Li rochoch laj Peter Whitmer, xb’aan laj Al Rounds

1–7 marzo

Tzolʼlebʼ ut Sumwank 20–22

“Lix waklijik lix Iglees li Kristo”

Naq yooqat chixtzolb’al Tzolʼlebʼ ut Sumwank 20–22 chiru li xamaan a’in, naru te’k’ulunq li na’leb’ sa’ laa k’a’uxl chirix k’a’ru taak’ut. Naru nakataweb’ xkomon chik aana’leb’ chirix chan ru k’utuk sa’ li tusleb’ aatin a’in.

Tz’iib’a li nakak’oxla

Xkanab’ankileb’ chi wotzok

K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixwotzb’al li neke’xnaw chirix lix k’ub’lajik li Iglees. Re xkomon li tenq’, sik’ sa’ li “Ch’ol 9: Xk’uub’lajik lix Iglees li Jesukristo” (Eb’ li Esilal sa’ li Tzol’leb’ ut Sumwank, 40–42).

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 20–21

Lix Iglees li Jesukristo k’ojob’anb’il wi’chik.

Sa’ li 6 re abril re 1830, laj Jose Smith ut laj Oliver Cowdery ut xkomoneb’ chik li kristiaan ke’xch’utub’ rib’ re xk’uub’ankil lix Iglees li Jesukristo k’ojob’anb’il wi’chik. Chan ru naru nakatenq’aheb’ li kok’al nakatzoleb’ chixtawb’al ru lix aajelil ru a’an?

Kok’ k’anjel naru chi b’aanumank

• Oksi lix jolomil Tzolʼlebʼ ut Sumwank 21 malaj li ch’ol 9 re Eb’ li Esilal sa’ li Tzol’leb’ ut Sumwank re xseraq’inkil sa’ junpaat reheb’ li kok’al li kik’ulman sa’ li kutan naq kik’uub’aman li Iglees. Re xtenq’ankileb’ chixtawb’al ru li kik’ulman, k’ut li video “La organización de la Iglesia” (ChurchofJesusChrist.org).

• Ye reheb’ li kok’al k’a’ut naq nakab’antioxi naq wan qik’in lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Ch’olob’ naq li wank jo’ komon re li Iglees nokoxkawresi re q’ajk rik’in li Dios. Tenq’aheb’ chixka’sutinkil li ch’ol aatin “Wankin saʼ lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan” naab’al sut malaj chixb’ichankil “Lix Iglees li Jesukristo” (B’ichleb’aal choq’ reheb’ li Kok’al, 48).

Tzol’leb’ ut Sumwank 20:37, 71–74

Yookin chixkawresinkil wib’ re taakub’eeq inha’.

Eb’ li kok’al li nakatzoleb’ yookeb’ chixkawresinkil rib’ choq’ re li kub’iha’. Tenq’aheb’ chixtawb’al ru k’a’ru naraj naxye li kub’iha’ ut li naru neke’xb’aanu re xkawresinkileb’ rib’.

Kok’ k’anjel naru chi b’aanumank

• K’ut xjalam-uuch jun ch’ina al yoo chi kub’eek xha’ (chi’ilmanq Hu reheb’ li Jalam-uuch re li Evangelio, 104) ut kanab’eb’ li kok’al chixyeeb’al li neke’ril. Il ru malaj k’os ru Tzolʼlebʼ ut Sumwank 20:71–74, ut tenq’aheb’ li kok’al chirilb’al chan ru naq li jalam-uuch naxk’am rib’ rik’in li ch’olob’anb’il sa’eb’ li raqal a’an. Ch’olob’ xyaalal naq tento taqataaqe lix b’aanuhom li Kolonel ut taakub’eeq qaha’ jo’ chanru naq kixtaqla a’an.

• K’os ru Tzolʼlebʼ ut Sumwank 20:37. K’a’ru naqatzol sa’ li raqal a’in chirixeb’ li kristiaan li neke’raj kub’eek xha’? K’uteb’ jalam-uuch re chan ru naq eb’ li kok’al naru neke’xkawresi rib’ choq’ re li kub’iha’, jo’ li k’anjelak chiruheb’ li ras riitz’in ut li tijok.

• B’ichahomaq jun li b’ich chirix li kub’iha’, jo’ “Naq nakub’e lin ha’ ” (B’ichleb’aal choq’ reheb’ li Kok’al, 53), malaj ilomaq li video “El bautismo de Jesús” (biblevideos.ChurchofJesusChrist.org). Kanab’eb’ li kok’al chixwotzb’al li reek’ahomeb’ chirix li kub’iha’.

