li Jesus xaqxo chiruheb’ kristiaan wiq’wookeb’

Li junjunq xb’een aqej taab’asmanq, xb’aan laj J. Kirk Richards

22–28 marzo

Tzolʼlebʼ ut Sumwank 29

Li Jesukristo tixch’utub’ lix tenamit

Laa’at nakanaweb’ ru li kok’al nakatzoleb’ ut naab’aleb’ li yaal wankeb’ sa’ Tzol’leb’ ut Sumwank 29 li naru neke’rosob’tesiheb’. Taaqe lix b’eresihom li Musiq’ej naq yooqat chixtzolb’al li tasal 29 ut tz’iib’a li nakak’oxla chirix chan ru taak’uteb’ li yaal a’an.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’oxla xkanab’ankileb’ junjunq li kok’al chixwotzb’al junjunq na’leb’ chirix chan ru neke’xtzol li evangelio sa’ kab’l, xjuneseb’, malaj rik’ineb’ lix junkab’al. Kanab’ jun malaj wiib’ oxib’ li kok’al chixwotzb’al lix nawom xch’ool chirix k’a’ruhaq xe’xtzol sa’ kab’l chiru li xamaan a’in.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 29:1–2

Li Jesukristo tixch’utub’ lix tenamit rub’elaj naq taak’ulunq wi’chik.

Li Kolonel nokoxch’utub’ naq neke’qak’ulub’a ut neke’qataaqe lix k’utum.

Kok’ k’anjel naru chi b’aanumank

• Kanab’eb’ li kok’al chixb’onb’al li perel re kok’ k’anjel re li xamaan a’in. Kanab’eb’ li kok’al chixk’oxlankil chan ru naq jun xan kaxlan naxkoleb’ rix lix kok’ kaxlan.

• Chirix rilb’al ru Tzol’leb’ ut Sumwank 29:1–2, k’utb’esihomaq lix na’leb’ li Kristo chirix xch’utub’ankil lix tenamit “jo’ chanru ajwi’ jun xan kaxlan naxch’utub’eb’ lix kok’ kaxlan.” Jun ch’ina al naru nareetali li xan kaxlan ut tixsik’ jun na’ajej sa’ li tzoleb’aal b’ar wi’ xaqxooq. Naq li ch’ina al tixye “klo,” kanab’eb’ lix komoneb’ li kok’al chixch’utub’ankileb’ rib’ sa’ xsutam a’an. Eb’ li kok’al naru neke’xk’e xhoonaleb’ chirib’ileb’ rib’ chireetalinkil li xan kaxlan. Chap chi kutankil jun xjalam-uuch li Kolonel ut kanab’eb’ li kok’al chixch’utub’ankileb’ rib’ rik’in a’an. Wotz rik’ineb’ li kok’al chan ru naq li Jesus nokoxtenq’a naq naqach’utub’ qib’ rik’in a’an.

  xan kaxlan ut eb’ lix kok’ k’axlan

  Jarub’aq sut, xb’aan li xLiz Lemon Swindle

Tzol’leb’ ut Sumwank 29:2–11

Naru ninkawresi wib’ re xaqliik chiru li Qaawa’.

Sa’ jun kutan, chiqajunilo wanqo b’ar wi’ wan li Jesukristo. Us ta toj najt wan chaq li kutan a’an, eb’ li kok’al naru neke’xk’oxla chan ru taawanq a’an ut chan ru naru neke’xkawresi rib’ choq’ re li hoonal a’an.

Kok’ k’anjel naru chi b’aanumank

• K’ut jun jalam-uuch re li xkab’ xk’ulunik li Qaawa’ (chi’ilmanq Hu reheb’ li Jalam-uuch re li Evangelio, 66) ut tenq’a jun ch’ina al chirilb’al ru Tzol’leb’ ut Sumwank 29:11. Tenq’aheb’ li kok’al chixk’eeb’aleb’ reetal li ch’ol aatin sa’ li raqal li neke’aatinak chirix li jalam-uuch. Wotz rik’ineb’ a’an k’a’ru nakaweek’a laa’at chirix naq li Jesukristo taak’ulunq wi’chik sa’ li ruchich’och’.

• B’ichahomaq sa’ komonil jun li b’ich na’aatinak chirix li xkab’ xk’ulunik li Qaawa’, jo’ “Naq taak’ulunq li Kolonel” (B’ichleb’aal choq’ reheb’ li Kok’al, 46–47). K’uteb’ jalam-uuch chiruheb’ li kok’al re li k’a’ru naru neke’xb’aanu re xkawresinkileb’ rib’ re xaqliik chiru li Kolonel ut wank rik’in a’an chi junelik (chi’ilmanq Hu reheb’ li Jalam-uuch re li Evangelio re xtawb’al xkomon aana’leb’). Tenq’aheb’ chixtawb’al chan chik ru naru neke’xkawresi rib’ sa’ Tzol’leb’ ut Sumwank 29:2–10.

reetalil li k‘utuk

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 29

Li qaChoxahil Yuwa’ kixkawresi jun k’uub’anb’il na’leb’ re li kolb’a-ib’ choq’ we.

