« ថ្ងៃទី ១៤–២០ ខែ ធ្នូ មរ៉ូណៃ ១០ ៖ ‹ ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១៤–២០ ខែ ធ្នូ មរ៉ូណៃ ១០ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
ដើម្បីឲ្យអ្នករាល់គ្នាអាចដឹង ដោយ ហ្គែរី អិល ខាប
ថ្ងៃទី ១៤–២០ ខែ ធ្នូ
មរ៉ូណៃ ១០
« ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ »
កុមារមួយចំនួននៅក្នុងថ្នាក់របស់អ្នកអាចមានបទពិសោធន៍រៀនសូត្រដ៏មានអត្ថន័យមកពីព្រះគម្ពីរមរមននៅផ្ទះ ។ តើអ្នកអាចប្រើបទពិសោធន៍ទាំងនោះ ដើម្បីលើកទឹកចិត្តកុមារទាំងអស់ឲ្យអានព្រះគម្ពីរនៅផ្ទះដោយរបៀបណា ?
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមហុចព្រះគម្ពីរមរមនមួយក្បាលតៗគ្នា ។ ពេលកុមារម្នាក់ៗកាន់ព្រះគម្ពីរ សូមឲ្យគាត់ចែកចាយអ្វីមួយដែលគាត់ចូលចិត្តអំពីព្រះគម្ពីរមរមន—រឿងមួយដែលចូលចិត្ត ទីបន្ទាល់ ឬបទពិសោធន៍រៀនសូត្រមកពីគម្ពីរនេះនៅផ្ទះ ឬនៅព្រះវិហារ ។
បង្រៀនគោលលទ្ធិ ៖ កុមារតូចៗ
ខ្ញុំអាចដឹងដោយខ្លួនខ្ញុំថា ព្រះគម្ពីរមរមនពិត ។
សូមរកមើលរបៀបនានាដើម្បីជួយកុមារឲ្យទទួលយកការអញ្ជើញរបស់មរ៉ូណៃ ដើម្បីទូលសួរព្រះ ប្រសិនបើព្រះគម្ពីរមរមនពិតឬអត់ ។
សកម្មភាពដែលអាចជ្រើសរើស
-
សូមបង្ហាញរូបភាពមរ៉ូណៃកប់ផ្ទាំងចំណារមាស ( សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ហើយសូមឲ្យកុមារពិពណ៌នាអំពីអ្វីដែលពួកគេឃើញ ។ សូមអញ្ជើញពួកគេឲ្យចង្អុលផ្ទាំងចំណារ ហើយពន្យល់ថា ផ្ទាំងចំណារទាំងនេះបានកត់ត្រានូវពាក្យដែលឥឡូវនេះយើងអាននៅក្នុងព្រះគម្ពីរមរមន ។ សូមឲ្យកុមារធ្វើជាមរ៉ូណៃសរសេរអក្សរលើផ្ទាំងចំណារ ហើយកប់វា ។ សូមច្រៀងបទ « ផ្ទាំងមាស » ( សៀវភៅចម្រៀងកុមារ ទំព័រ ៦១ ) ជាមួយគ្នា ។
-
សូមបង្ហាញព្រះគម្ពីរមរមន ហើយអាន មរ៉ូណៃ ១០:៤ ។ សូមគូសបញ្ជាក់ថា យើងអាចទូលសូមព្រះ ប្រសិនបើព្រះគម្ពីរមរមនពិត ហើយទ្រង់នឹងបញ្ជូនព្រះវិញ្ញាណបរិសុទ្ធឲ្យថ្លែងទីបន្ទាល់មកកាន់យើង ។ អ្នកក៏អាចប្រើ « ជំពូកទី ៥៤ ៖ ការសន្យានៃព្រះគម្ពីរមរមន » ( ដំណើររឿងព្រះគម្ពីរមរមន ទំព័រ ១៥៦ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ សូមចែកចាយរបៀបដែលព្រះវិញ្ញាណបរិសុទ្ធបានជួយអ្នកឲ្យទទួលបានទីបន្ទាល់របស់អ្នកអំពីព្រះគម្ពីរមរមន ។ សូមជួយកុមារឲ្យយល់ថា តើសាក្សីពីព្រះវិញ្ញាណមានសភាពដូចម្តេច ? សូមច្រៀងចម្រៀងមួយបទអំពីការស្វែងរកសេចក្តីពិត ដូចជាបទ « ស្វែងរក គិត អធិស្ឋាន » ( សៀវភៅចម្រៀងកុមារ ទំព័រ ៦៦ ) ។
