« ថ្ងៃទី ៧–១៣ ខែ ធ្នូ មរ៉ូណៃ ៧–៩ ៖ ‹ សូមឲ្យព្រះគ្រីស្ទលើកកូនឡើង › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ៧–១៣ ខែ ធ្នូ មរ៉ូណៃ ៧–៩ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

មីនើវ៉ា ធៀឆើត ( ១៨៨៨–១៩៧៦ ) មរ៉ូណៃ ៖ សាសន៍នីហ្វៃចុងក្រោយគេ ១៩៤៩–១៩៥១ គំនូរលាបប្រេងលើឈើគូតុងទំហំ ៣៤⅞ x ៤៧ អ៊ីញ ។ សារមន្ទីរសិល្បៈនៃសាកលវិទ្យាល័យព្រិកហាំ យ៉ង់ ឆ្នាំ ១៩៦៩

ថ្ងៃទី ៧–១៣ ខែ ធ្នូ

មរ៉ូណៃ ៧–៩

« សូមឲ្យព្រះគ្រីស្ទលើកកូនឡើង »

សូមសិក្សា មរ៉ូណៃ ៧–៩ ប្រកបដោយការអធិស្ឋាន ដែលនឹងអញ្ជើញព្រះចេស្តានៃព្រះវិញ្ញាណបរិសុទ្ធ ។ ទ្រង់នឹងជួយអ្នកឲ្យយល់ពីតម្រូវការរបស់កុមារនៅក្នុងថ្នាក់របស់អ្នក ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមរំឭកកុមារអំពីអ្វីមួយដែលអ្នកបានអញ្ជើញពួកគេឲ្យធ្វើកាលពីមេរៀនសប្តាហ៍មុន ឬអ្វីដែលពួកគេអាចរៀនជាមួយគ្រួសារពួកគេនាសប្តាហ៍នេះ ។ សូមឲ្យពួកគេចែកចាយអ្វីដែលពួកគេបានរៀន ។

បង្រៀនគោលលទ្ធិ ៖ កុមារតូចៗ

មរ៉ូណៃ ៧:៣៣

ប្រសិនបើខ្ញុំមានសេចក្ដីជំនឿ ខ្ញុំអាចធ្វើអ្វីដែលព្រះតម្រូវឲ្យខ្ញុំធ្វើ ។

កុមារដែលមានសេចក្តីជំនឿលើព្រះយេស៊ូវគ្រីស្ទ និងមានទំនុកចិត្តលើព្រះចេស្តារបស់ទ្រង់អាចសម្រេចនូវកិច្ចការអស្ចារ្យបាន ពេលពួកគេបម្រើទ្រង់ ។

សកម្មភាពដែលអាចជ្រើសរើស

សូមអាន មរ៉ូណៃ ៧:៣៣ ហើយអញ្ជើញកុមារឲ្យក្រោកឈរ ពេលពួកគេឮពាក្យ « សេចក្ដីជំនឿ » ។ សូមពន្យល់ថា យើងបង្ហាញសេចក្ដីជំនឿរបស់យើងលើព្រះយេស៊ូវគ្រីស្ទ ពេលយើងគោរពបទបញ្ញត្តិទ្រង់ ។ សូមជួយកុមារឲ្យធ្វើបញ្ជីមួយនៅលើក្ដារខៀនអំពីអ្វីមួយចំនួនដែលព្រះយេស៊ូវសព្វព្រះទ័យឲ្យពួកគេធ្វើ ដូចជា ការស្តាប់បង្គាប់ឪពុកម្តាយរបស់ពួកគេ ឬការប្រាប់ការពិត ។ សូមថ្លែងទីបន្ទាល់ថា សេចក្ដីជំនឿរបស់យើងលើព្រះយេស៊ូវគ្រីស្ទអាចជួយយើងឲ្យគោរពតាមបទបញ្ញត្តិ ។
សូមបង្ហាញរូបភាពពីរបីដែលបង្ហាញពីមនុស្សមកពីព្រះគម្ពីរមរមន ( ឬគម្ពីរផ្សេងទៀត ) សម្រេចបានកិច្ចការសំខាន់ៗ ដោយសារគាត់មានសេចក្តីជំនឿលើព្រះយេស៊ូវគ្រីស្ទ ( ឧទាហរណ៍ សូមមើល សៀវភៅរូបភាពដំណឹងល្អ លេខ ១៩, ៧០, ៧៨, ៨១ ) ។ សូមជួយកុមារប្រាប់រឿងដែលបានបង្ហាញនៅក្នុងរូបភាព ។ សូមប្រាប់ពួកគេថា ដោយសារមនុស្សទាំងនេះមានសេចក្តីជំនឿលើព្រះយេស៊ូវគ្រីស្ទ នោះពួកគេត្រូវបានផ្តល់អំណាចដើម្បីធ្វើអ្វីដែល ទ្រង់ត្រូវការឲ្យពួកគេធ្វើ ។

