« 7–13 nō Tītema. Moroni 7–9 : ‘’Ia fa’ateitei rā te Mesia ia ’oe i ni’a’ », Mai, pe’e mai—nō te Paraimere : Buka a Moromona 2020 (2020)
« 7–13 nō Tītema. Moroni 7–9 », Mai, pe’e mai—nō te Paraimere : 2020
Minerva Teichert (1888–1976), Moroni : Te ’āti Nephi hōpe’a, 1949–1951, peni hinu, 34¾ x 47 initi. Brigham Young University Museum of Art, 1969
7–13 nō Tītema
Moroni 7–9
« ’Ia fa’ateitei rā te Mesia ia ’oe i ni’a »
’Ia tuatāpapahia Moroni 7–9 nā roto i te pure, e ani te reira i te fa’aurura’a a te Vārua Maita’i. E tauturu mai ’oia ia ’outou ’ia hāro’aro’a i te mau hina’aro o te mau tamari’i i roto i tā ’outou piha ha’api’ira’a.
Pāpa’i i te mau mana’o e tae mai
Tītau i te mana’o
E fa’aha’amana’o i te mau tamari’i i te hō’ē mea tā ’outou i ani ia rātou ’ia rave i roto i te ha’api’ira’a o te hepetoma i ma’iri a’e nei ’e ’aore rā, hō’ē mea tā rātou i ’apo mai i roto i tō rātou ’utuāfare i teie hepetoma. E ani ia rātou ’ia fa’a’ite mai i te mea tā rātou i ’apo mai.
Ha’api’i i te ha’api’ira’a tumu : Mau tamari’i ’āpī
Mai te mea ē, e fa’aro’o tō’u, e nehenehe tā’u e rave i te mau huru mea ato’a tā te Atua e hina’aro ’ia rave au.
Te mau tamari’i e fa’aro’o tō rātou ia Iesu Mesia ’e e ti’aturi i tōna mana, e nehenehe rātou e fa’aoti i te mau mea rarahi ’a tāvini ai rātou iāna.
Mau ’ohipa e nehenehe e rave
-
E tai’o Moroni 7:33, ’e e ani i te mau tamari’i ’ia ti’a i ni’a ’ia fa’aro’o ana’e rātou i te ta’o ra « fa’aro’o ». E fa’ata’a ē, e fa’a’ite tātou i tō tātou fa’aro’o ia Iesu Mesia ’ia ha’apa’o ana’e tātou i tāna mau fa’auera’a. E tauturu i te mau tamari’i ’ia hāmani i te hō’ē tāpura i ni’a i te tāpura ’ere’ere nō te tahi mau mea tā Iesu e hina’aro ’ia rave rātou, mai te ha’apa’ora’a i te parau a tō rātou mau metua ’e ’aore rā, te paraura’a i te parau mau. E fa’a’ite pāpū ē, e nehenehe tō tātou fa’aro’o ia Iesu Mesia e tauturu ia tātou ’ia ha’apa’o i te mau fa’auera’a.
-
E pia i te tahi mau hōho’a ’o tē fa’a’ite ra i te hō’ē ta’ata nō roto mai i te Buka a Moromona (’e ’aore rā, te tahi atu mau buka pāpa’ira’a mo’a) tei fa’aoti i te hō’ē mea faufa’a roa nō te mea e fa’aro’o tōna ia Iesu Mesia (hi’o, ’ei hi’ora’a, Buka hōho’a o te ’evanelia, nūmera 19, 70, 78,81). E tauturu i te mau tamari’i ’ia fa’ati’a mai i te ’ā’amu i fa’ata’ahia i roto i te hōho’a. E parau ia rātou ē, nō te fa’aro’o o teie mau ta’ata ia Iesu Mesia, ’ua hōro’ahia te mana ia rātou ’ia rave i te mea tāna i hina’aro ’ia rave rātou.
