E ’ite ai ’outou, nā Gary L. Kapp

14–20 nō Tītema

Moroni 10

« E haere mai i te Mesia ’e ’ia maita’i roa ’outou iāna »

’A fa’aoti ai ’outou i te tai’o i te Buka a Moromona, e nehenehe e ’imi i te hō’ē ’ite ’āpī nō ’ō mai i te Vārua Maita’i ē, e parau mau te reira. ’A nā reira ai ’outou, ’a pāpa’i i te mau mana’o e tae mai.

Pāpa’i i te mau mana’o e tae mai

Tē ha’amata nei te Buka a Moromona nā roto i tā Nephi parau fafau nō te fa’a’ite mai ia tātou ē, « tei ni’a iho tō te Fatu aroha mau ia rātou ato’a i mā’itihia e āna ra, nō tō rātou fa’aro’o » (1 Nephi 1:20). Tē ’ōpani nei te buka ma te hō’ē poro’i mai te reira nā Moroni ’a fa’aineine ai ’oia i tē « tāpiri » i te mau pāpa’a parau : ’ua tītau manihini ’oia ia tātou ’ia « ha’amana’o… i tō te Atua aroha » (Moroni 10:2–3). Noa atu ē e feruri noa tātou i te mau ’ohipa aroha e rave rahi tei pāpa’ihia i roto i te Buka a Moromona, e mea rahi ïa ’ia feruri. E aha te mau hi’ora’a e tae mai i tō ’outou mana’o ? E nehenehe ato’a e feruri i te aroha o te Atua i te arata’ira’a i te ’utuāfare o Lehi nā roto i te medebara ’e nā ni’a i te mau pape rahi, te aroha marū tāna i fa’a’ite ia Enosa i te hia’aira’a tōna vārua i te fa’a’orera’a hara, ’aore rā te aroha tāna i fa’a’ite ia Alama, te ’enemi ’ino’ino ho’i o te ’Ēkālesia tei riro mai ’ei hō’ē o tāna mau pāruru mata’u ’ore mau. ’Aore rā, e nehenehe tō ’outou mau mana’o e fāriu i ni’a i te aroha tā te Fa’aora tei ti’afa’ahou i fa’a’ite i te ta’ata ’a fa’aora ai ’oia i tō rātou ma’i ’e ’a ha’amaita’i ai i tā rātou mau tamari’i ri’i. Penei a’e te mea faufa’a roa a’e, e ti’a i te reira mau mea ato’a ’ia fa’aha’amana’o ia ’outou i « tō te Atua aroha » ia ’outou, inaha ’o te hō’ē o te fā rahi o te Buka a Moromona, ’o te tītau-manihini-ra’a ïa e fāri’i i te aroha o te Atua—e anira’a tei fa’ahiti-’ōhie-hia i roto i te mau parau fa’atau aroha a Moroni ra : « E haere mai i te Mesia ’e ’ia maita’i roa ’outou iāna » (Moroni 10:32).

Mau mana’o nō tā ’oe iho tuatāpapara’a pāpa’ira’a mo’a

Moroni 10:3–7

E ti’a iā’u ’ia ’ite i te parau mau nā roto i te mana o te Vārua Maita’i.

’Ua taui te parau fafau i roto i te Moroni 10:3–7 i te orara’a o e tau mirioni ta’ata ’ati a’e i te ao nei. Nāhea te reira i te tauira’a ia ’oe ? Tē ’imi ra ’oe ’ia noa’a tō ’oe ’itera’a pāpū nō te Buka a Moromona ’aore rā ’ia ha’apūai i te reira, ’ua tano te anira’a a Moroni nō ’oe. ’A tai’o ai ’oe i te Moroni 10:3–7, e nehenehe tā ’oe e tai’o māite atu ā i tei nā mua a’e. E nehenehe e hi’opo’a i te pereota tāta’itahi ma te ui ’ia ’oe iho i te mau uira’a mai teie : E aha te aura’a ? Nāhea vau i te rave maita’i a’e i te reira ? E aha te mau ’ohipa i tupu nō’u nō ni’a i te reira ? Nāhea te Vārua Maita’i i te fa’a’itera’a i te parau mau o te Buka a Moromona iā’u ?

E feruri ato’a i te hō’ē ta’ata e tītau nei i te fa’aro’o i tō ’oe ’itera’a pāpū nō te Buka a Moromona. Nāhea ’oe i te tauturu i terā ta’ata ’ia ’imi i tōna iho ’ite ?

Moroni 10:8–25

« ’Eiaha e huna i te mau mea e hōro’ahia mai e te Atua. »

E rave rahi rāve’a nō te ta’ata ’ia « huna i te mau mea e hōro’ahia mai e te Atua » (Moroni 10:8). Tē huna nei te tahi mau ta’ata i te vai-mau-ra’a roa o teie mau hōro’a. E huna vetahi ē tē vai ra tā rātou mau hōro’a pae vārua, ma tē ’ite rā i te reira i roto i te tahi atu mau ta’ata. Tē vai ato’a ra e huna i tā rātou mau hōro’a nā roto noa i te tāu’a-’ore-ra’a i te reira ’e te ’orera’a e fa’ahotu i te reira.

’A tai’o ai ’oe i te Moroni 10:8–25, ’a ’imi i te mau parau mau e tauturu ia ’oe ’ia ’ite mai i te mau hōro’a pae vārua ’e ’ia fa’a’ohipa i te reira ma te mana rahi a’e nō te ha’amaita’i ia ’oe iho ’e ia vetahi ’ē. E ’imi i te mau hi’ora’a nō ni’a i te mau hōro’a tā te Atua i hōro’a ia ’oe ’aore rā te mau hōro’a ’ua hina’aro ’oia ia ’oe ’ia ’imi atu. Nō te aha e mea faufa’a ’ia « ha’amana’o ē nō ’ō mai i te Mesia te mau mea maitata’i »? (Moroni 10:18).

