« ថ្ងៃទី ៣០ ខែ វិច្ឆិកា–ថ្ងៃទី ៦ ខែ ធ្នូ មរ៉ូណៃ ១–៦ ៖ ‹ ដើម្បីរក្សាពួកគេឲ្យនៅក្នុងផ្លូវត្រូវ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ៣០ ខែ វិច្ឆិកា–ថ្ងៃទី ៦ ខែ ធ្នូ មរ៉ូណៃ ១–៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

មីនើវ៉ា ធៀឆើត ( ១៨៨៨–១៩៧៦ ) អាលម៉ាជ្រមុជទឹកនៅក្នុងទឹកមរមន ១៩៤៩–១៩៥១ គំនូរប្រេងលើឈើគូតុងទំហំ ៣៥⅞ x ៤៨ អ៊ីញ ។ សារមន្ទីរសិល្បៈនៃសាកលវិទ្យាល័យព្រិកហាំ យ៉ង់ ឆ្នាំ ១៩៦៩

ថ្ងៃទី ៣០ ខែ វិច្ឆិកា–ថ្ងៃទី ៦ ខែ ធ្នូ

មរ៉ូណៃ ១–៦

« ដើម្បីរក្សាពួកគេឲ្យនៅក្នុងផ្លូវត្រូវ »

ពីមុនអ្នកចាប់ផ្តើមផែនការសកម្មភាពរៀនសូត្រសម្រាប់កុមារ សូមសិក្សា មរ៉ូណៃ ១–៦ ប្រកបដោយការអធិស្ឋាន ដោយរកមើលគោលការណ៍ និងខគម្ពីរនានា ដែលអ្នកមានអារម្មណ៍ថាពួកគេត្រូវយល់ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមអញ្ជើញកុមារឲ្យចែកចាយអ្វីដែលពួកគេបានរៀនអំពីមរ៉ូណៃ ។ អ្នកអាចប្រើ « ជំពូកទី ៥៣ ៖ មរ៉ូណៃ និងការបង្រៀនរបស់លោក » ( ដំណើររឿងព្រះគម្ពីរមរមន ទំព័រ ១៥៤–១៥៥ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ដើម្បីជួយពួកគេឲ្យចាំ ។

បង្រៀនគោលលទ្ធិ ៖ កុមារតូចៗ

មរ៉ូណៃ ៤–៥

ខ្ញុំទទួលទានសាក្រាម៉ង់ ដើម្បីបង្ហាញថា ខ្ញុំនឹងចងចាំព្រះយេស៊ូវគ្រីស្ទជានិច្ច ។

ពិធីសាក្រាម៉ង់អាចក្លាយជាបទពិសោធន៍ខាងវិញ្ញាណដ៏ពិសិដ្ឋមួយ—សូម្បីតែសម្រាប់កុមារតូចៗក្តី ។ តើអ្នកអាចជួយកុមារដែលអ្នកបង្រៀនឲ្យប្រើពេលវេលា អំឡុងពេលសាក្រាម៉ង់ឲ្យគិតអំពីព្រះយេស៊ូវដោយរបៀបណា ?

សកម្មភាពដែលអាចជ្រើសរើស

សូមបង្ហាញរូបភាពមនុស្សទទួលទានសាក្រាម៉ង់ ( សូមមើល សៀវភៅរូបភាពដំណឹងល្អ លេខ ១០៨ ) ។ សូមឲ្យកុមារប្រាប់អ្នកអំពីអ្វីកើតឡើងអំឡុងពេលសាក្រាម៉ង់ ។ តើយើងគួរតែធ្វើអ្វីខ្លះអំឡុងពេលសាក្រាម៉ង់ ?
សូមអញ្ជើញសមាជិកវួដពីរនាក់មកថ្នាក់របស់អ្នក ដើម្បីអាន មរ៉ូណៃ ៤:៣ និង ៥:២ ឲ្យកុមារស្តាប់ ហើយចែកចាយពីមូលហេតុដែលពួកគេទទួលទានសាក្រាម៉ង់រៀងរាល់សប្តាហ៍ ។ សូមឲ្យពួកគេផ្តល់យោបល់នូវអ្វីដែលកុមារអាចធ្វើ ដើម្បីជួយពួកគេឲ្យគិតអំពីព្រះយេស៊ូវអំឡុងពេលសាក្រាម៉ង់ ហើយចងចាំដល់ទ្រង់ជានិច្ច ។
សូមច្រៀងចម្រៀងមួយបទដែលជួយកុមារគិតអំពីព្រះយេស៊ូវ ដូចជាបទ « ដោយគោរព ដោយស្ងៀមស្ងាត់ » ( សៀវភៅចម្រៀងកុមារ ទំព័រ ១១ ) ។ សូមឲ្យកុមារហាត់អនុវត្តការអង្គុយដោយគារវភាពដូចពួកគេអង្គុយអំឡុងពេលសាក្រាម៉ង់ ។

