Chʼol 54
Li Dios ut eb’ li anjel
Febrero–abril re 1843
Sa’ jun kutan jun li winq li kixye naq rilom chaq jun li anjel kichal rik’in laj Jose Smith. Li winq kixye re laj Jose li aq’ej tiqto wi’ li anjel. Laj Jose kixye naq li winq moko rilom ta jun li anjel chi yaal xb’aan naq eb’ li anjel ink’a’ neke’xtiqib’ rib’ jo’ ch’olob’anb’il xb’aan li winq.
Q’axal kijosq’o’ li winq. Kixtaqla naq taat’ane’q li xam sa’ choxa re xk’atb’al li Profeet ut li rochoch. A’b’anan li winq maak’a’ xwankil li Dios rik’in, ut maajun xam ki’el chaq sa’ choxa.
Li Jesus kixk’e jun k’utb’esinb’il na’leb’ chirixeb’ li anjel re laj Jose Smith. Li Jesus kixye naq eb’ li anjel a’aneb’ li ani ak ke’wan xyu’am sa’ ruchich’och’, ke’kam, ut ak waklijenaqeb’ chi yo’yo. Wankeb’ xjunxaqalil tib’ ut b’aq okenaq chaq.
Li Jesus kixye naq laj Satanas naxyal xq’e chiqab’alaq’inkil. Wan naq naxb’alaq’i junaq re naq tixk’oxla naq a’an jun li anjel. A’an naxyal xq’e chiqab’eresinkil re taqab’aanu li ink’a’ us. A’b’an li ani tiik xch’ool tixnaw jo’q’e yoo laj Satanas chixyalb’al xq’e chixb’alaq’inkil.
Moqon, laj Jose Smith kixye reheb’ laj Santil Paab’anel xkomon chik li yaalalil na’leb’ chirix li choxa. Kixye naq eb’ li anjel moko wankeb’ ta sa’ jun ruchich’och’ jo’ li ruchich’och’ wanko wi’. Wankeb’ b’an rik’in li Dios. Laj Jose kixye ajwi’ naq li ani wan sa’ choxa toj naxnaw chixjunil li kixtzol sa’ ruchich’och’.
Laj Jose Smith kixye naq chixjunileb’ lix chaq’rab’ li Dios ke’yiib’aman sa’ choxa rub’elaj naq koochal sa’ ruchich’och. Wan rosob’tesihom li junjunq li chaq’rab’. Tento taqapaab’ li chaq’rab’ re xk’ulb’al li osob’tesink.
Laj Jose Smith kixye reheb’ laj Santil Paab’anel resil li Jesukristo ut li qaChoxahil Yuwa’. Li rilob’aal li Jesus chanchan jun li winq ut wan xjunxaqalil tib’ ut b’aq okenaq.
Li qaChoxahil Yuwa’ wan ajwi’ xjunxaqalil tib’ ut b’aq okenaq. A’an wan sa’ jun chaq’al ru na’ajej q’axal nalemtz’unk.
Laj Jose Smith kixye ajwi’ naq li Santil Musiq’ej a’an jun musiq’ej. Maak’a’ xjunxaqalil tib’ ut b’aq okenaq li Santil Musiq’ej.