Te ti’aturira’a ia Iesu Mesia, e hōro’a mai te reira iā’u i te tīa’ira’a.
E rave rahi ta’ata i roto i te ao nei e feruri nei ē, ’aita tō rātou e tīa’ira’a. Nāhea e ti’a ai ia ’outou ’ia tauturu i te mau tamari’i tā ’outou e ha’api’i nei ’ia ’ite i te tīa’ira’a ia Iesu Mesia ?
Mau ’ohipa e nehenehe e rave
-
E tai’o ’e e fa’ata’a i te Moroni 7:41 i te mau tamari’i, ’e e ani ia rātou ’ia ’āfa’i i tō rātou rima i ni’a ’ia fa’aro’o ana’e rātou i te hō’ē mea tā Moromona i parau ē, tītauhia ia tātou ’ia roa’a te tīa’ira’a i te reira. E parau i te mau tamari’i nō ni’a i te tīa’ira’a e vai ra i roto ia ’outou maoti Iesu Mesia.
-
E ani i te mau tamari’i ’ia feruri i te hō’ē ta’ata tā rātou i mātau, e fifi tōna nō te hō’ē mea. E ani i te mau tamari’i ’ia pāpa’i i te hō’ē hōho’a nā teie ta’ata ’o te nehenehe e fa’aha’amana’o iāna ’ia roa’a te tīa’ira’a ia Iesu Mesia.
« ’O te aroha ra, ’o te hina’aro mau ïa i te Mesia ».
E aha te mau ’itera’a nō roto mai i tō ’outou orara’a e nehenehe e tauturu i te mau tamari’i ’ia fa’a’ite i te maita’i i ni’a ia vetahi ’ē ’e ’ia fa’a’ite i te here ia rātou ?
Mau ’ohipa e nehenehe e rave
-
E ani i te mau tamari’i ’ia fa’ahiti fa’ahou i teie parau ’e o ’outou: « ’O te aroha ra, ’o te hina’aro mau ïa i te Mesia » (Moroni 7:47). E tauturu i te mau tamari’i ’ia feruri i te mau huru ’a fa’a’ite ai Iesu Mesia i te aroha ia vetahi ’ē (e nehenehe te mau hōho’a e tauturu, mai te Buka hōho’a o te ’evanelia, nūmera 55, 83,84). Nāhea ’oia i te fa’a’itera’a i te here ia tātou ? O vai tā tātou e nehenehe e fa’a’ite i te here mai tā Iesu i nā reira ?
-
E ani i te mau tamari’i ’ia pāpa’i hōho’a nō rātou iho e fa’a’ite ra i te here i te hō’ē ta’ata. E parau ia rātou ’ia tu’u i tō rātou hōho’a i te vāhi e fa’aha’amana’o mai te reira ia rātou ’ia here ia vetahi ’ē mai tā Iesu i rave.
Ha’api’i i te ha’api’ira’a tumu : Mau tamari’i pa’ari
E ha’amaita’ihia vau mai te mea e fa’aro’o tō’u ia Iesu Mesia.
’Ua hina’aro Moromona ’ia ’ite te mau ta’ata ē, ’aita te mau temeio i fa’aea i te taime ’a hope ai te tau ’ohipara’a a te Fa’aora i ni’a i te fenua nei. Mai te mea e vai noa tō tātou fa’aro’o ia Iesu Mesia, nā roto i tāna tauturu, e nehenehe tātou e rave i te mau huru ’ohipa ato’a tāna e hina’aro ’ia rave tātou—tae noa atu i te mau mea temeio.
