Minerva Teichert (1888–1976), Tē bāpetizo ra Alama i roto i te pape nō Moromona, 1949–1951, peni hinu, 35⅞ x 48 initi. Brigham Young University Museum of Art, 1969

30 nō Novema–6 nō Tītema

Moroni 1–6

« Nō te tāpe’a ia rātou i ni’a i te ’ē’a ti’a »

Hou ’a ha’amata ai ’outou i te fa’anaho i te mau ’ohipara’a nō te ’apo mai nā te mau tamari’i, e tuatāpapa nā roto i te pure i te Moroni 1–6, ma te ’imi i te mau parau tumu ’e te mau ’īrava tā ’outou e mana’o ra ē, e hina’aro rātou e hāro’aro’a.

Pāpa’i i te mau mana’o e tae mai

Tītau i te mana’o

E ani i te mau tamari’i ’ia fa’a’ite mai e aha tā rātou i ’apo mai nō ni’a ia Moroni. E nehenehe tā ’outou e fa’a’ohipa i te « Pene 53 : Moroni ’e tāna mau ha’api’ira’a » (Te mau ’ā’amu o te Buka a Moromona, 154–55) nō te tauturu ia rātou ’ia ha’amana’o.

Ha’api’i i te ha’api’ira’a tumu : Mau tamari’i ’āpī

Moroni 4–5

E rave au i te ’ōro’a mo’a nō te fa’a’ite ē, e ha’amana’o tāmau noa vau ia Iesu Mesia.

E nehenehe te ’ōro’a mo’a e riro ’ei ’itera’a pae vārua mo’a—tae noa atu nō te mau tamari’i ’āpī. Nāhea e ti’a ai ia ’outou ’ia tauturu i te mau tamari’i tā ’outou e ha’api’ira’a ra ’ia fa’a’ohipa i te taime o te ’ōro’a mo’a nō te feruri ia Iesu ?

Mau ’ohipa e nehenehe e rave

• E fa’a’ite i te hōho’a o te mau ta’ata e ’amu ra i te ’ōro’a mo’a (hi’o Buka hōho’a o te ’evanelia, nūmera 108). E ani i te mau tamari’i ’ia fa’a’ite mai ia ’outou e aha te tupu i te taime nō te ’ōro’a mo’a. E aha te ti’a ia tātou ’ia rave i roto i te taime nō te ’ōro’a mo’a ?

• E ani e piti melo o te pāroita ’ia haere mai i roto i te piha ha’api’ira’a nō te tai’o i te Moroni 4:3 ’e 5:2 i mua i te mau tamari’i ’e ’ia fa’a’ite nō te aha rāua e rave ai i te ’ōro’a mo’a i te mau hepetoma ato’a. E ani ia rāua ’ia hōro’a mai i te tahi mau mea e nehenehe te mau tamari’i e rave nō te tauturu ia rātou ’ia feruri nō ni’a ia Iesu i te taime nō te ’ōro’a mo’a ’e ’ia ha’amana’o noa iāna.

• E hīmene i te hō’ē hīmene o te tauturu i te mau tamari’i ’ia feruri nō ni’a ia Iesu, mai te « Humblement, calmement » (Chants pour les enfants,11). E ani i te mau tamari’i ’ia ha’amātau i te pārahi ma te fa’atura i te taime nō te ’ōro’a mo’a.

Moroni 6:1–3

E nehenehe au e fa’aineine ’ia bāpetizohia vau.

Te fa’ata’ara’a a Moroni nō ni’a i te mau ta’ata i bāpetizohia i tōna ra tau, e tauturu i te mau tamari’i ’ia fa’aineine i te fāri’i i teie ’ōro’a faufa’a roa i teie mahana.

Mau ’ohipa e nehenehe e rave

• E tai’o i te mau pereota nō roto mai i te Moroni 6:1–3 ’o tē ha’api’i nei, ’o vai te nehenehe e bāpetizohia. E tātara i te mau parau ’aita te mau tamari’i e māramarama ra. ’Ei hi’ora’a, hō’ē aura’a o « te ’ā’au tātarahapa ’e te vārua marū » o te ha’ape’ape’ara’a ïa nō tā tātou mau hara (Moroni 6:2). E parau e mea nāhea ’outou i te fa’aineinera’a nō te bāpetizora’a, ’e ’aore rā, e ani i te tahi ta’ata tei bāpetizohia ’aita i maoro a’e nei ’ia fa’ata’a mai e mea nāhea ’oia i te fa’aineinera’a. E tauturu i te mau tamari’i ’ia feruri i te mau rāve’a e nehenehe ai rātou e fa’aineine ’ia bāpetizohia i te hō’ē mahana.

• E pia i te mau hōho’a o te mau ta’ata e bāpetizohia ra (hi’o Buka hōho’a o te ’evanelia, nūmera 103, 104), ’e e vaiiho i te mau tamari’i ’ia parau mai nō ni’a i te mea tā rātou e ’ite ra i ni’a i te mau hōho’a. E tauturu ia rātou ’ia ’ite i te mau ha’apāpūra’a, mai te pape ’e te ahu ’uo’uo. E ani te mau tamari’i nō te aha tātou e bāpetizohia ai, ’e e fa’ata’a ē, nō te aha ’outou i mā’iti ai ’ia bāpetizohia.

