« ថ្ងៃទី ២១–២៧ ខែ ធ្នូ បុណ្យគ្រីស្ទម៉ាស់ ៖ ‹ ទ្រង់នឹងយាងមកឯលោកិយ ដើម្បីមកប្រោសលោះរាស្ត្ររបស់ទ្រង់ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២១–២៧ ខែ ធ្នូ បុណ្យគ្រីស្ទម៉ាស់ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០២០
មើលន៎ កូនចៀមនៃព្រះ ដោយ វ៉លធើរ រ៉េន
ថ្ងៃទី ២១–២៧ ខែ ធ្នូ
បុណ្យគ្រីស្ទម៉ាស់
« ទ្រង់នឹងយាងមកឯលោកិយ ដើម្បីមកប្រោសលោះរាស្ត្ររបស់ទ្រង់ »
ជារឿយៗ កុមារអន្ទះសារចង់និយាយអំពីរបៀបដែលពួកគេសាទរដល់បុណ្យគ្រីស្ទម៉ាស់ ។ សូមពិចារណាអំពីអ្វីដែលអ្នកអាចធ្វើដើម្បីជួយពួកគេឲ្យផ្តោតចិត្តលើព្រះយេស៊ូវគ្រីស្ទ និងអំណរគុណរបស់ពួកគេសម្រាប់ការប្រសូតរបស់ទ្រង់ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមអញ្ជើញកុមារឲ្យប្រាប់ ឬគូររូបភាពអំពីអ្វីដែលគ្រួសាររបស់ពួកគេធ្វើនៅរដូវបុណ្យគ្រីស្ទម៉ាស់ ដើម្បីជួយពួកគេឲ្យចងចាំដល់ព្រះយេស៊ូវគ្រីស្ទ ។
បង្រៀនគោលលទ្ធិ ៖ កុមារតូចៗ
នីហ្វៃទី១ ១១:១៣–២២; ម៉ូសាយ ៣:៥–៨; អាលម៉ា ៧:៩–១៣; ហេលេមិន ១៤:១–៦; នីហ្វៃទី៣ ១:១៥, ១៩–២១
ព្រះយេស៊ូវគ្រីស្ទបានប្រសូតមកដើម្បីធ្វើជាព្រះអង្គសង្គ្រោះរបស់ខ្ញុំ ។
តើកុមារដែលអ្នកបង្រៀនដឹងពីមូលហេតុដែលយើងសាទរដល់បុណ្យគ្រីស្ទម៉ាស់ដែរឬទេ ? តើអ្នកអាចជួយពួកគេឲ្យយល់ពីមូលហេតុនៃការប្រសូតរបស់ព្រះយេស៊ូវគឺជាមូលហេតុសម្រាប់ការសាទរនេះយ៉ាងដូចម្ដេច ?
សកម្មភាពដែលអាចជ្រើសរើស
-
សូមប្រាប់អំពីការប្រសូតរបស់ព្រះយេស៊ូវ ដោយបង្ហាញរូបភាពពេលអ្នកប្រាប់រឿងនោះ ( ដូចជា សៀវភៅរូបភាពដំណឹងល្អ លេខ ២៨, ២៩, ៣០, ៣១ ) ។ សូមឲ្យកុមារចែកចាយអ្វីដែលពួកគេដឹង ។ សូមប្រើទំព័រសកម្មភាពសម្រាប់សប្ដាហ៍នេះដើម្បីបង្រៀនកុមារថា មនុស្សរស់នៅជំនាន់ព្រះគម្ពីរមរមនបានដឹងអំពីការប្រសូតរបស់ព្រះយេស៊ូវ ។
-
សូមអានឃ្លាគន្លឹះមកពី អាលម៉ា ៧:១១–១២ ដើម្បីបង្រៀនកុមារអំពីអ្វីដែលព្រះយេស៊ូវបានធ្វើសម្រាប់យើង ។ សូមចែកចាយមូលហេតុដែលអ្នកមានអំណរគុណដែលព្រះយេស៊ូវគ្រីស្ទបានប្រសូត ហើយបង្ហាញអារម្មណ៍របស់អ្នកអំពីពលិកម្មដ៏ធួនរបស់ទ្រង់ ។
-
