E ’ite ai ’outou, nā Gary L. Kapp

14–20 nō Titema.

Moroni 10

« Haere mai i te Mesia ’e ’ia maita’i roa ’outou iāna »

E riro ē, tē fāri’i nei paha te tahi mau tamari’i i roto i tā ’outou piha ha’api’ira’a i te mau ’itera’a faufa’a rahi nā roto i te ’apora’a mai nā roto mai i te Buka a Moromona i te fare. Nāhea e ti’a ai ia ’outou ’ia fa’a’ohipa i te reira mau ’itera’a nō te fa’aitoito i te mau tamari’i ato’a ’ia tai’o i te mau pāpa’ira’a mo’a i te fare ?

Pāpa’i i te mau mana’o e tae mai

Tītau i te mana’o

E hōro’a fa’a’ati i te hō’ē Buka a Moromona. ’Ia tāpe’a ana’e te tamari’i tāta’itahi i te buka, e ani iāna ’ia fa’a’ite mai i te hō’ē mea tāna i here nō ni’a i te Buka a Moromona—hō’ē ’ā’amu au-roa-hia, hō’ē ’itera’a pāpū, ’e ’aore rā, hō’ē ’itera’a i te ’apora’a mai i te reira i te fare ’e ’aore rā, i te fare purera’a.

Ha’api’i i te ha’api’ira’a tumu : Mau tamari’i ’āpī

Moroni 10:3–5

E nehenehe au e ’ite nā roto iā’u iho ē, e parau mau te Buka a Moromona.

E ’imi i te mau rāve’a nō te tauturu i te mau tamari’i ’ia fāri’i i te anira’a a Moroni ’ia ani i te Atua e parau mau ānei te Buka a Moromona.

Mau ’ohipa e nehenehe e rave

• E fa’a’ite i te hō’ē hōho’a nō Moroni e huna ra i te mau ’api auro (hi’o i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare), ’e e ani i te mau tamari’i ’ia fa’ata’a mai e aha tā rātou e ’ite nei. E ani ia rātou ’ia fa’atoro i ni’a i te mau ’api, ’e e fa’ata’a ē, i ni’a i teie mau ’api ’ua pāpa’ihia te mau parau tā tātou e tai’o i teienei i roto i te Buka a Moromona. E vaiiho i te mau tamari’i ’ia fa’ahua Moroni tē pāpa’i ra i ni’a i te mau ’api ’e te huna ra i te reira. E hīmene ’āmui « Les plaques d’or » (chants pour les enfants, 61).

• E fa’a’ite i te Buka a Moromona, ’e e tai’o Moroni 10:4. E ha’apāpū ē, e nehenehe tātou e ani i te Atua, e parau mau ānei te Buka a Moromona, ’e e tono mai ’oia i te Vārua Maita’i nō te fa’a’ite pāpū ia tātou. E nehenehe ato’a ’outou e fa’a’ohipa i te « Pene 54 : Te fafaura’a o te Buka a Moromona » (Te mau ’ā’amu no te Buka a Moromona,156). E fa’a’ite e mea nāhea te Vārua Maita’i i te tauturu ia ’outou ’ia fāri’i i tō ’outou ’itera’a pāpū nō te Buka a Moromona. E tauturu i te mau tamari’i ’ia hāro’aro’a, mai te aha te huru o te hō’ē ’itera’a nō roto mai i te Vārua. E hīmene i te hō’ē hīmene nō ni’a i te ’imira’a i te parau mau, mai te « Quand je lis l’Ecriture sainte » (Chants pour les enfants, 66).

Moroni 10:8–20

E hōro’a mai te Metua i te ao ra i te mau hōro’a pae vārua iā’u.

’Ua fa’ata’a Moroni i te mau hōro’a tā te Atua e hōro’a i tāna mau tamari’i mai te mea e fa’aro’o tō rātou iāna. E nehenehe ’outou e tauturu i te mau tamari’i ’ia roa’a te fa’aro’o ē, e hōro’a mai te Atua ia rātou i te mau hōro’a pae vārua.

Mau ’ohipa e nehenehe e rave

• E pāpa’i i te mau nūmera 9 e tae atu i te 16 i ni’a i te mau tuha’a ’api parau ta’a ’ē, ’e e pū’ohu i te tuha’a ’api parau tāta’itahi mai te hō’ē ō. E vaiiho i te mau tamari’i, te tahi i muri mai i te tahi ’ia tātara i te mau ō . ’A rave ai rātou i te reira, a tai’o ’āmui i te mau ’īrava i roto i te Moroni 10:9–16 o te tū’ati i te mau nūmera, ’e a tauturu i te mau tamari’i ’ia ’imi i te hōro’a vārua tāta’itahi. E fa’ata’a ē, e mau hōro’a teie tā te Metua i te ao ra e hōro’a i tāna mau tamari’i ’ei reira e nehenehe ai ia tātou ’ia tauturu te tahi ’e te tahi ’e ’ia rave i tāna ’ohipa.

