estatua re Kristo

29 marzo–4 abril

Li Paswa

“Laa’in li yo’yo, laa’in li kikamsiik”

Jun tzolok sa’ li Tzoleb’aal reheb’ li Kok’al chirix li Paswa a’an jun chaab’il hoonal re xtenq’ankileb’ li kok’al chixkawob’resinkil lix paab’aaleb’ chirix li Jesukristo ut lix tojb’al rix li maak xb’aan a’an. Sik’ xb’eresihom li Qaawa’ chirix chan ru xb’aanunkil a’an. Taataweb’ xkomon aana’leb’ sa’ li tusleb’ aatin a’in.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al aawik’in li neke’xnaw chirix k’a’ut naq naqaninq’ehi li Paswa. Patz’ reheb’ k’a’ru neke’xb’aanu lix junkab’al re xninq’ehinkil lix waklijik chi yo’yo’ li Jesukristo sa’eb’ li kutan a’an. Malaj ut, kanab’eb’ chixwotzb’al k’a’ru xe’xtzol chirix li Jesukristo sa’ kab’l ut sa’eb’ li loq’laj hu.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 138:11–17

Sa’ xk’ab’a’ li Jesukristo, laa’in tinwakliiq chi yo’yo.

Naq yooqat chixtzolb’aleb’ li kok’al chirix lix waklijik chi yo’yo li Jeuskristo, Tzol’leb’ ut Sumwank 138:11–17 naru nakatxtenq’a chixch’olob’ankil k’a’ru naraj naxye wakliik chi yo’yo. Eb’ li raqal a’an naru nakate’xtenq’a chixnimob’resinkil xpaab’aaleb’ chirix naq sa’ jun kutan te’wakliiq chi yo’yo.

Kok’ k’anjel naru chi b’aanumank

• K’uteb’ xjalam-uuch lix kamik, lix muqlajik, ut lix waklijik chi yo’yo li Kolonel (chi’ilmanq Hu reheb’ li Jalam-uuch re li Evangelio, 57, 58 ut 59). Patz’ reheb’ li kok’al k’a’ru neke’xnaw chirix li kik’ulman. Ch’olob’ xyaalal naq li Jesus kikam sa’ qak’ab’a’ ut kiwakli chaq sa’ xyanqeb’ li kamenaq re naq chiqajunil tooruuq chi wakliik chi yo’yo chirix naq tookamq.

• K’oxla junaq li na’leb’ re k’utb’esink li naru naxtenq’aheb’ li kok’al chixtawb’al ru k’a’ru nak’ulman naq nokokam (li qamusiq’ ut li qatib’el neke’xjach rib’) ut naq nokowakli chi yo’yo (li qamusiq’ ut li qatib’el neke’xjunaji wi’chik rib’). Qayehaq, k’a’ru nak’ulman naq naqisi li b’ateriiy sa’ jun li pook malaj li b’on sa’ jun tz’iib’leb’? K’a’ru nak’ulman naq neke’junajiman wi’chik li k’a’aq re ru a’an?

• Il ru choq’ reheb’ li kok’al Tzol’leb’ ut Sumwank 138:17: “Li musiq’ej ut li tz’ejwalej te’junajiiq re naq maajo’q’e chik te’jachmanq ru, re naq te’xk’ul xtz’aqalil li sahil ch’oolejil.” K’a’ut naq naqab’antioxi li qatib’el? Wotz li sahil ch’oolejil nakaweek’a chirix xnawb’al naq toowaklesiiq chi yo’yo ut taawanq wi’chik qatib’el.

• B’ichahomaq sa’ komonil jun li b’ich chirix li wakliik chi yo’yo, jo’ “Ma yaal naq li Jesus xwakli?” malaj “Xwakli Jesus” (B’ichleb’aal choq’ reheb’ li Kok’al, 45, 44). K’eheb’ jalam-uuch reheb’ li kok’al li te’reetali aatin malaj ch’ol aatin re li b’ich (qayehaq, chi’ilmanq Hu reheb’ li Jalam-uuch re li Evangelio, 59, 60 ut 61), ut kanab’eb’ chixchapb’aleb’ li jalam-uuch naq te’xb’ichaheb’ li aatin a’an.

Tzol’leb’ ut Sumwank 76:11–24; 101:1–7; Jose Smith—Resilal 1:14–17

Li Profeet aj Jose Smith kiril ru li Jesukristo.