ព្រះវរបិតាសួគ៌ប្រទានអំណោយទានខាងវិញ្ញាណដល់ខ្ញុំ ។
មរ៉ូណៃបានពិពណ៌នាអំពីអំណោយទានដែលព្រះប្រទានដល់បុត្រាបុត្រីរបស់ទ្រង់ ពេលពួកគេមានសេចក្តីជំនឿលើទ្រង់ ។ អ្នកអាចជួយកុមារឲ្យមានសេចក្តីជំនឿថា ព្រះនឹងប្រទានពួកគេនូវអំណោយទានខាងវិញ្ញាណ ។
សកម្មភាពដែលអាចជ្រើសរើស
-
សូមសរសេរលេខ ៩ ដល់លេខ ១៦ នៅលើក្រដាសផ្សេងដាច់ពីគ្នា ហើយបត់ក្រដាសនីមួយៗ ដូចជាអំណោយ ។ សូមទុកឲ្យកុមារឆ្លាស់វេនគ្នាបើកអំណោយនោះ ។ ពេលអ្នកធ្វើវា សូមអានខគម្ពីរមកពី មរ៉ូណៃ ១០:៩–១៦ ជាមួយគ្នា ដែលត្រូវនឹងលេខទាំងនោះ ហើយជួយកុមារឲ្យរកឃើញអំណោយទានខាងវិញ្ញាណនីមួយៗ ។ សូមពន្យល់ថា ទាំងនេះគឺជាអំណោយទានដែលព្រះវរបិតាសួគ៌ប្រទានដល់បុត្រាបុត្រីរបស់ទ្រង់ ដើម្បីយើងអាចជួយគ្នាទៅវិញទៅមក និងធ្វើកិច្ចការរបស់ទ្រង់ ។
-
សូមអញ្ជើញកុមារឲ្យនិយាយសង្ខេបអំពីអំណោយដ៏ពេញចិត្ត ដែលពួកគេបានទទួល ។ សូមប្រាប់កុមារអំពីអំណោយទានខាងវិញ្ញាណដែលអ្នកបានកត់សម្គាល់ថា ព្រះវរបិតាសួគ៌បានប្រទានដល់ពួកគេ ដូចជាអំណោយទាននៃសេចក្តីជំនឿ ប្រាជ្ញា ទីបន្ទាល់ សន្តានចិត្តល្អ និងសមត្ថភាពដើម្បីរៀន ។
ព្រះយេស៊ូវគ្រីស្ទសព្វព្រះទ័យឲ្យខ្ញុំមកកាន់ទ្រង់ ។
សូមពិចារណាអំពីរបៀបដែលអ្នកនឹងជួយកុមារឲ្យយល់ពីអត្ថន័យនៃឃ្លា « ចូរមករកព្រះគ្រីស្ទ » ។
សកម្មភាពដែលអាចជ្រើសរើស
-
សូមអាន មរ៉ូណៃ ១០:៣២ « ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ » ឲ្យកុមារស្តាប់ ហើយអញ្ជើញកុមារឲ្យថាឃ្លានេះឡើងវិញជាមួយអ្នក ។ សូមឲ្យពួកគេបិទភ្នែក អំឡុងពេលអ្នកដាក់រូបភាពព្រះយេស៊ូវនៅកន្លែងណាមួយនៅក្នុងបន្ទប់ ។ សូមឲ្យពួកគេបើកភ្នែក ស្វែងរករូបភាព និងប្រមូលគ្នាជុំវិញរូបនោះ ។ សូមពិភាក្សាជាមួយកុមារអំពីរបៀបដែលយើងអាចមកកាន់ព្រះគ្រីស្ទ ( ឧទាហរណ៍សូមមើល មាត្រានៃសេចក្ដីជំនឿ ១:៣–៤ ) ។ សូមនិយាយឃ្លានេះឡើងវិញ ដោយឲ្យកុមារដាក់រូបភាពនោះនៅកន្លែងណាមួយនៅក្នុងបន្ទប់រៀន ។
-
សូមជួយកុមារតុបតែងស្លាកឈ្មោះរាងបេះដូងដែលសរសេរឃ្លាថា « ខ្ញុំស្រឡាញ់ព្រះឲ្យអស់ពីសមត្ថភាព អស់ពីគំនិត និងអស់ពីកម្លាំងរបស់ខ្ញុំ » ( សូមមើល មរ៉ូណៃ ១០:៣២ ) ។ តើយើងបង្ហាញព្រះថា យើងស្រឡាញ់ទ្រង់តាមរបៀបណា ?
