Eb’ laj santil paab’anel neke’q’axon toj Kirtland, xb’aan laj Sam Lawlor

12–18 abril

Tzolʼlebʼ ut Sumwank 37–40

“Wi ink’a’ junajex, moko wehex ta”

Li Dios naxnaw k’a’ru neke’raj ru xtzolb’al li kok’al sa’ laa tzoleb’aal. Kanab’ a’an chab’eresinkil naq yooqat chixsik’b’aleb’ ru li na’leb’ ut eb’ li kok’ k’anjel li te’k’anjelaq aawe re xtzolb’aleb’.

Tz’iib’a li nakak’oxla

Xkanab’ankileb’ chi wotzok

Numsi jun reheb’ li loq’laj hu sa’ xyanqeb’ li kok’al. Naq li junjunq chi kok’al tixchap li loq’laj hu, kanab’ chixwotzb’al k’a’ruhaq nanaq sa’ xch’ool re li tzolok sa’ li xamaan xnume’, malaj re li k’a’ru kiril ru sa’eb’ li loq’laj hu sa’ kab’l sa’ li xamaan a’in.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 38:24–27

Naru ninraheb’ li was wiitz’in.

Li Qaawa’ kiraj naq eb’ laj santil paab’anel te’xch’utub’ rib’ aran Ohio ut te’xra rib’ chirib’ileb’ rib’ chi juntaq’eet. Chan ru naru nakatenq’aheb’ li kok’al nakatzoleb’ chireek’ankil naq junajeb’ ut neke’xraheb’ li ras riitz’in?

Kok’ k’anjel naru chi b’aanumank

• Oksi li perel re kok’ k’anjel re li xamaan a’in re xk’utb’al chiruheb’ li kok’al naq sa’ xtiklajik chaq li Iglees, li Qaawa’ kixpatz’ reheb’ li komon naq te’elq sa’ komonil aran Ohio (chi’ilmanq ajwi’ li reetalil li ch’och’ li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Li Dios kiraj naq te’xtzol xraab’aleb’ rib’ ut xk’amb’aleb’ rib’ sa’ usilal. Kanab’eb’ li kok’al chixyeeb’al chan ru naru neke’xk’ut xrahomeb’ chirib’ileb’ rib’.

• Il ru Tzol’leb’ ut Sumwank 38:25 choq’ reheb’ li kok’al ut ye reheb’ rik’in aawaatin k’a’ru naraj naxye xk’oxlankil li ras riitz’in jo’ naxk’oxla rib’ a’an (chi’ilmanq Mateo 7:12). Tenq’aheb’ chixka’sutinkil li raqal rik’in xjalb’al li “ras riitz’in” rik’in xk’ab’a’eb’ lix komoneb’.

• B’ichahomaq jun li b’ich li na’aatinak chirix xraab’aleb’ chixjunil li kristiaan, jo’ “Aawik’in tinb’eeq laa’in” (B’ichleb’aal choq’ reheb’ li Kok’al, 78–79). Naq yooqeb’ chi b’ichank, kanab’eb’ chixchapb’aleb’ xjalam-uuch kok’al jalaneb’ chik xtenamit.

• Tenq’aheb’ li kok’al chixk’utb’esinkil jun hoonal b’ar wi’ naq anihaq toj ak’ nawulak sa’ li Tzoleb’aal reheb’ li Kok’al. Chan raj ru naru naqatenq’a chireek’ankil naq k’ulb’il chi chaab’il? Eb’ li kok’al naru neke’xyal xsahil li k’utb’esink a’an rik’ineb’ kok’ muñeek re uq’ej malaj setb’il jalam-uuch.

Tzol’leb’ ut Sumwank 38:30

Wi kawresinb’ilin, moko tinxuwaq ta.

Jun na’leb’ chirix chan ru naq li qaChoxahil Yuwa’ nokoxtenq’a re naq ink’a’ tooxuwaq a’an xk’utb’al chiqu naq tento kawresinb’ilaqo.

Kok’ k’anjel naru chi b’aanumank

• K’iilasutihomaq li ch’ol aatin: “Wi kawresinb’ilex ink’a’ texxuwaq” (raqal 30). Chirix wiib’ oxib’ sut, isiheb’ junjunq li aatin ut kanab’eb’ li kok’al chixyeeb’al b’ar wankeb’ li aatin maak’a’eb’. Seraq’i reheb’ chirix junaq hoonal b’ar wi’ naq laa’at kawresinb’ilat choq’ re k’a’ruhaq ut naq xb’aan naq kawresinb’ilat ink’a’ xatxuwak.

