Chʼol 17
Eb’ li xb’een obiisp sa’ li Iglees
Febrero ut diciembre re 1831
Laj Jose ut li xEmma, laj Sidney Rigdon, ut laj Edward Partridge xkoheb’ Kirtland. Laj Jose ut li xEmma ke’k’ule’ sa’ rochoch jun li komon sa’ li Iglees, laj Newel K. Whitney xk’ab’a’.
Ke’wan tana’ 1,000 chi komon sa’ li Iglees sa’ Kirtland. Yookeb’ chixk’eeb’aleb’ xch’ool chixpaab’ankil li Dios, a’b’an ink’a’ ke’xtaw ru chixjunil chirix li evangelio.
Tzolʼlebʼ ut Sumwank 41, xtiklajik li tasal
Laj Jose kitijok ut kixk’ul jun k’utb’esinb’il na’leb’. Li Jesus kixye re naq na’ajman ru jun obiisp choq’ reheb’ laj Santil Paab’anel sa’ Kirtland. Li obiisp tento taaroksi lix hoonal chixtzolb’aleb’ ut chixtenq’ankileb’ laj Santil Paab’anel. Li xb’een obiisp re li Iglees, a’anaq laj Edward Partridge.
Naq yoo chi k’ihank rajlankileb’ li komon sa’ li Iglees, ke’ajman ru xkomon chik li obiisp. Laj Newel K. Whitney kib’oqe’ choq’ li xkab’ obiisp re li Iglees.
Li Jesus kixye re laj Jose naq li obiisp tento tixk’uula jun li k’uuleb’aal kab’l. Eb’ laj Santil Paab’anel tento te’xk’e li tzakemq, li aq’ej, ut jalan chik li mayej re li obiisp re xk’uulankil sa’ li k’uuleb’aal kab’l. Chirix a’an li obiisp taaroksiheb’ li k’a’aq re ru a’in re xtenq’ankileb’ laj Santil Paab’anel li neb’a’eb’ malaj li maak’a’ wankeb’ re.
Li Jesus kixye ajwi’ naq li obiisp tento tixk’ul li tumin q’axtesinb’il re li Iglees xb’aaneb’ laj Santil Paab’anel. Li obiisp taaroksi li tumin a’in re xtojb’al lix k’as li Iglees ut re xtenq’ankileb’ li neb’a’.
Li obiisp tento tixraheb’ laj Santil Paab’anel ut tixyal xq’e chixtenq’ankileb’. Tento tixch’utub’ rib’ rik’ineb’ li winq sa’ li tijonelil re aatinak chirix li k’a’ru yookeb’ re xtenq’ankileb’ laj Santil Paab’anel.
Jun li obiisp naxjolomiheb’ laj Santil Paab’anel sa’ li junjunq chi teep re li Iglees. Jun li awa’b’ej re li uq’ej a’an chanchan jun li obiisp. Jun awa’b’ej re li uq’ej naxjolomiheb’ laj Santil Paab’anel sa’eb’ li uq’ej re li Iglees.
Anajwan, wankeb’ k’iila mil li obiisp sa’ li Iglees.