xEmma Smith

8–14 marzo

Tzolʼlebʼ ut Sumwank 23–26

“Xk’eeb’al xkawilal li Iglees”

Naq yooqat chixkawresinkil aawib’ re k’utuk, k’e reetaleb’ li na’leb’ re kok’ k’anjel sa’ li tasal “Kok’al toj ka’ch’ineb’ xyu’am” jo’ ajwi’ sa’ li tasal “Kok’al ak ninqeb’.”

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut jun xjalam-uuch li xEmma Smith (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ li kok’al chixwotzb’al li neke’xnaw chirix a’an, jo’ ajwi’ li maare xe’xtzol naq xe’ril ru Tzolʼlebʼ ut Sumwank 25 sa’ li xamaan xnume’. Ch’ol 13: Laj Jose ut li xEmma” (Eb’ li Esilal sa’ li Tzol’leb’ ut Sumwank, 51–55) naru natenq’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzolʼlebʼ ut Sumwank 23:6; 26:1

Li Dios naraj naq tintijoq ut tintzoloq sa’eb’ li loq’laj hu rajlal kutan.

Li Qaawa’ kixye reheb’ li xb’eenil aj jolominel ut amiiw re li Iglees naq te’tijoq (chi’ilmanq Tzolʼlebʼ ut Sumwank 23:6) ut te’xtzoleb’ li loq’laj hu (chi’ilmanq Tzolʼlebʼ ut Sumwank 26:1). Chan ru naru nakatenq’aheb’ li kok’al chiroksinkil li tijok ut eb’ li loq’laj hu jo’ xcha’al lix yu’ameb’?

Kok’ k’anjel naru chi b’aanumank

• Yaab’asi choq’ reheb’ li kok’al Tzolʼlebʼ ut Sumwank 23:6, xtikib’ankil sa’ “tento tattijoq.” Tenq’aheb’ chixk’eeb’aleb’ reetal li jalan jalanq na’ajej ut chan ru kixye li Qaawa’ naq tento tootijoq. Kanab’eb’ chixyiib’ankil xjalam-uucheb’ a’an naq yookeb’ chi tijok sa’ junaq reheb’ li na’ajej a’an malaj jo’ chanru yeeb’il sa’ li raqal.

• Wi na’ajman ru, ch’olob’ chiruheb’ chan ru li tijok. Jun li b’ich chirix li tijok, jo’ “Ninmutz’ li wu” (B’ichleb’aal choq’ reheb’ li Kok’al, 18) naru natenq’an.

• Il ru rik’ineb’ li kok’al: “Teekanab’ chi q’axtesiik lee kutan choq’ re xtzolb’aleb’ li loq’laj hu” (Tzolʼlebʼ ut Sumwank 26:1) Ye reheb’ k’a’ut naq nakatzoleb’ li loq’laj hu. Tenq’aheb’ chixk’oxlankil chan ru naru neke’tzolok sa’eb’ li loq’laj hu, us ta toj maji’ neke’xnaw ilok ru hu.

• B’ichahomaq sa’ komonil “Tintzol, tink’oxla, tintijoq” (B’ichleb’aal choq’ reheb’ li Kok’al, 66) malaj junaq chik li b’ich chirix li tijok ut xtzolb’aleb’ li loq’laj hu. Tenq’aheb’ li kok’al chixk’eeb’aleb’ reetal li osob’tesihom yeechi’inb’ileb’ sa’ li b’ich. Seraq’i reheb’ li musiq’ejil eek’ahom aak’ulum laa’at naq nakattijok ut nakawileb’ ru li loq’laj hu.

Tzol’leb’ ut Sumwank 25:11–12

Jwal nawulak chiru li Jesus “lix b’ichahom li aamej.”

Chirixeb’ li loq’laj b’ich, li Qaawa’ kixye: “li nasaho’ wi’ sa’ inch’ool.” Tenq’aheb’ li kok’al chirilb’al li b’ichank moko ka’ajwi’ ta jo’ jun ch’ina k’anjel ch’ina us, jo’ aj b’an wi’ xloq’oninkil li Qaawa’.

Kok’ k’anjel naru chi b’aanumank

• Kanab’eb’ li kok’al chixyeeb’al b’ar wan li b’ich re li Iglees li jwal nawulak chiruheb’, ut te’xb’icha sa’ komonil junjunqeb’ li b’ich. Yaab’asi Tzolʼlebʼ ut Sumwank 25:12 choq’ reheb’ li kok’al ut kanab’eb’ chixk’oxlankil k’a’ru neke’reek’a li qaChoxahil Yuwa’ ut li Jesus naq nokohe’rab’i chixb’ichankileb’ li b’ich a’an.