• Tenq’aheb’ li kok’al chixk’oxlankileb’ k’a’aq re ru b’ar wi’ naraj li qaChoxahil Yuwa’ naq te’xkawresi rib’, jo’ choq’ re li kub’iha’ malaj re xik sa’ li santil ochoch. K’uteb’ jalam-uuch malaj k’a’aq chik re ru re xk’eeb’aleb’ xna’leb’. Aatinan chirix chan ru naq naru te’xkawresi rib’ ut kanab’eb’ chixyiib’ankileb’ xjalam-uuch naq yookeb’ chixkawresinkil rib’ rik’ineb’ li k’a’aq re ru xe’xk’oxla.

Tzol’leb’ ut Sumwank 39:6, 23

Nink’ul li maatan re li Santil Musiq’ej naq nikink’ojob’aak.

K’a’ru neke’raj ru xtawb’al ru li kok’al sa’ laa tzoleb’aal chirix xk’ulb’al li maatan re li Santil Musiq’ej? Li ch’olob’ank kixk’e li Qaawa’ re laj James Covel chirix li k’ojob’anb’il k’anjel a’an naru natenq’an.

Kok’ k’anjel naru chi b’aanumank

• K’ut xjalam-uuch anihaq li yoo chi kub’eek xha’ ut re anihaq li yoo chi k’ojob’aak (chi’ilmanq Hu reheb’ li Jalam-uuch re li Evangelio, 104, 105). Il ru Tzol’leb’ ut Sumwank 39:23, ut kanab’eb’ li kok’al chixk’utb’al li jalam-uuch naq te’rab’i chirix li kub’iha’ malaj li k’ojob’aak.

• Ilomaq ru sa’ komonil Tzol’leb’ ut Sumwank 39:6, ut k’ut chiruheb’ li kok’al jalam-uuch malaj k’a’aq re ru li te’reetali chan ru naq li Santil Musiq’ej nokorosob’tesi (a’ ajwi’ li nayeeman sa’ li raqal 6). Kanab’eb’ chixk’eeb’aleb’ xhoonal chirib’ileb’ rib’ chixchapb’aleb’ li jalam-uuch malaj eb’ li k’a’aq re ru, ut naq yooqeb’ chixb’aanunkil a’an, wotz xnawom aach’ool chirix chan ru naq li Santil Musiq’ej nakatrosob’tesi chi jo’kan. Tenq’aheb’ chixk’eeb’aleb’ reetal li hoonal b’ar wi’ naq maare xe’reek’a xwankil li Musiq’ej.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 37; 38:31–33

Li Dios nokoxch’utub’ re qosob’tesinkil.

Li ch’utub’ank-ib’ aran Ohio kiwan jo’ jun nimla mayej choq’ reheb’ naab’aleb’ laj santil paab’anel sa’ xtiklajik li Iglees. Sa’eb’ li kutan a’in ink’a’ napatz’man qe naq taqach’utub’ qib’ sa’ jun ajwi’ li na’ajej, a’b’an naqach’utub’ qib’ jo’ junkab’al, teep, ut oqech.

Kok’ k’anjel naru chi b’aanumank

• K’ut chiruheb’ li kok’al li perel re kok’ k’anjel re li xamaan a’in malaj li reetalil ch’och’ natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Ilomaq ru sa’ komonil Tzol’leb’ ut Sumwank 37, ut tenq’aheb’ li kok’al chixtawb’aleb’ sa’ li reetalil ch’och’ li na’ajej yeeb’ileb’ sa’ li k’utb’esinb’il na’leb’. K’a’ru kixtaqla li Qaawa’ naq te’xb’aanu laj santil paab’anel?

• Sik’ ru jun ch’ol aatin malaj junaq aatin aajel ru sa’ Tzol’leb’ ut Sumwank 38:31–33 li nakaweek’a naq naxch’olob’ k’a’ut naq li Qaawa’ kiraj naq lix tenamit te’xch’utub’ rib’. Jek’iheb’ li aatin re li ch’ol aatin sa’ chixjunil li tzoleb’aal ut kanab’eb’ li kok’al chixch’utub’ankileb’, chixtusub’ankil ru li ch’ol aatin, ut chixtawb’al b’ar neke’tawman sa’eb’ li raqal. Kʼaʼut naq li Qaawaʼ naraj naq taqach’utub’ qib’?

Tzol’leb’ ut Sumwank 38:24–27

Li Dios naraj naq lix tenamit junajaqeb’ ru.

Re xkawresinkileb’ laj santil paab’anel re naq te’xch’utub’ rib’, li Qaawa’ kixk’ut chiruheb’ naq tento te’ril rib’ chirib’ileb’ rib’ chi juntaq’eet ut naq “junajaqeb’ ”(raqal 27). Chan ru naq li ch’olob’ahom a’an naru narosob’tesiheb’ li kok’al nakatzoleb’?

