Kōjerbal Itok Ļoor Eō—N̄an Būraimere

Keppopo n̄an Katakin ilo Būraimere

Ekkatak an juon make im baam̧le ilo m̧weeo eaikuj in io̧lepen ekkatak eo an gospel in. Menin em̧ool n̄an kwe im ajri ro kwoj katakin. Ilo am̧ keppopo n̄an katakin, jino kake en̄jake ko am̧ make ilo jeje ko rekwojarajr. Keppopo eo am̧ eaorōktata enaaj waļo̧k ilo am̧ pukot jeje ko rekwojarjar im pukot im̧we eo an Jetōb Kwojarjar.

Itok Ļoor Eō—N̄an Kajjojo Armej im Baam̧le ko ej bar juon m̧ōttan eo eaorōk ilo ekkatak eo am̧ make ilo am̧ keppopo n̄an katakin. Enaaj jipan̄ eok bōk juon meļeļe eo ealikkar ļo̧k kōn pedped in katak ko loi ilo jeje ko rekwojarjar.

Ilo iien am̧ keppopo, ļōmņak im im̧we ko renaaj itok n̄an kwe kōn ajri ro kwoj katakin. Kwonaaj bōk ļōmņak ko kōn wāween an pedped in katak ko ilo jeje ko rekwojarjar naaj kōjeraam̧m̧an mour ko aer. Kwonaaj bōk tōl n̄an im̧we er n̄an lo pedped in katak ko ilo aer ekkatak jen jeje ko rekwojarjar kōn er make im ippān baam̧le ko aer. Keememej in kijenmej ippān ajri ro ro me jekjek ko an baam̧le rejjab rie ekkatak jān jeje ko rekwojarjar im nokon in jota an baam̧le.

Ļōmņak ko n̄an Katakin

Ilo am̧ keppopo n̄an katakin, kwomaron̄ bōk im̧we n̄an katakin jen laajrak in katakin in. Jab ļōmņak kōn ļōmņak kein āinwōt kōmeļeļe ko jidik kōn jidik ak ijoke rej kakobaba n̄an kameramlo̧k im̧we ko am̧ make. Kwojeļā kajjien ajri rein—im enaaj ļapļo̧k am̧ jeļā kajjier ilo am̧ iaio̧ ippāer ilo kūlaaj. Irooj ebar jeļā kajjier, im Enaaj im̧we eok ilo wāween ko rem̧m̧antata ilo am̧ katakin im kōjeraam̧m̧an er.

Kein jipan̄ ko jet repād n̄an am̧ kōjerbali ilo am̧ keppopo, ekoba ļōmņak ko ilo Itok, Ļoor Eō—N̄an Kajjojo Armej im Baam̧le ko im māākjin ko an Kabun̄. N̄an meļeļe ko reļļapļo̧k kōn men kein im kein jipan̄ ko jet, lale “Kein Katakin ko Jet n̄an Katakin Ajri ro” kein katak in.

Jet Men ko n̄an Ļōmņak Kaki

• Jinen im jemān ajri ro aer eddo eļapļo̧k n̄an katakin nejier. Āinwōt juon rikaki, ewōr juon am̧ eddo eaorōk n̄an rie, kōketak im kalōk gospel in ekkatak ilo m̧weeo. Kwon kijenmej n̄an ajri ro me ro jineer im jemeer rejjab katakin gospel eo ilo m̧weeo im̧weer. Kobaik aolep ajri ro ilo iien kōnono kōn gospel eo, ekkar n̄an jekjek ko ilo m̧weeo im̧weer.

• Āliji Em̧m̧an Em̧m̧anļo̧k an ajri ro ekkatak n̄e m̧ool kein rej ālij ilo elōn̄ kain im wāween m̧akūtkūt ko. Eļan̄n̄e kwoj loe ke em̧m̧an m̧akūtkūt in ekkatak eo n̄an ajri ro, ļōmņak in bar āliji, eļaptata n̄e kwoj katakin ajri ro reddikļo̧k. Kwomaron̄ bar etale m̧akūtkūt eo an katak eo ļo̧k.

• Jemedwōj Ilan̄ ekōņan bwe kwon tōprak āinwōt juon rikaki. Eaar letok elōn̄ kein katak ko n̄an jipan̄ eok, ekoba ko̧o̧njeļ in kweilo̧k ko an rikaki. Ilo kweilo̧k kein kwomaron̄ kapilōk doon ippān rikaki ro jet kōn apan̄ ko kwoj loi. Kwomaron̄ bar kōnono im kaminene katakin pedped in katakin āinwōt Kraist.

• Eļan̄n̄e kwoj katakin ajri ro reddikļo̧k im aikuj jipan̄ ko jet, lale “Tōpar Aikuj ko an Ajri ro Reddikļo̧k” ilo kein katakin in.

• Kein katakin in ekoba laajrak ko an kajjojo wiik ilo iiō eo ijelo̧kin Jabōt ko n̄e kweilo̧k eo eļap ej bōk jikin. Ilo Jabōt ko n̄e Būraimere ejjab kōm̧m̧an itok jen kweilo̧k eo eļap an stake ak jabdewōt un ko jet, baam̧le ko rej aikuj wōnm̧aanļo̧k wōt im riit Bok in Mormon ilo m̧weeo ekkar n̄an jikejuuļ eo kar kōlaajrake. N̄an kōm̧m̧an bwe Būraimere kūlaaj eo am̧ en jejjet ilo jikejuuļ, kwomaron̄ kālet n̄an joļo̧k juon katak ak kobaik ruo katak ippān doon. N̄an bōbrae po̧k, būreejtōn ro an Būraimere reaikuj karon̄ rikaki ro kōn oktak kein m̧okta jen iien eo.