• E vaiiho i te mau tamari’i ’ia parau poto noa mai nō ni’a i te mau hōro’a auhia tā rātou i fāri’i. E parau i te mau tamari’i nō ni’a i te mau hōro’a pae vārua tā ’outou i ’ite tā te Metua i te ao ra i hōro’a ia rātou, mai te mau hōro’a o te fa’aro’o, te pa’ari, te ’itera’a pāpū, te maita’i ’e te ’aravihi nō te ’apo mai.

Moroni 10:32

Tē hina’aro nei Iesu Mesia ’ia haere au iāna ra.

E feruri nāhea ’outou i te tauturu i te mau tamari’i ’ia hāro’aro’a i te aura’a « haere mai i te Mesia ».

Mau ’ohipa e nehenehe e rave

• E tai’o atu i te mau tamari’i i te Moroni 10:32, « haere mai i te Mesia e ’ia maita’i roa ’outou iāna », ’e e ani i te mau tamari’i ’ia fa’ahiti fa’ahou i te reira pereota nā muri iho ia ’outou. E ani ia rātou ’ia tāpiri i tō rātou mata ’a tu’u ai ’outou i te hōho’a o Iesu i te tahi vāhi i roto i te piha. E i muri iho, e vaiiho ia rātou ’ia ’ara’ara i tō rātou mata, ’ia ’imi i te hōho’a, ’e ’ia ha’aputuputu i pīha’i iho i te reira. E ’āparau ’e te mau tamari’i i te mau rāve’a e ti’a ai ia tātou ’ia haere mai i te Mesia ra (hi’o, ’ei hi’ora’a, Te mau hiro’a fa’aro’o 1:3–4). E tāpiti fa’ahou i teie ’ohipara’a, ma te vaiiho i te mau tamari’i ’ia tu’u i te hōho’a i te hō’ē vāhi i roto i te piha ha’api’ira’a.

• E tauturu i te mau tamari’i ’ia fa’anehenehe i te mau tāreta hōho’a māfatu e parau ra ē, « ’ia aroha atu i te Atua ma tō ’outou ’ā’au ato’a, ’e te mana’o ato’a, ’e te pūai ato’a » (hi’o Moroni 10:32). Nāhea tātou i te fa’a’ite i te Atua ē, ’ua here tātou iāna ?

Ha’api’i i te ha’api’ira’a tumu : Mau tamari’i pa’ari

Moroni 10:3–5

E ti’a iā’u ’ia ’ite i te parau mau nā roto i te mana o te Vārua Maita’i.

’Ua hina’aro te Atua ia tātou tāta’itahi ’ia ’ite ē, e parau mau te Buka a Moromona. E tauturu i te mau tamari’i ’ia hāro’aro’a i te fafaura’a a te Atua ’ia « fa’a’ite i te parau mau o te reira i roto ia ’outou, nā roto i te mana o te Vārua Maita’i ».

Mau ’ohipa e nehenehe e rave

• E pāpa’i i ni’a i te tāpura ’ere’ere i te mau ta’o tai’o, ha’amana’o, feruri māite, ’e ani. E ani i te mau tamari’i ’ia ’imi i teie mau ta’o i roto i te Moroni 10:3–4. E aha tā tātou e tai’o, e ha’amana’o, e feruri māite, ’e e ani ’ia roa’a ’e ’aore rā, nō te ha’apūai i tō tātou ’itera’a pāpū nō te Buka a Moromona ? E ani i te mau tamari’i ’ia ’imi i te mau tueara’a i rotopū i teie mau ’īrava ’e i te hīmene ra « Quand je lis l’Ecriture sainte » (Chants pour les enfants, 66).

• E tauturu i te mau tamari’i ’ia ha’amana’o i te tahi mau ’itera’a tei roa’a ia ’outou ’e o rātou i te ’apora’a mai nā roto mai i te Buka a Moromona. E fa’a’ite i tō ’outou mau ’āehuehu nō ni’a i te Buka a Moromona, tae noa atu nāhea te roa’ara’a ’e ’aore rā te ha’apūaira’ahia tō ’outou ’itera’a pāpū ē, e parau mau te reira. E ani i te mau tamari’i ’ia fa’a’ite mai i tō rātou mau ’āehuehu ’e te ’itera’a pāpū.

• E parau nō ni’a i te hō’ē taime ’a fa’a’ite pāpū ai te Vārua Maita’i ia ’outou nō ni’a i te hō’ē mea. E fa’ata’a e aha tā ’outou i fāri’i ’e e mea nāhea tō ’outou ’itera’a, o te Vārua Maita’i te reira. E tauturu i te mau tamari’i ’ia ’apo mai nā roto mai i te mau pāpa’ira’a mo’a i muri nei nāhea te Vārua ’ia paraparau ia tātou : Ioane 14:26–27; Te Parau Ha’api’ira’a ’e te mau Parau Fafau 6:15, 23; 8:2–3; 9:7–9; 11:12–14.