មរ៉ូណៃ ៧:៤១

សេចក្ដីជំនឿលើព្រះយេស៊ូវគ្រីស្ទអាចផ្តល់សេចក្តីសង្ឃឹមដល់ខ្ញុំ ។

មានមនុស្សជាច្រើននៅក្នុងពិភពលោកនេះដែលមានអារម្មណ៍ថា ពួកគេគ្មានសង្ឃឹម ។ តើអ្នកអាចជួយកុមារដែលអ្នកបង្រៀនឲ្យរកឃើញសេចក្តីសង្ឃឹមលើព្រះយេស៊ូវគ្រីស្ទដោយរបៀបណា ?

សកម្មភាពដែលអាចជ្រើសរើស

សូមអាន និងពន្យល់ មរ៉ូណៃ ៧:៤១ ដល់កុមារ ហើយសូមពួកគេឲ្យលើកដៃ ពេលពួកគេស្តាប់ឮអ្វីដែលមរមនបាននិយាយថា យើងគួរតែមានសេចក្តីសង្ឃឹមលើវា ។ សូមប្រាប់កុមារអំពីសេចក្តីសង្ឃឹមដែលអ្នកមាន ដោយសារតែព្រះយេស៊ូវគ្រីស្ទ ។
សូមឲ្យកុមារគិតអំពីនរណាម្នាក់ដែលពួកគេស្គាល់ ដែលកំពុងជួបការលំបាកជាមួយនឹងអ្វីមួយ ។ សូមឲ្យកុមារគូររូបភាពសម្រាប់បុគ្គលនោះ ដែលអាចរំឭកគាត់ អំពីការមានសង្ឃឹមលើព្រះយេស៊ូវគ្រីស្ទ ។

មរ៉ូណៃ ៧:៤៧

« សេចក្តីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ » ។

តើបទពិសោធន៍អ្វីខ្លះមកពីជីវិតអ្នកដែលអាចជួយកុមាររៀន ដើម្បីមានសន្តានចិត្តល្អចំពោះមនុស្សដទៃ ហើយប្រព្រឹត្តដាក់ពួកគេដោយសេចក្តីស្រឡាញ់ ?

សកម្មភាពដែលអាចជ្រើសរើស

សូមឲ្យកុមារនិយាយឃ្លានេះជាមួយអ្នកឡើងវិញ « សេចក្តីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ » ( មរ៉ូណៃ ៧:៤៧ ) ។ សូមជួយកុមារឲ្យគិតពីរបៀបដែលព្រះយេស៊ូវគ្រីស្ទ បានបង្ហាញសេចក្តីស្រឡាញ់ដល់មនុស្សដទៃ ( រូបភាពនានាអាចជួយបាន ដូចជា សៀវភៅរូបភាពដំណឹងល្អ លេខ ៥៥, ៨៣, ៨៤ ) ។ តើទ្រង់បានបង្ហាញសេចក្តីស្រឡាញ់ដល់យើងយ៉ាងដូចម្ដេច ? ដូចព្រះយេស៊ូវបានធ្វើ តើយើងអាចបង្ហាញសេចក្ដីស្រឡាញ់ចំពោះនរណា ? ឧទាហរណ៍ សូមបង្ហាញវីដេអូ « My Brother Hyrum » ( ChurchofJesusChrist.org ) ។
សូមអញ្ជើញកុមារឲ្យគូររូបខ្លួនពួកគេ ដែលបង្ហាញសេចក្តីស្រឡាញ់ដល់នរណាម្នាក់ ។ សូមផ្តល់យោបល់ឲ្យពួកគេដាក់រូបភាពនោះនៅកន្លែងដែលវារំឭកពួកគេឲ្យស្រឡាញ់មនុស្សដទៃដូចព្រះយេស៊ូវធ្វើដែរ ។

