5–11 abril

Tzolʼlebʼ ut Sumwank 30–36

“B’oqb’ilat chixjultikankil lin evangelio”

Naq yooqat chixtzolb’al rik’in tijok Tzol’leb’ ut Sumwank 30–36 rik’ineb’ li kok’al sa’ laa k’a’uxl, li Musiq’ej tixk’e aana’leb’ re chan ru xtzolb’aleb’. Sik’ xkomoneb’ aana’leb’ sa’ li tusleb’ aatin a’in.

Tz’iib’a li nakak’oxla

Xkanab’ankileb’ chi wotzok

Chap chi kutankil xjalam-uucheb’ misioneer ut kanab’eb’ li kok’al chixwotzb’al k’a’ru neke’xnaw chirix li k’anjel re xjultikankil li evangelio.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 33:2–3, 6–10

Naru ninwotz lix evangelio li Jesukristo.

Eb’ li kok’al toj ka’ch’ineb’ xyu’am naru ajwi’ neke’xwotz xnawomeb’ xch’ool chirix lix evangelio li Jesukristo. Chan ru naru nakawoksiheb’ li raqal a’in re xwaklesinkileb’ xch’ool chixb’aanunkil?

Kok’ k’anjel naru chi b’aanumank

• Kanab’eb’ li kok’al chixyalb’al xyeeb’al junaq ch’ol aatin jo’ “li Dios nakatxra” rik’ineb’ li xtz’uumal re chi tz’aptz’o. K’ut chiruheb’ naq ink’a’ naru naqatzoleb’ li kristiaan chirix li evangelio wi ink’a’ naqate li xtz’uumal qe. Il ru Tzol’leb’ ut Sumwank 33:8–10, ut kanab’eb’ li kok’al chixteeb’aleb’ li re rajlal sut naq te’rab’i li ch’ol aatin “tehomaq xtz’uumal eere.” K’a’ut naq li qaChoxahil Yuwa’ naraj naq taqate li xtz’uumal qe ut taqawotz li evangelio rik’ineb’ li qas qiitz’in?

• Hasb’a k’a’ruhaq reheb’ li kok’al, jo’ “laj Jose Smith kiwan jo’ xprofeet li Dios,” ut kanab’eb’ chixka’sutinkil li k’a’ru taaye. Chirix a’an ye wi’chik li ch’ol aatin a’an chi kaw xyaab’ aakux. Il ru Tzol’leb’ ut Sumwank 33:2. Tenq’aheb’ li kok’al chixtawb’al ru naq “xtaqsinkil xyaab’ qakux” naraj naxye naq maak’a’aq qaxiw chiraatinankileb’ li qas qiitz’in chirix li Jesukristo, lix Hu laj Mormon, ut xkomoneb’ chik li yaal re li evangelio.

• K’eheb’ kok’ huhil kristiaan malaj xjalam-uucheb’ kristiaan sa’ li tzoleb’aal. Kanab’eb’ li kok’al chixtawb’aleb’ li kok’ huhil kristiaan ut te’xch’utub’eb’ chi uub’ej sa’ li tzoleb’aal. Il ru Tzol’leb’ ut Sumwank 33:6, ut ch’olob’ k’a’ru naraj naxye naq li Qaawa’ “tixch’utub’eb’ li sik’b’ileb’ ru xb’aan.” Ch’olob’ naq naru nokotenq’an chixch’utub’ankil lix tenamit li Qaawa’ naq naqawotz li evangelio.

• B’ichahomaq sa’ komonil jun li b’ich na’aatinak chirix xwotzb’al li evangelio, jo’ “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90). Tenq’aheb’ li kok’al chixk’oxlankil chan ru naru neke’xtenq’aheb’ li ras riitz’in chi tzolok chirix li Jesukristo.

Tzol’leb’ ut Sumwank 33:12–17

Naru ninkab’la lin yu’am sa’ xb’een lix evangelio li Jesukristo.

Li na’leb’ kixk’e li Qaawa’ re laj Ezra Thayer ut laj Northrop Sweet naru naxtenq’aheb’ li kok’al nakatzoleb’ chixkab’lankileb’ lix yu’am sa’ xb’een lix evangelio li Jesukristo.

Kok’ k’anjel naru chi b’aanumank

• K’ut chiruheb’ li kok’al xjalam-uuch xk’ojleb’aal jun nimla kab’l, ut kanab’eb’ chi aatinak chirix a’an. K’a’ut naq aajeleb’ ru li kawil k’ojleb’aal sa’ jun li nimla kab’l? Il ru rik’ineb’ li kok’al Tzol’leb’ ut Sumwank 33:12–13, ut ch’olob’ chiruheb’ naq li Qaawa’ naraj naq taqakab’la li qayu’am sa’ xb’een lix evangelio. Tenq’aheb’ chixk’oxlankileb’ junjunq na’leb’ re chan ru naru neke’xkab’la lix yu’ameb’ sa’ xb’een lix evangelio li Jesukristo.

• K’e reheb’ li kok’al junjunqeb’ k’a’aq re ru naru neke’roksi re xkab’lankil jun nimla xteramil kab’l, jo’eb’ li kok’ kaaxukuut malaj huhil sek’. K’e chiruheb’ li junjunq chi k’a’aq re ru jun jalam-uuch li taareetali li kixye li Qaawa’ sa’ Tzol’leb’ ut Sumwank 33:14–17. Kanab’eb’ li kok’al chixyiib’ankil jun nimla xteramil kab’l naq yooqat chiraatinankileb’ chirix chan ru naq nokohe’xtenq’a li k’a’aq re ru a’an chixkab’lankil li qayu’am sa’ xb’een lix evangelio li Jesukristo.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 30:1–2

Tento tinjayali wib’ sa’eb’ li k’a’aq re ru re li Dios chiru li k’a’aq re ru re ruchich’och’.

Li na’leb’ kixk’e li Qaawa’ re laj David Whitmer sa’ li tasal 30 naru naxtenq’aheb’ li kok’al chi wank chi tiik sa’ lix evangelio li Jesukristo.

Kok’ k’anjel naru chi b’aanumank

• Ilomaq ru Tzol’leb’ ut Sumwank 30:1 sa’ komonil ut kanab’eb’ li kok’al chixk’osb’al ru li na’leb’ kixk’e li Qaawa’ re laj David Whitmer rik’ineb’ li raatin. Chan raj ru naru naq sa’ junaq hoonal “naqaxuwa ru li winq” malaj na’ok chaq qak’a’uxl chirix k’a’ru neke’xk’oxla li qas qiitz’in, sa’ xna’aj xb’aanunkil li k’a’ru naqanaw naq tento taqab’aanu?

• Kanab’eb’ li kok’al chixyalb’al xb’aanunkil wiib’ k’a’aq re ru sa’ jun ajwi’ li hoonal, jo’ xyeeb’al junaq xraqalil li paab’aal ut xtz’iib’ankil xk’ab’a’eb’ chixjunileb’ li kok’al sa’ li tzoleb’aal. Patz’ reheb’ k’a’ut naq ch’a’aj xjayalinkileb’ rib’ sa’ li xb’een k’anjel. B’ar wankeb’ junjunq li “k’a’aq re ru re li ruchich’och’ ” (Tzol’leb’ ut Sumwank 30:2) li naru neke’risi li qak’a’uxleb’aal chiru xjultikankil li Jesukristo ut lix evangelio? Chan ru naru naqajayali qib’ rik’in a’an sa’ xna’ajeb’ li k’a’aq re ru maak’a’ x’aajelil ru?

Tzol’leb’ ut Sumwank 30–34

Naru ninwotz lix evangelio li Jesukristo.

Naab’aleb’ li kok’al sa’ li Iglees neke’royb’eni xik sa’ jun mision. Lix numsihomeb’ li misioneer wankeb’ resil sa’ eb’ li tasal 30–34 naru naxtenq’aheb’ chixkawresinkileb’ rib’.

Kok’ k’anjel naru chi b’aanumank

• K’e xb’oqb’al junaq komon re li teep chi tzolok chirix jun reheb’ li misioneer ke’b’oqe’ sa’ Tzol’leb’ ut Sumwank 30–34 ut chixwotzb’al rik’ineb’ li kok’al li xtzol (chi’ilmanq “Eb’ li xyaab’ kuxej re li k’ojob’ank wi’chik: Eb’ laj paab’anel sa’ xtiklajik chaq li Iglees” sa’ Kim, Taaqehin—Choq’ reheb’ li komon ut li junkab’al malaj “La fe y la caída de Thomas Marsh,” Ezra Thayer: de escéptico a creyente,” “Llamamiento de Orson Pratt a servir,” Revelaciones en contexto, 58–74).

