Chʼol 39
Nak’ojob’aak li Santil Ochoch re Kirtland
Enero–marzo re 1836
Taqlanb’ileb’ laj Santil Paab’anel chixkab’lankil jun santil ochoch sa’ Kirtland xb’aan li Qaawa’. Neb’a’eb’ laj Santil Paab’anel, a’b’anan ke’majeyak ut ke’k’anjelak chi anchaleb’ xch’ool re xkab’lankil li santil ochoch. Ke’wan xpaab’aaleb’ naq li Qaawa’ tixtenq’aheb’ chixb’aanunkil li k’a’ru xpatz’om reheb’.
Naq ak haye’k chaq re xk’ablankil li santil ochoch, junjunqeb’ laj jolominel re li Iglees ke’xch’utub’ rib’ aran. Sa’ li ch’utam, lix yuwa’ laj Jose Smith kirosob’tesiheb’ laj jolominel re li Iglees. Lix yuwa’ laj Jose Smith a’an li yuwa’b’ejil aj k’anjel re li Iglees.
Toja’ naq laj Jose Smith kixk’ul jun chaq’al ru k’utb’esinb’il na’leb’ sa’ wi’ kiril li choxahil awa’b’ejihom. Li choxahil awa’b’ejihom a’an li na’ajej wan wi’ li Dios. Laj Jose Smith kiril naq k’a’jo’ xch’ina-usal li choxahil awa’ab’ejihom. Kiril li qaChoxahil Yuwa’ ut li Jesus. Kiril ajwi’ li ras laj Alvin, li ak kamenaq.
Kisach xch’ool laj Jose chirilb’al laj Alvin sa’ li choxahil awa’b’ejihom xb’aan naq moko kub’enaq ta xha’ laj Alvin rub’elaj naq kikam. Li Jesus kixch’olob’ naq wankeb’ naab’aleb’ li ink’a’ ke’xnaw ru li evangelio naq wankeb’ sa’ ruchich’och’.
Junjunq reheb’ li kristiaan a’in, jo’ laj Alvin, ke’wan xyu’ameb’ sa’ xq’ehil naq maak’a’ lix tz’aqal evangelio li Jesukristo sa’ ruchich’och’. Junjunqeb’ ke’wan sa’eb’ li na’ajej b’ar ink’a’ ke’ru chi wulak laj k’amol aatin re xtzolb’aleb’.
Junjunq reheb’ li kristiaan a’in te’xpaab’ raj li evangelio ut te’kub’eeq raj xha’ wi ta ke’xnaw ru li evangelio naq ke’wan sa’ ruchich’och’. Eb’ a’in te’xik sa’ li choxahil awa’b’ejihom.
Sa’ li kutb’esinb’il matk’ a’in, laj Jose kitzolok ajwi’ chirix li kok’al li neke’kam chi maji’ neke’tz’aqlok waqxaqib’ chihab’. Li Jesus kixye naq eb’ li kok’al a’in te’xik sa’ li choxahil awa’b’ejihom.
Sa’ roso’jik kiyaalo’ li Santil Ochoch re Kirtland ut yo’on wan re taak’ojob’aaq. A’an naraj naxye naq li santil ochoch taak’ehe’q re li Qaawa’ ut taa’oksimanq ka’ajwi’ choq’ re lix k’anjel. Eb’ laj Santil Paab’anel ke’xb’aanu jun xnimal ru ch’utam re xk’ojob’ankil li santil ochoch.
Naab’aleb’ laj Santil Paab’anel ke’k’ulun sa’ li ch’utam. K’a’jo’ xsahileb xch’ool rik’in jun santil ochoch sa’ xyanqeb’. Ke’b’ichan ut ke’tijok chiru li qaChoxahil Yuwa’. Ke’xk’e rib’ sa’ aatin naq te’xtaaqe li Profeet aj Jose Smith ut li jun ch’ol chik laj jolominel re li Iglees.
Laj Jose kixk’e jun xnimal ru tij re xk’ojob’ankil li santil ochoch. Chirix naq kiraqe’ li tij, santob’resinb’il chik li santil ochoch. A’an li rochoch li Qaawa’. Eb’ li anjel ke’wulak sa’ li Santil Ochoch re Kirtland chiru li kutan a’an. Li Santil Musiq’ej kiwan rik’ineb’ laj Santil Paab’anel. K’a’jo’ xnimal ru li kutan a’an!