មរ៉ូណៃ ៦:១–៣

ខ្ញុំអាចរៀបចំខ្លួនដើម្បីទទួលបុណ្យជ្រមុជទឹក ។

ការពិពណ៌នារបស់មរ៉ូណៃអំពីមនុស្សដែលទទួលបុណ្យជ្រមុជទឹកនៅជំនាន់របស់លោក អាចជួយកុមារឲ្យរៀបចំទទួលពិធីបរិសុទ្ធសំខាន់នេះនាបច្ចុប្បន្ននេះ ។

សកម្មភាពដែលអាចជ្រើសរើស

សូមអាននានាឃ្លាមកពី មរ៉ូណៃ ៦:១–៣ ដែលបង្រៀនថា នរណាអាចទទួលបុណ្យជ្រមុជទឹក ។ សូមពន្យល់ពាក្យដែលកុមារពុំអាចយល់បាន ។ ឧទាហរណ៍ អត្ថន័យនៃពាក្យ « ចិត្តសង្រេង និងវិញ្ញាណទន់ទាប » គឺអារម្មណ៍សោកស្តាយចំពោះអំពើបាបរបស់យើង ( មរ៉ូណៃ ៦:២ ) ។ សូមប្រាប់អំពីរបៀបដែលអ្នកបានរៀបចំខ្លួនដើម្បីទទួលបុណ្យជ្រមុជទឹក ឬសួរនរណាម្នាក់ដែលទើបតែទទួលបុណ្យជ្រមុជទឹក ឲ្យពន្យល់ពីរបៀបគាត់បានរៀបចំខ្លួន ។ សូមជួយកុមារឲ្យគិតអំពីរបៀបនានាដែលពួកគេអាចរៀបចំខ្លួនទទួលបុណ្យជ្រមុជទឹកនាថ្ងៃណាមួយ ។
សូមបង្ហាញរូបភាពមនុស្សទទួលបុណ្យជ្រមុជទឹក ( សូមមើល សៀវភៅរូបភាពដំណឹងល្អ លេខ ១០៣, ១០៤ ) ហើយសូមឲ្យកុមារនិយាយអំពីអ្វីដែលពួកគេឃើញនៅក្នុងរូបភាព ។ សូមជួយពួកគេឲ្យកត់សម្គាល់ភាពលម្អិតនានា ដូចជាទឹក និងសម្លៀកបំពាក់ពណ៌ស ។ សូមសួរកុមារពីមូលហេតុដែលយើងទទួលបុណ្យជ្រមុជទឹក ហើយសូមពន្យល់ពីមូលហេតុដែលអ្នកជ្រើសរើសទទួលបុណ្យជ្រមុជទឹក ។

មរ៉ូណៃ ៦:៤–៦, ៩

ខ្ញុំមានពរ ពេលខ្ញុំទៅព្រះវិហារ ។

តើកុមារដែលអ្នកបង្រៀន យល់អំពីមូលហេតុដែលពួកគេទៅព្រះវិហាររៀងរាល់សប្តាហ៍ដែរឬទេ ? មរ៉ូណៃ ៦ ផ្តល់ហេតុផលសំខាន់ៗមួយចំនួន ។