បង្រៀនគោលលទ្ធិ ៖ កុមារធំៗ
ខ្ញុំអាចដឹងសេចក្តីពិតបានតាមរយៈព្រះចេស្តានៃព្រះវិញ្ញាណបរិសុទ្ធ ។
ព្រះសព្វព្រះទ័យឲ្យយើងគ្រប់គ្នាដឹងថា ព្រះគម្ពីរមរមនគឺពិត ។ សូមជួយកុមារឲ្យយល់អំពីការសន្យារបស់ព្រះថា « បង្ហាញសេចក្តីពិតទៅដល់អ្នក ដោយព្រះចេស្តានៃព្រះវិញ្ញាណបរិសុទ្ធ » ។
សកម្មភាពដែលអាចជ្រើសរើស
-
សូមសរសេរនៅលើក្ដារខៀននូវពាក្យ អាន ចងចាំ ពិចារណា និង ទូលសូម ។ សូមឲ្យកុមាររកមើលពាក្យទាំងនេះនៅក្នុង មរ៉ូណៃ ១០:៣–៤ ។ តើយើងគួរអាន ចងចាំ ពិចារណា ហើយទូលសូមអ្វីខ្លះដើម្បីទទួលបាន ឬពង្រឹងទីបន្ទាល់របស់យើងអំពីព្រះគម្ពីរមរមន ? សូមឲ្យកុមាររកមើលភាពស្រដៀងគ្នារវាងខគម្ពីរទាំងនេះ និងចម្រៀង « ស្វែងរក គិត អធិស្ឋាន » ( សៀវភៅចម្រៀងកុមារ ទំព័រ ៦៦ ) ។
-
សូមជួយកុមារឲ្យចងចាំបទពិសោធន៍មួយចំនួនដែលអ្នកមានជាមួយគ្នាមកពីការរៀនអំពីព្រះគម្ពីរមរមន ។ សូមចែកចាយអារម្មណ៍របស់អ្នកអំពីព្រះគម្ពីរមរមន រួមមានរបៀបដែលអ្នកបានទទួល ឬបានពង្រឹងទីបន្ទាល់របស់អ្នកថា ព្រះគម្ពីរមរមនពិត ។ សូមអញ្ជើញកុមារឲ្យចែកចាយអារម្មណ៍ និងទីបន្ទាល់របស់ពួកគេ ។
-
សូមប្រាប់ពីគ្រាមួយ ពេលព្រះវិញ្ញាណបរិសុទ្ធបានថ្លែងទីបន្ទាល់ដល់អ្នកអំពីអ្វីមួយ ។ សូមពិពណ៌នាអំពីរបៀបដែលអ្នកបានទទួលអារម្មណ៍ និងដឹងថានោះគឺជាព្រះវិញ្ញាណបរិសុទ្ធ ។ សូមជួយកុមាររៀនអំពីរបៀបដែលព្រះវិញ្ញាណមានបន្ទូលមកកាន់យើង តាមរយៈខគម្ពីរខាងក្រោមនេះ យ៉ូហាន ១៤:២៦–២៧; គោលលទ្ធិ និងសេចក្ដីសញ្ញា ៦:១៥, ២៣; ៨:២–៣; ៩:៧–៩; ១១:១២–១៤ ។
ព្រះវរបិតាសួគ៌ប្រទានអំណោយទានខាងវិញ្ញាណដល់ខ្ញុំ ។
មានមនុស្សជាច្រើននៅក្នុងជំនាន់យើងដែល « បដិសេធ…អំណោយទាននៃព្រះ » ( មរ៉ូណៃ ១០:៨ ) ។ សូមជួយកុមារឲ្យយល់ថា អំណោយទានទាំងនេះនៅតែមានសព្វថ្ងៃនេះ ។
សកម្មភាពដែលអាចជ្រើសរើស
-
សូមសរសេរអំណោយទានដែលរៀបរាប់នៅក្នុង មរ៉ូណៃ ១០:៩–១៦ នៅលើបន្ទះក្រដាស ហើយដាក់វានៅក្នុងប្រអប់អំណោយមួយ ។ សូមសរសេរលេខពី ៩ ដល់លេខ ១៦ នៅលើក្តារខៀន ហើយសូមអញ្ជើញកុមារឆ្លាស់វេនគ្នាជ្រើសរើសក្រដាសមួយពីប្រអប់ ហើយផ្គូផ្គងវាទៅលេខខគម្ពីរនៅលើក្តារខៀន ។ តើយើងរៀនអ្វីខ្លះអំពីអំណោយទានទាំងនេះចេញពី ខទី ៨ និង ១៧–១៨ ?
