Chʼol 48
Laj Jose Smith naxpatz’ xtenq’ankil rik’in li awa’b’ej re li Estados Unidos
Marzo–noviembre re 1839
Laj Jose kixtaqlaheb’ li hu rik’ineb’ laj Santil Paab’anel naq wan sa’ li tz’alam sa’ Liberty. Kixye reheb’ naq te’xtz’iib’a li k’a’ru ke’rahob’tesiik wi’ xb’aaneb’ li ch’uut chi aj rahob’tesinel. Kixye reheb’ naq te’xtaqla li k’a’ru tz’iib’anb’il xb’aaneb’ rik’ineb’ laj jolominel re li tenamit.
Laj Jose kixye reheb’ laj Santil Paab’anel naq te’xtz’iib’a xk’ab’a’eb’ li ani ke’rahob’tesink reheb’. Kixye reheb’ naq te’xye resil lix sachlijik li rochocheb’ ut lix ch’och’.
Chirix naq ak kaahib’ po wanjenaqeb’ laj Jose ut eb’ li ramiiw sa’ li tz’alam sa’ Liberty, junjunqeb’ laj k’aak’alenel ke’xk’ameb’ sa’ jalan chik li k’aleb’aal re taaraqmanq aatin chirixeb’. Laj Jose ut eb’ li ramiiw ke’xloq’ wiib’ li kawaay rik’ineb’ laj k’aak’alenel. Ke’xk’e li t’ikr reheb’ laj k’aak’alenel re xtojb’al jun kawaay ut ke’xk’e rib’ sa’ aatin naq moqon te’xtoj li kawaay jun chik.
Sa’ jun q’ojyin ke’kala junjunq reheb’ laj k’aak’alenel ut ke’ok chi wark. Jun reheb’ laj k’aak’alenel kixtenq’aheb’ chi eelelik laj Jose ut eb’ li ramiiw.
Xkoheb’ laj Jose ut eb’ li ramiiw chiru kawaay, li junjunq chixk’ulb’al xhoonal sa’ xb’eeneb’ li kawaay. Chirix lajeeb’ kutan ke’wulak Quincy, Illinois, b’ar ke’xtaw xjunkab’aleb’.
Ke’saho’ sa’ xch’ool laj Jose ut eb’ li ramiiw chi wank wi’chik rik’in xjunkab’aleb’.
Eb’ laj Santil Paab’anel ke’raj xtawb’al jun na’ajej sa’ Illinois choq’ re xyiib’ankil lix tenamit xjunes rib’. Ke’xloq’ jun siir chi ch’och’ chixk’atq li Nima’ Mississippi li nujenaq rik’in ha’ ut sulul. Laj Jose ut eb’ laj Santil Paab’anel ke’k’anjelak chi anchaleb’ xch’ool re xchaqihob’resinkil li ch’och’ re naq te’ruuq chi kab’lak ut chixrawb’al li awimq. Ke’ok chixyiib’ankil jun tenamit chaq’al ru, li ke’xk’e choq’ xk’ab’a’ Nauvoo. Nauvoo naraj naxye ch’ina-us.
Naq ke’ok laj Santil Paab’anel chixyiib’ankil li tenamit Nauvoo, laj Jose Smith xko’o re rilb’al li awa’b’ej re li Estados Unidos. Laj Jose kixye re li awa’b’ej resil li ch’uut chi aj rahob’tesinel sa’ Missouri. Kixye re naq eb’ li ch’uut chi aj rahob’tesinel ke’xk’at li rochocheb’ laj Santil Paab’anel, ke’xmaq’eb’ lix ketomq, ut ke’ralinasiheb’ sa’eb’ xch’och’.
Laj Jose kixye naq ke’kamsiik junjunq reheb’ laj Santil Paab’anel. Jalaneb’ chik ke’tz’ape’ sa’ tzalam. Kixk’ut chiru li awa’b’ej li k’a’ru ke’xtz’iib’a laj Santil Paab’anel chirix li rahob’tesinb’ileb’ wi’. Laj Jose kixye naq eb’ laj jolominel sa’ Missouri ink’a’ ke’raj xtenq’ankileb’ laj Santil Paab’anel. Kixpatz’ re li awa’b’ej naq tixtenq’aheb’.
Li awa’b’ej kixye naq kixnaw naq ke’xnumsi li rahilal laj Santil Paab’anel, a’ut maak’a’ taaruuq tixb’aanu re xtenq’ankileb’. Wi tixtenq’aheb’ laj Santil Paab’anel, te’josq’o’q li tenamit sa’ Missouri.
Kiraho’ xch’ool laj Jose rik’in naq li awa’b’ej ink’a’ tixtenq’aheb’ laj Santil Paab’anel. Kisutq’i chaq Nauvoo.