Tē pāpa’i nei Moroni i ni’a i te mau ’api ’auro

Te pāpa’i nei Moroni i ni’a i te mau ’api ’auro, nā Dale Kilborn

2–8 nō Novema

Moromona 7–9

« Tē parau nei au mai te mea ra tei ’ō nei ’outou »

’A tai’o ai ’outou i te Moromona 7–9, ’a feruri e aha tā ’outou e hina’aro rahi i te mau tamari’i tā ’outou e ha’api’i nei ’ia ’ite. E rave i te mau fa’anahora’a nō te ha’api’i i te mau parau mau tā ’outou e mana’o ra e ha’amaita’i i tō rātou orara’a.

Pāpa’i i te mau mana’o e tae mai

ītona fa’a’itera’a

Tītau i te mana’o

E fa’ahaere i te hō’ē Buka a Moromona nā ni’a i te mau tamari’i. E ani i te mau tamari’i, ’ia tae i te taime nā rātou e tāpe’a i te buka, ’ia fa’a’ite i te hō’ē mea tā rātou i ’apo mai i roto i te reira buka. Mai te mea e hina’aro rātou i te tauturu, e fa’aha’amana’o ia rātou i te mau mea tā rātou i ’apo mai i roto i te piha ha’api’ira’a ’aita i maoro a’e nei.

ītona ha’api’ira’a

Ha’api’i i te ha’api’ira’a tumu : Mau tamari’i ’āpī

Moromona 7:8–10

Tē fa’a’ite pāpū nei te Buka a Moromona ’e te Bibilia ia Iesu Mesia.

’Ua ha’api’i Moromona ē, ’ua pāpa’ihia te Buka a Moromona nō te tauturu ia tātou ’ia ti’aturi i te Bibilia, ’e te feiā e ti’aturi i te Bibilia e ti’aturi ato’a ïa i te Buka a Moromona.

Mau ’ohipa e nehenehe e rave

• E fa’a’ite i te mau tamari’i i te ’api upo’o parau o te Buka a Moromona, ’e e fa’atoro i ni’a i te mau ta’o o te upo’o parau ’a tai’o ai ’outou i te reira, ma te ha’apāpū i te ta’o ra te tahi. E tauturu i te mau tamari’i ’ia feruri i te tahi atu mau buka pāpa’ira’a mo’a ’o tē ha’api’i nei ia tātou nō ni’a ia Iesu. E fa’a’ite ia rātou ē, i roto i te Bibilia tē vai ra te Faufa’a Tahito ’e te Faufa’a ’Āpī. E taututu i te mau tamari’i ’ia parau, « Faufa’a Tahito, Faufa’a ’āpī » ’ia fa’atoro ana’e ’outou i ni’a i te Bibilia, ’e « Te tahi atu ’ite » ’ia fa’atoro ana’e ’outou i ni’a i te Buka a Moromona.

• E pia i te hō’ē hōho’a fenua ’e ’aore rā, te ’api ’ohipara’a nō teie arata’i, e tae noa atu i te hō’ē Bibilia ’e hō’ē Buka a Moromona. E fa’a’ohipa i teie mau mea nō te ha’api’i i te mau tamari’i ē, te Bibilia, e pāpa’ira’a ïa nō te mau ha’api’ira’a a Iesu i roto ’e nā rāpae ia Ierusalema, ’e te Buka a Moromona, e pāpa’ira’a ïa nō tāna mau ha’api’ira’a i te fenua Amerika.

• E mā’iti e rave rahi mau ’ohipa i tupu ’e te mau parau mau tā te Bibilia ’e te Buka a Moromona e fa’a’ite pāpū nei, mai te fānaura’a, te pohera’a ’e te ti’afa’ahoura’a o Iesu. E fa’a’ite i te mau hōho’a nō roto mai i te Buka hōho’a o te ’evanelia ’o te fa’ata’a nei i teie mau ’ohipa i tupu ’e te mau parau mau. E ani i te mau tamari’i ’ia fa’ata’a mai e aha tā rātou e ’ite ra i roto i te mau hōho’a, ’e e parau ia rātou ē, tē ha’api’i nei te Bibilia ’e te Buka a Moromona i te reira mau mea.

Moromona 8:3

E nehenehe au e mā’iti i te maita’i noa atu ē, ’o vau ana’e.

’O Moroni te ’āti Nephi parau-ti’a hōpe’a, ’ua tāpe’a māite rā ’oia i tōna ’itera’a pāpū. E tauturu i te mau tamari’i ’ia ’apo mai i tōna hi’ora’a.

Mau ’ohipa e nehenehe e rave

• E tai’o Moromona 8:3, ma te ha’apāpū ē, ’ua vai noa o Moroni ōna ana’e, ’ua ha’apa’o tāmau noa rā ’oia i te mau fa’auera’a, tae noa atu i te fa’auera’a ’ia fa’aoti i te Buka a Moromona. E fa’a’ite i te taime ’a vai ha’apa’o maita’i noa ai ’outou, noa atu ’o ’outou ana’e.