សកម្មភាពដែលអាចជ្រើសរើស

សូមសួរកុមារពីមូលហេតុដែលពួកគេចូលចិត្តទៅព្រះវិហារ ហើយជួយពួកគេឲ្យប្រាប់ពីអ្វីមួយចំនួនដែលពួកគេធ្វើនៅព្រះវិហារ ។ សូមអានអ្វីមួយចំនួននេះមកពី មរ៉ូណៃ ៦:៤–៦, ៩ ឲ្យពួកគេស្តាប់ ហើយអញ្ជើញពួកគេឲ្យសម្តែង ឬគូររូបភាពអំពីខ្លួនពួកគេធ្វើកិច្ចការទាំងនេះ ( ដូចជាអធិស្ឋាន បង្រៀន ច្រៀង និងទទួលទានសាក្រាម៉ង់ ) ។
សូមជួយកុមារឲ្យច្រៀងចម្រៀងមួយបទអំពីការចូលរួមព្រះវិហារ ដូចជាបទ « When I Go to Church » ( Children’s Songbook ទំព័រ ១៥៧ ) ។ សូមប្រាប់កុមារពីមូលហេតុដែលអ្នកចូលចិត្តទៅព្រះវិហារ និងរបៀបដែលវាផ្តល់ពរដល់អ្នក ។

បង្រៀនគោលលទ្ធិ ៖ កុមារធំៗ

មរ៉ូណៃ ២–៦

ព្រះវិញ្ញាណបរិសុទ្ធគឺជាអំណោយទានដ៏ពិសិដ្ឋ ។

ព្រះវិញ្ញាណបរិសុទ្ធត្រូវបានថ្លែងបីបួនដងនៅក្នុង មរ៉ូណៃ ២–៦ ។ តើអ្នកអាចប្រើជំពូកទាំងនេះដើម្បីជួយកុមារឲ្យយល់ពីរបៀប ដែលព្រះវិញ្ញាណបរិសុទ្ធអាចជួយពួកគេដោយរបៀបណា ?

សកម្មភាពដែលអាចជ្រើសរើស

សូមឲ្យកុមាររកមើលគ្រប់ខគម្ពីរមួយនៅក្នុង មរ៉ូណៃ ២–៦ ដែលលើកឡើងពីព្រះវិញ្ញាណបរិសុទ្ធ ឬព្រះវិញ្ញាណ ។ សូមអានខគម្ពីរទាំងនេះជាមួយគ្នា ហើយសូមអញ្ជើញកុមារឲ្យធ្វើបញ្ជីមួយនៅលើក្តារខៀន អំពីអ្វីដែលពួកគេរៀនអំពីព្រះវិញ្ញាណបរិសុទ្ធ ។ តើព្រះវិញ្ញាណបរិសុទ្ធអាចជួយយើងដូចម្តេច ?
សូមប្រាប់កុមារពីគ្រាមួយ ពេលអ្នកទទួលអារម្មណ៍នៃឥទ្ធិពលពីព្រះវិញ្ញាណបរិសុទ្ធ ទោះនៅព្រះវិហារ ឬនៅកន្លែងផ្សេងទៀតក្តី ។ សូមពន្យល់របៀបដែលអ្នកដឹងថា ទ្រង់ជាព្រះវិញ្ញាណបរិសុទ្ធ និងរបៀបដែលទ្រង់បានជួយអ្នក ។ សូមឲ្យកុមារចែកចាយបទពិសោធន៍ដែលពួកគេមានជាមួយព្រះវិញ្ញាណបរិសុទ្ធ ហើយលើកទឹកចិត្តពួកគេឲ្យស្វែងរកឥទ្ធិពលរបស់ទ្រង់ ។

