Li Tzolʼlebʼ ut Sumwank 2021
15–21 marzo. Tzol’lebʼ ut Sumwank 27–28: “Chixjunil li k’a’aq re ru tento taab’aanumanq chi tustu”

“15–21 marzo. Tzolʼlebʼ ut Sumwank 27–28: “Chixjunil li k’a’aq re ru tento taab’aanumanq chi tustu,” ” Kim, Taaqehin—Choq’ re li Tzoleb’aal reheb’ li Kok’al: Li Tzolʼlebʼ ut Sumwank 2021 (2020)

“15–21 marzo. Tzolʼlebʼ ut Sumwank 27–28,” Kim, Taaqehin—Choq’ re li Tzoleb’aal reheb’ li Kok’al: 2021

Jalam-uuch
aj Jose Smith

15–21 marzo

Tzolʼlebʼ ut Sumwank 27–28

“Chixjunil li k’a’aq re ru tento taab’aanumanq chi tustu”

Eb’ li yaal neke’k’utman sa’ Tzol’leb’ ut Sumwank 27–28 naru neke’xkawob’resi xnawom xch’ooleb’ li kok’al nakatzoleb’. Naq nakak’oxla li k’a’ru neke’raj ru li kok’al, k’a’ruheb’ li yaal taajayali wi’ aawib’ sa’ li tzolok?

Tz’iib’a li nakak’oxla

Jalam-uuch
reetalil li wotzok

Xkanab’ankileb’ chi wotzok

K’ut jun xjalam-uuch li Profeet aj Jose Smith ut jun xjalam-uuch li profeet anajwan. Kanab’eb’ li kok’al chixyeeb’al xk’ab’a’eb’ li kristiaan wankeb’ sa’ li jalam-uuch ut te’xye k’a’ru neke’xb’aanu li profeet.

Jalam-uuch
reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 27:1–2

Li loq’laj wa’ak nikinixtenq’a chixjultikankil li Jesukristo.

Eb’ li kok’al toj ka’ch’ineb’ xyu’am naru neke’xtzol lix aajelil ru li loq’laj wa’ak ut naru neke’xsik’ chan ru xjultikankil li Kolonel sa’ li loq’laj k’ojob’anb’il k’anjel a’an.

Kok’ k’anjel naru chi b’aanumank

  • K’ut chiruheb’ li kok’al jun xjalam-uuch li Jesus naq kixk’e li loq’laj wa’ak reheb’ lix apostol (chi’ilmanq Hu reheb’ li Jalam-uuch re li Evangelio, 54). Chan raj ru xk’ulb’al li loq’laj wa’ak rochb’een li Kolonel? (chi’ilmanq Tzol’leb’ ut Sumwank 27:5). Yaab’asi Tzol’leb’ ut Sumwank 27:2, xtikib’ankil sa’ “chi jultikanb’il eere chiru li Yuwa’b’ej,” ut kanab’eb’ li kok’al chirab’inkil li naraj li Kolonel naq taqajultika naq nokotz’aqon sa’ li loq’laj wa’ak.

  • K’ut chiruheb’ li kok’al b’ayaq li kaxlan wa ut li ha’, ut jun xjalam-uuch li Kolonel. Kanab’eb’ chixchapb’al li jalam-uuch naq yooqat chixk’utb’al naq li loq’laj wa’ak nokoxtenq’a chixjultikankil li Jesukristo.

  • Tenq’aheb’ li kok’al chixk’oxlankil k’a’ru naru neke’xb’aanu re xjultikankil li Jesus sa’ li loq’laj wa’ak. K’a’ru neke’xb’aanu sa’ lix junkab’aleb’ re xtenq’ankileb’ rib’ chirib’ileb’ rib’ chi wank rik’in oxloq’? Kanab’eb’ li kok’al chixyiib’ankil jun jalam-uuch li naru neke’ril sa’ li loq’laj wa’ak ut tixtenq’aheb’ chixjultikankil li Kolonel.

Tzol’leb’ ut Sumwank 27:15–18

Li kolb’a-ib’ aq’ej re li Dios naxkol wix.

K’oxla chan ru naru nakatenq’aheb’ li kok’al nakatzoleb’ chirilb’al naq xpaab’ankileb’ li taqlahom a’an chanchan tiqib’ank-ib’ rik’in li kolb’a-ib’ aq’ej re li Dios.