• I muri a’e i te ’āparaura’a i te hi’ora’a o Moroni, e fa’a’ite i te tahi mau ravera’a i reira te hō’ē tamari’i e tītauhia ai ’ia fa’aoti e rave ānei i te parau-ti’a ’e ’aore rā, ’aita, noa atu ē, ’aita e ta’ata e hi’o mai ra. E aha tā Moroni i rave ?

• E hīmene ’e te mau tamari’i i te hō’ē hīmene nō ni’a i te mā’itira’a i te parau-ti’a, mai te « Choisir le bien » (Chants pour les enfants,82). Nō te aha e mea faufa’a ’ia mā’iti i te parau-ti’a i te mau taime ato’a, noa atu o ’outou ana’e ?

Moromona 9:7–21

« E Atua nō te mau temeio » te Atua.

E tauturu i te mau tamari’i ’ia hāro’aro’a e mea faufa’a te mau temeio i roto i te ’ohipa a te Atua, ’e e fa’atupu te Atua i te mau temeio mai te mea e fa’aro’o tō tōna mau ta’ata.

Mau ’ohipa e nehenehe e rave

• E fa’ata’a ē, te hō’ē temeio o te hō’ē ïa mea tā te Atua e rave nō te fa’a’ite i tōna mana ’e nō te ha’amaita’i i tō tātou orara’a (hi’o i te Bible Dictionary, « Miracles »). E tai’o i te mau ta’o ’e te mau pereota i roto i te Moromona 9:11–13, 17 ’o tē fa’ata’a ra i te tahi mau temeio a te Atua. E tauturu i te mau tamari’i ’ia feruri i te tahi atu mau temeio e ’itehia i roto i te mau pāpa’ira’a mo’a (e nehenehe te mau hōho’a i roto i te Buka hōho’a o te ’evanelia, mai te nūmera 26, 40, 41, ’e 83, e tauturu). E fa’a’ite pāpū ē, ’ua fa’atupu te Atua i te mau temeio i tahito ra ’e tē fa’atupu noa nei ā ’oia i te mau temeio i teie mahana.

• E fa’a’ite i te hō’ē ’itera’a ’a ’ite ai ’outou i te mau temeio i roto i te ’Ēkālesia i teie mahāna ’e ’aore rā, i roto i tō ’outou iho orara’a. E fa’a’ite i tō ’outou ’itera’a pāpū, « E Atua nō te mau temeio » te Atua (Moromona 9:11).

ītona ha’api’ira’a

Ha’api’i i te ha’api’ira’a tumu : Mau tamari’i pa’ari

Moromona 7:8–10

Te fa’a’ite pāpū nei te Buka a Moromona ’e te Bibilia ia Iesu Mesia.

’Ua ha’api’i Moromona ē, « te ’evanelia a te Mesia, ’o tei fa’a’itehia i mua ia [tātou] » i roto i te Bibilia ’e te Buka a Moromona. E feruri nāhea ’outou i te ha’api’i i te mau tamari’i ē, e mea faufa’a nā buka mo’a nō tātou.

Mau ’ohipa e nehenehe e rave

• E pāpa’i Moromona 7:9 i ni’a i te tāpura ’ere’ere, ’eiaha rā e pāpa’i i te mau ta’o teie ’e terā. E pāpa’i ato’a i ni’a i te tāpura ’ere’ere teie = te Buka a Moromona ’e terā = te Bibilia. E ani i te mau tamari’i ’ia tai’o Moromona 7:9 ma te pūai ’e ma te fa’a’ohipa i te mau pereota i ni’a i te tāpura ’ere’ere nō te fa’a’ī i te mau vāhi vata. E aha tā tātou e ’apo mai nō ni’a i te Bibilia ’e te Buka a Moromona i roto i teie ’īrava ?

• E fa’a’ite i te hō’ē Buka a Moromona ’e hō’ē Bibilia. E fa’a’ite i te tahi mau ’ā’amu nō roto mai i teie nā buka tāta’itahi, ma te fa’a’ite i te mau hōho’a mai te mea, tē vai ra (hi’o i te Buka hōho’a o te ’evanelia). E ani i te mau tamari’i ’ia fa’atoro i ni’a i te buka nō reira mai te ’ā’amu. Nō te aha tātou e hina’aro ai i nā buka to’opiti ?

• E pāpa’i i te ta’o tāta’itahi o te hiro’a fa’aro’o va’u i ni’a i te mau tuha’a ’api parau ta’a ’ē. E hōro’a hō’ē ’e ’aore rā, e piti ta’o i te tamari’i tāta’itahi, ’e e ani i te mau tamari’i ’ia ’ohipa ’āmui nō te tu’u i te mau ta’o i roto i te ’āna’ira’a tano. I muri iho, e ani ia rātou ’ia fa’ahiti i te hiro’a fa’aro’o e rave rahi taime. E aha tā teie e ha’api’i mai nei ia tātou ?

  mau hōho’a o te Buka a Moromona nā roto e rave rahi reo

  Tē fa’a’ite pāpū nei te Buka a Moromona nō Iesu Mesia

Mormon 8:1–7

E nehenehe tā’u e mā’iti i te parau-ti’a noa atu ē, e mo’emo’e ri’i au.