Kok’ k’anjel naru chi b’aanumank

• Ilomaq ru sa’ komonil Tzol’leb’ ut Sumwank 38:24–27, ut kanab’eb’ li kok’al chixtz’iib’ankileb’ li aatin reheb’ li raqal a’an li neke’xk’oxla naq aajeleb’ ru, jo’ ajwi’ li neke’ka’sutiman. K’a’ut naq li Qaawa’ kixka’sutiheb’ li aatin a’an? Kanab’eb’ chixwotzb’al li xe’xtz’iib’a ut chi aatinak chirix li xe’xtzol sa’eb’ li aatin a’an.

• Tenq’aheb’ li kok’al chixk’oxlankileb’ hoonal b’ar wi’ naq anihaq kireek’a naq moko k’ulb’il ta, jo’ naq jun kristiaan toj ak’ sa’ li Iglees, naq neke’xik sa’ junaq ak’ na’ajej malaj naq neke’xik sa’ junaq ak’ eskweel. K’a’ru li na’leb’ wan sa’ Tzol’leb’ ut Sumwank 38:24–27 chirix chan raj ru taqil junaq li kristiaan sa’ li hoonal a’an? K’utb’esihomaq junjunqeb’ li hoonal a’an.

• Wotz jun na’leb’ li tixk’utb’esi chan ru naq eb’ li k’a’aq re ru naru neke’ch’utub’aman malaj neke’junajiman re naq junaq ajwi’, jo’ eb’ li setb’il t’ikr neke’yiib’aman wi’ li isb’ malaj li k’a’ru neke’oksiman re xyiib’ankil jun kaxlan wa. K’a’ru neke’xk’ut chiqu li eetalil a’in chirix chan ru wulak chi jun jo’ xtenamit li Dios?

Tzol’leb’ ut Sumwank 39–40

Naru nintz’aqob’resi ruheb’ lin yeechi’ihom.

Laj James Covel kixyeechi’i ab’ink chiru li Qaawa’, a’b’an ink’a’ kixb’aanu. Li tzolok chirix lix numsihom a’an naru naxtenq’aheb’ li kok’al chixjultikankil lix aajelil ru ab’ink chiru li Qaawa’.

Kok’ k’anjel naru chi b’aanumank

• Kanab’eb’ li kok’al chirilb’al ruheb’ lix jolomileb’ li tasal Tzol’leb’ ut Sumwank 39 ut 40, ut kanab’eb’ chixk’osb’al ru rik’ineb’ aatin malaj jalam-uuch li k’a’ru xe’xtzol chirix laj James Covel.

• Tz’iib’aheb’ patz’om sa’ li pizarron li tixtenq’aheb’ li kok’al chixtawb’al ru li tasal 40, jo’ K’a’ru li sumwank kixb’aanu laj James Covel? K’a’ut naq ink’a’ ki’ab’ink chiru lix sumwank? Kanab’eb’ chixtawb’aleb’ xsumenkil sa’ li tasal 40.

• Tenq’aheb’ li kok’al chixjultikankileb’ li yeechi’ihom xe’xb’aanu naq xe’kub’e xha’ (chi’ilmanq Mosiah 18:8–10). Tenq’aheb’ chixtz’iib’ankil chi tustu junjunqeb’ li xiw malaj “li nachal wi’ xk’a’uxl li ruchich’och’ ” (Tzol’leb’ ut Sumwank 40:2) li naru naxram junaq li kristiaan chixtz’aqob’resinkileb’ ru li yeechi’ihom a’an. Kanab’eb’ chixtz’iib’ankil jun ch’ina esil li tixjultika reheb’ naq xpaab’ankileb’ lix taqlahom li qaChoxahil Yuwa’ tixtenq’aheb’ chixq’axb’al ru li xiw ut li k’a’ru nachal wi’ xk’a’uxl li ruchich’och’. Waklesi xch’ooleb’ chixk’uulankil li jultikahom a’an sa’ junaq na’ajej b’ar wi’ te’ril chi kok’ aj xsa’.

Xb’oqb’aleb’ chi tzolok sa’ kab’l

Kanab’eb’ li kok’al chi aatinak rik’ineb’ li xna’ xyuwa’ malaj jalaneb’ chik komon sa’ lix junkab’aleb’ chirix chan ru naq lix junkab’aleb’ naru neke’wan chi mas junaj wi’chik.

Xchaab’ilob’resinkil li qak’utum

Kanab’ sa’ k’a’uxlej jun li raqal reheb’ li loq’laj hu. Naru nakasik’ ru jun raqal sa’eb’ li loq’laj hu li nakak’oxla naq naru naxkawob’resi xnawom xch’ooleb’ li kok’al, re xtenq’ankileb’ chixkanab’ankil sa’ xk’a’uxleb’. Eb’ li kok’al toj ka’ch’ineb’ xyu’am naru neke’xkanab’ sa’ xk’a’uxleb’ jun xcha’alil li raqal malaj jun ajwi’ li ch’ol aatin.