Wi junaq ch’ina al wan naab’al xnawom chirix lix k’uub’anb’il na’leb’ li Dios re kolb’a-ib’, naru naroksi lix paab’aal chirix li qaChoxahil Yuwa’ ut li Jesukristo chi us chixtaaqenkil li k’uub’anb’il na’leb’ a’an. B’ar wankeb’ xcha’al li k’uub’anb’il na’leb’ li nakaweek’a naq taajayali wi’ aawib’?

Kok’ k’anjel naru chi b’aanumank

• Kanab’eb’ wiib’ oxib’ li kok’al chixwotzb’al reetalil jun hoonal b’ar wi’ kiwan jun xk’uub’anb’ileb’ na’leb’, jo’ re xik chi b’eek malaj re xb’aanunkil junaq k’anjel. Laa’at naru ajwi’ taak’e junjunq reetalileb’ k’uub’anb’il na’leb’, jo’ jun li tusleb’ kutan rik’ineb’ kok’ k’anjel tz’iib’anb’ileb’ chiru, malaj ch’olob’ank re xb’aanunkil k’a’ruhaq. K’a’ut naq chaab’ileb’ li k’uub’anb’il na’leb’? Ye reheb’ li kok’al naq li qaChoxahil Yuwa’ wan jun lix k’uub’anb’il na’leb’ li nokoxk’e chi wulak jo’ a’an.

• Re xtenq’ankileb’ li kok’al chixtawb’al ru lix k’uub’anb’il na’leb’ li Dios, yiib’eb’ perel hu rik’ineb’ li aatin a’in: li yu’am naq maji’ nokoyo’la, li yo’ob’tesink, li t’ane’k, li yu’am sa’ ruchich’och’, ut li xkab’ xk’ulunik li Qaawa’. Chirix xch’olob’ankil li junjunq chi ch’ol aatin (chi’ilmanq Tzol’leb’ ut Sumwank 29:9–45), k’eheb’ li perel hu reheb’ junjunq li kok’al ut kanab’eb’ chixtusb’aleb’ rib’ re xk’utb’al jo’q’e nak’ulman li junjunq chi na’leb’ sa’ lix k’uub’anb’il na’leb’ li qaChoxahil Yuwa’. Li junjunq reheb’ a’an naru neke’aatinak chirix li k’a’ru neke’xnaw chirix li wan chiru lix perel huheb’. Tenq’aheb’ chirilb’al chan ru naq xnawb’al ru lix k’uub’anb’il na’leb’ li qaChoxahil Yuwa’ nokoxtenq’a chi wulak jo’ a’an ut jo’ li Kolonel.

• Oksi jun malaj wiib’ oxib’ reheb’ li kok’ k’anjel a’in re xk’utb’aleb’ li yaal chirix li k’uub’anb’il na’leb’ ut chan ru naq nak’anjelak choq’ qe. Wi nakawaj, naru nakakanab’eb’ junjunq li kok’al chi chalk chi kawresinb’ileb’ re aatenq’ankil chi k’utuk.

  • Li xtaql chʼoolej. Tenq’aheb’ li kok’al chixtawb’al ru naq li qaChoxahil Yuwa’ xk’ehom chaq qe li maatan re xtaql ch’oolej—li seeb’al re sik’ok-u—ut naq naxteneb’ sa’ qab’een li k’a’ru sik’b’il ru qab’aan (chi’ilmanq Tzol’leb’ ut Sumwank 29:39–40). Yiib’ wiib’ perel hu choq’ reheb’ li junjunq chi kok’al: jun li taareetali xsik’b’al ru li us (qayehaq, jun xnaq’ uhej se’ se’ ru) ut jun chik li taareetali xsik’b’al ru li ink’a’ us (qayehaq, jun xnaq’ uhej josq’). Wotzeb’ reetalil xsik’b’al ru li k’a’ru us ut xsik’b’al ru li ink’a’ us, ut kanab’eb’ li kok’al chixtaqsinkil li perel hu a’ yaal li taaye. Kanab’eb’ chi aatinak chirixeb’ li osob’tesihom naqak’ul wi naqataaqe li Jesukristo. K’a’ut naq li qaChoxahil Yuwa’ nokoxkanab’ chixsik’b’al ru li k’a’ru naqaj?

