« 23–29 nō Novema. Etera 12–15 : ’Nā roto i te fa’aro’o e ti’a ai te mau mea ato’a,’ » Mai, pe’e mai—nō te Paraimere : Buka a Moromona 2020 (2020)
« 23–29 nō Novema. Etera 12–15 », Mai, pe’e mai—nō te Paraimere : 2020
Etera e tāpuni ra i roto i te hō’ē ana, nā Gary Ernest Smith
23–29 nō Novema
Etera 12–15
« Nā roto i te fa’aro’o e ti’a ai te mau mea ato’a »
’A tai’o ai ’outou i te Etera 12–15, e feruri i te mau tamari’i tā ’outou e ha’api’i nei. E nehenehe te mau mana’o nō te ’ohipara’a i roto i teie arata’i e fa’auru ia ’outou ’e te tahi atu mau mana’o ’o te tauturu i te pāhono i te mau hina’aro o te mau tamari’i i roto i tā ’outou piha ha’api’ira’a.
Pāpa’i i te mau mana’o e tae mai
Tītau i te mana’o
E tauturu i te mau tamari’i ’ia feruri i te mau ’ā’amu o te pāpa’ira’a mo’a nō ni’a i te mau ta’ata o tei fa’a’ite i te fa’aro’o rahi. E ’itehia te tahi mau hi’ora’a i roto i te Etera 12:11–22.
Ha’api’i i te ha’api’ira’a tumu : Mau tamari’i ’āpī
Te faʼaroʼo ’o te ti’aturi ïa i te mau mea ’aore e ʼite-mata-hia e tātou.
’Ua fa’a’ite mai Moroni e rave rahi mau hi’ora’a nō te mau ta’ata tei rave i te mau ’ohipa rarahi nō tō rātou fa’aro’o. E feruri nāhea ’outou ’ia fa’a’ohipa i teie mau hi’ora’a nō te ha’api’i i te mau tamari’i e aha te fa’aro’o.
Mau ’ohipa e nehenehe e rave
-
E tai’o i te mau tamari’i « o te fa’aro’o nei, ’o te ti’aturi ïa i te mau mea ’aore i hi’ohia » i roto i te Etera 12:6, ’e e ani ia rātou ’ia fa’ahiti i teie pereota nā muri iho ia ’outou. E parau i te mau tamari’i i te mau mea tā ’outou i ti’aturi noa atu ē, ’aore ’outou i ’ite mata, ’e ’a tauturu i te mau tamari’i ’ia feruri i te tahi atu mau hi’ora’a. E tauturu tē hīmene « La foi » (Chants pour les enfants,50–51), ’e ’aore rā, te tahi ’ē atu hīmene nō ni’a i te fa’aro’o.
-
E fa’a’ite i te mau hōho’a e fa’ata’a ra i te mau hi’ora’a o te fa’aro’o i roto i te Etera 12:13–15, 20–21 (hi’o Buka hōho’a o te ’evanelia, nūmera 78, 85 ’e te ’api ’ohipara’a nō teie hepetoma). E vaiiho i te mau tamari’i ’ia parau mai ia ’outou e aha tā rātou e ’ite nei i roto i te mau hōho’a ’e e aha tā rātou i ’ite nō ni’a i te mau ’ā’amu. E paraparau e te mau tamari’i nō ni’a e mea nāhea tō teie mau ta’ata fa’a’itera’a i te fa’aro’o ’e e aha tei tupu nā roto i tō rātou fa’aro’o.
-
E ha’uti i te hō’ē ha’uti tu’upirira’a ’e te mau tamari’i. E hōro’a ia rātou i te mau tāpa’o fa’a’itera’a nō ni’a i te mau ta’ata ha’apa’o i fa’ata’ahia i roto i te Etera 12:13–15, 19–20 ’e tae roa ’ua ’itehia te piri i te mau tamari’i ’o vai rātou. I muri iho, e vaiiho i te mau tamari’i ’ia ha’uti fa’ahou i te reira ha’uti nā roto i te hōro’ara’a, te tahi i muri mai i te tahi, i te mau tāpa’o fa’a’itera’a nō ni’a i taua ā mau ta’ata ra (’e ’aore rā, te tahi atu mau ta’ata ha’apa’o maita’i) ’a ’itehia ai te piri i te toe’a o te piha ha’api’ira’a. E fa’a’ite e aha tā ’outou i fa’ahiahia nō ni’a i te fa’aro’o o teie mau ta’ata.
E nehenehe Iesu Mesia e tauturu iā’u ’ia pūai.
I te tahi taime e fa’aruru te mau tamari’i i te mau ’ohipa e paruparu ai tō rātou ferurira’a, mai ia Moroni ato’a i nā reira. E tauturu ia rātou ’ia ’apo mai i te mea tā Moroni i ’apo mai—’oia ho’i, e nehenehe te Fa’aora « e fa’ariro i te mau mea paruparu ’ei mea ’eta’eta » (Etera 12:27,).