Mau ’ohipa e nehenehe e rave
-
E tauturu i te mau tamari’i ’ia tāpa’o i ni’a i te tāpura ’ere’ere i te tahi o te mau « ’ohipa maita’i » tā tātou i fāri’i nā roto i te ’evanelia a Iesu Mesia, mai te fāri’ira’a i te ’utuāfare mure ’ore, te ho’ira’a i pīha’i iho i te Metua i te ao ra, ’e te fa’a’orera’ahia tā tātou mau hara. I muri iho e ani i te mau tamari’i ’ia tai’o i te Moroni 7:21–22 ’e 25, ma te ’imi nāhea e ti’a ai ia tātou ’ia fāri’i i teie mau ’ohipa maita’i ato’a. Nāhea tātou i te fa’a’ite i tō tātou fa’aro’o ia Iesu Mesia ’e i tāna mau fafaura’a ?
-
E tai’o atu Moroni 7:33 i te mau tamari’i, ’e e ani ia rātou ’ia fa’aro’o e aha tā tātou e nehenehe e rave mai te mea e fa’aro’o tō tātou ia Iesu Mesia. Mai te mea e nehenehe, e fa’a’ite i te mau ’itera’a tei roa’a ia ’outou i te taime ’a tauturu ai te fa’aro’o ia ’outou ’ia rave i te mea tā te Atua i hina’aro ’ia rave ’outou. E tauturu i te mau tamari’i ’ia feruri i te mau hi’ora’a i roto i tō rātou orara’a ’e ’ia fa’a’ite mai i te reira. Nāhea te fa’aro’o i te Mesia i te fa’atupu i te ta’a-’ē-ra’a i roto i teie mau hi’ora’a ?
E noa’a iā’u te tīa’ira’a ia Iesu Mesia, tae noa atu i roto i te mau tāmatara’a fifi.
’Ua fa’aruru Moromona ’e o Moroni i te mau ’ohipa ha’aparuparu mana’o, ’ua ’itehia rā ia rāua te tīa’ira’a i roto i te Fa’aora ia Iesu Mesia. Nāhea e ti’a ai ia ’outou ’ia tauturu i te mau tamari’i ’ia ’ite mai i te tīa’ira’a i roto i te Mesia, ’ia tō’aru’aru rātou ?
Mau ’ohipa e nehenehe e rave
-
E tauturu i te mau tamari’i ’ia tāpura i te tahi mau fifi o te nehenehe e fa’atupu i te tō’aru’aru ’e ’aore rā, te tīa’ira’a ’ore i roto i te ta’ata. E ani i te mau tamari’i ’ia tai’o i te Moroni 7:40–41 ’e 9:25–26, ma te ’imi i te tahi mea ’o te nehenehe e tauturu i te hō’ē ta’ata tei tō’aru’aru. E parau ia rātou e mea nāhea tō Iesu Mesia ’e tāna ’evanelia tauturura’a ia ’outou i roto i te mau taime fifi.
-
E ani i te mau tamari’i ’ia pāpa’i i te hō’ē poro’i i te hō’ē ta’ata tei tō’aru’aru nō te tauturu iāna ’ia ’itehia iāna te tīa’ira’a i roto i te Mesia, mai tā Moromona i rave nō tāna tamaiti i roto i te Moroni 9:25–26. E fa’aitoito i te mau tamari’i ’ia fa’a’ohipa i te mau ta’o ’e te mau pereota nō roto mai i teie mau ’īrava i roto i tā rātou mau poro’i.
-
E fa’a’ī i te hō’ē fa’ari’i i te pape, ’e e tu’u e piti tao’a i roto—hō’ē e pāinu ’e hō’ē e tomo. E fa’aau i te tao’a pāinu i te hō’ē ta’ata e tīa’ira’a tōna i roto i te Mesia. E tai’o ’āmui i te Moroni 9:25. Nāhea te Mesia i te « Fa’ateitei ia [tātou] i ni’a » ’ia fa’aruru ana’e tātou i te mau tāmatara’a fifi roa ? E tauturu i te mau tamari’i ’ia feruri i te mau rāve’a e ti’a ai ia rātou ’ia ha’apa’o i te parau a te Fa’aora ’e i tāna mau ha’api’ira’a fa’aitoito « i roto i [tō rātou] ’ā’au e a muri noa atu ».
