E ’āfa’i mai au i tō ’outou mau pahī nā raro i te mau vāhi hōhonu, nā Jonathan Arthur Clarke

16–22 nō Novema

Etera 6-11

« ’Ia fa’a’orehia te ’ino »

E ’ere te mau mana’o i roto i teie arata’i i te mau tītaura’a e ti’a ia ’outou ’ia pe’e. ’Ua fa’ata’ahia te reira nō te fa’atupu i tō ’outou mau mana’o ’āpī ’e nō te ani i te fa’aurura’a.

Pāpa’i i te mau mana’o e tae mai

Tītau i te mana’o

E fa’a’ohipa i te mau hōho’a nō roto mai i te arata’i ha’api’ira’a nō teie hepetoma ’e nō te hepetoma i ma’iri a’e nei i roto i te Mai, pe’e mai—nō te ta’ata hō’ē ’e te ’utuāfare nō te tauturu i te mau tamari’i ’ia hi’o fa’ahou e aha tā rātou i ’apo mai nō ni’a i tō te ’āti Iareda rāterera’a nā ni’a i te moana. E vaiiho ia rātou ’ia fa’a’ite mai, te tahi i muri mai i te tahi, e aha tā rātou i ’ite.

Ha’api’i i te ha’api’ira’a tumu : Mau tamari’i ’āpī

Etera 6:2–12

E nehenehe te Metua i te ao ra e tāmāhanahana iā’u ’ia ri’ari’a ana’e au.

Pāpū roa, e mea ri’ari’a mau nō te ’āti Iareda « ’ia tere tāhurihuri noa rātou i ni’a i te mau ’are i mua i te mata’i » (Etera 6:5). ’Ua pāruru rā te Fatu ia rātou ’e ’ua tauturu ia rātou. Nāhea e ti’a ai ia ’outou ’ia tauturu i te mau tamari’i ’ia fāriu atu i te Fatu ’ia ri’ari’a ana’e rātou ?

Mau ’ohipa e nehenehe e rave

• Ma te fa’a’ohipa i te mau ta’o ’e te mau pereota nō roto mai i te Etera 6:2–12, e fa’ata’a i te mau tamari’i i te tere o te ’āti Iareda nā ni’a i te moana. E ani i te mau tamari’i ’ia fa’ahua ta’uma i roto i te mau pahī ’e ’ia fa’ahua ē, te tura’ihia ra tō rātou pahī ’e te tāpo’ihia ra i te mau ’are miti. E aha mau te huru ’ia vai i roto i te hō’ē pahī mau i roto i te pape pūai ? E aha tā tātou e nehenehe e rave ’ia ri’ari’a ana’e tātou ? E tai’o ’āmui i te mau ’īrava 7 ’e te 9 nō te hi’o, e aha tā te ’āti Iareda i rave i te taime ’a ri’ari’a ai rātou.

• E fa’ati’a i te hō’ē taime ’a ri’ari’a ai ’outou ’e ’a tāmāhanahana ai te Metua i te ao ra ia ’outou. E fa’a’ite i te mau tamari’i i te hō’ē hīmene ’o tei tauturu ia ’outou « ’ia ha’amaita’i ’e ’ia ’ārue i te Fatu » (Etera 6:9) nō tāna tauturu. E vaiiho i te mau tamari’i ’ia fa’a’ite mai i tā rātou mau hīmene Paraimere au roa, ’e e hīmene ’āmui i te tahi o te reira.

• E fa’a’ohipa i te ’api ’ohipara’a o teie hepetoma nō te tauturu i te mau tamari’i ’ia hāmani i te mau pahī papie. E fa’ata’a ē, ’ua tauturu te mau pahī i te ’āti Iareda ’ia vai pāruru-noa-hia noa atu ē, ’ua hā’atihia rātou i te miti (hi’o Etera 6:7, 10). E aha tā te Metua i te ao ra i hōro’a mai ia tātou ’ia vai pāruru-noa-hia tātou i roto i tō tātou tere nō te ho’i i pīha’i iho iāna ?

Etera 6:9, 12, 30; 7:27; 10:2

E nehenehe au e māuruuru

I muri a’e i tō rātou taera’a atu ma te hau i te fenua i parauhia ra, ’ua māuruuru roa te ’āti Iareda ’e « ua ’oto ihora rātou ma te roimata ’oa’oa » (Etera 6:12). Nāhea ’outou ’ia fa’aitoito i te vārua māuruuru i roto i te mau tamari’i tā ’outou e ha’api’i nei ?

Mau ’ohipa e nehenehe e rave

• E tai’o atu i te mau tamari’i i te mau pereota nō roto mai i te Etera 6:9 ’e 12 nō te ha’api’i ia rātou e mea nāhea tō te ’āti Iareda fa’a’itera’a i tō rātou ’ā’au mēhara i te Fatu nō te tauturura’a ia rātou ’ia tae i te fenua i parauhia ra. E ani i te mau tamari’i ’ia fa’a’ite mai i te tahi mau mea tā rātou i māuruuru. E hīmene ’āmui, mai te ’āti Iareda, i te hō’ē hīmene e fa’a’ite ra i te ’ā’au mēhara, mai « Merci, ô mon Père divin » (Chants pour les enfants,9).