Jun na’leb’ re xtenq’ankileb’ li kok’al chixkawob’resinkil lix paab’aaleb’ chirix li Kolonel, a’an xwotzb’al rik’ineb’ lix nawom xch’ool laj Jose Smith: “Naq yo’yo! Xb’aan naq kiqil, sa’ ajwi’ lix nim uq’ li Dios” (Tzol’leb’ ut Sumwank 76:22–23).

Kok’ k’anjel naru chi b’aanumank

• K’ut chiruheb’ li kok’al jun xjalam-uuch li Xb’een K’utb’esink re laj Jose Smith (chi’ilmanq li tusleb’ aatin re 4–10 enero sa’ Kim, Taaqehin—Choq’ reheb’ li komon ut li junkab’al). Kanab’eb’ chixyeeb’al aawe k’a’ru yoo chi k’ulmank sa’ li jalam-uuch, ut kanab’eb’ chixtawb’al il Jesukristo. Patz’ reheb’ ma nake’xnaw resil jo’q’ehaq chik naq laj Jose Smith kiril ru li Kolonel. Rik’in tz’aqal aawaatin, seraq’iheb’ li numsihom ch’olob’anb’ileb’ sa’ Tzol’leb’ ut Sumwank 76:11–24; 110:1–7. Ye reheb’ li kok’al chan ru naq eb’ li raqal a’in reheb’ li loq’laj hu neke’xkawob’resi laa paab’aal chirix li Jesukristo.

• Naq eb’ li kok’al yooqeb’ chixb’onb’al li perel re kok’ k’anjel re li xamaan a’in, yaab’asi choq’ reheb’ li raqal reheb’ li loq’laj hu li wan rilom rik’in. Aatinan chirixeb’ li jalam-uuch neke’ch’olob’aman sa’eb’ li raqal a’an. Ch’olob’ xyaalal choq’ reheb’ li kok’al naq li Profeet aj Jose Smith kiril li Jesukristo ut naq a’an jun reheb’ li xyaalal naq naqanaw naq li Jesus yo’yo.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 76:11–24; 110:1–10; Jose Smith—Resilal 1:14–17

Li Profeet aj Jose Smith kixch’olob’ xyaalal naq li Jesukristo yo’yo.

Li k’anjel mas aajel ru choq’ re jun li profeet a’an xch’olob’ankil xyaalal li Jesukristo. Tenq’aheb’ li kok’al chixnimob’resinkileb’ lix paab’aal chirix li Kolonel naq neke’xtzol lix ch’olob’ahom laj Jose Smith chirix a’an.

Kok’ k’anjel naru chi b’aanumank

• Eb’ li raqal a’in neke’xch’olob’ jarub’ sut kixk’utb’esi rib’ li Jesukristo chiru laj Jose Smith: Tzol’leb’ ut Sumwank 76:11–24; 110:1–10; Jose Smith—Resilal 1:14–17. Yiib’ sa’ li pizarron jun xtusulaleb’ li yaal neke’qatzol chirix li Kolonel sa’eb’ li raqal a’an. Kanab’eb’ li kok’al chixyeeb’al b’ar wankeb’ li raqal neke’xk’ut li yaal neke’tawman sa’ li pizarron. K’a’ chik ru naqatzol chirix li Jesukristo sa’eb’ lix numsihom laj Jose Smith?

• Sa’ li perel re kok’ k’anjel re li xamaan a’in, tenq’aheb’ li kok’al chixk’ulinkileb’ li jalam-uuch rik’ineb’ li raqal reheb’ li loq’laj hu. K’a’ut naq a’an jun osob’tesihom naq laj Jose Smith kiril li Kolonel chi waklijenaq chi yo’yo? Wotz lix nawom aach’ool chirix naq li Jesukristo yo’yo ut naq laj Jose Smith a’an jun profeet.

Tzol’leb’ ut Sumwank 63:49; 88:14–17, 27; 138:11, 14–17

Sa’ xk’ab’a’ li Jesukristo, laa’in tinwakliiq chi yo’yo.

Chan ru taatenq’aheb’ li kok’al chixnimob’resinkil lix rahomeb’ choq’ re li maatan re li wakliik chi yo’yo kixk’e qe li Kolonel?

Kok’ k’anjel naru chi b’aanumank

• Kanab’eb’ li junjunq chi kok’al chirilb’al ruheb’ li raqal a’in reheb’ li loq’laj hu Tzol’leb’ ut Sumwank 63:49; 88:14–17, 27; 138:11, 14–17. Kanab’eb’ chi sik’ok sa’eb’ li raqal xe’tz’aq re xtawb’al junaq ch’ol aatin li te’reek’a naq na’aatinak chirix li Paswa. Kanab’eb’ chixwotzb’al li neke’xk’oxla. Wi wan hoonal, kanab’eb’ chixyiib’ankileb’ kok’ hu rik’ineb’ li ch’ol aatin xe’xtaw, li naru neke’xk’e reheb’ li komon sa’ lix junkab’aleb’ malaj li ramiiweb’.