-
សូមចែកចាយរឿងស្តីពី ការចេញមកនៃព្រះគម្ពីរមរមន ( សូមមើល « ជំពូកទី ៣ ៖ ទេវតាមរ៉ូណៃ និងផ្ទាំងមាស » ដំណើររឿងព្រះគម្ពីរគោលលទ្ធិ និងសេចក្ដីសញ្ញា ទំព័រ ១៣–១៧ ) ។ សូមជួយកុមាររកមើលអំណោយទានដែលបានថ្លែងនៅក្នុង មរ៉ូណៃ ១០:៩–១៦ ដែលព្រះបានប្រទានដល់ យ៉ូសែប ស៊្មីធ ដើម្បីលោកអាចនាំព្រះគម្ពីរមរមនចេញមក ។ ហេតុអ្វីព្រះវរបិតាសួគ៌សព្វព្រះទ័យឲ្យយើងជឿលើអំណោយទានខាងវិញ្ញាណនាពេលបច្ចុប្បន្ននេះ ?
ព្រះយេស៊ូវគ្រីស្ទសព្វព្រះទ័យឲ្យខ្ញុំមកកាន់ទ្រង់ ។
តើអ្នកនឹងអញ្ជើញកុមារឲ្យ « ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ » តាមរបៀបណា ?
សកម្មភាពដែលអាចជ្រើសរើស
-
សូមសរសេរលើក្តារខៀននូវសំណួរដូចជា តើចូរមករកព្រះគ្រីស្ទមានន័យដូចម្តេច ? សូមជួយកុមារឲ្យស្រាវជ្រាវ មរ៉ូណៃ ១០:៣២–៣៣ ដើម្បីស្វែងយល់ចម្លើយដែលអាចមាន ។ សូមធ្វើការជាមួយគ្នាដើម្បីសរសេរអ្វីដែលព្រះគ្រីស្ទសព្វព្រះទ័យឲ្យយើងធ្វើ និងអ្វីដែលទ្រង់សន្យាធ្វើដល់យើង ។
-
សូមចែកចាយវគ្គបទខគម្ពីរ ឬរឿងដែលអ្នកចូលចិត្តមកពីព្រះគម្ពីរមរមន ដែលបានជួយអ្នកឲ្យមករកព្រះគ្រីស្ទ ហើយអញ្ជើញកុមារឲ្យចែកចាយខគម្ពីរ ឬរឿងរបស់ពួកគេផងដែរ ។ សូមរំឭកជាមួយកុមារនូវប្រសាសន៍របស់ ព្យាការី យ៉ូសែប ស៊្មីធ មកពី បុព្វកថានៃព្រះគម្ពីរមរមន ៖ « បុគ្គលម្នាក់ៗអាចចូលទៅជិតព្រះបាន ដោយសារការធ្វើតាមសិក្ខាបទទាំងឡាយនៃ [ ព្រះគម្ពីរមរមន ] ជាជាងគម្ពីរដទៃទាំងអស់ » ។ សូមថ្លែងទីបន្ទាល់របស់អ្នកអំពីរបៀបដែលការណ៍នេះបានកើតឡើងក្នុងជីវិតរបស់អ្នក ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យអធិស្ឋានទូលសូមទីបន្ទាល់កាន់តែរឹងមាំអំពីព្រះគម្ពីរមរមន បន្ទាប់មកចែកចាយទីបន្ទាល់របស់ពួកគេជាមួយសមាជិកគ្រួសារ ឬមិត្តម្នាក់ ។
ការកែលម្អការបង្រៀនរបស់យើង
សូមលើកទឹកចិត្តឲ្យចែកចាយ ។ ជារឿយៗ កុមារតូចៗមានការយល់ដឹងអំពីដំណឹងល្អប្រកបដោយអត្ថន័យ ។ ការចែកចាយគំនិតរបស់ពួកគេជួយរៀបចំពួកគេឲ្យនិយាយទៅកាន់មិត្តភក្តិពួកគេអំពីដំណឹងល្អ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣០ ) ។