1 ’E i teienei, inaha, e parau atu vau i te tahi mau parau ri’i i te toe’a o teie feiā ’o tei fa’aora-noa-hia, ’āhiri ē ’ua ti’a i te Atua ’ia hōro’a atu i tā’u nei mau parau ia rātou ra, ’ia ’ite rātou i te mau mea nō ni’a i tō rātou ra mau metua ; ’oia ïa, tē parau atu nei au ia ’outou, e te toe’a nō te ’utuāfare o ’Īserā’ela ; ’e teie te mau parau tā’u e parau atu nei :

2 ’Ia ’ite ’outou ē, nō te ’utuāfare o ’Īserā’ela ’outou.

3 ’Ia ’ite ’outou ē, e mea ti’a ia ’outou ’ia tātarahapa, ’e mai te mea ’aita ra, ’aita ïa ’outou e fa’aorahia.

4 ’Ia ’ite ’outou ē, e mea ti’a roa ia ’outou ’ia ha’apae i tā ’outou mau mauha’a tama’i, ’e ’eiaha e ’oa’oa fa’ahou i te ha’amani’i i te toto, ’e ’eiaha e rave fa’ahou i te mauha’a tama’i, maori rā ’ia fa’aue mai te Atua ia ’outou.

5 ’Ia ’ite ’outou ē, e mea ti’a ia ’outou ’ia fāri’i i te ’ite nō ni’a i tō ’outou mau metua, ’e ’ia tātarahapa i tā ’outou mau hara ato’a ’e tā ’outou mau ’ohipa ’ī’ino ato’a, ’e ’ia ti’aturi ia Iesu Mesia, ’e e Tamaiti ’oia nā te Atua, ’e ’ua taparahihia ’oia e te mau ’āti Iuda, ’e nā roto i te mana o te Atua ’ua ti’afa’ahou mai ’oia, ’e nā roto i te reira ’ua noa’a iāna te rē i ni’a a’e i te pohe ; ’e nā roto ho’i iāna ’ua horomi’ihia te tara nō te pohe.

6 ’E ’ua fa’atae mai ’oia i te ti’afa’ahoura’a o te feiā pohe ra, ’ia ti’a i te ta’ata ’ia ti’a atu i mua i tāna ra vāhi ha’avāra’a.

7 ’E ’ua fa’atae mai ’oia i te fa’aorara’a i tō teie nei ao, ’e nā roto i te reira e fa’ati’ahia ai te ta’ata hapa ’ore ’o tē ti’a atu i mua iāna i te mahana ha’avāra’a, ’ia pārahi ma te ’oa’oa hope ’ore i mua i te aro o te Atua i roto i tōna bāsileia, ’e ma te hīmene tu’utu’u ’ore ’e te mau pupu hīmene i te mau ’āruera’a i te Metua, ’e i te Tamaiti, ’e i te Vārua Maita’i, e Atua hō’ē ho’i rātou.

8 Nō reira, ’a tātarahapa, ’e ’ia bāpetizohia nā roto i te i’oa o Iesu, ’e ’a tāpe’a mai i te ’evanelia a te Mesia, ’o tē fa’a’itehia atu i mua ia ’outou, ’eiaha i roto i teie ana’e iho pāpa’a parau, i roto ato’a rā i te pāpa’a parau e tae atu i te mau ’Ētene no ’ō mai i te mau ’āti Iuda ra, ’e e tae mai taua pāpa’a parau ra mai te mau ’Ētene mai ia ’outou na.

9 Inaha ho’i, ’ua pāpa’ihia teie nō te hō’ē ’ōpuara’a ’ia ti’aturi ’outou i te reira ; ’e ’ia ti’aturi ’outou i te reira, e ti’aturi ato’a ’outou i teie ; ’e ’ia ti’aturi ’outou i teie, e ’ite ato’a ïa ’outou i te mau mea nō ni’a i tō ’outou mau metua ’e te mau ’ohipa māere i ravehia nā roto i te mana o te Atua i rotopū ia rātou ra.

10 ’E e ’ite ato’a ’outou ē, e toe’a ’outou nō te hua’ai o Iakoba ; nō reira ’ua tai’ohia ’outou i rotopū i te feiā nō te fafaura’a mātāmua ra ; ’e mai te mea tē ti’aturi nei ’outou i te Mesia, ’e ’ua bāpetizohia nā mua i te pape, ’e i te auahi ’e i te Vārua Maita’i ato’a ho’i, ma te pe’e atu i te hi’ora’a o tō tātou Fa’aora, mai te au i tāna i fa’aue mai ia tātou ra, e maita’i roa ïa ’outou i te mahana ha’avāra’a. ’Āmene.