  • Eb’ li taqlahom. Kanab’eb’ li kok’al chixyiib’ankil jun xtusulal junjunqeb’ li taqlahom sa’ li pizarron. (Qayehaq, naru neke’sik’ok sa’ Exodo 20:3–17 ut sa’ li Hu reheb’ li Jalam-uuch re li Evangelio, 103–115). K’a’ut naq li qaChoxahil Yuwa’ naxk’eheb’ chaq li taqlahom qe? K’a’ru naqatzol sa’ Tzol’leb’ ut Sumwank 29:35 chirixeb’ lix taqlahom li qaChoxahil Yuwa’?

  • Lix tojb’al rix li maak xb’aan li Jesukristo. Tenq’aheb’ li kok’al chirilb’al naq li qaChoxahil Yuwa’ kixkawresi jun na’leb’ re naq taakuye’q qamaak naq naqasik’ ru li ink’a’ us. Kanab’eb’ li junjunq chi kok’al chirilb’al ru jun reheb’ li raqal sa’ Tzol’leb’ ut Sumwank 29:1, 42–43, ut te’xwotz li neke’xk’ut chirix lix tojb’al rix li maak kixb’aanu li Kolonel. Sik’ chan ru naru nakab’oqeb’ li kok’al chixwotzb’al li te’xtaw, jo’ rik’in xtusulal xyo’lajikeb’, malaj li ka’ch’in roq toj sa’ li mas nim roq, ut wan chik xkomon.

Tzol’leb’ ut Sumwank 29:1–2

Li Jesukristo tixch’utub’ lix tenamit rub’elaj naq taak’ulunq wi’chik.

Chan ru naru nakatenq’aheb’ li kok’al nakatzoleb’ chireek’ankil xsahileb’ xch’ool re tenq’ank chixch’utub’ankil Israel?

Kok’ k’anjel naru chi b’aanumank

• Kanab’eb’ li kok’al chirilb’al ru Tzol’leb’ ut Sumwank 29:1–2, ut te’xsik’ k’a’ru naxjuntaq’eeta wi’ rib’ li Qaawa’. K’a’ru neke’xk’oxla li kok’al naq neke’ril ru li juntaq’eetank a’an? K’a’ru kixye li Qaawa’ naq tento taqab’aanu re naq a’an tooxch’utub’?

• Jun na’leb’ re xwaklesinkileb’ xch’ool li kok’al chirix li ch’utub’ank, a’an xwotzb’al jun seraq’ chirix anihaq ki’ok sa’ li Iglees jo’ komon. Qayehaq, ani ki’oksin re laa junkab’al sa’ li Iglees? Wi nakawaj, patz’ reheb’ li kok’al chi rub’elaj naq te’tzoloq chirix li ani sa’ lix junkab’aleb’ a’an li xb’een ki’ok choq’ komon sa’ li Iglees, ut naq te’xwotz li seraq’ chirix a’an sa’ li tzoleb’aal.

• Kanab’eb’ li kok’al chixtz’iib’ankil chi tustu chan ru naru neke’xtenq’aheb’ li kristiaan chixch’utub’ankileb’ rib’ rik’in li Kolonel. Qayehaq, naru neke’xk’e xb’oqb’aleb’ li ramiiw malaj komon sa’ lix junkab’aleb’ sa’ jun li ch’ina k’anjel re li Tzoleb’aal reheb’ li Kok’al malaj sa’ junaq q’ojyin re junkab’al rik’ineb’ lix junkab’al.

• Li xlaje xraqalil li paab’aal na’aatinak chirix lix ch’utub’ankil Israel. Ma wan junaq li ch’ina al naxnaw sa’ xk’a’uxl lix raqalil li paab’aal a’an? Wi wan, kanab’ chixyeeb’al sa’ li tzoleb’aal. Wi maak’a’ junaq, tenq’aheb’ chixkanab’ankil xjayalihomeb’ re te’xkanab’ sa’ xk’a’uxleb’.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixtz’iib’ankil jun li yaal xe’xtzol sa’ li tzoleb’aal. Patz’ reheb’ k’a’ru te’xb’aanu re xwotzb’al li yaal a’an rik’ineb’ lix junkab’al.

Xchaab’ilob’resinkil li qak’utum

K’e reetal. K’e reetal chan ru naq eb’ li kok’al sa’ laa tzoleb’aal neke’xb’aanu li kok’ k’anjel re tzolok. Wi ink’a’ neke’wan sa’ xyaalal, naru nakatnume’ sa’ junaq chik li ch’ina k’anjel malaj naru nekexxik chi b’eek. Wi nakawil naq eb’ li kok’al yookeb’ chi tz’aqonk ut chi tzolok, maak’oxla nume’k sa’ junaq chik k’anjel.

perel re kok’ k’anjel: li Jesus tixch’utub’ lix tenamit