Kok’ k’anjel naru chi b’aanumank

  • K’ut chiruheb’ li kok’al jun xjalam-uuch li kolb’a-ib’ aq’ej (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Naq yooqat chirilb’al ru Tzol’leb’ ut Sumwank 27:15–18, tenq’aheb’ chixtawb’aleb’ lix cha’alil li kolb’a-ib’ aq’ej sa’ li jalam-uuch. Ye reheb’ chan ru naq li kolb’a-ib’ aq’ej nakatxtenq’a laa’at “chixkuyb’al li rahil kutan” (raqal 15).

  • Sa’ li tusleb’ aatin choq’ re Efesios sa’ Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2019 wan jun perel re kok’ k’anjel chirix li kolb’a-ib’ aq’ej re li Dios. Seteb’ lix cha’alil li kolb’a-ib’ aq’ej ut kanab’eb’ li kok’al chixk’eeb’aleb’ sa’ li jalam-uuch naq yooqat chirilb’al ru Tzol’leb’ ut Sumwank 27:15–18. Tenq’aheb’ chixtawb’al ru li naru neke’xb’aanu re xk’eeb’al chirixeb’ li kolb’a-ib’ aq’ej re li Dios, jo’ li tijok, xb’aanunkil li us, k’anjelak chiruheb’ li ras riitz’in, ut wan chik xkomon.

    Jalam-uuch
    kok’al neke’b’atz’un

    Naru nink’e chiwix li kolb’a-ib’ aq’ej re li Dios.

Tzol’leb’ ut Sumwank 28:2, 6–7

Li profeet naxb’eresi li Iglees.

Ma neke’xnaw li kok’al nakatzoleb’ k’a’ut naq wankeb’ li profeet? Oksi Tzol’leb’ ut Sumwank 28 re xtenq’ankileb’ li kok’al chixnawb’al naq ka’ajwi’ li profeet naru nab’eresink re li Iglees.

Kok’ k’anjel naru chi b’aanumank

  • Il ru malaj ye rik’ineb’ laa waatin li seraq’ chirix laj Hiram Page (chi’ilmanq “Ch’ol 14: Li Profeet ut eb’ li k’utb’esinb’il na’leb’ choq’ re li Iglees,” Eb’ li Esilal sa’ li Tzol’leb’ ut Sumwank, 56–57). Wotz lix nawom aach’ool chirix naq li qaChoxahil Yuwa’ ut li Jesukristo ke’xsik’ ru laj Jose Smith re naq tixb’eresi li Iglees sa’ lix kutankil chaq (chi’ilmanq Tzol’leb’ ut Sumwank 28:2). Wotz lix nawom aach’ool chirix naq li profeet wan anajwan b’oqb’il re xtenq’ankil li Qaawa’ chixb’eresinkil lix Iglees sa’eb’ li kutan a’in.

  • Kanab’eb’ li kok’al chixb’atz’unkil “taaqe laj jolominel”—jun ch’ina al naru naxaqli chi uub’ej sa’ li tzoleb’aal ut xkomoneb’ chik li kok’al naru neke’xka’suti li k’a’ru tixb’aanu li ch’ina al a’an. A’an naru natenq’an chi k’amok sa’ jun aatinak chirix k’a’ut naq naqataaqe li profeet. Naru nakak’ut jun xjalam-uuch li Jesukristo ut nakach’olob’ naq naqataaqe li profeet xb’aan naq a’an naxtaaqe li Kolonel ut naxye li raatin a’an.

Jalam-uuch
reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 27:1–2

Li loq’laj wa’ak nikinixtenq’a chixjultikankil li Jesukristo.

Chan ru naq li xtzolb’aleb’ li na’leb’ neke’tawman sa’ Tzol’leb’ ut Sumwank 27:1–2 naru naxtenq’aheb’ li kok’al chixtawb’al xyaalalil li loq’laj wa’ak naq neke’tz’aqon rik’in a’an?

Kok’ k’anjel naru chi b’aanumank

  • Kanab’eb’ li kok’al chixtz’iib’ankileb’ k’a’aq re ru li neke’xk’oxla naq li Kolonel taaraj raj naq a’aneb’ te’xnaw chirix li loq’laj wa’ak. Wi na’ajman ru, naru neke’ril ru “Loq’laj wa’ak” sa’ li K’utul Raqal reheb’ li Loq’laj Hu. Kanab’eb’ chixwotzb’aleb’ li k’a’aq re ru xe’xtz’iib’a ut kanab’eb’ chixtz’iib’ankil xkomon li tusulal chirix naq te’ril ru Tzol’leb’ ut Sumwank 27:1–2 Chan ru te’tenq’aaq xb’aan li k’a’ru xe’xtz’iib’a chirix chan ru naq neke’tz’aqon sa’ li loq’laj wa’ak ralaj domingo?