សូមបង្ហាញរូបភាពដែលបង្ហាញពីពលិកម្មដ៏ធួនរបស់ព្រះអង្គសង្គ្រោះ—ដូចជាការរងទុក្ខនៅក្នុងសួនច្បារគែតសេម៉ានី ការសុគតនៅលើឈើឆ្កាង និងការមានព្រះជន្មរស់ឡើងវិញ ( សូមមើល សៀវភៅរូបភាពដំណឹងល្អ លេខ ៥៦, ៥៧, ៥៨, ៥៩ ) ។ សូមឲ្យកុមារប្រាប់អ្នកអំពីអ្វីដែលពួកគេឃើញនៅក្នុងរូបភាព ។ សូមជួយពួកគេឲ្យយល់ថា ព្រះវរបិតាសួគ៌បានបញ្ជូនព្រះយេស៊ូវគ្រីស្ទមកកាន់ផែនដី ដើម្បីរងទុក្ខសម្រាប់អំពើបាបរបស់យើង សុគត់សម្រាប់យើង ហើយមានព្រះជន្មរស់ឡើងវិញ ដើម្បីយើងអាចត្រឡប់ទៅរស់នៅជាមួយទ្រង់វិញ ។
-
សូមច្រៀងចម្រៀងមួយបទអំពីព្រះយេស៊ូវគ្រីស្ទជាមួយកុមារ ដូចជាបទ « ទ្រង់បញ្ជូនបុត្រាទ្រង់មក » ឬបទ « ផ្ទុំនៅក្នុងស្នូក » ( សៀវភៅចម្រៀងកុមារ ២០–២១, ២៦–២៧ ) ។ សូមចង្អុលទៅឃ្លានានានៅក្នុងចម្រៀង ដែលពិពណ៌នាអំពីពរជ័យដែលយើងមានដោយសារការប្រសូតរបស់ព្រះយេស៊ូវ ។
ព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ ។
ពេលអ្នកបញ្ចប់ការសិក្សាព្រះគម្ពីរមរមនរបស់អ្នកឆ្នាំនេះ សូមរំឭកកុមារថា គម្ពីរនេះគឺជា « សក្ខីយបទមួយទៀតអំពីព្រះយេស៊ូវគ្រីស្ទ » ដែលបានសរសេរឡើងដើម្បីជួយយើងឲ្យមករកទ្រង់ ។
សកម្មភាពដែលអាចជ្រើសរើស
-
សូមលើកព្រះគម្ពីរមរមនមួយក្បាលឡើងឲ្យកុមារមើល ។ សូមអានចំណងជើង ហើយចង្អុលទៅពាក្យ « សក្ខីយបទមួយទៀតអំពីព្រះយេស៊ូវគ្រីស្ទ » ។ សូមឲ្យកុមារឆ្លាស់វេនគ្នាកាន់ព្រះគម្ពីរនោះ ហើយជួយពួកគេឲ្យរកមើលព្រះនាមរបស់ព្រះអង្គសង្គ្រោះនៅលើគម្របព្រះគម្ពីរ ។ សូមប្រាប់កុមារអំពីអារម្មណ៍របស់អ្នកស្តីពីព្រះគម្ពីរមរមន និងរបៀបដែលវាបានជួយអ្នកឲ្យរៀនពីព្រះយេស៊ូវគ្រីស្ទ ។
-
សូមឲ្យរូបភាពព្រះយេស៊ូវមួយសន្លឹកទៅកុមារម្នាក់ៗ ឬឲ្យពួកគេគូររូបទ្រង់ដោយខ្លួនពួកគេផ្ទាល់ ។ សូមអញ្ជើញពួកគេឲ្យកាន់រូបភាពរបស់ពួកគេឡើង គ្រប់ពេលដែលពួកគេឮព្រះនាមរបស់ព្រះគ្រីស្ទ ពេលអ្នកអាន នីហ្វៃទី២ ២៥:២៣, ២៦ ។ សូមថ្លែងទីបន្ទាល់ថា ព្រះគម្ពីរមរមនត្រូវបានសរសេរឡើងដើម្បីជួយយើង « ឲ្យជឿដល់ព្រះគ្រីស្ទ » ( នីហ្វៃទី២ ២៥:២៣ ) ។
-
សូមចែកចាយវគ្គបទគម្ពីរ ឬរឿងមួយមកពីព្រះគម្ពីរមរមនដែលអ្នកចូលចិត្តដែលជួយអ្នករៀនពីព្រះយេស៊ូវគ្រីស្ទដល់កុមារ ។ សូមសួរកុមារអំពីរឿងនៅក្នុងព្រះគម្ពីរមរមនដែលពួកគេចូលចិត្ត ហើយជួយពួកគេឲ្យឃើញពីរបៀបដែលរឿងទាំងនេះ ជួយយើងឲ្យរៀនពីព្រះអង្គសង្គ្រោះ ហើយខិតកាន់តែជិតទ្រង់ ។ ការមើលរូបភាពមួយចំនួននៅក្នុង ដំណើររឿងព្រះគម្ពីរមរមន អាចជួយពួកគេឲ្យចងចាំអំពីរឿងទាំងនោះ ។
