1 ’E i muri a’era, i te toru hānere ’e ono ’ahuru ’e ma toru o te matahiti, ’ua haere atu te mau ’āti Nephi ’e tō rātou mau nu’u fa’ehau i ni’a nō te ’aro atu ’e nō te tīahi atu i te mau ’āti Lamana i rāpae i te fenua ra nō Ano.

2 ’E i muri a’era, ’ua tūra’i-fa’ahou-hia atu ra te mau nu’u fa’ehau o te mau ’āti Nephi i te fenua ra nō Ano. ’E ’a vai noa ai rātou i roto i te rohirohi, ’ua tae mai ra te hō’ē nu’u fa’ehau ’āpī o te mau ’āti Lamana nō te ’aro ia rātou ; ’e ’ua tupu ihora te hō’ē tama’i rahi, ’e nō reira ho’i, ’ua haru ihora te mau ’āti Lamana i te ’oire ra nō Ano, ’e ’ua taparahi ihora i te mau ’āti Nephi e rave rahi, ’e ’ua haru atu ho’i e rave rahi ’ei feiā mau-’āuri.

3 ’E ’ua horo atu te toe’a ’e ’ua ’āmui atu ia rātou i te mau ta’ata nō te ’oire ra nō Teanekuma. ’E taua ’oire ra nō Teanekuma, tei te mau hiti ïa nō te pae tahatai ; ’e e mea fātata ato’a ïa i te ’oire ra nō Ano.

4 ’E nō te mea ’ua haere atu te mau nu’u fa’ehau o te mau ’āti Nephi i ni’a nō te ’aro atu i te mau ’āti Lamana i taparahihia ai rātou ; ’e ’āhiri ’aita rātou i nā reira, ’aita ato’a ïa tō te mau ’āti Lamana e mana i ni’a a’e ia rātou.

5 ’Āre’a rā, inaha, e ro’ohia te feiā parauti’a ’ore i te mau ha’avāra’a a te Atua ; ’e nā roto i te feiā parauti’a ’ore te feiā parauti’a ’ore e fa’autu’ahia ai ; ’e nā te feiā parauti’a ’ore ho’i e fa’ati’arepu nei i te ’ā’au o te mau tamari’i a te ta’ata nei ’ia ha’amani’i i te toto.

6 ’E i muri a’era, ’ua fa’aineine te mau ’āti Lamana nō te haere mai e ’aro i te ’oire ra nō Teanekuma.

7 ’E i muri a’era, i te toru hānere ’e ono ’ahuru ’e ma maha o te matahiti, ’ua tae mai te mau ’āti Lamana nō te ’aro i te ’oire ra nō Teanekuma, penei a’e ’o te roa’a ato’a ia rātou taua ’oire ra nō Teanekuma.

8 ’E i muri a’era, ’ua tīahihia atu rātou ’e ’ua tūra’ihia atu i muri e te mau ’āti Nephi. ’E ’ia ’ite a’era te mau ’āti Nephi ē, ’ua tīahi atu rātou i te mau ’āti Lamana i muri, ’ua fa’ate’ote’o fa’ahou ihora rātou nō tō rātou iho pūai ; ’e ’ua haere atu ra rātou ma tō rātou ihora pūai, ’e ’ua haru fa’ahou ihora rātou i te ’oire ra nō Ano.

9 ’E i teienei, ’ia oti teie mau mea ato’a i te ravehia, e rave rahi tauatini ta’ata i pohe i nā pae e piti ato’a ra, tō te mau ’āti Nephi ’e tō te mau ’āti Lamana ato’a ho’i.

10 ’E i muri a’era, ’ia tae a’era i te toru hānere ’e ono ’ahuru ’e ma ono o te matahiti, ’ua haere fa’ahou mai ra te mau ’āti Lamana e ’aro i te mau ’āti Nephi ; ’e ’aita roa ho’i te mau ’āti Nephi i tātarahapa i tā rātou ra mau ’ohipa ’ī’ino i rave, ’ua tāmau noa rā rātou i roto i tā rātou mau ’ohipa ’ī’ino.

11 ’E ’aita roa e ti’a i te vaha ’ia fa’a’ite i te reira, ’e ’aore rā i te hō’ē ta’ata ’ia pāpa’i pāpū maita’i i te mea ri’ari’a rahi i tupu nō te ha’amani’ira’a toto ’e te taparahira’a ta’ata i rotopū i te mau ta’ata, tō te mau ’āti Nephi ’e tō te mau ’āti Lamana ato’a ho’i ; ’e ’ua ’eta’eta roa tō rātou ’ā’au ē hope roa a’e, i au roa ai rātou i te ha’amani’i i te toto.