បង្រៀនគោលលទ្ធិ ៖ កុមារធំៗ

មរ៉ូណៃ ៧:២១–២២, ២៥, ៣៣

ខ្ញុំមានពរ ពេលខ្ញុំមានសេចក្ដីជំនឿលើព្រះយេស៊ូវគ្រីស្ទ ។

មរមនចង់ឲ្យមនុស្សដឹងថា អព្ភូតហេតុនៅតែមាន ទោះជាការងារបម្រើនៅលើផែនដីរបស់ព្រះអង្គសង្គ្រោះចប់ទៅហើយក្ដី ។ ដរាបណាយើងនៅមានសេចក្តីជំនឿលើព្រះយេស៊ូវគ្រីស្ទ នោះយើងអាចធ្វើអ្វីគ្រប់យ៉ាងដែលទ្រង់ត្រូវការឲ្យយើងធ្វើ ដោយមានជំនួយពីទ្រង់—រួមទាំងអព្ភូតហេតុផងដែរ ។

សកម្មភាពដែលអាចជ្រើសរើស

សូមជួយកុមារឲ្យធ្វើបញ្ជីមួយនៅលើក្តារខៀននូវ « កិច្ចការល្អៗ » ដែលយើងទទួលបានតាមរយៈដំណឹងល្អរបស់ព្រះយេស៊ូវគ្រីស្ទ ដូចជាការមានក្រុមគ្រួសារអស់កល្បជានិច្ច ការត្រឡប់ទៅកាន់ព្រះវរបិតាសួគ៌ និងការត្រូវបានអភ័យទោសពីអំពើបាបរបស់យើង ។ បន្ទាប់មក សូមអញ្ជើញកុមារឲ្យអាន មរ៉ូណៃ ៧:២១–២២ និង ២៥ ហើយរកមើលរបៀបដែលយើងអាចទទួលរឿងល្អៗទាំងអស់នេះ ។ តើយើងអាចបង្ហាញសេចក្ដីជំនឿរបស់យើងលើព្រះយេស៊ូវគ្រីស្ទ និងការសន្យារបស់ទ្រង់ដូចម្តេច ?
សូមអាន មរ៉ូណៃ ៧:៣៣ ឲ្យកុមារស្តាប់ ហើយសូមឲ្យពួកគេស្តាប់រកមើលអ្វីដែលយើងអាចធ្វើដើម្បីមានសេចក្តីជំនឿលើព្រះយេស៊ូវគ្រីស្ទ ។ តាមការគួរ សូមចែកចាយបទពិសោធន៍ដែលអ្នកមាន ពេលសេចក្តីជំនឿបានជួយអ្នកធ្វើអ្វីដែលព្រះសព្វព្រះទ័យឲ្យអ្នកធ្វើ ។ សូមជួយកុមារឲ្យគិត និងចែកចាយគំរូមកពីជីវិតរបស់ពួកគេ ។ តើសេចក្តីជំនឿលើព្រះគ្រីស្ទធ្វើឲ្យមានការផ្លាស់ប្តូរនៅក្នុងគំរូទាំងនេះយ៉ាងដូចម្តេច ?

មរ៉ូណៃ ៧:៤០–៤១; ៩:២៥–២៦

ខ្ញុំអាចមានសេចក្ដីសង្ឃឹមលើព្រះយេស៊ូវគ្រីស្ទ ទោះបីនៅក្នុងការសាកល្បងលំបាកក្ដី ។

មរមន និង មរ៉ូណៃ បានប្រឈមមុខនឹងកាលៈទេសៈនៃការបាក់ទឹកចិត្ត ប៉ុន្តែពួកគេរកឃើញសេចក្តីសង្ឃឹមលើព្រះអង្គសង្គ្រោះព្រះយេស៊ូវគ្រីស្ទ ។ តើអ្នកអាចជួយកុមារឲ្យរកឃើញសេចក្តីសង្ឃឹមលើព្រះគ្រីស្ទ ពេលពួកគេបាក់ទឹកចិត្តដោយរបៀបណា ?