បង្រៀនគោលលទ្ធិ ៖ កុមារធំៗ
នីហ្វៃទី១ ១១:១៣–២២; ម៉ូសាយ ៣:៥–៨; អាលម៉ា ៧:១០–១៣; ហេលេមិន ១៤:១–៦; នីហ្វៃទី៣ ១:១៥, ១៩–២១
ព្រះយេស៊ូវគ្រីស្ទបានប្រសូតមកដើម្បីធ្វើជាព្រះអង្គសង្គ្រោះរបស់ខ្ញុំ ។
សូមពិចារណាពីរបៀបដែលអ្នកអាចជួយកុមារបានល្អបំផុត ដើម្បីយល់ពីសារៈសំខាន់នៃការប្រសូតរបស់ព្រះគ្រីស្ទ និងអត្ថន័យនៃការប្រសូតនោះសម្រាប់ពួកគេ ។
សកម្មភាពដែលអាចជ្រើសរើស
-
សូមឲ្យកុមារម្នាក់ៗនូវសេចក្តីយោងបទគម្ពីរដែលមាននៅលើទំព័រសកម្មភាពនាសប្ដាហ៍នេះ ។ សូមអញ្ជើញពួកគេម្នាក់ៗឲ្យអានខគម្ពីរ ស្វែងរកព្យាការីដែលនិយាយ ហើយចែកចាយអ្វីមួយដែលព្យាការីនេះបានដឹងអំពីព្រះយេស៊ូវគ្រីស្ទ ។ ប្រសិនបើចាំបាច់ សូមជួយពួកគេ ឬឲ្យពួកគេធ្វើការរួមគ្នា ។
-
សូមធ្វើបញ្ជីមួយនៅលើក្តារខៀនអំពីព្រឹត្តិការណ៍មួយចំនួនជុំវិញការប្រសូតរបស់ព្រះយេស៊ូវ ដូចបានពិពណ៌នានៅក្នុង លូកា ២:៤–១៤; ម៉ាថាយ ២:១–២ និង នីហ្វៃទី៣ ១:១៥, ១៩–២១ ។ សូមជួយកុមារឲ្យស្រាវជ្រាវខគម្ពីរទាំងនេះ ដើម្បីកំណត់ថា តើព្រឹត្តិការណ៍នេះបានកើតឡើងនៅបេថ្លេហិម ទ្វីបអាមេរិក ឬទាំងពីរកន្លែង ។ ហេតុអ្វីយើងមានអំណរគុណដែលមានព្រះគម្ពីរមរមនជាសាក្សីទីពីរអំពីការប្រសូតរបស់ព្រះយេស៊ូវគ្រីស្ទ និងបេសកកម្មរបស់ទ្រង់ក្នុងនាមជាព្រះអង្គសង្គ្រោះ ?
-
សូមអាន អាលម៉ា ៧:១០–១៣ ជាមួយកុមារ ។ តើយើងរៀនអ្វីខ្លះ មកពីខគម្ពីរទាំងនេះអំពីការប្រសូតរបស់ព្រះយេស៊ូវ ? អំពីភាពជាព្រះរបស់ទ្រង់ ? អំពីបេសកកម្មនៅលើផែនដីរបស់ទ្រង់ ? សូមអញ្ជើញកុមារឲ្យចែកចាយមូលហេតុដែលពួកគេមានអំណរគុណចំពោះព្រះយេស៊ូវគ្រីស្ទ ហើយចែកចាយទីបន្ទាល់របស់អ្នកអំពីទ្រង់ ។
នីហ្វៃទី២ ២៥:២៣, ២៦; ៣៣:៤, ១០
ព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ ។
ដោយថ្លែងពីព្រះគម្ពីរមរមន នោះព្យាការីយ៉ូសែប ស្ម៊ីធ បានមានប្រសាសន៍ថា « បុគ្គលម្នាក់ៗអាចចូលទៅជិតព្រះបាន ដោយសារធ្វើតាមសិក្ខាបទទាំងឡាយនៃគម្ពីរនេះជាជាងគម្ពីរដទៃទាំងអស់ » ( បុព្វកថានៃព្រះគម្ពីរមរមន ) ។ តើអ្នកអាចជួយកុមារឲ្យយល់ពីការសន្យានេះដោយរបៀបណា ?
