Tōpar Aikuj ko an Ajri ro Reddikļo̧k

Ajri ro repojak im kijerjer in ekkatak gospel eo eļan̄n̄e ej waļo̧k ilo juon wāween eo remaron̄ meļeļek kake. Eļaptata eļan̄n̄e kwoj katakin ajri ro reddikļo̧k, ļōmņak in kōjerbal m̧akūtkūt kein ilaļ n̄an jipan̄ er ekkatak.

• Al. Al in jar ko im al ko jen Children’s Songbook rej kwaļo̧k katak ko rekajoor. Kōjerbale topics index eo ilo tulikin Children’s Songbook n̄an pukot al ko me reiokļo̧k pedped in katak ko an gospel eo kwoj katakin. Jipan̄ ajri ro iokļo̧k ennaan ko kōn al ko n̄an mour ko aer. N̄an waanjon̄ok, kwomaron̄ kajjitōk kōn naan ko an eoon ko ilo al eo. Ilo kakkobaba n̄an al, ajri ro remaron̄ kōm̧m̧ani m̧akūtkūt ko me rej ekkejel wōt ilo al eo ak baj ron̄jake wōt al ko utilik ilo aer kōm̧m̧ani m̧akūtkūt ko jet.

• Ron̄jake im kōm̧m̧an arin juon bwebwenato. Ajri ro reddikļo̧k em̧m̧an bwebwenato ippāer—jān jeje ko rekwojarjar, jān mour eo am̧, jān bwebwenatoon Kabun̄, ak jān māākjin ko an Kabun̄. Pukot wāween ko n̄an kobaik er ilo iien bwebwenato ko. Remaron̄ jibwe pija ak kein katakin ko, jin̄a pija ko kōn ta eo rej ron̄, im kōm̧m̧an arin bwebwenato eo, ak jipan̄ kwaļo̧k bwebwenato eo. Jipan̄ ajri ro kile m̧ool ko an gospel in ilo bwebwenato eo kwoj kwaļo̧ke.

• Riiti juon eoon. Ajri ro reddik remaron̄ jab lukkuun riit, ak kwomaron̄ kobaik er ilo ekkatak eo jen jeje ko rekwojarjar. Kwomaron̄ in mije wōt juon eoon, naan eo eaorōk, ak naan eo. Ilo am̧ riit elaaj eoon eo, kwon kajjitōk ippān ajri ro n̄an jutak ak kotak peier n̄e rej ron̄ naan eo ekkar ak eoon eo kwoj kōņaan mije. Remaron̄ in kakilōklōke eoon ko rekadu jān jeje ko rekwojarjar eļan̄n̄e rej make āliji. Ilo aer ron̄ naan in Anij, renaaj en̄jake Jetōb.

• Kwon emourur. Kōnke ajri ro reddikļo̧k ekkā aer keen̄ki, karōk wāween ko n̄an kōmakūtkūt er—m̧aaj, ekkeke, eeb, emajedjed, etetal, im m̧akūtkūt ko jet rej iokļo̧k pedped in katak eo ak bwebwenato ilo kwoj kwaļo̧ke. Makūtkūt kein remaron̄ bar ļap tokjaer ilo ami al ippān doon.

• Lale juon pija ak alooje juon video. N̄e kwoj kwaļo̧k n̄an ajri ro juon pija ak video eo eiokļo̧k pedped in katakin gospel eo ak bwebwenato jen jeje ko rekwojarjar, kajjitōk ippāer kajjitōk ko me ejipan̄ er ekkatal jen ta eo rej loe. N̄an waanjon̄ok, kwomaron̄ kajjitōk “Ta eo ewaļo̧k ilo pija in ak video in?” ak “Ewi am̧ en̄jake?” Gospel Library app, medialibrary.ChurchofJesusChrist.org, im children.ChurchofJesusChrist.org rej jikin ko rem̧m̧an n̄an lali video ko.

• Kwaļo̧k en̄jake ko. Ajri ro reddikļo̧k emaron̄ jab lukkuun lōn̄ mennin aer kwaļo̧k jen ajri ro rerūttoļo̧k, ak eļan̄n̄e kwoj leļo̧k tōl, remaron̄ kwaļo̧k en̄jake ko aer im en̄jake ko kōn ta eo rej ekkatak.

