki he fānau ʻokú ke akoʻí. ʻE lava ke tokoni ʻa e ngaahi fakakaukau ʻi he fokotuʻutuʻu ko ʻení ki hono tataki hoʻo teuteú.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali ha fakatātā ʻo e hā ʻa Sīsū Kalaisi ki he Ongo ʻAmeliká, hangē ko ia ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakaafeʻi ʻa e fānaú ke nau talaatu ha ngaahi fakaikiiki ʻi he fakatātaá pea vahevahe ha meʻa ʻoku nau ʻilo kau ki he talanoa ʻoku hā ʻi he fakatātaá.

Akoʻi e Tokāteliné: Fānau Iiki Angé

3 Nīfai 8–11

ʻOku fakaafeʻi au ʻe Sīsū Kalaisi ke u haʻu kiate Ia.

Mahalo he ʻikai ke ke lava ʻo vahevahe ʻa e kotoa ʻo e ngaahi fakaikiiki ʻi he hā ʻa e Fakamoʻuí ki he kakai ʻo Nīfaí, ka te ke lava ʻo tokoniʻi kinautolu ke nau ongoʻi ʻa e ʻofa naʻá Ne fai ki he kakaí ʻi he 3 Nīfai 8–11.

Ngaahi ʻEkitivitī ʻe Ala Fakahokó

• Talanoa ki he fānaú fekauʻaki mo e ngaahi matangi mo e ngaahi konga fakapoʻuli naʻe fakamatalaʻi ʻi he 3 Nīfai 8, tokanga ke ʻoua naʻá ke fakailifiaʻi pe fakamamahiʻi kinautolu. Te ke lava ʻo fakaʻaongaʻi ʻa e “Vahe 42: Ko e Ngaahi Fakaʻilonga ʻo Hono Tutuki ʻo Kalaisí” (Ngaahi Talanoa ʻo e Tohi ʻa Molomoná, 117–19, pe ko e vitiō kaunga ki ai ʻi he ChurchofJesusChrist.org). Fehuʻi ki he fānaú ko e hā ʻenau ongoʻi kapau naʻa nau ʻi he lotolotonga ʻo e ngaahi matangi mo e fakapoʻuli ko iá. Fakamatalaʻi ange ko e ngaahi matangí mo e fakapoʻulí ko ha ngaahi fakaʻilonga ia kuo pekia ʻa Sīsū, pea fakahā ha fakatātā ʻo e Tutukí (vakai ki he Tohi Talanoa ʻo e Ongoongoleleí, fika 57). Lau leva ʻa e 3 Nīfai 9:13. Ko e hā naʻe folofola ʻe Sīsū te Ne fai kiate kinautolu naʻa nau fakatomalá? Tokoni ke mahino ki he fānaú ʻoku ʻuhinga ʻa e foʻi lea “fakamoʻui” ʻi he veesi ko ʻení, ʻe fakamolemoleʻi kinautolu ʻe Sīsū.

• Fakaʻaliʻali ʻa e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí lolotonga hoʻo fakamatalaʻi ʻi hoʻo ngaahi lea pē ʻaʻaú, ʻa e hā ʻa e Fakamoʻui kuo toetuʻú ki he kau Nīfaí mo e kau Leimaná. Lau ha ngaahi potufolofola nounou mei he 3 Nīfai 11 ʻe tokoni ke nau ongoʻi ʻa e toputapu ʻo e meʻa ko ʻeni naʻe hokó. Fakaafeʻi kinautolu ke nau kuikui honau matá pea fakakaukauloto ki he ongo te nau maʻu kapau naʻa nau lava ke mamata kia Sīsū. Pe fakaʻaliʻali e fuofua miniti ʻo e vitiō, “My Joy Is Full” (ChurchofJesusChrist.org). Talanoa ki he fānaú fekauʻaki mo e ongo ʻokú ke maʻu ʻi he taimi ʻokú ke lau mo fakalaulauloto ai ki he ngaahi meʻa ko ʻeni naʻe hokó. Fakamoʻoniʻi ange ʻoku finangalo ʻa Sīsū ke tau haʻu kotoa kiate Ia pea ongoʻi ʻa ʻEne ʻofá. Fakakakato mo e fānaú ʻa e peesi ʻekitivitií.

3 Nīfai 10:4–6

ʻOku maluʻi ʻe Sīsū ʻa Hono kakaí ʻo hangē ko hono maluʻi ʻe ha motuʻa-moa ʻa hono fanga ʻuhikí.

ʻE lava ke tokoni ʻa e fakatātā ʻo ha motuʻa-moa ʻokú ne tānaki ʻene fanga ʻuhikí, ke akoʻi e fānaú fekauʻaki mo e fiemālie mo e malu ʻoku foaki mai ʻe he Fakamoʻuí kapau te tau haʻu kiate Ia.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo ha motuʻa-moa ʻokú ne tauhi ʻene fanga ʻuhikí. Lau ʻa e 3 Nīfai 10:6, pea talaange ki he fānaú fekauʻaki mo ha motuʻa-moa ʻokú ne ui ʻene fanga ʻuhikí pea maluʻi kinautolu ʻi hono lalo kapakaú ʻi he taimi ʻoku ʻi ai ai ha fakatuʻutāmaki. Aleaʻi ʻa e founga ʻoku hangē ai ʻa Sīsū ko ha motuʻa-moá pea mo kitautolu ko e fanga ʻuhikí. Te tau haʻu fēfē nai kiate Ia ke tau maʻu ʻa e malú?