E feruri ato’a i teie parau a’o a Elder John C. Pingree Jr. : « Nāfea ïa tātou e ’ite ai i tō tātou mau hōro’a ? E nehenehe tā tātou e hi’o i tō tātou ha’amaita’ira’a pātereareha, e ani i te feiā tei ’ite maita’i ia tātou, ’e e ’imi tātou iho e aha tō tātou iho mau maita’i ’e te fa’ahiahia. Te mea faufa’a roa atu, e nehenehe tā tātou e ani i te Atua (hi’o Iakobo 1:5 ; PH&PF 112:10). ’Ua ’ite ’oia i tō tātou mau hōro’a, i te mea ē, nāna i hōro’a mai i te reira ia tātou » (« E ’ohipa tā’u nā ’oe », Ensign ’aore rā Liahona, Nov. 2017, 33).

Hi’o i te Arata’i nō te mau pāpa’ira’a mo’a, « Mau hōro’a a te Vārua », scriptures.ChurchofJesusChrist.org.

Moroni 10:30–33

E ti’a iā’u ’ia tae i te maita’i-roa-ra’a nā roto i te aroha o Iesu Mesia.

Tē a’o a Moroni e « haere mai i te Mesia » ’ua hau atu ïa i te ha’api’ira’a nō ni’a iāna ’aore rā te feruri-pinepine-ra’a iāna ’aore rā te tāmata-itoito-roa-ra’a ’ia ha’apa’o i tāna mau fa’auera’a, noa atu ā te faufa’a o te reira. E tītaura’a manihini teie ’ia haere mai i te Mesia i tōna hopera’a—’ia riro mai iāna te huru. ’A tai’o ai ’oe i te Moroni 10:30–33, e hi’o mai i te mau pereota e tauturu nei ia ’oe ’ia māramarama i te aura’a nō te haere-hope-ra’a mai i te Mesia, mai te mau parau « tāpe’a i te mau mea maita’i i hōro’ahia mai », « ’eiaha e rave noa atu i te mea paieti ’ore ra », ’e « ’ia maita’i roa ’outou iāna » (pāpa’ira’a fa’a’opa tei tu’uhia).

Nāhea ïa te reira e tupu ai ? ’A hi’o i te mau pāhonora’a i roto i te Moroni 10:30–33. E aha tā te Vārua e parau nei ia ’oe ’ia rave nō te « haere [hope atu ā] i te Mesia ’ia maita’i roa [’oe] iāna » ?

Hi’o Omoni 1:26 ; Arata’i nō te mau pāpa’ira’a mo’a, « Maita’i roa », scriptures.ChurchofJesusChrist.org.

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Moroni 10

E tai’o ’āmui i teie pene ma te ’imi i te mau taime ato’a ’ua fa’a’ohipa Moroni i te ta’o ra a’o. Tāpura ’aore rā tāpa’o i tā Moroni e a’o ra—e fa’aitoito pūai nei—ia tātou ’ia rave. E aha tā tātou e nehenehe e rave nō te ha’apa’o i tāna mau a’ora’a ?

Moroni 10:3

E aha te ha’api’ira’a tā tātou i ’apo mai nō ni’a i te aroha o te Fatu ’a tai’o ai tātou i te Buka a Moromona i teie matahiti ? Nāhea te Fatu i te fa’a’itera’a i te aroha i tō tātou ’utuāfare ?

Moroni 10:3–5

I muri a’e i te tai’ora’a i teie mau ’īrava, e nehenehe tā ’outou e ani i te mau melo o te ’utuāfare ’ia fa’a’ite mai nāhea rātou i te ’itera’a ’ē e parau mau te Buka a Moromona. E nehenehe e hīmene ’āmui i te hō’ē hīmene nō ni’a i te ’imira’a i te parau mau, mai te hīmene « Quand je lis l’Ecriture sainte » (Chants pour les enfants, 66). E nehenehe ato’a tā ’outou e ani i te mau melo o te ’utuāfare ’ia pāpa’i i tō rātou ’itera’a pāpū i roto i te hō’ē buka ’ā’amu nō te ’utuāfare.

Moroni 10:8–18

E taime au te Noela nō te feruri nō ni’a i te fāri’ira’a i te mau tao’a. Penei a’e e nehenehe te mau melo o te ’utuāfare e pū’ohu i te tahi mau hōro’a ’ei fa’ahōho’ara’a i « te mau mea e hōro’ahia mai e te Atua » i fa’ahitihia i roto i te Moroni 10:9–16. E nehenehe ato’a teie mau hōro’a e fa’ahōho’a i te tahi atu mau hōro’a maita’i nō ’ō mai i te Mesia ’o tā rātou e ’ite ra i roto i te tahi ’e te tahi.

Moroni 10:27–29, 34

E nehenehe te mau melo o te ’utuāfare e fa’a’ite e aha tā rātou e parau atu ia Moroni i te taime e « fārerei ai [iāna] i te ha’avāra’a a Iehova teitei ».

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’i i tā ’oe iho tuatāpapara’a pāpa’ira’a mo’a

’Imi ia Iesu Mesia. Te tumu o te Buka a Moromona—’e o te mau pāpa’ira’a mo’a ato’a—’o te fa’a’itera’a ïa nō Iesu Mesia. E aha te ha’api’ira’a tā ’outou e ’apo mai nei nō ni’a ia Iesu Mesia i roto i te Moroni 10 ? E aha tā ’outou e mana’o ra e rave nō tē haere iāna ra ?

Te hunara’a Moroni i te mau ’api, nā Jon McNaughton