’A hi’o na i te Arenio a te Atua, nā Walter Rane

21–27 nō Tītema

Noela

« E tae mai ’oia i te ao nei ’ia fa’aora i tōna ra mau ta’ata »

Te pu’e tau Noela, e taime ïa nō te feruri ’e nō te fa’a’ite i te māuruuru nō te fānaura’a o tō tātou Fa’aora, ’o Iesu Mesia. ’A tai’o ai ’outou ’e ’a feruri ai i teie hepetoma nō ni’a i tōna fānaura’a ’e tōna orara’a, ’a feruri nāhea tā ’outou tuatāpapara’a i te Buka a Moromona i teie matahiti i te ha’apūai i tō ’outou ’itera’a pāpū ē, ’o ’oia te Fa’aora o te ao nei. Pāpa’i i te mau mana’o e tae mai ia ’outou ra.

Pāpa’i i te mau mana’o e tae mai

Mai ia Nephi ē tae atu ia Moroni, ’ua ha’apa’o te mau peropheta ato’a o te Buka a Moromona i te fā mo’a i tātara-poto-hia i ni’a i te ’api upo’o parau o te buka : « ’Ia fa’a’ite pāpū atu ho’i i [te mau ta’ata ato’a] ē, ’o Iesu, ’o te Mesia ïa ». ’Ua ’ite te hō’ē peropheta iāna ’ei vārua hou te tāhuti nei, ’e ’ua ’ite te tahi atu peropheta i tōna fānaura’a ’e tāna tāvinira’a i roto i te hō’ē ’ōrama. ’Ua ti’a te hō’ē i ni’a i te hō’ē patu nō te poro i te mau tāpa’o nō tōna fānaura’a ’e tōna pohera’a, ’e ’ua tūturi te tahi atu i mua i tōna tino tei ti’afa’ahou, nō te fāfā i te mau puta i tōna nā rima ’e te ’āvae ’e te ’ao’ao. ’Ua ’ite rātou pā’āto’a i teie parau mau faufa’a tumu : « ’Aita atu ā rāve’a e ora ai te ta’ata nei, maori rā ’o te toto tāra’ehara nō Iesu Mesia ra… e haere mai… e fa’aora i tō teie nei ao » (Helamana 5:9).

Nō reira, i roto i teie pu’e tau Noela, ’a fa’ahanahana ai te feiā fa’aro’o ’ati a’e i te ao i te maita’i ’e te here o te Atua i te tonora’a mai i tāna Tamaiti, ’a feruri nāhea te Buka a Moromona i te ha’apūai i tō ’outou fa’aro’o i te Mesia. ’A feruri ai ’outou nō ni’a i tōna fānaura’a, ’a feruri nō te aha ’oia i tae mai ai ’e nāhea tōna taera’a mai i taui ai i tō ’outou orara’a. ’Ei reira ’outou e ’ite ai i te ’oa’oa mau nō Noela—te hōro’a tā Iesu Mesia i hōro’a nō ’outou.

Mau mana’o nō tā ’oe iho tuatāpapara’a pāpa’ira’a mo’a

1 Nephi 11:13–36 ; Mosia 3:5–10 ; Helamana 14:1–13 ; 3 Nephi 1:4–22

ʼUa haere mai Iesu Mesia i te fenua nei nō te riro ’ei Fa’aora nō’u.

E peu mātau te tai’ora’a i te ’ā’amu nō ni’a i te fānaura’a o te Fa’aora i roto i te Faufa’a ’Āpī i te Noela, e ti’a ato’a rā ia ’outou ’ia ’ite i te mau parau tohu ha’aputapū ’ā’au nō ni’a i te reira ’ohipa mo’a i roto i te Buka a Moromona. ’Ei hi’ora’a, te mau parau tohu nō te fānaura’a o te Fa’aora ’e tāna tāvinira’a e ’itehia i roto i te 1 Nephi 11:13–36 ; Mosia 3:5–10 ; Helamana 14:1–13 ; ’e te 3 Nephi 1:4–22. E aha te mau mana’o e tae mai nō ni’a ia Iesu Mesia ’a tai’o ai ’oe i teie mau tuha’a ma te hāro’aro’a i te mau aura’a e noa’a nō te mau tāpa’o o tōna fānaura’a ? Nāhea te mau ’itera’a pāpū o teie mau peropheta tahito i Amerika tahito e ha’apūai ai i tō ’outou ’itera’a pāpū nō te Mesia ’e nō tāna misiōni ?

Hi’o ato’a Mataio 1:18–25 ; 2 ; Luka 2.

2 Nephi 2:6 ; Alama 7:7–13 ; 11:40 ; Helamana 5:9 ; 14:16–17

’O Iesu Mesia te Tāra’ehara nō te mau ta’ata ato’a.

’Aita e tumu nō te fa’ahanahana i te fānaura’a o Iesu Mesia maori rā nō tāna tusia tāra’ehara, nā roto i te reira ’oia e fa’aora ai ia tātou i te hara ’e i te pohe, nā roto i te reira ’oia e tāmāhanahana ai ia tātou i roto i te ’ati ’e nā roto i te reira ’oia e tauturu ai ia tātou « ’ia maita’i roa… iāna » (Moroni 10:32). E aha te ha’api’ira’a tā ’oe i ’apo mai i roto i te Buka a Moromona i teie matahiti nō ni’a i te mana o te Fa’aora nō te fa’aora ia ’oe ? E mau ’ā’amu ānei ’aore rā mau ha’api’ira’a tā ’oe e ha’amana’o ta’a ’ē nei ? E feruri e aha tā te mau hi’ora’a i muri nei e ha’api’i nei ia ’oe nō ni’a i te misiōni tāra’ehara a te Fa’aora : 2 Nephi 2:6 ; Alama 7:7–13 ; 11:40 ; ’e te Helamana 5:9 ; 14:16–17. E aha tā ’oe e mana’o ra e rave nō te fa’a’ite iāna i tō ’oe māuruuru? (tē vai ra te tahi mau mana’o i ni’a ia Christmas.ComeUntoChrist.org.)

