Chʼol 58
Jun ak’ aj jolominel choq’ re li Iglees
Julio–agosto re 1844
Chirix naq kamsinb’il li Profeet aj Jose Smith, maak’a’ jun awa’b’ej re li Iglees. Eb’ laj Santil Paab’anel ink’a’ ke’xnaw ani taajolominq reheb’.
Lix k’ihaleb’ li apostol wankeb’ najt sa’ taqlanb’il xk’anjel.
Laj Sidney Rigdon a’an laj tenq’ aj k’ehol na’leb’ chiru laj Jose Smith. A’ut ink’a’ rab’ihom chiru li Qaawa’ ut elenaq chaq sa’ Nauvoo.
Naq laj Sidney Rigdon kirab’i resil naq kamenaq laj Jose Smith, kisutq’i chaq Nauvoo. Kiraj ok choq’ awa’b’ej re li Iglees.
Eb’ li apostol li wankeb’ sa’ taqlanb’il k’anjel ke’sutq’i ajwi’ Nauvoo naq ke’rab’i resil lix kamik laj Jose Smith. Laj Brigham Young a’an laj jolominel reheb’ li apostol. Kixye naq li Qaawa’ xk’ehom reheb’ li apostol li wankilal re xjolominkil li Iglees toj reetal naq sik’b’ilaq ru jun ak’ awa’b’ej.
Ke’ch’utub’aak sa’ ch’utam eb’ li komon sa’ li Iglees. Xb’een laj Sidney Rigdon ki’aatinak rik’ineb’ ut kixye naq a’an tento taa’ok choq’ laj jolominel re li Iglees.
Toja’ naq ki’aatinak laj Brigham Young ut kixye naq eb’ li apostol tento te’xjolomi li Iglees. Kiwan li Santil Musiq’ej rik’in. Lix yaab’ xkux laj Brigham Young chanchan lix yaab’ xkux laj Jose Smith, ut ke’wan li ke’ril naq kik’utun laj Jose Smith sa’ xjunxaqalil. Eb’ laj Santil Paab’anel ke’xnaw naq li Dios kixsik’eb’ ru li apostol re xjolominkil li Iglees, ut chixjunileb’ ke’xk’ulub’a naq li apostol te’jolominq reheb’. Kijosq’o’ laj Sidney Rigdon. Kisutq’i sa’ rochoch ut kixtikib’ jun lix iglees xjunes rib’. Ink’a’ chik okenaq choq’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.