• K’ut chiruheb’ li kok’al jun li b’ich li wan rilom rik’in li b’ichank, jo’ “Taqsi xyaab’ aakux ut b’ichan” (B’ichleb’aal choq’ reheb’ li Kok’al, 124), malaj jun na’aatinak chirix li Jesukristo, jo’ “Kixtaqla li Ralal” (B’ichleb’aal choq’ reheb’ li Kok’al, 20–21). K’e xb’oqb’aleb’ chixb’ichankil li b’ich rik’ineb’ lix junkab’al chiru li xamaan a’in.

  eb’ li kok’al neke’b’ichan

  Sa’ li b’ichank naqak’utb’esi li qarahom choq’ re li Dios.

Tzolʼlebʼ ut Sumwank 25:13, 15

Naru ninkawresi wib’ re ok sa’eb’ li loq’laj sumwank.

Eb’ li kok’al nakatzoleb’ yookeb’ chixkawresinkil rib’ re ok sa’ li xb’een xsumwankeb’ rik’in li qaChoxahil Yuwa’ naq te’kub’eeq xha’. Chan ru naru nakatenq’aheb’ chirilb’al xnimal xloq’aleb’ li qasumwank?

Kok’ k’anjel naru chi b’aanumank

• Il ru Tzolʼlebʼ ut Sumwank 25:13 choq’ reheb’ li kok’al. Ch’olob’ chiruheb’ naq li aatin “chatjiloq” sa’ li raqal a’in naraj naxye xchapb’al chi kaw k’a’ruhaq. Re xtenq’ankileb’ chixtawb’al ru, numsi jun k’a’aq re ru jwal kaw sa’ li tzoleb’aal, jo’ jun li pek (malaj jun toqol b’arb’ookil ch’iich’), ut kanab’eb’ chixchapb’al rik’in chixjunileb’ lix metz’ew. Ch’olob’ naq xjilosinkil qib’ rik’ineb’ li qasumwank naraj naxye rilb’al (malaj roxloq’inkil) li yeechi’ink naqab’aanu rik’in li qaChoxahil Yuwa’ ut maajun wa taqakoq’ (malaj maajun wa taqakanab’ qib’ chi t’ane’k).

• Oksi li perel re kok’ k’anjel re li xamaan a’in re xtzolb’aleb’ li kok’al chirixeb’ li hoonal b’ar wi’ neke’qab’aanu li sumwank rik’in li qaChoxahil Yuwa’. Il ru Tzolʼlebʼ ut Sumwank 25:15 ut ch’olob’ naq li “koroon re tiikilal” nareetali li osob’tesihom re q’ajk chi wank rik’in li Dios li qaChoxahil Rey.

reetalil li k‘utuk

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 23:3–7; 25:7

Li Jesus naraj naq laa’in tinkawob’resiheb’ li kristian wankeb’ chinsutam.

Naq kik’uub’aman li Iglees, moko k’iheb’ ta chaq li komon. Li Qaawa’ kixpatz’ reheb’ laj santil paab’anel naq te’xkab’la li Iglees, ut re a’an te’xwotz li evangelio ut te’xkawob’resi rib’ chirib’ileb’ rib’. Laa’o ajwi’ naru naqab’aanu a’an sa’ li kutan a’in.

Kok’ k’anjel naru chi b’aanumank

• Kanab’eb’ li kok’al chixsikb’aleb’ li aatin “waklesink ch’oolej” ut “xwaklesinkil xch’ool” sa’ Tzolʼlebʼ ut Sumwank 23:3–7; 25:7. Tenq’aheb’ chixtawb’al xch’olob’ankileb’ li aatin a’an. Chan ru naq nakawu anihaq naq nawaklesiman xch’ool? Kanab’eb’ li kok’al chixk’utb’esinkil naq “neke’xwaklesi xch’ool” anihaq, a’b’an rik’in rahok.

• Chan ru naru naqachaab’ilob’resi li qak’anjel re xkawob’resinkileb’ li komon re li Iglees? Re xk’utb’al li na’leb’ a’in, k’e re junaq li ch’ina al jun k’anjel b’ar wi’ te’ajmanq ru xtenq’ naab’aleb’. Chirix a’an kanab’eb’ xkomoneb’ li kok’al chi tenq’ank ut te’aatinaq chirix chan ru naq moko ch’a’aj ta x’el li k’anjel. Wotz jun aanumsihom b’ar wi’ naq laa’at xatkawob’resiik xb’aan xk’anjel junaq chik komon re li Iglees.

Tzol’leb’ ut Sumwank 24:1, 8

Li Kolonel naru “nikinixwaklesi chaq sa’eb’ lin ch’a’ajkilal.”

Laj Jose Smith kixnumsi naab’aleb’ li ch’a’ajkilal, a’b’an kiru chi “kuyuk sa’ li ch’a’ajkilal” xb’aan naq li Qaawa’ kixyeechi’i re naq junelik taawanq rik’in.