• E tai’o atu i te mau tamari’i i te Etera 10:2 nō te fa’a’ite ē, noa atu te rahira’a matahiti i muri mai, ’ua ha’amana’o noa te ’āti Iareda e mea nāhea tō te Fatu tauturura’a i tō rātou mau tupuna i te rāterera’a nā ni’a i te moana. E tauturu i te mau tamari’i ’ia feruri e mea nāhea tō te Fatu ha’amaita’ira’a ia rātou. I muri iho e vaiiho i te mau tamari’i ’ia pāpa’i hōho’a nō te fa’aha’amana’o ia rātou iho i teie mau ha’amaita’ira’a (’e ’aore rā, e tauturu ia rātou ’ia mā’iti i roto i te tahi mau hōho’a tā ’outou i hōpoi mai, nō roto mai ānei i te hō’ē ve’a a te ’Ēkālesia).

Etera 7:24–27

E ha’amaita’ihia vau ’ia pe’e ana’e au i te peropheta.

Tē fa’a’ite māramarama mai nei te buka a Etera ē, ’ia pe’e ana’e te ’āti Iareda i te mau peropheta, e ha’amaita’ihia rātou, ’e ’ia pāto’i ana’e rātou i te mau peropheta, e fifi tō rātou orara’a. E feruri i te mau rāve’a e ti’a ai ia ’outou ’ia tauturu i te mau tamari’i ’ia ’ite ē, mai te reira ato’a nō tātou.

Mau ’ohipa e nehenehe e rave

• E fa’a’ite i te hō’ē hōho’a o te peropheta ora, ’e e ani i te mau tamari’i e aha tā rātou i ’ite nō ni’a iāna. E aha tā te hō’ē peropheta e rave ? E fa’ata’a ē, e peropheta ato’a tō te ’āti Iareda, ’e ’a pe’e ai rātou i te peropheta, ’ua ha’amaita’ihia rātou ’e ’ua ’oa’oa (hi’o Etera 7:24–27). Nāhea e ti’a ai ia tātou ’ia pe’e i te peropheta ?

• E hīmene ’āmui i te hō’ē hīmene nō ni’a i te mau peropheta, mai te « Suis les prophètes » (Chants pour les enfants, 58–59; a hi’o ato’a i te Buka hōho’a o te ’evanelia, nūmera 4–27, 67–87). E parau i te tamari’i nō ni’a i te mau mea tā te peropheta i ha’api’i mai ia tātou ’ia rave (’ei hi’ora’a, te tai’ora’a i tā tātou mau pāpa’ira’a mo’a i te mau mahana ato’a, te ha’amo’ara’a i te mahana sābati, ’e ’aore rā, te tāvinira’a ’ia vetahi ’ē), ’e e ani ia rātou ’ia ha’uti ta’ata ora i te ha’apa’ora’a i te reira a’o ’ia parau ’outou ē, « Pe’e i te peropheta ! ».

Ha’api’i i te ha’api’ira’a tumu : Mau tamari’i pa’ari

Etera 6:2–12

E nehenehe tā’u e ti’aturi i te Metua i te ao ra nō te arata’i iā’u i te ora mure ’ore.

E nehenehe te ’ā’amu nō te tere o te ’āti Iareda nā ni’a i te moana e fa’aauhia i tō tātou tere i roto i te tāhuti nei. I te tahi mau taime e mea ffifi nā tere to’opiti, ’e e tītauhia te fa’aro’o e arata’i ’e e pāruru te Fatu ia tātou.

Mau ’ohipa e nehenehe e rave

• E tai’o ’āmui i te Etera 6:2–12, ma te fa’afa’aea pinepine ’ia nehenehe i te mau tamari’i ’ia pāpa’i hōho’a nō te mau mea tā rātou e tai’o ra. Nāhea te tere o te ’āti Iareda e au ai i tō tātou orara’a ? E tauturu i te mau tamari’i ’ia ’imi ’e ’ia tāpa’o e aha te mau tuha’a rau o tā rātou mau hōho’a pāpa’i e fa’ahōho’a ai i tō tātou orara’a. ’Ei hi’ora’a, e nehenehe te ’āti Iareda e fa’ahōho’ahia ia tātou. E fa’ahōho’a i te mau pahī i tō tātou mau fare, i te ’Ēkālesia, ’e ’aore rā, i te ’evanelia. E aha te nehenehe e fa’ahōho’a i te mata’i, te pape, te mau ’ōfa’i ’ana’ana, ’e te fenua i parauhia ra ?

• E tauturu i te mau tamari’i ’ia ’imi i te mau ta’o ’e te mau pereota i roto i te Etera 6:2–12 o tē fa’a’ite nei e mea nāhea te ’āti Iareda i ti’aturi ai i te Atua. E fa’a’ite i te mau hi’ora’a, e mea nāhea te ti’aturira’a i te Atua e tauturu ai ia ’outou i roto i te mau taime fifi i roto i tō ’outou orara’a. E fa’aitoito i te mau tamari’i ’ia fa’a’ite mai i te tahi mau hi’ora’a mai te reira te huru tā rātou i fāri’i.