Moroni 10:8–19

E hōro’a mai te Metua i te ao ra i te mau hōro’a pae vārua iā’u.

E rave rahi i tō tātou nei ’anotau ’o tē « huna nei i te mau hōro’a a te Atua » (Moroni 10:8). E tauturu i te mau tamari’i ’ia ’ite ē, tē vai noa nei ā teie mau hōro’a i teie mahana.

Mau ’ohipa e nehenehe e rave

• E pāpa’i i te mau hōro’a i fa’a’itehia i roto i te Moroni 10:9–16 i ni’a i te mau tuha’a ’api parau, ’e e tu’u i te reira i roto i te hō’ē ’āfata. E pāpa’i te nūmera 9 e tae atu i te 16 i ni’a i te tāpura ’ere’ere, ’e e ani i te mau tamari’i te tahi i muri mai i te tahi, ’ia rave i te hō’ē tuha’a ’api parau i roto i te ’āfata ’e ’ia fa’atu’ati i te reira i te nūmera o te ’īrava i ni’a i te tāpura ’ere’ere. E aha tā tātou e ’apo mai nō ni’a i teie mau hōro’a i roto i te mau ’īrava 8 ’e 17–18 ?

• E fa’a’ite i te ’ā’amu nō te taera’a mai te Buka a Moromona (hi’o « Pene 3 : Te melahi Moroni ’e te mau ’api ’auro », Te mau ’ā’amu o Te Parau Ha’api’ira’a ’e te mau Parau Fafau, 13–17). E tauturu i te mau tamari’i ’ia ’imi i te mau hōro’a i fa’ahitihia i roto i te Moroni 10:9–16 tā te Atua i hōro’a ia Iosepha Semita ’ia nehenehe iāna ’ia hōpoi mai i te Buka a Moromona. Nō te aha te Metua i te ao ra i hina’aro ia tātou ’ia ti’aturi i roto i te mau hōro’a pae vārua i teie mahana ?

Moroni 10:32-33

Tē hina’aro nei Iesu Mesia ’ia haere au iāna ra.

Nāhea ’outou i te ani i te mau tamari’i ’ia « haere i te Mesia ra ’e ’ia maita’i roa ’outou iāna » ?

Mau ’ohipa e nehenehe e rave

• E pāpa’i i ni’a i te tāpura ’ere’ere i te hō’ē uira’a mai te E aha te aura’a ’ia haere i te Mesia ra ? E tauturu i te mau tamari’i ’ia ’imi Moroni 10:32–33 nō te ’ite mai i te mau pāhonora’a tano. E ha’a ’āmui nō te tāpura e aha tā te Mesia e hina’aro ’ia rave tātou ’e e aha tāna i fafau e rave ’oia nō tātou.

• E fa’a’ite i tā ’outou mau tuha’a parau au roa ’e ’aore rā, te mau ’ā’amu nō roto mai i te Buka a Moromona tei tauturu ia ’outou ’ia haere i te Mesia ra, ’e e ani i te mau tamari’i ’ia nā reira ato’a. E hi’o fa’ahou ’e te mau tamari’i i te mau parau a te peropheta Iosepha Semita i roto i te ’ōmuara’a o te Buka a Moromona : « E ha’afātata rahi atu ā te hō’ē ta’ata i te Atua nā roto i te ha’apa’ora’a i te mau ha’api’ira’a a te [Buka a Moromona] i te tahi ’ē atu buka ». E fa’a’ite i tō ’outou ’itera’a pāpū nō ni’a i te huru te tupura’a te reira i roto i tō ’outou orara’a.

Fa’aitoito i te ha’api’ira’a mai i te fare

E ani i te mau tamari’i ’ia pure nō te fāri’i i te hō’ē ’itera’a pāpū pūai a’e nō te Buka a Moromona ’e i muri iho, ’ia fa’a’ite i tō rātou ’itera’a pāpū i te hō’ē melo nō te ’utuāfare ’e ’aore rā, i te hō’ē hoa.

Ha’amaita’ira’a i tā tātou ha’api’ira’a

Fa’aitoito i te fa’a’itera’a. E mea pinepine te mau tamari’i ’āpī i te fāri’i i te mau ’itera’a faufa’a rahi nō ni’a i te ’evanelia. E tauturu te fa’a’itera’a i tō rātou mau mana’o i te fa’aineinera’a ia rātou ’ia paraparau i tō rātou mau hoa nō ni’a i te ’evanelia (hi’o Ha’api’ira’a mai tā te Fa’aora, 30).