12 ’E ’aita roa e mau ’ohipa ’ī’ino rahi mai teie te huru i tupu i rotopū i te mau tamari’i ato’a a Lehi, ’e ’aita ato’a i rotopū i te mau ’utuāfare ato’a o ’Īserā’ela, mai teie i tupu i rotopū i teie mau ta’ata, mai te au i te mau parau a te Fatu.

13 ’E i muri a’era, ’ua roa’a i te mau ’āti Lamana te ’oire ra nō Ano, nō te mea ’ua rahi atu tō rātou mau ta’ata i tō te mau ’āti Nephi.

14 ’E ’ua haere atu ra rātou e ’aro i te ’oire ra nō Teanekuma, ’e ’ua tīahi atu ra i te mau ta’ata i rāpae i taua ’oire ra, ’e ’ua rave ihora i te feiā mau-’āuri e rave rahi, i te mau vahine ’e te mau tamari’i, ’e ’ua pūpū atu ra ia rātou ’ei mau tusia i tō rātou ra mau atua ’īdolo.

15 ’E i muri a’era, ’ia tae a’era i te toru hānere ’e ono ’ahuru ’e ma hitu o te matahiti, nō te riri o te mau ’āti Nephi i te mea ’ua pūpūhia tā rātou mau vahine ’e tā rātou mau tamari’i ’ei tusia, ’ua haere atu ra rātou e ’aro i te mau ’āti Lamana ma te riri rahi roa, ’e nō reira ho’i ’ua pau fa’ahou ihora te mau ’āti Lamana ia rātou, ’e ’ua tīahi atu ra ia rātou i rāpae i tō rātou mau fenua.

16 ’E ’aita atu ra te mau ’āti Lamana i haere fa’ahou mai e ’aro i te mau ’āti Nephi ē tae noa atu i te toru hānere ’e hitu ’ahuru ’e ma pae o te matahiti.

17 ’E i taua matahiti nei, ’ua haere mai rātou i raro nō te ’aro i te mau ’āti Nephi ma tō rātou pūai ato’a ; ’e ’aita i tai’ohia tō rātou rahira’a nō te rahi o tō rātou mau ta’ata.

18 ’E mai teie taime atu, ’aita roa te mau ’āti Nephi i fāri’i i te mana i ni’a a’e i te mau ’āti Lamana, ’e ’ua ha’amouhia rātou e te mau ’āti Lamana, mai te hupe e mou i mua i te mahana.

19 ’E i muri a’era, ’ua haere mai ra te mau ’āti Lamana i raro nō te ’aro i te ’oire ra nō Ano ; ’e ’ua tupu te hō’ē ’arora’a rahi roa i te fenua ra nō Ano, ’e ’ua taparahi rātou i te mau ’āti Nephi.

20 ’E ’ua horo fa’ahou atu ra te mau ’āti Nephi mai mua atu ia rātou, ’e tae atu ra i te ’oire ra nō Boaza ; ’e i reira ’ua ti’a atu rātou nō te ’aro atu i te mau ’āti Lamana ma te mata’u ’ore, ’e nō reira ho’i ’aita te mau ’āti Lamana i manuia nō te taparahi ia rātou ē tae roa atu ’ua ho’i mai rātou i te piti o te taime.

21 ’E i tō rātou haerera’a mai i te piti o te taime, ’ua tīahihia ’e ’ua taparahihia te mau ’āti Nephi ’e ’ua rahi roa tei taparahihia ; ’e ’ua pūpū-fa’ahou-hia atu ra tā rātou mau vahine ’e tā rātou mau tamari’i ’ei tusia i te mau ’īdolo.

22 ’E i muri a’era, ’ua horo fa’ahou atu ra te mau ’āti Nephi mai mua atu ia rātou, ma te rave atu i te mau ta’ata ato’a nā muri ia rātou, tō te mau ’oire rahi ’e te mau ’oire ri’i.

23 ’E i teienei, ’ia ’ite a’era vau, ’o Moromona ē, ’ua fātata te fenua i te pau i te mau ’āti Lamana, nō reira, ’ua haere atu ra vau i ni’a i te ’āivi ra o Sima, ’e ’ua rave atu ra i te mau pāpa’a parau ato’a tā Amarona i huna i te Fatu ra.