Tzol’leb’ ut Sumwank 20:75–79

Li loq’laj wa’ak nikinixtenq’a chixjultikankil li Jesukristo.

Chan ru naru nakatenq’aheb’ li kok’al chixtawb’al ru chi us k’a’ut naq nokotz’aqon sa’ li loq’laj wa’ak rajlal xamaan?

Kok’ k’anjel naru chi b’aanumank

• Yaab’asi Tzolʼlebʼ ut Sumwank 20:77 choq’ reheb’ li kok’al. Kanab’eb’ chi xaqliik naq te’rab’i li k’a’ru tento taqajultika naq naqatzeka li kaxlan wa re li loq’laj wa’ak. B’aanu ajwi’ a’an rik’in li raqal 79. (Maare us raj xyeeb’al naq ha’ li naquk’ sa’ xna’aj li viin.) Chan ru naru naqak’utb’esi naq naqajultika li Jesus?

• Seraq’i reheb’ li kok’al jun aanumsihom b’ar wi’ naq xayeechi’i k’a’ruhaq ut xab’aanu. Kanab’eb’ chixwotzb’al lix numsihomeb’ chanchan ajwi’ a’an. Ch’olob’ naq sa’ xtzekankil li loq’laj wa’ak naqab’aanu yeechi’ink. Il ru Tzolʼlebʼ ut Sumwank 20:77, rik’in xjultikankileb’ li yeechi’ink neke’qab’aanu re “junelik chixjultikankil a’an” ut “chixpaab’ankil lix taqlahom.” Kanab’eb’ li kok’al chixwotzb’al junaq xnumsihomeb’ b’ar wi’ ke’xjultika li Kolonel malaj ke’xpaab’ jun li taqlahom.

  

  Li loq’laj wa’ak naxjultika we naq tento tink’oxla li Jesukristo.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 20–21

Lix Iglees li Jesukristo k’ojob’anb’il wi’chik.

Sa’ xpaab’ankil lix taqlahom li Qaawa’, laj Jose Smith, laj Oliver Cowdery, ut xkomoneb’ chik li kristiaan ke’xk’uub’ lix Iglees li Jesukristo k’ojob’anb’il wi’chik sa’ li 6 re abril re 1830. K’oxla chan ru naru nakatenq’aheb’ li kok’al chirilb’al chan ru naq osob’tesinb’il lix yu’ameb’ xb’aan li hoonal a’an.

Kok’ k’anjel naru chi b’aanumank

• Jultika reheb’ li kok’al junjunq li hoonal aajel ru chirix li yookeb’ wi’ chixtzolb’al, jo’ lix k’ojob’ankil wi’chik li tijonelil ut lix jaltesinkil ru lix Hu laj Mormon. K’a’ut naq aajel ru naq ke’k’ulman li k’a’aq re ru a’an rub’elaj xk’uub’ankil li Iglees?

• K’uteb’ xjalam-uuch k’a’aq re ru neke’qab’aanu sa’ li Iglees ut li ch’olob’anb’ileb’ sa’ li tasal 20, jo’ li tzolok chirix li Dios ut li Jesukristo, rilb’aleb’ li komon, kub’sink ha’, ut tz’aqonk sa’ li loq’laj wa’ak. Tenq’aheb’ li kok’al chixk’ulinkileb’ li jalam-uuch rik’ineb’ li raqal neke’ch’olob’ank reheb’, jo’ Tzolʼlebʼ ut Sumwank 20:17–21, 47, 70, 72–74, 75–79, ut lix jolomil li tasal 21. K’a’ru li osob’tesihom wan qe sa’ xk’ab’a’ naq laa’o komon sa’ li Iglees?

• B’ichahomaq sa’ komonil “Lix Iglees li Jesukristo” (B’ichleb’aal choq’ reheb’ li Kok’al, 48).

Tzol’leb’ ut Sumwank 20:37, 77, 79

Naq kikub’e inha’, kinyeechi’i xtaaqenkil li Jesukristo.

Naab’aleb’ re li kok’al sa’ laa tzoleb’aal ak kub’enaqeb’ xha’. Jultika reheb’ li sumwank ke’xb’aanu re “xk’ulb’al sa’ xb’eeneb’ lix k’ab’a’ li Jesukristo” Tzolʼlebʼ ut Sumwank 20:37).

Kok’ k’anjel naru chi b’aanumank

• K’e xb’oqb’aleb’ junjunq li kok’al chi chalk chi kawresinb’ileb’ re aatinak chirix li k’a’ru ke’reek’a naq ke’kub’e xha’. Maare naru neke’xk’am junaq jalam-uuch re li kutan naq ke’kub’e xha’ re xk’utb’al sa’ li tzoleb’aal. K’a’ut naq ke’kub’e xha’? Chan ru naq neke’osob’tesiik xb’aan naq ke’kub’e xha’ ut xb’aan xk’ulb’al li Santil Musiq’ej?