Mau ’ohipa e nehenehe e rave
-
E fa’ata’a nō te mau tamari’i i te hō’ē ’ohipa o te tītau i te pūai rahi o te tino nō te fa’aoti i te reira. E ani ia rātou ’ia fa’a’ite mai i te mau hi’ora’a o te mau mea ’aita tō rātou pūai i nava’i nō te rave i teienei. Nāhea e ti’a ai ia tātou ’ia nava’i te pūai nō te rave i teie mau ’ohipa ? E fa’ata’a ē, tē vai ato’a ra tā tātou ’ohipa pae vārua e rave, terā rā i te tahi taime te paruparu nei tātou i te pae vārua. ’Ua ’ite Moroni i teie huru nō ni’a i tāna mau pāpa’ira’a i ni’a i te mau ’api parau. E tai’o i te Etera 12:27 i te mau tamari’i. E aha tā te Fatu i fafau i te feiā tei paruparu ?
-
E fa’a’ite i te hō’ē ’itera’a i reira te Fa’aora i te tauturura’a ia ’outou ’e ’aore rā, i te tahi ta’ata tā ’outou i mātau ’ia rave i te hō’ē ’ohipa ’eta’eta. E fa’a’ite pāpū i te mau tamari’i ē, mai te mea e ’imi rātou i tāna tauturu, e nehenehe Iesu e tauturu ia rātou ’ia pūai, noa atu ē, tē paruparu ra rātou.
Ha’api’i i te ha’api’ira’a tumu : Mau tamari’i pa’ari
Te faʼaroʼo o te ti’aturira’a ïa i te mau mea ’aore e ʼite-mata-hia e tātou.
Tē patu nei te mau tamari’i tā ’outou e ha’api’i nei i te niu o tō rātou ’itera’a pāpū. E nehenehe te parau a’o a Moroni nō ni’a i te fa’aro’o, e ’itehia i roto i te Etera 12:6, e tauturu ia rātou.
Mau ’ohipa e nehenehe e rave
-
E fa’ata’a ē, ’ua tāmata te peropheta Etera e ha’api’i i te ’āti Iareda i te « mau mea rarahi ’e te māere », ’aita rā rātou i ti’aturi i te mau mea tāna i parau. E ani i te mau tamari’i ’ia tai’o i te Etera 12:5 nō te ’ite mai nō te aha ’aita rātou i ti’aturi. E aha te tahi mau mea tā te Metua i te ao ra e hina’aro nei ’ia ti’aturi tātou noa atu ē, ’aita tātou e ’ite mata i te reira ? E tai’o ’āmui i te Etera 12:6. E aha tā Moroni i ha’api’i i te mau ta’ata ’o tei ’ore i ti’aturi i te mau parau mau pae vārua nō te mea ’aita i ti’a ia rātou ’ia ’ite mata i te reira ?
-
E fa’a’ite i te hō’ē o te mau tamari’i i te hō’ē hōho’a ma te ’ore te tahi atu mau tamari’i e ’ite mata, ’e e ani i te tamari’i ’ia fa’ata’a i te hōho’a i te toe’a o te piha ha’api’ira’a. Mai te mea e taimehia, e vaiiho i te tahi atu mau tamari’i, te tahi i muri mai i te tahi, ’ia rave ato’a i te reira i ni’a i te tahi atu mau hōho’a. I muri iho, e ani ia rātou ’ia tai’o i te Etera 12:6 ’e e ’imi i teie pereota: « o te fa’aro’o nei, o te ti’aturi ïa i te mau mea ’aore i hi’ohia ». Nāhea tātou i te fa’a’ite i te fa’aro’o i roto ia Iesu Mesia mai te mea ’aita e ti’a ia tātou ’ia ’ite Iāna ?
-
E ani i te mau tamari’i ’ia tai’o i teie pereota i roto i te Etera 12:6: « E ’ore ho’i ’outou e tae i te ’ite ’e ’ia oti te tāmatara’a i tō ’outou fa’aro’o » E tauturu i te mau tamari’i ’ia hāro’aro’a ē, ’ia ha’apa’o ana’e tātou i te hō’ē fa’auera’a, e nehenehe tātou e ’ite ē, e parau mau. E ani ia rātou ’ia feruri i te mau parau tumu o te ’evanelia tā te Atua e hina’aro ia tātou ’ia fāri’i i te hō’ē ’itera’a pāpū nō te reira, mai te aufaura’a i te tuha’a ’ahuru, te ha’amo’ara’a i te mahana sābati, ’e ’aore rā, te orara’a i te parau pa’ari. I muri iho e pāpa’i i ni’a i te tāpura ’ere’ere Nō te fāri’i i te hō’ē ’itera’a pāpū o te , e ti’a iā’u ’ia . E fa’a’ite e mea nāhea tō ’outou fa’a’ohipara’a i te fa’aro’o nō te fāri’i i tō ’outou ’itera’a pāpū nō teie mau parau mau o te ’evanelia ’e nō te tahi atu.
E au te tīa’i mai te hō’ē tūtau nō tō’u vārua.
E tauturu i te mau tamari’i tā ’outou e ha’api’i nei ’ia hāro’aro’a ē, e nehenehe tātou « e tīa’i i te hō’ē ao maita’i roa » nō tō tātou fa’aro’o i te Mesia (Etera 12:4).
