« 21–27 nō Tītema. Noela : E haere mai ’oia i roto i te ao nei nō te fa’aora i tōna mau ta’ata’ », Mai, pe’e mai—nō te Paraimere : Buka a Moromona 2020 (2020)
« 21–27 nō Tītema. Noera », Mai, pe’e mai—nō te Paraimere : 2020
’A hi’o na i te ’ārenio a te Atua, nā Walter Rane
21–27 nō Titema
Noela
« E haere mai ’oia i roto i te ao nei nō te fa’aora i tōna mau ta’ata »
E mea pinepine te mau tamari’i i te hina’aro pūai i te paraparau nō ni’a i te fa’ahanahanara’a i te noera. E feruri māite e aha te ti’a ia ’outou ’ia rave nō te tauturu ia rātou ’ia fa’atumu i ni’a ia Iesu Mesia ’e i ni’a i tō rātou māuruuru nō tōna fānaura’a.
Pāpa’i i te mau mana’o e tae mai
Tītau te mana’o
E ani i te mau tamari’i ’ia parau mai ’e ’aore rā, ’ia pāpa’i i te hō’ē hōho’a nō ni’a i te hō’ē mea tā tō rātou ’utuāfare i rave i te pu’e tau noera nō te tauturu ia rātou ’ia ha’amana’o ia Iesu Mesia.
Ha’api’i i te ha’api’ira’a tumu : Mau tamari’i ’āpī
1 Nephi 11:13–22; Mosia 3:5–8; Alama 7:9–13; Helamana 14:1–6; 3 Nephi 1:15, 19–21.
’Ua fānauhia Iesu Mesia ’ia riro ’ei Fa’aora nō’u.
’Ua ’ite ānei te mau tamari’i tā ’outou e ha’api’i ra, nō te aha tātou e fa’ahanahana ai i te noera ? Nāhea ’outou i te tauturu ia rātou ’ia hāro’aro’a, nō te aha te fānaura’a o Iesu Mesia i riro ai ’ei tumu nō te fa’ahanahanara’a ?
Mau ’ohipa e nehenehe e rave
-
E parau nō ni’a i te fānaura’a o Iesu, ma te pia i te mau hōho’a (mai te Buka hōho’a o te ’evanelia, nūmera 28, 29, 30, 31). E vaiiho i te mau tamari’i ’ia fa’a’ite mai i te mau mea tā rātou i ’ite. E fa’a’ohipa i te ’api ’ohipara’a nō teie hepetoma nō te ha’api’i i te mau tamari’i ē, ’ua ’ite te mau ta’ata tei ora nā i te ’anotau o te Buka a Moromona i te parau nō te fānaura’a o Iesu.
-
E tai’o i te mau parau faufa’a nō roto mai ia Alama 7:11–12 nō te ha’api’i i te mau tamari’i e aha tā Iesu Mesia i rave nō tātou. E fa’a’ite nō te aha ’outou i māuruuru ai nō te fānaura’ahia Iesu Mesia, ’e e fa’a’ite i tō ’outou mau mana’o nō ni’a i tāna tusia tāra’ehara.
-
E fa’a’ite i te mau hōho’a e fa’ahōho’a ra i te tusia tāra’ehara a te Fa’aora—mai tōna mamaera’a i Getesemane, te pohe i ni’a i te sātauro, ’e te ti’afa’ahoura’a (a hi’o Buka hōho’a o te ’evanelia, nūmera 56, 57, 58, 59). E ani i te mau tamari’i ’ia parau mai ia ’outou e aha tā rātou e ’ite nei i roto i te mau hōho’a. E tauturu ia rātou ’ia hāro’aro’a ē, ’ua tono mai te Metua i te ao ra ia Iesu Mesia i te fenua nei ’ia mamae nō tā tātou mau hara, ’ia pohe nō tātou, ’e ’ia ti’afa’ahou ’ia nehenehe ia tātou ’ia ho’i fa’ahou e ora i pīha’i iho iāna.
-
E hīmene i te hō’ē hīmene ’e te mau tamari’i nō ni’a iho i te fānaura’a o Iesu, mai te « Il envoya son fils aimé » ’aore rā « Au loin, dans l’étable » (Chants pour les enfants, 20–21, 26–27). E ha’apāpū i te mau tamari’i i te mau parau i roto i te hīmene o tē fa’ata’a ra i te mau ha’amaita’ira’a i roa’a ia tātou nā roto i te fānaura’a o Iesu.