• Ilomaq ru sa’ komonil Tzolʼlebʼ ut Sumwank 20:77, ut kanab’eb’ li kok’al chixk’eeb’aleb’ reetal li yeechi’ink naqab’aanu sa’ li loq’laj wa’ak. Re xtenq’ankileb’ chixtawb’al ru naq wankeb’ li k’a’aq re ru naru neke’b’aanuman rajlal kutan re “junelik chixjultikankil” li Jesukristo, kanab’ jun ch’ina al chixk’utb’esinkil k’a’ruhaq li naru naxb’aanu re xjultikankil li Kolonel. Kanab’eb’ lix komoneb’ chixq’ehinkil k’a’ru naraj naxye li kixb’aanu. Jo’ naxye li raqal 77, chan ru naq noko’osob’tesiik xb’aan xjultikankil junelik li Kolonel?

• Tenq’aheb’ li kok’al chixjuntaq’eetankil Tzolʼlebʼ ut Sumwank 20:37 rik’in li raqal 77 re naq te’xtaw li ch’ol aatin li naka’sutiman sa’eb’ li raqal. K’ut chiruheb’ k’a’ruhaq li wan xk’ab’a’ chiru (jo’ jun xk’ab’a’ junaq marca malaj kristiaan). K’a’ru naxye li k’ab’a’ej chirix li k’a’aq re ru? Ilomaq ru sa’ komonil Tzolʼlebʼ ut Sumwank 20:37 re xtawb’al k’a’ru li k’ab’a’ej naqak’ul sa’ qab’een naq nakub’e qaha’. K’a’ru naraj naxye xk’ulb’al sa’ qab’een lix k’ab’a’ li Jesukristo? Chan ru tento took’oxlaq ut toowanq xb’aan naq xqak’ul li k’ab’a’ej a’an?

Tzol’leb’ ut Sumwank 21:4–6

Osob’tesinb’ilin naq nintaaqe li profeet.

Chan ru taatenq’aheb’ li kok’al chixk’ulb’aleb’ li osob’tesiik neke’yeechi’iman sa’eb’ li raqal a’an choq’ reheb’ li neke’taaqen re li profeet?

Kok’ k’anjel naru chi b’aanumank

• Tz’iib’aheb’ sa’ li pizarron Taqlahom ut Osob’tesihom. Kanab’eb’ li kok’al chirilb’al ru Tzolʼlebʼ ut Sumwank 21:4–6, re xsik’b’aleb’ li taqlahom kixk’e li Qaawa’ ut li osob’tesihom kixyeechi’i. Kanab’eb’ chixtz’iib’ankil sa’ li pizarron li k’a’ru neke’xtaw.

• K’ut xjalam-uuch li profeet re li kutan a’in ut kanab’eb’ li kok’al chixwotzb’al k’a’ruhaq xe’xtzol malaj xe’rab’i rik’in a’an toje’. Ilomaq ru sa’ komonil Tzolʼlebʼ ut Sumwank 21:5. Kanab’eb’ li kok’al chixtz’iib’ankil malaj chixyiib’ankil xjalam-uuch k’a’ruhaq naru neke’xb’aanu re xtaaqenkil li profeet. Wotz lix nawom aach’ool chirix naq rajlal sut naq naqataaqe li profeet, naqataaqe li Kolonel.

Xb’oqb’aleb’ chi tzolok sa’ kab’l

Kanab’eb’ li kok’al chixtz’iib’ankil chi tustu k’a’ut naq neke’xb’antioxi lix Iglees li Jesukristo li k’ojob’anb’il wi’chik. Waklesi xch’ooleb’ chixwotzb’al lix tusulaleb’ rik’in junaq komon sa’ lix junkab’aleb’ malaj junaq ramiiweb’.

Xchaab’ilob’resinkil li qak’utum

Oksiheb’ li seraq’ re xk’utb’aleb’ li tzol’leb’. “Eb’ li seraq’ neke’xtenq’aheb’ li kok’al chirilb’al chan ru naq li evangelio nak’anjelak sa’ li yu’amej wulaj wulaj. … Naq nakatzoleb’ li kok’al, k’uub’ chan ru te’tz’aqonq sa’ li seraq’; qayehaq, naru te’xk’ut li jalam-uuch, te’xye li aatin chi xka’sutil, malaj te’reetali li k’a’ru nak’ulman sa’ li seraq’ ” (Li k’utuk jo’ li Kolonel, 25).