« ’O te aroha ra, ’o te hina’aro mau ïa i te Mesia ».
Te fa’ahotura’a i te hōro’a o te aroha, ’o te hō’ē ïa fā nō te orara’a tā’āto’a. Nāhea e ti’a ai ia ’outou ’ia fa’auru i te mau tamari’i ’ia ’imi i te here mau o te Mesia ?
Mau ’ohipa e nehenehe e rave
-
E ani i te mau tamari’i ’ia fa’a’ite mai e aha te aura’a nō te parau « aroha ». I muri iho, e ani i te hō’ē o te mau tamari’i ’ia tai’o i te Moroni 7:45. (Mai te mea e mea fifi te tahi mau ta’o i roto i teie ’īrava nō te hāro’aro’a, e tauturu i te mau tamari’i ’ia hi’o i roto i te buka fa’atoro parau). E ani i te mau tamari’i ’ia paraparau mai nō ni’a i te mau ta’ata tā rātou i mātau e mau hi’ora’a maita’i nō te aroha tō rātou. Nō te aha i parauhia ai te aroha « te here mau o te Mesia » ? (Moroni 7:47). E aha tā te ’īrava 48 e ha’api’i mai nei ia tātou nō ni’a i te huru e ti’a ai ia tātou ’ia ’ī i te aroha ? E fa’aitoito i te mau tamari’i tāta’itahi ’ia pure nō te aroha i teie hepetoma ’e ’ia ’imi i te mau rāve’a nō te fa’a’ite i te aroha ia vetahi ’ē.
-
E tauturu i te mau tamari’i ’ia feruri i te mau rāve’a ’a fa’a’ite ai Iesu i te aroha (’ei hi’ora’a, hi’o i te Luka 23:34; Ioane 8:1–11; Etera 12:33–34). Nāhea e ti’a ai ia tātou ’ia pe’e i tōna hi’ora’a ?
-
E ani i te mau tamari’i ’ia pāpa’i i te i’oa o te mau ta’ata tā rātou i mātau i ni’a iho i te mau tuha’a ’api parau ’e e tu’u i te reira i roto i te hō’ē pūtē na’ina’i ’e ’aore rā, te hō’ē fa’ari’i. E ani ia rātou ’ia hōpoi i tā rātou fa’ari’i i te fare, ’ia mā’iti i te hō’ē i’oa i te mau mahana ato’a, ’e ’ia rave i te hō’ē mea nō te fa’a’ite i te here nō taua ta’ata ra. I roto i te hō’ē ha’api’ira’a i muri mai, e ani ia rātou ’ia fa’a’ite mai i tō rātou mau ’itera’a nō te tāvinira’a i teie mau ta’ata.
Fa’aitoito i te ha’api’ira’a mai i te fare
E fa’aitoito i te mau tamari’i ’ia feruri i te hō’ē ta’ata ’o tē ’imi nei paha i te hō’ē fa’aro’o rahi ’e ’aore rā, tīa’ira’a ia Iesu Mesia. E ani i te mau tamari’i ’ia fa’a’ite i te reira ta’ata i te hō’ē mea tā rātou i ’apo mai i roto i te piha ha’api’ira’a i teie mahana.
Ha’amaita’iraʼa i tā tātou ha’api’ira’a
E fa’aitoito i te fa’aturara’a. Te hō’ē tuha’a faufa’a roa o te fa’aturara’a ’o te ferurira’a ïa i te Metua i te ao ra ’e ia Iesu Mesia. E ti’a ia ’outou ’ia fa’aha’amana’o i te mau tamari’i ’ia fa’atura nā roto i te hīmene marūra’a ’e ’aore rā, e hamu noa i te hō’ē hīmene, ’e ’aore rā, te fa’a’itera’a i te hō’ē hōho’a ’o Iesu.