សកម្មភាពដែលអាចជ្រើសរើស

សូមជួយកុមារឲ្យសរសេរបញ្ហាពីរបី ដែលអាចធ្វើឲ្យមនុស្សមានអារម្មណ៍បាក់ទឹកចិត្ត ឬគ្មានសង្ឃឹម ។ សូមអញ្ជើញកុមារឲ្យអាន មរ៉ូណៃ ៧:៤០–៤១ និង ៩:២៥–២៦ ដោយរកមើលអ្វីដែលអាចជួយនរណាម្នាក់ដែលមានអារម្មណ៍បាក់ទឹកចិត្ត ។ សូមប្រាប់ពួកគេអំពីរបៀបដែលព្រះយេស៊ូវគ្រីស្ទ និងដំណឹងល្អរបស់ទ្រង់បានជួយអ្នកអំឡុងគ្រាលំបាកៗ ។
សូមអញ្ជើញកុមារឲ្យសរសេរសារលិខិតមួយទៅកាន់នរណាម្នាក់ ដែលមានអារម្មណ៍បាក់ទឹកចិត្ត ដើម្បីជួយគាត់ឲ្យរកឃើញសេចក្តីសង្ឃឹមលើព្រះគ្រីស្ទ ដូចមរមនបានធ្វើដល់កូនប្រុសរបស់លោកនៅក្នុង មរ៉ូណៃ ៩:២៥–២៦ ។ សូមលើកទឹកចិត្តកុមារឲ្យប្រើពាក្យ និងឃ្លានានាមកពីខគម្ពីរទាំងនេះនៅក្នុងសារលិខិតរបស់ពួកគេ ។
សូមដាក់ទឹកឲ្យពេញកែវថ្លាមួយ ហើយទម្លាក់វត្ថុពីរទៅក្នុងដបនោះ—វត្ថុមួយលិចទៅក្នុងទឹក វត្ថុមួយទៀតអណ្តែតលើទឹក ។ សូមប្រៀបធៀបវត្ថុអណ្តែតលើទឹកទៅនឹងមនុស្សម្នាក់ដែលមានសេចក្តីសង្ឃឹមលើព្រះគ្រីស្ទ ។ សូមអាន មរ៉ូណៃ ៩:២៥ ជាមួយគ្នា ។ តើព្រះគ្រីស្ទ « លើក [ យើង ] ឡើង » ពេលយើងប្រឈមមុខនឹងការសាកល្បងលំបាកៗដោយរបៀបណា ? សូមជួយឲ្យកុមារគិតអំពីរបៀបនានា ដែលពួកគេអាចរក្សាព្រះអង្គសង្គ្រោះ និងការបង្រៀនដ៏លើកទឹកចិត្តរបស់ទ្រង់ « ស្ថិតនៅក្នុងគំនិត [ របស់ពួកគេ ] ជារៀងរហូតតទៅ » ។

មរ៉ូណៃ ៧:៤៥–៤៨

« សេចក្តីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ » ។

ការអភិវឌ្ឍអំណោយទាននៃសេចក្តីសប្បុរសគឺជាគោលដៅពេញមួយជីវិត ។ តើអ្នកអាចបំផុសគំនិតកុមារឲ្យស្វែងរកសេចក្តីស្រឡាញ់ដ៏សុទ្ធសាធរបស់ព្រះគ្រីស្ទដោយរបៀបណា ?