Moroni 6:4–6, 9

E ha’amaita’ihia vau ’ia haere au i te purera’a.

Tē māramarama ra ānei te mau tamari’i tā ’outou e ha’api’i ra nō te aha tātou e haere ai i te purera’a i te mau hepetoma ato’a ? Tē hōro’a nei Moroni 6 i te tahi mau tumu faufa’a.

Mau ’ohipa e nehenehe e rave

• E ani i te mau tamari’i nō te aha e mea au nā rātou ’ia haere mai i te purera’a, ’e e tauturu ia rātou ’ia fa’a’ite mai i te tahi o te mau mea tā tātou e rave i te fare purera’a. E tai’o atu ia rātou i te tahi o teie mau mea nā roto mai i te Moroni 6:4–6, 9, ’e e ani ia rātou ’ia ha’uti ’e ’aore rā, ’ia pāpa’i i tō rātou iho mau hōho’a tē rave ra rātou i te tahi o te reira mau mea (mai te purera’a, te porora’a, te hīmenera’a, ’e te ravera’a i te ’ōro’a mo’a).

• E tauturu i te mau tamari’i ’ia hīmene i te hō’ē hīmene nō ni’a i te haerera’a i te purera’a, mai te « When I Go to Church » (Children’s Songbook,157). E parau i te mau tamari’i nō te aha e mea au nā ’outou ’ia haere i te purera’a ’e e mea nāhea te reira i te ha’amaita’ira’a ia ’outou.

Ha’api’i i te ha’api’ira’a tumu : Mau tamari’i pa’ari

Moroni 2–6

E hōro’a mo’a te Vārua Maita’i.

E rave rahi taime te fa’ahitira’ahia te Vārua Maita’i i roto i te Moroni 2–6. Nāhea e ti’a ai ia ’outou ’ia fa’a’ohipa i teie mau pene nō te tauturu i te mau tamari’i ’ia hāro’aro’a ē, nāhea te Vārua Maita’i i te tauturu ia rātou ?

Mau ’ohipa e nehenehe e rave

• E ani i te mau tamari’i ’ia ’imi i te mau ’īrava i roto i te Moroni 2–6, ’o te fa’ahiti ra i te Vārua Maita’i ’e ’aore rā, te Vārua. E tai’o ’āmui i teie mau ’īrava tāta’itahi, ’e e ani i te mau tamari’i ’ia tāpa’o i ni’a i te tāpura ’ere’ere i te mau mea tā rātou i ’apo mai nō ni’a i te Vārua Maita’i. Nāhea e ti’a ai i te Vārua Maita’i ’ia tauturu ia tātou ?

• E parau i te mau tamari’i nō ni’a i te hō’ē taime ’a fāri’i ai ’outou i te fa’aurura’a a te Vārua Maita’i, i te fare pure ānei ’e ’aore rā, i te tahi atu vāhi. E fa’ata’a e mea nāhea ’outou i ’ite ai ’o te Vārua Maita’i ’e e mea nāhea tōna tauturura’a ia ’outou. E ani i te mau tamari’i ’ia fa’a’ite mai i te mau ’itera’a tā rātou i fāri’i nā roto i te Vārua Maita’i, ’e e fa’aitoito ia rātou ’ia ’imi i tāna fa’aurura’a.

  

  E hōro’ahia te hōro’a o te Vārua Maita’i nā roto i te tu’ura’a rima.

Moroni 4–5

E rave au i te ’ōro’a mo’a nō te fa’a’ite ē, e ha’amana’o tāmau noa vau ia Iesu Mesia.

’Ia māramarama ana’e te mau tamari’i i te mo’ara’a o te ’ōro’a mo’a, e rahi atu tō rātou hina’aro ’ia fa’atura i te reira ’e ’ia ’ite ’ua fātata atu rātou i te Atua i roto i taua ’ōro’a ra.

Mau ’ohipa e nehenehe e rave

• E pāpa’i i te mau pereota nō roto mai i te Moroni 4:3 ’e 5:2 i ni’a i te mau tuha’a ’api parau ta’a ’ē, ’e e ani i te mau tamari’i ’ia fa’anaho i te mau pereota i roto i te ’āna’ira’a tano. ’Ia au i teie mau ’īrava, nō te aha e mea faufa’a te ’ōro’a mo’a ?

• E ani i te mau tamari’i ’ia feruri ē, ’ua haere mai te hō’ē hoa i te purera’a ’ōro’a nō te taime mātāmua. Nāhea rātou i te fa’ata’a i tō rātou hoa ē, e aha te ’ōro’a mo’a ’e nō te aha tātou e ’amu ai i te reira ? E fa’aitoito ia rātou ’ia fa’a’ohipa i te Moroni 4:3 ’e 5:2 i roto i tā rātou mau fa’ata’ara’a.