1 Nephi 6:4 ; 19:18 ; 2 Nephi 25:23, 26 ; 33:4, 10

Tē fa’a’ite pāpū nei te Buka a Moromona nō Iesu Mesia

Tē parau ra « Te tahi fa’ahou ’ite nō Iesu Mesia », ’ua hau atu ïa i te hō’ē upo’o parau na’ina’i nō te Buka a Moromona ; e fa’ahitira’a nō tō te reira fā hanahana. ’A feruri i te ha’api’ira’a tā ’oe e ’apo mai i roto i te mau ’īrava i muri nei nō ni’a i te misiōni o te Buka a Moromona e fa’a’ite pāpū nō te Mesia : 1 Nephi 6:4 ; 19:18 ; ’e te 2 Nephi 25:23, 26 ; 33:4, 10.

E nehenehe e pāpa’i i roto i te hō’ē buka ’ā’amu nāhea te tuatāpapara’a i te Buka a Moromona i teie matahiti i te ha’afātatara’a ia ’oe i te Mesia. E nehenehe te mau ha’amatara’a i muri nei e tauturu atu :

• « Hō’ē mea ’āpī tā’u i ha’api’i nō ni’a i te Fa’aora i teie matahiti, ’oia ho’i… »

• « Maoti tō’u tai’ora’a i te [mau ’īrava nō ni’a i te Fa’aora], ’ua taui te huru vau e… »

• « Te ta’ata [’aore rā te ’ā’amu] tā’u e au roa nei i roto i te Buka a Moromona, ’ua ha’api’i mai ïa iā’u e riro te Fa’aora i te… »

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

1 Nephi 11:13–23 ; Mosia 3:5–10 ; Helamana 14:1–13 ; 3 Nephi 1:4–22

E au paha te mau tamari’i e pāpa’i i te hōho’a nō te mau mea tā rātou e fa’aro’o ’a tai’o ai ’outou i te mau ’ā’amu nō ni’a i te fānaura’a ’e te tāvinira’a a te Fa’aroa i roto i te 1 Nephi 11:13–23 ; Mosia 3:5–10 ; Helamana 14:1–13 ; ’e te 3 Nephi 1:4–22. I muri iho, e nehenehe tā ’outou mau tamari’i e fa’ati’a fa’ahou mai i te mau ’ā’amu ma te fa’a’ohipa i te mau hōho’a tā rātou i pāpa’i.

« ’O ’oia te tao’a hōro’a »

Nō te tauturu i tō ’outou ’utuāfare ’ia rōtahi i ni’a i te hōro’a a te Metua i te Ao ra ia tātou nā roto i te tonora’a mai i tāna Tamaiti, e nehenehe tā ’outou e pū’ohu i te hō’ē hōho’a nō Iesu Mesia mai te hō’ē tao’a hōro’a. E nehenehe te mau melo o te ’utuāfare e parau mai i te mau hōro’a Nōela tā rātou i fāri’i ’aore rā ’o tā rātou i hina’aro ’ia fāri’i. I muri iho, e nehenehe e tātara i te hōho’a o te Mesia ma te ’āparau nāhea ’oia i te rirora’a ’ei hōro’a tao’a rahi nō tātou.

E mea maita’i ato’a paha nō tō ’outou ’utuāfare ’ia feruri i te hō’ē hōro’a ’o tā rātou i hina’aro e hōro’a i te Fa’aora, mai te tauto’o-ta’a-’ē-ra’a ’ia hāmani maita’i ia vetahi ’ē ’aore rā mai te ha’ara’a nō te fa’a’ore i te hō’ē peu ’ino. E nehenehe e ani i te mau melo o te ’utuāfare ’ia pāpa’i i tō rātou mau mana’o, ’a pū’ohu atu ai mai te hō’ē tao’a hōro’a ’e ’a tu’u atu ai i tā rātou tao’a hōro’a i pīha’i iho i te hōho’a o te Fa’aora.

Te vārua nō Noela

E riro ē, e ’ohipa ’ārearea ’ia fa’anahonaho i te mau ’ohipa e rave nō tō ’outou ’utuāfare i te mau mahana hou te Noela nō te putapū i te Vārua o te Mesia, mai te tauturura’a i te tahi ta’ata ’aore rā te hīmene-āmui-ra’a i te mau hīmene Noela. (Nō te mau mana’o, ’a hi’o christmas.ComeUntoChrist.org).

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i tā tātou ha’api’ira’a

’Āpe’e i te mau anira’a ’ia rave. « ’Ia ’ape’e ana’e ’outou i te mau anira’a ’ia ’ohipa, tē fa’a’ite ra ïa ’outou i [te mau melo o te ’utuāfare] ē tē ha’apa’o nei ’outou ia rātou ’e nāhea te ’evanelia i te ha’amaita’i i tō rātou orara’a. Tē hōro’a ato’a ra ’outou ia rātou i te mau rāve’a nō te fa’a’ite i te mau ’ohipa i tupu nō rātou, ’o tē ha’apūai i tā rātou fafaura’a, ’e ’ua ti’a atura ia rātou ’ia turu i te tahi ’e te tahi i te orara’a i te ’evanelia » (Ha’api’ira’a mai tā te Fa’aora, 35).

Te ’ōrama a Nephi nō te paretenia ra ia Maria, nā Judith A. Mehr