សកម្មភាពដែលអាចជ្រើសរើស

សូមអញ្ជើញកុមារឲ្យចែកចាយអ្វីដែលពួកគេគិតអំពីអត្ថន័យនៃពាក្យ « សេចក្ដីសប្បុរស » ។ បន្ទាប់មក សូមអញ្ជើញកុមារម្នាក់ឲ្យអាន មរ៉ូណៃ ៧:៤៥ ។ ( ប្រសិនបើពាក្យមួយចំនួននៅក្នុងខគម្ពីរនេះពិបាកយល់ សូមជួយកុមារឲ្យមើលពាក្យទាំងនោះនៅក្នុងវចនានុក្រម ) ។ សូមឲ្យកុមារនិយាយអំពីមនុស្សដែលពួកគេដឹងថា ជាគំរូល្អស្តីពីសេចក្តីសប្បុរស ។ ហេតុអ្វីសេចក្តីសប្បុរសត្រូវបានហៅថា « សេចក្ដីស្រឡាញ់ដ៏សុទ្ធសាធនៃព្រះគ្រីស្ទ » ? ( មរ៉ូណៃ ៧:៤៧ ) ។ តើ ខទី ៤៨ បង្រៀនយើងអ្វីខ្លះអំពីរបៀបដែលយើងអាចពោរពេញដោយសេចក្តីសប្បុរស ? សូមលើកទឹកចិត្តកុមារម្នាក់ៗឲ្យអធិស្ឋានទូលសូមសេចក្ដីសប្បុរសសប្តាហ៍នេះ ហើយរកមើលរបៀបនានាដើម្បីបង្ហាញសេចក្តីសប្បុរដល់មនុស្សដទៃ ។
សូមជួយកុមារឲ្យគិតអំពីរបៀបនានាដែលព្រះយេស៊ូវគ្រីស្ទបានបង្ហាញសេចក្តីសប្បុរស ( ឧទាហរណ៍សូមមើល លូកា ២៣:៣៤; យ៉ូហាន ៨:១–១១; អេធើរ ១២:៣៣–៣៤ ) ។ តើយើងអាចធ្វើតាមគំរូរបស់ទ្រង់យ៉ាងដូចម្ដេច ?
សូមឲ្យកុមារសរសេរឈ្មោះមនុស្សដែលពួកគេស្គាល់នៅលើក្រដាស ហើយដាក់វានៅក្នុងថង់ ឬប្រអប់តូចមួយ ។ សូមអញ្ជើញពួកគេដើម្បីដបរបស់ពួកគេទៅផ្ទះ សូមជ្រើសរើសឈ្មោះមកពីដបនោះរាល់ថ្ងៃ ហើយធ្វើអ្វីដែលបង្ហាញសេចក្តីស្រឡាញ់ដល់បុគ្គលនោះ ។ នៅក្នុងមេរៀនខាងមុខទៀត សូមអញ្ជើញពួកគេឲ្យចែកចាយបទពិសោធន៍របស់ពួកគេដែលបម្រើមនុស្សទាំងនេះ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមលើកទឹកចិត្តកុមារឲ្យគិតអំពីនរណាម្នាក់ដែលអាចកំពុងស្វែងរកសេចក្តីជំនឿ ឬសេចក្តីសង្ឃឹមលើព្រះយេស៊ូវគ្រីស្ទកាន់តែខ្លាំងឡើង ។ សូមអញ្ជើញកុមារឲ្យចែកចាយជាមួយបុគ្គលនោះនូវអ្វីដែលពួកគេបានរៀននៅក្នុងថ្នាក់ថ្ងៃនេះ ។

ការកែលម្អការបង្រៀនរបស់យើង

លើកទឹកចិត្តឲ្យមានគារវភាព ។ ផ្នែកដ៏សំខាន់មួយនៃគារវភាពគឺជាការគិតដល់ព្រះវរបិតាសួគ៌ និងព្រះយេស៊ូវគ្រីស្ទ ។ អ្នកអាចរំឭកកុមារឲ្យមានគារវភាពបាន ដោយការច្រៀង ឬច្រៀងគ្រហ៊ឹមបន្ទរបទចម្រៀងមួយដោយស្ងាត់ស្ងៀម ឬការបង្ហាញរូបភាពព្រះយេស៊ូវមួយសន្លឹក ។

ទំព័រសកម្មភាព ៖ សេចក្តីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