សកម្មភាពដែលអាចជ្រើសរើស
-
សូមឲ្យខគម្ពីរមួយខាងក្រោមនេះទៅកុមារម្នាក់ៗ ៖ នីហ្វៃទី២ ២៥:២៣, ២៦; ៣៣:៤, ១០ ។ សូមអញ្ជើញកុមារឲ្យអានខគម្ពីររបស់ពួកគេ ហើយរកមើលអ្វីដែលព្យាការីក្នុងព្រះគម្ពីរមរមនចង់ឲ្យយើងដឹង ។ សូមឲ្យពួកគេសរសេរអ្វីដែលពួកគេរកឃើញនៅលើក្តារខៀន ។ សូមពន្យល់ថា រឿងទាំងនេះពិពណ៌នាអំពីគោលបំណងសំខាន់នៃព្រះគម្ពីរមរមន ។ សូមឲ្យកុមារដើរតួសម្តែងជាមួយគ្នា អំពីរបៀបដែលពួកគេនឹងពន្យល់មិត្តភក្តិម្នាក់អំពីគោលបំណងសំខាន់នៃព្រះគម្ពីរមរមន ។
-
សូមចែកចាយជាមួយនឹងកុមារនូវវគ្គបទគម្ពីរមួយ ឬរឿងមកពីព្រះគម្ពីរមរមនដែលអ្នកចូលចិត្តដែលជួយអ្នកឲ្យរៀនពីព្រះយេស៊ូវគ្រីស្ទ ។ សូមសួរកុមារអំពីរឿងនៅក្នុងព្រះគម្ពីរមរមនដែលពួកគេចូលចិត្ត ហើយជួយពួកគេឲ្យឃើញពីរបៀបដែលរឿងទាំងនេះ ជួយយើងឲ្យរៀនពីព្រះអង្គសង្គ្រោះ ហើយខិតកាន់តែជិតទ្រង់ ។ សូមចែកចាយជាមួយកុមារអំពីរបៀបដែលព្រះគម្ពីរមរមនបានជួយអ្នកឲ្យដឹងថា ព្រះយេស៊ូវគឺជាព្រះគ្រីស្ទ ។ សូមលើកទឹកចិត្តកុមារឲ្យគិតអំពីខគម្ពីរ ឬរឿងមួយមកពីព្រះគម្ពីរមរមនដែលពង្រឹងដល់ជំនឿរបស់ពួកគេលើព្រះយេស៊ូវគ្រីស្ទ ។ សូមឲ្យពួកគេចែកចាយវាជាមួយមិត្តភក្តិ ឬសមាជិកគ្រួសារម្នាក់ ដែលពុំស្គាល់ព្រះគម្ពីរមរមន ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយជាមួយគ្រួសារពួកគេអំពីរបៀបដែលព្រះគម្ពីរមរមនបានជួយពួកគេឲ្យរៀនបន្ថែមទៀតអំពីព្រះគ្រីស្ទ ។ សូមលើកទឹកចិត្តពួកគេឲ្យចែកចាយខគម្ពីរ ឬរឿងមួយមកពីព្រះគម្ពីរមរមនទុកជាផ្នែកមួយនៃទីបន្ទាល់របស់ពួកគេ ។
ការកែលម្អការបង្រៀនរបស់យើង
កុមារចូលចិត្តស្តាប់រឿង ។ រឿងគឺជារបៀបដ៏ល្អបំផុតដើម្បីជួយកុមារឲ្យរៀន និងចងចាំដល់សេចក្តីពិត ។ ពេលអ្នកចែកចាយរឿងអំពីការប្រសូតរបស់ព្រះយេស៊ូវ សូមពិចារណាអំពីការចែកចាយរឿងពីជីវិតអ្នកផងដែរ ដែលវាបានជួយពង្រឹងសេចក្តីជំនឿរបស់អ្នកលើព្រះអង្គសង្គ្រោះ ។