  

  Te tere o te ’āti Iareda nā Asia, nā Minerva Teichert

Etera 6:30; 7:27; 10:2

Te ha’amana’ora’a i te mea tā te Fatu i rave nō’u, e hōpoi mai te reira i te hau.

Hō’ē mea e fa’ata’a ’ē nei i te mau ari’i ’āti Iareda parau-ti’a i te mau ari’i ’ī’ino maori rā, « ’ua ha’amana’o [rātou] i te mau mea ta’a ’ē tā te Fatu i rave » nō rātou (Etera 7:27). Nāhea ’outou i te fa’auru i te mau tamari’i ’ia ha’amana’o e aha tā te Fatu i rave nō rātou ?

Mau ’ohipa e nehenehe e rave

• E ani i te mau tamari’i ’ia tai’o tātā’i hō’ē ’e ’aore rā, ’ei mau pupu na’ina’i, i te Etera 6:30; 7:27; ’e 10:2 ’e ’ia ’imi mai i te hō’ē mea e tū’ati i roto i teie mau ’īrava. E fa’a’ite i tō ’outou mau ’āehuehu nō ni’a i te mea tā te Fatu i rave nō ’outou, ’e e ani i te mau tamari’i ’ia nā reira ato’a.

• E fa’a’ite i te mau tamari’i e mea nāhea tō ’outou tāmatara’a e ha’amana’o i te mau rāve’a tā te Fatu ha’amaita’ira’a ia ’outou ’e tō ’outou ’utuāfare. E tauturu i te mau tamari’i ’ia feruri i te mau rāve’a e nehenehe ai rātou e fa’aha’amana’o ia rātou iho, e aha tā te Fatu i rave nō rātou. E hōro’a ia rātou tāta’itahi i te hō’ē tuha’a ’api parau, ’e e ani ia rātou ’ia feruri hōhonu ’e ’ia pāpa’i i te hō’ē mea tāna i rave nō rātou ’aita i maoro a’e nei. E fa’aue ia rātou ’ia ha’amau i te hō’ē peu tāmau ma te pāpa’ira’a i te mau ha’amaita’ira’a tā rātou i ’ite nō ō mai i te Fatu ra (hi’o « A ha’amana’o na, a ha’amana’o » [te video, ChurchofJesusChrist.org]).

Etera 9:28–35; 11:5–8.

E aroha mai te Fatu ’ia tātarahapa ana’e au.

Noa atu ē, ’ua pāto’i pinepine te ’āti Iareda i te mau peropheta ’e ’ua riro mai ’ei feiā ’ī’ino, ’ua fa’a’ore tāmau noa te Fatu i tā rātou mau hapa ’a fa’aha’eha’a ai rātou ia rātou iho ’e ’a tātarahapa ai.

Mau ’ohipa e nehenehe e rave

• E tai’o ’āmui i te Etera 9:28–35, ’e e tauturu i te mau tamari’i ’ia feruri e toru ’e ’aore rā, e maha fa’ahitira’a parau poto ’o te pū’ohu i te mea i tupu i roto i teie mau ’īrava. I muri iho, e tai’o i te Etera 11:5–8, ’e ’a tauturu i te mau tamari’i ’ia ’imi i te mau tū’atira’a i rotopū i teie nā ’ā’amu e piti. E aha tā tātou e ’apo mai i roto i teie nā ’ā’amu ?

• E ani i te mau tamari’i ’ia feruri i te tahi atu mau ta’ata i roto i te Buka a Moromona tei fa’aha’eha’a ia rātou iho ’e ’ua fa’a’orehia te hara. E fa’a’ohipa i te mau hōho’a nō roto mai i te Buka hōho’a o te ’evanelia ’e ’aore rā, Mai, pe’e mai—nō te ta’ata hō’ē ’e te ’utuāfare nō te tauturu ia rātou ’ia ha’amana’o. E fa’a’ite i tō ’outou ’itera’a pāpū ē, e fa’a’ore te Fatu i tā tātou hara, ’ia tātarahapa ana’e tātou ma te ’ā’au tae.

Fa’aitoito i te ha’api’ira’a mai i te fare

E ani i te mau tamari’i ’ia fa’a’ite i tō rātou ’utuāfare i te hō’ē mea tā te Metua i te ao ra i rave nō rātou ’e ’o tā rātou i māuruuru roa.

Ha’amaita’ira’a i tā tātou ha’api’ira’a

E tauturu i te mau tamari’i ’ia ’imi i te mau rāve’a ’āpī. « ’A ha’api’i ai ’outou i te mau tamari’i, e fa’ati’a ia rātou ’ia patu, ’ia pāpa’i hōho’a, ’ia fa’a’ū, ’ia pāpa’i, ’e ’ia hāmani. E riro teie mau mea ’ei mau ’ohipara’a ’ārearea—e mea faufa’a te reira nō te ’apora’a mai » (Ha’api’ira’a mai tā te Fa’aora,25