Chʼol 11
Xkomon chik neke’ok sa’ li Iglees
Abril–junio re 1830
Chirix xnumik junjunq xamaan, wankeb’ 27 li komon sa’ li Iglees. Moko ch’utch’uukeb’ ta sa’ jun ajwi’ li k’aleb’aal. Laj Jose Smith kixpatz’ reheb’ naq te’chalq sa’ jun ch’utub’aj-ib’, jun xnimal ru ch’utam choq’ re chixjunileb’ laj Santil Paab’anel. Laj Santil Paab’anel nayeeman reheb’ li komon sa’ lix Iglees li Jesukristo.
Eb’ laj Santil Paab’anel ke’xk’ul li loq’laj wa’ak sa’ li ch’utub’aj-ib’. Junjunqeb’ li winq ke’k’ojob’aman sa’ li tijonelil. Li Santil Musiq’ej kirosob’tesiheb’ laj Santil Paab’anel, ut ke’saho’ sa’ xch’ool.
Moko komoneb’ ta sa’ li Iglees junjunqeb’ chik li ke’oken sa’ li ch’utub’aj-ib’. Ke’tzolok chirix li evangelio ut ke’raj ok sa’ li Iglees, jo’kan naq ke’kub’e xha’. Chirix li ch’utub’aj-ib’, laj Jose Smith xko’o sa’ jalan chik li k’aleb’aal. Junjunqeb’ aran ke’raj ajwi’ li kub’iha’. Laj Jose Smith kixye naq taaruuq te’kub’eeq xha’ sa’ li nima’ li nach’ wan.
Eb’ a’an ke’xyiib’ jun ch’ina ramleb’aal ha’ sa’ li nima’ re naq cham chik li ha’ choq’ re xb’aanunkil li kub’iha’. Naq kichal li q’ojyin, jalaneb’ chik ke’xsach li ramleb’aal ha’.
Kiyiib’aman wi’chik li ramleb’aal ha’, ut laj Oliver Cowdery ki’ok chi kub’sink ha’. Tikto ke’chal jun ch’uut chi aj rahob’tesinel. Yib’ ruhil aatin ke’xye ut ke’xyal xrahob’tesinkileb’ laj Santil Paab’anel, a’b’anan li Qaawa’ kixkoleb’.
Li ch’uut chi aj rahob’tesinel toj ke’xk’e xch’ool chixch’i’ch’i’inkil li Iglees. Ke’xyoob’ aatin chirix laj Jose Smith ut ke’xchap. Sa’ li raqb’a-aatin, kitawman naq moko yaal ta li ke’xye junjunqeb’ chirix li Profeet. A’b’anan wankeb’ naab’eleb’ chik li ke’xye li yaal chirix laj Jose, chi jo’kan xk’utb’al naq moko yaal ta li raatineb’ li xik’ ke’ilok re.
Ki’ach’ab’aak laj Jose, a’b’an sa’ junpaat kichape’ wi’chik xb’aaneb’ li ani wankeb’ sa’ jalan chik chi condado moko najt ta rik’in. Naq wan sa’ tz’alam, kichuub’aak ut ink’a’ k’eeb’il tzakemq re. Kik’ulman jun chik li raqb’a-aatin, ut kitawman wi’chik naq maak’a’ xmaak laj Jose ut ki’ach’ab’aak.