Tē fa’a’ite pāpū nei te Buka a Moromona nō Iesu Mesia
Nō te ’ōpani i tā ’outou tuatāpapara’a i te Buka a Moromona i teie matahiti, e fa’aha’amana’o i te mau tamari’i ē, teie buka ’o te « tahi atu ’ite nō Iesu Mesia », tei pāpa’ihia nō te tauturu ia tātou ’ia haere mai iāna ra.
Mau ’ohipa e nehenehe e rave
-
E fa’a’ite i te hō’ē Buka a Moromona i te mau tamari’i. E tai’o i te upo’o parau ’e e fa’atoro i te mau parau ra « Te tahi atu ’ite nō Iesu Mesia ». E vaiiho i te mau tamari’i ’ia tāpe’a i te buka, te tahi i muri iho i te tahi, ’e e tauturu ia rātou ’ia ’imi i te i’oa o te Fa’aora i ni’a i te ’api tāpo’i. E parau i te mau tamari’i e aha tō ’outou mana’o nō ni’a i te Buka a Moromona ’e e mea nāhea te reira i te tauturura’a ia ’outou ’ia ’apo mai nō ni’a ia Iesu Mesia.
-
E hōro’a i te tamari’i tāta’itahi i te hō’ē hōho’a nō Iesu, ’e ’aore rā, e vaiiho ia rātou ’ia pāpa’i i tā rātou iho mau hōho’a nō ni’a iāna. E ani ia rātou ’ia ’āfa’i i tā rātou mau hōho’a i ni’a i te mau taime ato’a e fa’aro’o rātou i te i’oa o te Mesia ’a tai’o ai ’outou i te 2 Nephi 25:23, 26. E fa’a’ite pāpū ē, ’ua pāpa’ihia te Buka a Moromona nō te tauturu ia tātou ’ia « ti’aturi i te Mesia » (2 Nephi 25:23).
-
E fa’a’ite i te mau tamari’i i te hō’ē o tā ’outou mau tuha’a ’e ’aore rā, mau ’ā’amu au roa i roto i te Buka a Moromona, tei tauturu ia ’outou ’ia ’apo mai nō ni’a ia Iesu Mesia. E ani i te mau tamari’i e aha tā rātou mau ’ā’amu au roa a’e i roto i te Buka a Moromona, ’e e tauturu ia rātou ’ia ’ite nāhea teie mau ’ā’amu i te tauturu ia tātou ’ia ’apo mai nō ni’a i te Fa’aora ’e ’ia ha’afātata atu iāna. E nehenehe te hi’ora’a i te tahi mau hōho’a i roto i Te mau ’ā’amu o te Buka a Moromona e tauturu ia rātou ’ia ha’amana’o i te mau ’ā’amu.
Ha’api’i i te ha’api’ira’a tumu : Mau tamari’i pa’ari
1 Nephi 11:13–22; Mosia 3:5–8; Alama 7:10–13; Helamana 14:1–6; 3 Nephi 1:15, 19–21.
’Ua fānauhia Iesu Mesia ’ia riro ’ei Fa’aora nō’u.
E feruri e nāhea e ti’a ai ia ’outou ’ia tauturu maita’i a’e i te mau tamari’i ’ia hāro’aro’a i te aura’a o te fānaura’a o te Mesia ’e e aha te aura’a o te reira nō rātou.
Mau ’ohipa e nehenehe e rave
-
E hōro’a i te tamari’i tāta’itahi hō’ē o te mau ’īrava e ’itehia i roto i te ’api ’ohipara’a nō teie hepetoma. E ani ia rātou tāta’itahi ’ia tai’o i tā rātou ’īrava, e ’imi o vai te peropheta e paraparau nei, ’e e fa’a’ite i te hō’ē mea tā teie peropheta i ’ite nō ni’a ia Iesu Mesia. E tauturu ia rātou ’e ’aore rā, e vaiiho ia rātou ’ia ’ohipa ’āmui, mai te mea e tītauhia.
-
E tāpura i ni’a i te tāpura ’ere’ere te tahi o te mau ’ohipa tei tupu i te fānaura’a o Iesu, mai tei fa’ata’ahia i roto i te Luka 2:4–14; Mataio 2:1–2; e 3 Nephi 1:15, 19–21. E tauturu i te mau tamari’i ’ia ’imi i teie mau ’īrava nō te fa’ata’a ’ua tupu ānei te reira mau ’ohipa i Betelehema, i Amerika, ’e ’aore rā, i nā vāhi to’opiti. Nō te aha tātou e māuruuru ai ’ia fāri’i i te Buka a Moromona ’ei ’ite piti nō te fānaura’a o Iesu Mesia ’e nō tāna misiōni ’ei Fa’aora ?