• Yiib’ xjalam-uuch jun xtz’uumal ehej nim sa’ li pizarron ut tenq’aheb’ li kok’al chixtawb’al sa’ Tzol’leb’ ut Sumwank 33:8–10 li k’a’ru naxyeechi’i li Qaawa’ wi naqate li xtz’uumal qe re xjultikankil li evangelio. Kanab’eb’ chixtz’iib’ankileb’ li yeechi’ihom a’an sa’ li pizarron ut tenq’aheb’ chixtawb’al ru k’a’ru naraj neke’xye. Kanab’eb’ li kok’al chixtz’iib’ankil sa’ li xtz’uumal ehej jun li yaal re li evangelio li naru neke’xwotz rik’ineb’ li ras riitz’in.

• K’ut xjalam-uuch jun trompeet ut aatinan chirix k’a’ru naraj naxye xjultikankil li evangelio “jo’ rik’in xyaab’ jun trompeet.” Chan ru “neke’qataqsi” xyaab’ qakux?(Tzol’leb’ ut Sumwank 33:2; 34:6).

• Kanab’eb’ li kok’al chixwotzb’al chan ru yookeb’ chixkawresinkil rib’ re xik sa’ jun mision sa’ jun kutan. Wi neke’xnaw ru anihaq (maare junaq komon sa’ lix junkab’aleb’) li wan chaq sa’ mision, kanab’eb’ chixwotzb’aleb’ lix numsihom li kristiaan a’an. Malaj ut, k’e xb’oqb’aleb’ li misioneer, jun li komon ak xq’aj chaq sa’ xmision, malaj anihaq yoo chixkawresinkil rib’ re xik sa’ jun mision chixwotzb’al lix sahil xch’ool chirix li k’anjel re xjultikankil li evangelio. Wotz junjunqeb’ aanumsihom laa’at sa’ xwotzb’al li evangelio, jo’ li nakak’ul sa’ laa yu’am wulaj wulaj.

  

  Naru ninwotz li evangelio rik’ineb’ li wamiiw.

Tzol’leb’ ut Sumwank 33:12–17

Naru ninkab’la lin yu’am sa’ xb’een lix evangelio li Jesukristo.

Wi eb’ li kok’al neke’xtzol naq toj kok’eb’ chan ru xkab’lankil lix yu’ameb’ sa’ xb’een lix evangelio li Jesukristo, te’wanq chi tiik chiru a’an. Li na’leb’ nak’eeman sa’eb’ li raqal a’an naru naxtenq’aheb’.

Kok’ k’anjel naru chi b’aanumank

• K’ameb’ sa’ li tzoleb’aal k’a’aq re ru jalan jalanq xkawil, jo’ jun li muñeek, jun li q’unil t’ikr, li melb’, ut jun li pek. Kanab’eb’ li kok’al chixch’e’b’aleb’ li k’a’aq re ru a’an. Kanab’eb’ chirilb’al ru Tzol’leb’ ut Sumwank 33:12–13 re xsik’b’al li ch’olob’ank naxk’e li Qaawa’ chirix lix evangelio. K’a’ut naq “saqoonaq” a’an jun chaab’il aatin re xch’olob’ankil li evangelio? Chan ru naru naqakab’la li qayu’am sa’ xb’een li saqoonaq re li evangelio?

• Tenq’aheb’ li kok’al chirilb’al ru Tzol’leb’ ut Sumwank 33:12–17 ut chixtawb’al k’a’ru naru naqab’aanu re xkab’lankil li qayu’am sa’ xb’een lix evangelio li Jesukristo. Kanab’eb’ chixyiib’ankil xjalam-uuch k’a’ruhaq neke’xtaw ut kanab’eb’ chixq’ehinkil k’a’ru neke’xk’utb’esi xjalam-uucheb’ xkomoneb’ li kok’al.

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chi wank jo’eb’ li misioneer ut chixwotzb’al rik’ineb’ lix junkab’al k’a’ruhaq xe’xtzol sa’ li Tzoleb’aal reheb’ li Kok’al sa’ li kutan a’in.

Xchaab’ilob’resinkil li qak’utum

Ch’olob’ xyaalaleb’ li osob’tesihom yeechi’inb’il. Naq nakak’e xb’oqb’aleb’ li kok’al chixyu’aminkil junaq na’leb’ re li evangelio, wotz li yeechi’ihom li naxk’e li Dios reheb’ li neke’xyu’ami li na’leb’ a’an. Qayehaq, naru nakawotz lix nawom aach’ool chirixeb’ li osob’tesihom naxk’e li Qaawa’ reheb’ li neke’xte li xtz’uumal re ut neke’xwotz li evangelio.