• Fokotuʻu ha fakatātā ʻo Sīsū ʻi he holisí. Fakaafeʻi ʻa e fānaú ke nau lue takai ʻi he lokiakó lolotonga hoʻo lau leʻolahi ʻa e 3 Nīfai 10:4. Talaange kiate kinautolu ke nau laka atu ki he fakatātaá ʻi he taimi te nau fanongo ai ki he foʻi lea “tānaki”. Toutou fai ʻa e ʻekitivitī ko ʻení ʻi hoʻo lau ʻa e veesi 5 mo e 6. Vahevahe mo e fānaú ʻa e founga kuó ke haʻu ai ki he Fakamoʻuí ke maʻu ha malú, pea fakamoʻoniʻi te Ne maluʻi kitautolu mei he ngaahi fakatuʻutāmaki fakalaumālié ʻi he taimi ʻoku tau tauhi ai ʻEne ngaahi fekaú.

3 Nīfai 11:21–26

ʻOku finangalo ʻa Sīsū Kalaisi ke u papitaiso.

ʻOku teuteu ʻa e fānau ʻokú ke akoʻí ke nau papitaiso. ʻE lava ke tokoni ʻa e ngaahi akonaki ʻa Kalaisi ʻi he ngaahi potufolofola ko ʻení ke nau ʻiloi ʻa e ʻuhinga ʻoku mahuʻinga ai ʻa e papitaisó.

Ngaahi ʻEkitivitī ʻe Ala Fakahokó

• Lau ʻa e 3 Nīfai 11:21–26, pea fakaafeʻi ʻa e fānaú ke nau tuʻu ki ʻolunga ʻi he taimi kotoa pē ʻoku nau fanongo ai ki he foʻi lea “papitaiso.” Fakamatalaʻi ange naʻe akoʻi kitautolu ʻe Sīsū ki he founga totonu ʻo e papitaisó. Fakaʻaliʻali ha fakatātā ʻo ha kiʻi tamasiʻi pe taʻahine ʻoku papitaiso (vakai ki he Tohi Fakatātā ʻo e Ongoongoleleí, fika 104). Kapau kuo mamata ʻa e fānaú ki ha papitaiso kimuʻa, fakaafeʻi kinautolu ke nau fakamatalaʻi ʻa e meʻa naʻa nau mamata ki aí. Ko hai ʻokú ne fakahoko ʻa e ouau papitaisó, pea naʻá ne fakahoko fēfē ia?

• Fakaafeʻi kimuʻa ha tamai ʻo ha taha ʻo e fānaú ke kau atu ki hoʻo kalasí pea vahevahe mo e fānaú ʻa e ʻuhinga ʻoku mahuʻinga ai ke tau papitaiso ʻi he fakauku, ʻe ha taha ʻokú ne maʻu ʻa e lakanga fakataulaʻeikí. Te ne lava foki ʻo fakamatalaʻi ki he fānaú ʻa e meʻa ʻe hoko ʻi he taimi te nau papitaiso aí pea mo e ngaahi tāpuaki te nau maʻú. Poupouʻi ia ke ne ngāueʻaki ʻa e 3 Nīfai 11:23–26 ʻi heʻene fakamatalá.

Akoʻi e Tokāteliné: Fānau Lalahi Angé

3 Nīfai 8–11

ʻI he taimi ʻoku ou ʻi he fakapoʻulí aí, ʻe lava ke hoko ʻa Sīsū Kalaisi ko ʻeku maama.

Ko e taha ʻo e ngaahi pōpoaki mālohitaha ʻi he ngaahi vahe ko ʻení, ko Sīsū Kalaisi ʻa e maama ʻo e māmaní, pea te Ne lava ʻo hoko ko e maama ʻo ʻetau moʻuí.

Ngaahi ʻEkitivitī ʻe Ala Fakahokó

• Lau fakataha ʻa e 3 Nīfai 8:5–7, 11–23, mo e 10:9–13 (kapau ʻe lava, ʻai ke fakapōpōʻuli ʻa e lokí lolotonga hoʻo laú). Taʻofi fakataimi ʻa e laú pea fehuʻi ki he fānaú ko e hā e ongo ne nau mei maʻu ʻi he aʻusia ʻa e ngaahi meʻa ko ʻeni naʻe hokó. Lau mo e fānaú ha niʻihi ʻo e ngaahi lea naʻe folofola ʻaki ʻe Sīsū Kalaisi ki he kakaí lolotonga ʻenau kei ʻi he fakapoʻulí (vakai ki he 3 Nīfai 9:13–14, 18). Ko e hā e ʻuhinga naʻe ui ai ʻe Sīsū Kalaisi ʻa Ia ko e Maama ʻo e Māmaní? Ko e hā e meʻa naʻe fakaafeʻi ʻe Sīsū ke fai ʻe he kakaí mo kitautolu kae lava ke Ne hoko ko ʻetau māmá? (vakai ki he 3 Nīfai 9:20–22).