-
E taio Alama 7:10–13 ’e te mau tamari’i. E aha tā tātou e ’apo mai nā roto mai i teie mau ’īrava nō ni’a i te fānaura’a o Iesu ? Nō ni’a i tōna ti’ara’a Atua ? Nō ni’a i tāna misiōni i ni’a i te fenua nei ? E ani i te mau tamari’i ’ia fa’a’ite mai nō te aha rātou e māuruuru ai ia Iesu Mesia, ’e e fa’a’ite i tō ’outou ’itera’a pāpū nō ni’a iāna.
Tē fa’a’ite pāpū nei te Buka a Moromona nō Iesu Mesia
Nō ni’a i te Buka a Moromona, ’ua parau te peropheta Iosepha Semita ē, « e ha’afātata te hō’ē ta’ata i pīha’i iho i te Atua nā roto i te ha’apa’ora’a i tāna mau ha’api’ira’a, i te tahi atu buka » (’ōmuara’a o te Buka a Moromona). Nāhea e ti’a ai ia ’outou ’ia tauturu i te mau tamari’i ’ia hāro’aro’a i teie fafaura’a ?
Mau ’ohipa e nehenehe e rave
-
Hōro’a i te hō’ē o teie mau ’īrava i te tamari’i tāta’itahi : 2 Nephi 25:23, 26; 33:4, 10. E ani i te mau tamari’i ’ia tai’o i tā rātou ’īrava ’e ’ia ’imi e aha tā Nephi, te peropheta o te Buka a Moromona i hina’aro ’ia ’ite tātou. Ani ia rātou ʼia pāpaʼi i te mea tā rātou i ʼite i ni’a i te tāpura ’ere’ere. E fa’ata’a ē, tē fa’a’ite nei teie mau mea i te hō’ē tumu faufa’a o te Buka a Moromona. E vaiiho i te mau tamari’i ’ia ha’uti ta’ata ora i te tahi ’e te tahi nāhea rātou i te fa’ata’a i te hō’ē hoa i te hō’ē tumu faufa’a roa o te Buka a Moromona.
-
E fa’a’ite i te mau tamari’i i te hō’ē o tā ’outou mau tuha’a ’e ’aore rā, mau ’ā’amu au roa i roto i te Buka a Moromona, tei tauturu ia ’outou ’ia ’apo mai nō ni’a ia Iesu Mesia. E ani i te mau tamari’i e aha tā rātou mau ’ā’amu au roa a’e i roto i te Buka a Moromona, ’e e tauturu ia rātou ’ia ’ite nāhea teie mau ’ā’amu i te tauturu ia tātou ’ia ’apo mai i te parau nō ni’a i te Fa’aora ’e ’ia ha’afātata atu iāna. E fa’a’ite i te mau tamari’i e mea nāhea tō te Buka a Moromona tauturura’a ia ’outou ’ia ’ite ē, o Iesu te Mesia. E fa’aitoito i te mau tamari’i ’ia feruri i te hō’ē ’īrava ’e ’aore rā, i te hō’ē ’ā’amu nō roto mai i te Buka a Moromona tei ha’apūai i tō rātou ti’aturira’a ia Iesu Mesia. E ani ia rātou ’ia fa’a’ite i te reira i te hō’ē hoa ’e ’aore rā, i te hō’ē melo o te ’utuāfare tei ’ore i ’ite i te parau nō te Buka a Moromona.
Fa’aitoito i te ha’api’ira’a mai i te fare
E ani i te mau tamari’i ’ia fa’a’ite i tō rātou ’utuāfare e mea nāhea tō te Buka a Moromona tauturura’a ia rātou ’ia ’apo rahi mai nō ni’a i te Mesia. E fa’aitoito ia rātou ’ia fa’a’ite mai i te hō’ē ’īrava ’e ’aore rā, hō’ē ’ā’amu nō roto mai i te Buka a Moromona ’ei tuha’a nō tō rātou ’itera’a pāpū.
Ha’amaita’ira’a i tā tātou ha’api’ira’a
E mea au nā te mau tamari’i te mau ’ā’amu. E mau rāve’a maita’i roa te mau ’ā’amu nō te tauturu i te mau tamari’i ’ia ’apo mai ’e ’ia ha’amana’o i te mau parau mau. ’Ia fa’a’ite ana’e ’outou i te ’ā’amu o te fānaura’a o Iesu, e fa’a’ite ato’a i te mau ’ā’amu nō roto mai i tō ’outou orara’a tei tauturu i te ha’apūaira’a i tō ’outou fa’aro’o i te Fa’aora.