• Ejaake. Ajri ro remaron̄ ekkal, jin̄a, ak kōļare men eo ej iokļo̧k bwebwenato eo ak pedped in katak eo rej ekkatak. Kōketak er n̄an bōk men eo raar ejaake n̄an m̧weeo im kwaļo̧ke n̄an baam̧le eo n̄an jipan̄ ajri ro keememej ta eo raar ekkatak.

• Bōk kūņa ilo mennin katak ko. Juon katak eo epdidodo emaron̄ jipan̄ ajri ro meļeļe juon pedped in katak an gospel in me epen n̄an meļeļe kake. N̄e kōjerbal kein katak ko, pukot wāween ko n̄an kōm̧m̧an bwe ajri ro ren bōk kūņaer. Enaaj ļapļo̧k aer ekkatak jān en̄jake ko kwaļo̧ki jān baj lale juon kōmeļeļe.

• Kōmmālmel. N̄e ajri ro rej kōmmālmel juon jekjek renaaj ioon e ilo mour, em̧m̧anļo̧k aer meļeļe ewi wāween an juon pedped in gospel in jerbal ilo mour ko aer.

• Āliji m̧akūtkūt ko. Ajri ro reddikļo̧k remaron̄ kōņaan ron̄ katak elōn̄ ļo̧k alen n̄an meļeļeiki. Jab mijak in āliji bwebwenato ak m̧akūtkūt ko, men̄e ejja ilo katak eo wōt. N̄an waanjon̄ok, kwomaron̄ kwaļo̧k juon bwebwenato jen jeje ko rekwojarjar elōn̄ alen ilo wāween ko reoktak ilo bar juon katak—riit jān jeje ko rekwojarjar, kōmeļeļeiki ilo naan ko am̧ make, kwaļo̧k juon video, kōm̧m̧an bwe ajri ro ren jipan̄ eok kwaļo̧k bwebwenato eo, kajjitōk ippāer n̄an kōm̧m̧ane bwebwenato eo, im ko jet. Eļan̄n̄e m̧akūtkūt eo eaar jerbal ilo kūlaaj eo ebar āliji ilo m̧weeo, ālijinmen enaaj jipan̄ ajri ro ekkatak im keememeji.

• Iaio ippān ro jet. Ajri ro rej kōļapļo̧k kapeel ko im ekkatak itok limo in ekkatak im ikkure ippān ro m̧ōttaer. Ejaake iien ko rem̧m̧an bwe ren kwaļo̧k, bōk kūņaer, im kōmaanwa ilo aer ekkatak.

• Bōk Kūņa ilo elōn̄ m̧akūtkūt. Ajri ro reddikļo̧k ekadu iien aer m̧ad, im eoktak kilen aer ekkatak. Kōjerbal elōn̄ m̧akūtkūt ko, im lukkuun lale kōkaļļe n̄an iien kooktak būn̄tōn n̄an ajri ro. N̄an waanjon̄ok, kwomaron̄ aikuj in mejmejkaruo kōtaan ikun̄ im m̧akūtkūt.

Mōttan kōnono eo am̧ āinwōt juon rikaki n̄an ajri ro reddikļo̧k—ilo kakkobaba n̄an katakin pepded in gospel eo—ej n̄an jipan̄ ajri ro ekkatak kilen bōk kuņaer ilo kūlaaj an Kabun̄ in. N̄an waanjon̄ok, remaron̄ kōņaan ekkatak ilo iien bōk kūņaer, kwaļo̧k, kautiej ro jet, im ko jet. Jet rikaki rej ejaake jaat ko kōn juon ijjitōn̄ n̄an kajjojo ajri n̄an bōk kūņaer ilo juon kūlaaj ilo juon wāween eo ejjejet (āinwōt jar, jibwe juon pija, ak leto-letak peba ko). Ijjitōn̄ ko remaron̄ oktak kajjojo wiik. Menin ejipan̄ ajri ro bōk kūņaer im mije wōt m̧wiļ eo em̧m̧an ilo kūlaajruum̧ eo.

Ajri ro—eļaptata ajri ro reddikļo̧k—ekkā aer jeraam̧m̧an ilo juon, jānij emakijkij. Kōnke ajri ro reddikļo̧k ekadu iien aer m̧ad im jet iien epen n̄an mije aolepen kūlaaj eo, em̧m̧antata n̄e jānij in en kōm̧m̧an jen juon m̧akūtkūt n̄an eo juon. N̄an waanjon̄ok, kūlaaj eo am̧ emaron̄ jānij ilo iien kakkije n̄an ikkure, kōļar pija, al juon al, im ko jet.