អំណោយទាននៃព្រះវិញ្ញាណបរិសុទ្ធត្រូវបានប្រគល់ឲ្យដោយការដាក់ដៃលើ ។

មរ៉ូណៃ ៤–៥

ខ្ញុំទទួលទានសាក្រាម៉ង់ ដើម្បីបង្ហាញថា ខ្ញុំនឹងចងចាំដល់ព្រះយេស៊ូវគ្រីស្ទជានិច្ច ។

ពេលកុមារយល់ពីភាពពិសិដ្ឋនៃពិធីសាក្រាម៉ង់ នោះពួកគេទំនងជាប្រព្រឹត្តនឹងពិធីនេះដោយគារវភាព ហើយមានអារម្មណ៍ខិតជិតព្រះ អំឡុងពេលនៃពិធីបរិសុទ្ធនេះ ។

សកម្មភាពដែលអាចជ្រើសរើស

សូមសរសេរឃ្លានានាមកពី មរ៉ូណៃ ៤:៣ និង ៥:២ នៅលើបន្ទះក្រដាសផ្សេងៗ ហើយសូមឲ្យកុមារដាក់ឃ្លានោះតាមលំដាប់លំដោយ ។ យោងខគម្ពីរទាំងនេះ ហេតុអ្វីពិធីសាក្រាម៉ង់មានសារៈសំខាន់ ?
សូមឲ្យកុមារស្រមៃថា មិត្តភក្ដិម្នាក់កំពុងមកការប្រជុំពិធីសាក្រាម៉ង់ជាលើកដំបូង ។ តើពួកគេនឹងពន្យល់ដល់មិត្តភក្តិរបស់ពួកគេយ៉ាងដូចម្តេចអំពីពិធីសាក្រាម៉ង់ ហើយមូលហេតុដែលយើងទទួលទានវា ? សូមលើកទឹកចិត្តពួកគេឲ្យប្រើ មរ៉ូណៃ ៤:៣ និង ៥:២ នៅក្នុងការពន្យល់របស់ពួកគេ ។
សូមអញ្ជើញកុមារឲ្យចែកចាយអ្វីដែលគ្រួសារពួកគេធ្វើ អំឡុងពេលសាក្រាម៉ង់ ដើម្បីមានគារវភាព និងគិតអំពីព្រះយេស៊ូវគ្រីស្ទ ។ តើពួកគេមានគំនិតអ្វីផ្សេងទៀត ? សូមអញ្ជើញពួកគេឲ្យរើសយកគំនិតទាំងនេះ ហើយដាក់គោលដៅចំណាយពេលកាន់តែច្រើនឡើង គិតអំពីព្រះអង្គសង្គ្រោះអំឡុងពេលសាក្រាម៉ង់ ។

មរ៉ូណៃ ៦:៤–៦, ៩

យើងទៅព្រះវិហារដើម្បីទទួលទានសាក្រាម៉ង់ និងជួយជ្រោមជ្រែងគ្នាទៅវិញទៅមក ។

ពាក្យរបស់មរ៉ូណៃអាចជួយកុមារដែលអ្នកបង្រៀន រកឃើញគោលបំណងកាន់តែប្រសើរឡើងក្នុងការទៅព្រះវិហាររៀងរាល់សប្តាហ៍ ?