Kok’ k’anjel naru chi b’aanumank

• Tenq’aheb’ li kok’al chixyiib’ankil chiru li pizarron jun xtusulaleb’ li ch’a’ajkilal kixnumsiheb’ laj Jose Smith ut xkomoneb’ chik laj santil paab’anel sa’ xtiklajik li Iglees (chi’ilmanq “Ch’ol 11: Xkomon chik neke’ok sa’ li Iglees,” Eb’ li Esilal sa’ li Tzol’leb’ ut Sumwank, 46–47, malaj li video sa’ ChurchofJesusChrist.org). Chirix a’an kanab’eb’ chixk’eeb’al reetal k’a’ru kixye li Qaawa’ re laj Jose chirixeb’ lix ch’a’ajkilal sa’ Tzolʼlebʼ ut Sumwank 24:1, 8. Chan ru naru naqasik’ lix tenq’ li Qaawa’ naq wanko sa’ jun hoonal ch’a’aj?

• Re xk’utb’al chiruheb’ li kok’al naq jo’q’ehaq naqaj ru “kuyuk sa’ li qach’a’ajkilal,” naru nakak’ut chiruheb’ li video “Continuemos con paciencia” (ChurchofJesusChrist.org). Kanab’eb’ li kok’al chixk’oxlankil k’a’ruhaq li mas neke’rataw, a’b’an toj tento te’royb’eni. K’a’ut naq jo’q’ehaq li Qaawa’ naxpatz’ qe naq tookuyuq sa’eb’ li hoonal ch’a’ajeb’ sa’ li qayu’am? Chan ru naxk’e chiqanaw naq a’an wan “qik’in” sa’eb’ li qach’a’ajkilal?

Tzol’leb’ ut Sumwank 25:13

Naru “ninjilosi wib’ rik’ineb’ li sumwank” li xin’ok wi’.

B’ab’ay chik chirix naq li xEmma kikub’e xha’, li Qaawa’ kixye re, “Chatjiloq rik’ineb’ li sumwank li kak’uub’.” K’e reetal chan raj ru naq li na’leb’ a’an naru narosob’tesiheb’ li kok’al nakatzoleb’.

Kok’ k’anjel naru chi b’aanumank

• Ilomaq ru sa’ komonil Tzolʼlebʼ ut Sumwank 25:13, ut patz’ reheb’ li kok’al k’a’ru naraj naxye sa’ li raqal a’in “jilok rik’ineb’ li sumwank” li noko’ok wi’. Re xk’utb’esinkil, numsiheb’ k’a’aq re ru chapchookeb’ chirib’ileb’ rib’ sa’ li tzoleb’aal ut kanab’eb’ li kok’al chixyalb’al xjachb’aleb’ ru. K’a’ut naq li aatin “jilok” naxch’olob’ chan raj ru tento toowanq rik’ineb’ li qasumwank?

• Wi na’ajman ru, il wi’chik ruheb’ rik’ineb’ li kok’al li sumwank noko’ok wi’ naq nakub’e qaha’ (chi’ilmanq Mosiah 18:8–10; Tzolʼlebʼ ut Sumwank 20:37). K’a’ru nara naxye “jilok” rik’ineb’ li sumwank a’an?

• Ilomaq wi’chik sa’ komonil k’a’ru nakanaw laa’at chirix lix yu’am li xEmma Smith (chi’ilmanq “Ch’ol 13: Laj Jose ut li xEmma” [Eb’ li Esilal sa’ li Tzol’leb’ ut Sumwank 51–55], malaj li video sa’ ChurchofJesusChrist.org). K’e reheb’ li junjunq chi kok’al junjunq malaj ka’kab’ raqal re li tasal 25, ut kanab’eb’ chixwotzb’al chan ru naq li na’leb’ ut eb’ li k’anjel kixk’e li Qaawa’ kixtenq’a li xEmma chi “jilok rik’ineb’ li sumwank” ki’ok wi’ chaq. Chan ru naru taqab’aanu jo’ kixb’aanu a’an?

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixsik’b’al ru jun li raqal jwal nawulak chiruheb’ li xex’aatinak wi’ sa’ komonil, chixtz’iib’ankil rajlil li raqal, ut chixwotzb’al rik’in junaq komon sa’ xjunkab’aleb’ malaj ramiiweb’.

Xchaab’ilob’resinkil li qak’utum

Waklesiheb’ xch’ool chi oxloq’ink. Tenq’aheb’ li kok’al chixtawb’al ru naq jun na’leb’ aajel ru chirix li oxloq’ink a’an xk’oxlankil li qaChoxahil Yuwa’ ut li Jesukristo. Naru nakajultika reheb’ naq tento te’oxloq’inq rik’in xb’ichankil malaj xtz’uyinkil junaq li b’ich, malaj xk’utb’al junaq xjalam-uuch li Jesus.

perel re kok’ k’anjel: naru ninkawresi wib’ re ok sa’eb’ li sumwank