• E ani i te mau tamari’i ’ia fa’a’ite mai i te mau mea tā tō rātou ’utuāfare e rave i roto i te ’ōro’a mo’a nō te fa’atura ’e nō te feruri ia Iesu Mesia. E aha te tahi atu ā mau mana’o tō rātou ? E ani ia rātou ’ia rave mai i te hō’ē o te reira mau mana’o ’e ’ia fa’ata’a i te hō’ē fā nō te hōro’a i te taime hau atu ā nō te ferurira’a i te Fa’aora i roto i te ’ōro’a mo’a.

Moroni 6:4–6, 9

Tē haere nei tātou i te purera’a nō te rave i te ’ōro’a mo’a ’e nō te pāturu i te tahi ’e te tahi.

E tauturu te mau parau a Moroni i te mau tamari’i tā ’outou e ha’api’i ra ’ia ’ite i te ’ōpuara’a rahi a’e nō tē haere mai i te purera’a i te hepetoma tāta’itahi.

Mau ’ohipa e nehenehe e rave

• E pāpa’i Nō te aha tātou e haere ai i te purera’a ? i ni’a i te tāpura ’ere’ere, ’e e ani i te mau tamari’i ’ia pāpa’i i te tahi mau pāhonora’a. E ani ia rātou ’ia ’imi i te tahi atu ā mau pāhonora’a i roto i te Moroni 6:4–6, 9 ’e e ’āmui atu i te reira i tā rātou tāpura i ni’a i te tāpura ’ere’ere. E ani i te mau tamari’i ’ia fa’a’ite mai e mea nāhea rātou i te ha’amaita’ira’ahia nō te haerera’a i te purera’a. E fa’aue ia rātou ’ia ha’uti nō te fa’ata’a i te hō’ē hoa nō te tahi atu ha’apa’ora’a nō te aha rātou i māuruuru ai te rirora’a ’ei melo nō te ’Ēkālesia.

• E fa’a’ite i te mau hōho’a ’e ’aore rā, i te mau hi’ora’a nō te mau mā’a tāmā’a. Nō te aha e mea faufa’a ’ia fa’a’amu i tō tātou tino ? E tai’o ’āmui i te Moroni 6:4, ’e e ani i te mau tamari’i, i tō rātou mana’ora’a, e aha te aura’a o te pereota ra « fa’a’amuhia i te parau maita’i a te Atua ». Nāhea te parau a te Atua i te fa’a’amu ia tātou ?

• E ani i te hō’ē o te mau tamari’i ’ia tai’o i teie fa’ahitira’a parau a Elder Jeffrey R. Holland, ’e e ’āparau e aha tā te reira e ha’api’i nei nō ni’a i te huru e ti’a ai ia tātou ’ia fa’a’amu i te tahi ’e te tahi : « E rave rahi ta’ata ’aita rātou e haere mai nei i te purera’a nō te ’imi noa i te tahi mau mea ri’i ’āpī o te ’evanelia ’e ’aore rā, nō te hi’o noa i te mau hoa, noa atu ē, e mea faufa’a te reira mau mea ato’a. Tē haere mai nei rātou nō te ’imi i te hō’ē ’itera’a vārua. Tē hina’aro nei rātou i te hau. Tē hina’aro nei rātou ’ia ha’apūaihia tō rātou fa’aro’o ’e tō rātou tīa’ira’a ’ia fa’a’āpīhia. ’Ei ha’apotora’a, tē hina’aro nei rātou ’ia fa’a’amuhia rātou i te parau maita’i a te Atua, ’ia ha’apūaihia nā te mau mana o te ra’i » (« A Teacher Come from God », Ensign, me 1998, 26). Nāhea e ti’a ai ia tātou ’ia tauturu i te fa’a’amura’a i te pae vārua te tahi ’e te tahi i te fare purera’a ?

Fa’aitoito i te ha’api’ira’a mai i te fare

E fa’aitoito i te mau tamari’i ’ia ’āparau i tō rātou ’utuāfare nō ni’a i te mau tumu e mea au nā rātou ’ia haere i te purera’a i te hepetoma tāta’itahi.

Ha’amaita’i i tā tātou ha’api’ira’a

Turu i te mau metua. E ’imi nā roto i te pure i te mau rāve’a nō te turu i te mau metua o te mau tamari’i tā ’outou e ha’api’i ra. Nāhea e ti’a ai ia ’outou ’ia turu i tā rātou mau tauto’ora’a ’ia ha’api’i i te ’evanelia i tā rātou mau tamari’i ? ’Ei hi’ora’a, e nehenehe tā ’outou e paraparau i te mau metua nō ni’a i te mau hina’aro ’e i te mau ’ana’anataera’a o tā rātou mau tamari’i ’e ’aore rā, e fa’a’ite ia rātou e aha tā tā rātou mau tamari’i e ’apo nei i roto i te piha ha’api’ira’a (hi’o i te Te ha’api’ira’a mai tā te Fa’aora,25).