សកម្មភាពដែលអាចជ្រើសរើស

សូមសរសេរ ហេតុអ្វីយើងទៅព្រះវិហារ ? នៅលើក្តារខៀន ហើយសូមឲ្យកុមារសរសេរសរសេរចម្លើយដែលអាចមាន ។ សូមអញ្ជើញពួកគេឲ្យរកមើលចម្លើយបន្ថែមទៀតនៅក្នុង មរ៉ូណៃ ៦:៤–៦, ៩ ហើយបន្ថែមចម្លើយនោះលើបញ្ជីរបស់ពួកគេនៅលើក្តារខៀន ។ សូមអញ្ជើញកុមារឲ្យចែកចាយថា តើពួកគេបានពរជ័យបែបណាសម្រាប់ការចូលរួមព្រះវិហារ ។ សូមឲ្យពួកគេដើរតួសម្តែងដើម្បីពន្យល់ប្រាប់មិត្តភក្ដិម្នាក់ដែលមានជំនឿផ្សេង ពីមូលហេតុដែលពួកគេមានអំណរគុណចំពោះការក្លាយជាសមាជិកសាសនាចក្រ ។
សូមបង្ហាញរូបភាព ឬឧទាហរណ៍នៃអាហារចិញ្ចឹមបីបាច់ ។ ហេតុអ្វីវាសំខាន់ដើម្បីចិញ្ចឹមបីបាច់រូបកាយរបស់យើង ? សូមអាន មរ៉ូណៃ ៦:៤ ជាមួយគ្នា ហើយសួរកុមារថា តើពួកគេគិតថា « ចិញ្ចឹមបីបាច់ដោយព្រះបន្ទូលដ៏ល្អនៃព្រះ » មានន័យដូចម្តេច ។ តើព្រះបន្ទូលរបស់ព្រះចិញ្ចឹមបីបាច់យើងដូចម្ដេច ?
សូមអញ្ជើញកុមារម្នាក់ឲ្យអានការដកស្រង់ខាងក្រោមមកពីអែលឌើរ ជែហ្វ្រី អ័រ ហូឡិន ហើយពិភាក្សាពីអ្វីដែលការដកស្រង់នេះបង្រៀនអំពី របៀបដែលយើងអាចចិញ្ចឹមបីបាច់គ្នាទៅវិញទៅមក ៖ « មនុស្សមួយចំនួនពុំមកព្រះវិហារនេះ ដោយគ្រាន់តែស្វែងរកសេចក្តីពិតនៃដំណឹងល្អថ្មីពីរបីនេះ ឬដើម្បីជួបមិត្តភក្តិចាស់ៗនោះទេ បើទោះបីអ្វីៗទាំងអស់នេះសំខាន់យ៉ាងណាក៏ដោយ ។ ពួកគេមករកបទពិសោធន៍ខាងវិញ្ញាណ ។ ពួកគេចង់បានសេចក្ដីសុខសាន្ត ។ ពួកគេចង់ឲ្យសេចក្ដីជំនឿរបស់គេបានរឹងប៉ឹង និងទទួលបានសេចក្ដីសង្ឃឹមរបស់ពួកគេមកវិញ ។ ជារួម ពួកគេចង់បានការចិញ្ចឹមបីបាច់ដោយព្រះបន្ទូលដ៏ល្អនៃព្រះ ដើម្បីត្រូវបានពង្រឹងដោយអំណាចនៃស្ថានសួគ៌ » ( « A Teacher Come from God » Ensign ខែ ឧសភា ឆ្នាំ ១៩៩៨ ទំព័រ ២៦ ) ។ តើយើងអាចជួយចិញ្ចឹមបីបាច់គ្នាទៅវិញទៅមកខាងវិញ្ញាណយ៉ាងដូចម្ដេច ?

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមលើកទឹកចិត្តកុមារឲ្យនិយាយជាមួយគ្រួសារពួកគេ អំពីហេតុផលនានាដែលពួកគេចូលចិត្តចូលរួមព្រះវិហាររៀងរាល់សប្តាហ៍ ។

ការកែលម្អការបង្រៀនរបស់យើង

គាំទ្រដល់ឪពុកម្តាយ ។ សូមស្វែងរករបៀបនានាប្រកបដោយការអធិស្ឋាន ដើម្បីគាំទ្រឪពុកម្តាយរបស់កុមារដែលអ្នកបង្រៀន ។ តើអ្នកអាចគាំទ្រកិច្ចខិតខំរបស់ពួកគេដើម្បីបង្រៀនដំណឹងល្អដល់កូនចៅរបស់ពួកគេតាមរបៀបណា ? ឧទាហរណ៍ អ្នកអាចនិយាយជាមួយឪពុកម្តាយអំពីតម្រូវការ និងចំណាប់អារម្មណ៍របស់កូនៗពួកគេ ឬចែកចាយជាមួយពួកគេនូវអ្វីដែលកុមារកំពុងរៀននៅក្នុងថ្នាក់ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។

ទំព័រសកម្មភាព ៖ ខ្ញុំទទួលទានសាក្រាម៉ង់ដើម្បីចងចាំដល់ព្រះយេស៊ូវគ្រីស្ទ