• Fakaʻaliʻali ki he fānaú ha mape ʻo e māmaní, pea tokoniʻi kinautolu ke nau kumi ʻa Selusalema mo e Ongo ʻAmeliká. Fakamatalaʻi ange ko e fakaʻauha naʻe fakamatalaʻi ʻi he 3 Nīfai 8 ko ha fakaʻilonga ia ki he kakai ʻi he Ongo ʻAmeliká, kuo tutuki ʻa Sīsū Kalaisi ʻi Selusalema. Lau fakataha ʻa e 3 Nīfai 11:1–15, pea kole ki he fānaú ke nau talaatu ʻa e taimi te nau maʻu ai ha meʻa ʻi he ngaahi veesi ko ʻení ʻoku tokoni ke nau ongoʻi ʻa e ʻofa ʻa e ʻOtuá. Vahevahe ʻa e veesi 37, pea fakamoʻoniʻi ange ʻoku ʻofa ʻa e Fakamoʻuí ʻi he kotoa ʻo ʻene fānaú. Fai hoʻo fakamoʻoni ki hono moʻoni ʻo e meʻa ʻokú ke laú.

Taki Taha, tā ʻe Walter Rane

3 Nīfai 11:1–8

Te u lava ʻo ako ke fakatokangaʻi ʻa e leʻo ʻo e ʻOtuá ʻi heʻeku moʻuí.

ʻI he kamatá, naʻe ʻikai mahino ki he kakaí ʻa e leʻo naʻa nau fanongo ki ai mei he langí. Ko e hā ʻe lava ke ako ʻe he fānaú mei he talanoa ko ʻení fekauʻaki mo hono maʻu ʻo e fakahaá?

Ngaahi ʻEkitivitī ʻe Ala Fakahokó

• Lau mo e fānaú ʻa e 3 Nīfai 11:1–4 ʻo toutou taʻofi ke fai ha ngaahi fehuʻi hangē ko e “ʻOkú ke pehē ko e hā e ʻuhinga naʻe ʻikai lava ai ke mahino ki he kakaí ʻa e leʻó?” Kole ange leva ke nau lau ʻa e veesi 5–7 ke ʻiloʻi ko e hā e meʻa naʻe fai ʻe he kakaí ʻa ia naʻe tokoni ai ke mahino kiate kinautolu ʻa e leʻó ʻi honau lotó. Te tau feinga fēfē ke fanongo ki he ʻOtuá ʻi he taimi ʻokú Ne folofola mai ai ki hotau lotó ʻo fakafou ʻi he Laumālie Māʻoniʻoní?

• Tā leʻo siʻi ha hiki tatau ʻo ha himi pe hiva ʻa e fānaú ʻa ia ʻe faingataʻa ke tau fanongoa. Fehuʻi ki he fānaú pe ʻoku mahino kiate kinautolu ʻa e ngaahi lea ʻo e hivá. Tokoniʻi leva ʻa e fānaú ke nau kumi ʻi he 3 Nīfai 11:3 ki ha ngaahi fakamatala ʻo e leʻo mei he langí. Ko e hā e ʻuhinga ʻoku ʻikai folofola mai ai ʻa e ʻOtuá kiate kitautolu ʻi ha leʻo “lahi” pe “mālohí”? Ko e hā te tau lava ʻo fai ke tau fanongo lelei ange ai kiate Iá?

Poupouʻi e Ako ʻi ʻApí

Fakaafeʻi ʻa e fānaú ke nau talanoa ki ha taha fekauʻaki mo e ʻaʻahi ʻa Sīsū ki he Ongo ʻAmeliká—kapau ʻe lava, talanoa ki ha taha ʻoku ʻikai ke ʻi ai haʻane ʻilo kau ki aí.

Fakatupulaki ʻEtau Akoʻí

Fakaleleiʻi e ngaahi fakahohaʻasí ʻi he ʻofa. “Taimi ʻe niʻihi ʻe ʻi ai ha tōʻonga ʻa ha taha e fānaú te ne fakahohaʻasi e ako ʻa e toenga ʻo e kalasí. Kapau ʻe hoko ʻeni, faʻa kātaki, angaʻofa pea mo loto mahino ki he faingataʻa ʻoku siʻi fehangahangai mo e kiʻi tamasiʻí/taʻahiné. … Kapau ko e kiʻi tamasiʻi/taʻahine ko ia ʻokú ne fakatupu e fakahohaʻá ʻoku ʻi ai siʻane fie maʻu makehe, talanoa ki he mataotao faingataʻaʻia fakaesino ʻa e uōtí pe siteikí pe vakai ki he disabilities.ChurchofJesusChrist.org ke ʻilo ai e founga ke ke feau lelei ʻaki e ngaahi fie maʻu ko iá” (Ko e Faiako ʻi he Founga ʻa e Fakamoʻuí, 26).