Te fa’aotira’a pāpū a Moroni « e rave i te mea i fa’auehia mai e [tōna] metua » noa atu ē, ’ua pohe tōna metua tāne, e nehenehe te reira e fa’auru i te mau tamari’i ’ia ha’apa’o i te mau fa’auera’a a te Atua.

Mau ’ohipa e nehenehe e rave

• E tai’o Moromona 8:1–7 ’e te mau tamari’i, ’e e ani ia rātou ’ia fa’a’ite mai e aha tō rātou huru ’āhiri ē, o Moroni rātou. E ani ia rātou ’ia hi’o fa’ahou i te mau ’īrava 1, 3, ’e 4 nō te ’ite ē, e aha tei fa’auehia ia Moroni ’ia rave. Nāhea Moroni i te ravera’a « i te mea i fa’auehia mai e [tōna] metua » ? Nāhea e ti’a ai ia tātou ’ia riro rahi atu mai ia Moroni ?

• E ani i te mau tamari’i ’ia pāpa’i tāta’itahi i te hō’ē hi’ora’a i reira e tītauhia ai ia rātou ’ia rave i te hō’ē mā’itira’a i rotopū i te parau-ti’a ’e ’aore rā, te hape i te taime ’aita hō’ē ta’ata e hi’o mai ra. E tu’u i tō rātou mana’o i roto i te hō’ē fa’ari’i, ’e e vaiiho i te mau tamari’i, hō’ē i muri mai i te tahi, ’ia rave i te hō’ē ravera’a ’e ’ia fa’a’ite mai e aha tā rātou e rave nō te rirora’a mai ia Moroni.

Moromona 8:24–26; 9:7–26

« E Atua nō te mau temeio » te Atua.

E rave rahi ta’ata i teie mahana ’aita e ti’aturi nei ē, tē tupu noa nei ā te mau temeio. E fa’a’ohipa i te mau ha’api’ira’a a Moroni i roto i teie mau ’īrava nō te ha’api’i i te mau tamari’i ē, mai te mea e fa’aro’o tō tātou, e nehenehe tātou e ’ite i te Atua ’ia fa’atupu i te mau temeio i roto i tō tātou orara’a.

Mau ’ohipa e nehenehe e rave

• E fa’a’ite i te mau tamari’i i te hō’ē tāpura hāmani mā’a. E aha te tupu mai te mea e mo’ehia te hō’ē tuha’a faufa’a ? E ani i te mau tamari’i ’ia ’imi Moromona 8:24 ’e 9:20–21 nō te ’ite mai i te « tuha’a » faufa’a o te ti’a ’ia roa’a ia tātou hou ’a fa’atupu ai te Atua i te mau temeio. E fa’a’ite i te mau hi’ora’a o te mau temeio—rahi ’e ’aore rā na’ina’i—o tā ’outou i ’ite i roto i te ’Ēkālesia ’e ’aore rā, i roto i tō ’outou orara’a. E ani i te mau tamari’i ’ia fa’a’ite mai i tō rātou iho mau hi’ora’a.

• E vāhi i te mau tamari’i i roto e piti pupu. E ani i te pupu tāta’itahi ’ia ’imi i te mau hi’ora’a o te mau temeio i roto i te tahi ’e ’aore rā, i roto i te tā’āto’ara’a o teie mau pāpa’ira’a mo’a: Moromona 8:24; 9:11–13, 16–18, 21–25. E aha tā tātou e nehenehe e parau i te hō’ē ta’ata ’o tē mana’o nei, ’aita te mau temeio e tupu fa’ahou nei ? (hi’o Moromona 9:9, 15–21).

ītona ’apora’a ha’api’ira’a

Fa’aitoito i te ha’api’ira’a mai i te fare

E ani i te mau tamari’i ’ia ani i te hō’ē melo o te ’utuāfare ’ia fa’ata’a mai i te hō’ē temeio tei ha’apūai i tōna ’itera’a pāpū.

Haʼamaitaʼiraʼa i tā tātou haʼapiʼiraʼa

E nehenehe te mau tamariʼi e ʼite i te fa’aurura’a a te Vārua. E ha’api’i i te mau tamari’i ē, te mau mana’o o te hau, o te here ’e o te māhanahana tā rātou e fāri’i ’ia paraparau ’e ’aore rā, ’ia hīmene ana’e rātou nō ni’a ia Iesu Mesia ’e tāna ’evanelia, nō roto mai ïa i te Vārua Maita’i (hi’o Te Ha’api’ira’a mai tā te Fa’aora, 11).

’api ’ohipara’a : tē fa’a’ite pāpū nei te Buka a Moromona ’e te Bibilia nō te Fa’aora.