• Patz’ reheb’ li kok’al chan raj ru te’xch’olob’ chiru junaq riitz’ineb’ malaj junaq ramiiweb’ k’a’ru naraj naxye wakliik chi yo’yo. Re xtawb’aleb’ xna’leb’, ilomaq ru sa’ komonil Tzol’leb’ ut Sumwank 138:14–17, ut oksiheb’ li patz’om jo’eb’ a’in: K’a’ru nak’ulman rik’in li qamusiq’ ut li qatib’el naq nokokam? K’a’ru nak’ulman naq nokowakli chi yo’yo? Chan ru naq li Jesukristo kixk’e chi uxmank li wakliik chi yo’yo?

• K’ut li video “Gracias a que Él vive” (ChurchofJesusChrist.org) ut kanab’eb’ li kok’al chixwotzb’al li neke’reek’a chirix li kixb’aanu li Kolonel choq’ reheb’.

  li Jesus naq yoo chi tijok

  Qaawa’ re li tijok, xb’aan laj Yongsung Kim

Tzol’leb’ ut Sumwank 18:10–13; 19:16–19; 45:3–5; 58:42–43

Sa’ xk’ab’a’ li Jesukristo, naru neke’kuye’ lin maak.

Rik’in li qakolb’al chiru li kamk sa’ tib’elej, li Jesukristo kixk’e ajwi’ qe jun li b’e re naq tookole’q chiru li kamk sa’ musiq’ej—sa’ jalan chik aatin, re naq taakuye’q qamaak chiruheb’ li qamaak ut tooq’ajq b’ar wi’ wan li Dios.

Kok’ k’anjel naru chi b’aanumank

• Tz’iib’aheb’ sa’ li pizarron wiib’ jolomil na’leb’ jo’eb’ a’in: K’a’ru kixb’aanu li Kolonel ut K’a’ru tento tinb’aanu laa’in. Kanab’eb’ li kok’al chixsik’b’aleb’ li raqal a’in re xtawb’al k’a’ruhaq li naru taatz’iib’amanq rub’eleb’ li jolomil na’leb’: Tzol’leb’ ut Sumwank 18:10–13; 19:16–19; 45:3–5; 58:42–43. Wotz li sahil ch’oolejil ut li b’antioxink nakaweek’a xb’aan li kixb’aanu li Kolonel choq’ qe.

• Tenq’aheb’ li kok’al chixkanab’ankil sa’ xk’a’uxleb’ li rox xraqalil li paab’aal. Naru nakatenq’aheb’ chixkanab’ankil sa’ xk’a’uxl rik’in xk’utb’aleb’ jalam-uuch wankeb’ rilom rik’ineb’ li ch’ol aatin aajeleb’ ru.

• K’ut li video “La bicicleta brillante” (CanalMormón.org) malaj wotz li seraq’ chirix jun ch’ina al li kixsik’ ru li ink’a’ us ut chirix a’an kixjal xk’a’uxl. Tenq’aheb’ li kok’al chi aatinak chirix li k’a’ru kixb’aanu li ch’ina al sa’ li seraq’ re xk’ulb’al xkuyb’al xmaak. Chan ru naq li Kolonel naxk’e chi uxmank lix kuyb’al qamaak?

reetalil li tzolok

Xb’oqb’aleb’ chi tzolok sa’ kab’l

Tenq’aheb’ li kok’al chixk’oxlankil k’a’ruhaq naru neke’xb’aanu re xyeeb’al reheb’ li ras riitz’in—mas wi’chik lix junkab’aleb’—li k’a’ru kixb’aanu li Jesukristo choq’ qe. Sa’ li ch’utam chalel, kanab’eb’ chixwotzb’al aawik’in k’a’ru xe’xb’aanu.

Xchaab’ilob’resinkil li qak’utum

Eb’ li kok’al neke’xtaw ru chi us naq naka’sutiman li nak’ute’. Matxuwak chixb’aanunkileb’ li kok’ k’anjel naab’al sut, a’ tz’aqal rik’ineb’ li kok’al toj ka’ch’ineb’ xyu’am. Li ka’sutink tixtenq’aheb’ li kok’al chixjultikankil li neke’xtzol.

perel re kok’ k’anjel: laj Jose Smith kiril ru li Jesukristo