  • Tenq’aheb’ li kok’al chi k’oxlak chirix k’a’ru naraj naxye li tz’aqonk sa’ li loq’laj wa’ak “chi junaj ru lix sa’ eeru sa’ lix loq’al li Dios” (raqal 2). Aatinanqex chirixeb’ patz’om jo’eb’ a’in: K’a’ruheb’ li k’a’aq re ru naru neke’risi li qilob’aal malaj li qak’a’uxl sa’ li hoonal re li loq’laj wa’ak? K’a’ru naru naqab’aanu re xjayalinkil li qak’a’uxl chirix li Kolonel naq nokotz’aqon sa’ li loq’laj wa’ak? Chan ru naq li taqab’aanu naru nokoxtenq’a chixtaaqenkil a’an rajlal kutan?

Tzol’leb’ ut Sumwank 27:15–18

Li kolb’a-ib’ aq’ej re li Dios naxkol wix chiru li ink’a’ us.

Eb’ li kok’al nakatzoleb’ te’xnumsi naab’al li yib’ aj aaleek chiru lix yu’ameb’. Li qaChoxahil Yuwa’ naraj xtenq’ankileb’ chixq’axb’aleb’ ru li ink’a’ us. Chan ru naru nakawaklesi xch’ooleb’ chiroksinkil li kolb’a-ib’ aq’ej re li Dios?

Kok’ k’anjel naru chi b’aanumank

  • Kanab’eb’ li kok’al chirilb’al ru Tzol’leb’ ut Sumwank 27:15–18 ut te’xyiib’ xjalam-uucheb’ lix cha’alil li kolb’a-ib’ aq’ej neke’yeeman aran (wi na’ajman ru, naru neke’ril li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). K’a’ru neke’xk’ut chiqu li aatin neke’xch’olob’ li junjunq xcha’alil li kolb’a-ib’ aq’ej, chirix li k’a’ru naqaj ru re xkolb’al qib’ chiru li ink’a’ us wan sa’ qasutam (qayehaq: tiikilal, paab’aal, kolb’a-ib’ ut chi jo’kan)?

  • Kanab’eb’ li kok’al chixk’oxlankileb’ li k’a’aq re ru naru neke’xb’aanu re xkolb’aleb’ rib’ chiruheb’ li aaleek wankeb’ sa’ xsutam. Kanab’eb’ chixtz’aqob’resinkil ru li ch’ol aatin a’in rik’ineb’ lix na’leb’: “Naqoksi li kolb’a-ib’ aq’ej re li Dios rajlal kutan naq …” Tenq’aheb’ chirilb’al chan ru naq lix yalb’aleb’ xq’e chi chalk rik’in li Kristo naxtenq’aheb’ chiroksinkil li kolb’a-ib’ aq’ej re li Dios.

Tzol’leb’ ut Sumwank 28:1–7, 15

Li qaChoxahil Yuwa’ nikinixb’eresi rik’in li Santil Musiq’ej.

Tzol’leb’ ut Sumwank 28:1–7, 15 naru naxtenq’aheb’ li kok’al nakatzoleb’ chixtawb’al ru naq chiqajunil naru nokob’eresiik xb’aan li Santil Musiq’ej, a’b’an naq li k’utb’esinb’il na’leb’ choq’ re li Iglees ka’ajwi’ k’eeb’il rik’in xtz’uumal re li profeet.

Kok’ k’anjel naru chi b’aanumank

Jalam-uuch
reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixpatz’b’al reheb’ lix na’ xyuwa’eb’ ma naru neke’k’utuk jun sutaq sa’ li q’ojyin re junkab’al chirix k’a’ruhaq xe’xtzol sa’ li tzoleb’aal.

Xchaab’ilob’resinkil li qak’utum

Oksiheb’ li b’ich. Eb’ li b’ich reheb’ li kok’al ut sa’ li b’ichleb’aal naru neke’xtenq’aheb’ li kok’al a’ yaal jarub’ chihab’ wan reheb’ chixtawb’al ru ut chixjultikankileb’ li yaal re li evangelio. Li b’ichank naru ajwi’ naxtenq’aheb’ li kok’al chi tz’aqonk sa’eb’ li tzolok.

Jalam-uuch
perel re kok’ k’anjel: li Dios naxb’eresi lix Iglees

Isi reetalil