Mau ’ohipa e nehenehe e rave
-
E fa’a’ite i te mau tamari’i i te tātarara’a o te tīa’ira’a e ’itehia i roto i te « tīa’ira’a » (Arata’i nō te mau pāpa’ira’a mo’a, scriptures.ChurchofJesusChrist.org). ’Ia au i teie tātarara’a ’e te Etera 12:4, 32, e aha tā tātou e tīa’i ? (hi’o ato’a Moroni 7:40–42). E tauturu i te mau tamari’i ’ia feruri i te tahi mau ta’o nō te tīa’i, e tae noa atu i te mau ta’o pāto’i i te parau tīa’i. E fa’a’ite ia rātou i te tahi mau parau mau o te ’evanelia ’o te hōro’a ia ’outou i te tīa’i, ’e ē ani ia rātou ’ia nā reira ato’a.
-
E fa’a’ite (’e ’aore rā, a pāpa’i i ni’a i te tāpura ’ere’ere) i te hō’ē hōho’a o te hō’ē poti ’e hō’ē tūtau. Nō te aha te mau poti e hina’aro ai i te mau tūtau ? E aha te tupu i ni’a i te hō’ē poti ’aita tōna e tūtau ? E tai’o ’āmui i te Etera 12:4, ’e e ani i te mau tamari’i nāhea te tīa’ira’a i te fa’aauhia i te hō’ē tūtau. E ani i te mau tamari’i ’ia pāpa’i i tā rātou iho hōho’a nō te hō’ē poti ’e te tūtau ’o tā rātou e ha’api’i atu i tō rātou ’utuāfare nō ni’a i te tīa’ira’a.
E nehenehe Iesu Mesia e tauturu iā’u ’ia pūai.
’A pa’ari ai te mau tamari’i, e rahi atu tō rātou ’itera’a i tō rātou mau paruparu. E fa’a’ohipa i teie mau ’īrava nō te ha’api’i ia rātou nāhea te Fa’aora i te fa’ariro « i te mau mea paruparu ’ei mea ’eta’eta » (Etera 12:27).
Mau ’ohipa e nehenehe e rave
-
E ani i te mau tamari’i ’ia tai’o Etera 12:23–25 nō te ’ite mai nō te aha Moroni i māna’ona’o ai. E ani ia rātou, ’ua tupu a’ena ānei taua huru mana’o ra i roto ia rātou. I muri iho, e ani ia rātou ’ia tai’o i te mau ’īrava 26–27 nō te ’ite mai e mea nāhea tō te Fatu fa’aitoitora’a ia Moroni. E aha te tītauhia ia tātou ’ia rave ’ia ti’a i te Fatu ’ia tauturu mai ia tātou ’ia pūai i te taime e paruparu ai tātou ? E fa’a’ite i te hō’ē ’itera’a ’a tauturu ai te Fa’aora ia ’outou ’ia nava’i te pūai nō te rave i te hō’ē mea ’eta’eta.
-
E ani i te mau tamari’i ’ia pāpa’i hōho’a i te hō’ē ’ohipa paruparu ’e te hō’ē ’ohipa pūai. I muri iho, e ani ia rātou ’ia tu’u i ni’a i tā rātou hōho’a i te tahi mau ta’o ’e te mau pereota nō roto mai i te Etera 12:23–29 ’o tē ha’api’i ra ia rātou nō ni’a e mea nāhea te Fa’aora i te tauturu ia tātou ’ia huri i tō tātou paruparu ’ei mea pūai. E fa’aitoito i te mau tamari’i ’ia feruri i te paruparu e vai ra iō rātou ’e i muri iho, e ’imi i te tauturu a te Fa’aora nō te riro ’ei ta’ata pūai.
Fa’aitoito i te ha’api’ira’a mai i te fare
E ani i te mau tamari’i ’ia pāpa’i i te hō’ē parau mau ’o tā rātou e hina’aro e fāri’i i te hō’ē ’itera’a pāpū nō te reira. E tauturu ia rātou ’ia ha’amau i te hō’ē fā nō te fa’a’ohipa i te fa’aro’o ’ia ti’a ia rātou ’ia fāri’i i te hō’ē ’itera’a e parau mau te reira.
Haʼamaitaʼiraʼa i tā tātou haʼapiʼiraʼa
E ’imi ’ia hāro’aro’a te mau tamari’i i tā ’outou e ha’api’i nei. « E ’imi i te mau rāve’a nō te hāro’aro’a i te huru orara’a, te mau mea e anaanataehia, te mau tāreni, ’e te mau hina’aro o [te mau tamari’i] tā ’outou e ha’api’i nei. E ui i te mau uira’a, e fa’aro’o maita’i, ’e e hi’opo’a e aha tā te ta’ata ’apo mai e parau ’e e rave i roto i te mau ravera’a rau. E ani i tō rātou mau metua i te mau mana’o. Nā ni’a roa, e pure nō te fāri’i i te hāro’aro’ara’a tā te Vārua ana’e e nehenehe e hōro’a mai » (Te ha’api’ira’a mai tā te Fa’aora, 7).