Chʼol 29
Jun k’utb’esinb’il na’leb’ chirix li tijonelil
Septiembre re 1832
Naab’aleb’ reheb’ li winq sa’ li Iglees xkoheb’ sa’ taqlanb’il k’anjel. Naq ke’sutq’i sa’ ochoch, xkoheb’ Kirtland re rilb’al laj Jose Smith.
Tzolʼlebʼ ut Sumwank 84, xtiklajik li tasal
Eb’ li winq koxe’xye resil lix taqlanb’il k’anjel re laj Jose Smith. Ke’xkub’siheb’ xha’ naab’aleb’. Sa xch’ooleb’ rik’in lix taqlanb’il k’anjel, ut sa ajwi’ xch’ool laj Jose Smith.
Tzolʼlebʼ ut Sumwank 84, xtiklajik li tasal
Chixjunileb’ laj k’amol aatin wan reheb’ li tijonelil. Li tijonelil a’an lix wankil li Dios. Eb’ laj k’amol aatin ke’raj xnawb’al xkomon chirix li tijonelil.
Li Jesus kixk’e re laj Jose Smith jun k’utb’esinb’il na’leb’ chirix li tijonel. Li Jesus kixye re resil junjunqeb’ li winq sa’ li tijonelil sa’ najter q’e kutan. Laj Adan, li xb’een winq sa’ xb’een li ruchich’och’, kiwan li tijonelil rik’in.
Kiwan li tijonelil rik’in chixjunileb’ li profeet sa’ li Najter Chaq’rab’. Junjunq reheb’ li profeet a’in, a’aneb’ laj Enok, laj Noe, laj Moises, laj Melkisedek, ut laj Abraham. Laj Melkisedek kixk’e li tijonelil re laj Abraham.
Li Jesus kixye naq eb’ li winq tento taawanq rik’ineb’ li tijonel re te’xjolomi lix Iglees. Eb’ li winq sa’ li tijonelil neke’ru chi kub’sink ha’ ut chixk’eeb’al li maatan re li Santil Musiq’ej. Neke’ru chirosob’tesinkil li loq’laj wa’ak. Neke’ru chixk’eeb’al li osob’tesink reheb’ li yaj. Chixjunil li k’a’aq re ru a’in neke’tenq’an reheb’ laj Santil Paab’anel sa’ xyu’ameb’ sa’ ruchich’och’ ut neke’kawresin reheb’ chi wank wi’chik rik’in li qaChoxahil Yuwa’.
Li Jesus kixye re laj Jose naq tento naq tiikeb’ xch’ool li winq re te’xk’ul li tijonelil. Eb’ li neke’k’uluk re neke’xk’uub’ jun li sumwank, malaj yeechi’ihom, rik’in li Dios. Neke’xyeechi’i naq tiikaqeb’ chi paab’ank ut te’roksi li tijonelil re xtenq’ankileb’ li ras riitz’in. Li Dios naxyeechi’i naq wi tiikaqeb’ chi paab’ank, te’ruuq te’ok jo’ xnimal ru ralal. Sa’ jun kutan a’an tixwotz rik’ineb’chixjunil li k’a’ru wan re.
Li Jesus kixye re laj Jose Smith naq xkomoneb’ chik li winq tento te’xik sa’ taqlanb’il k’anjel. Tento te’xjultika li evangelio chiru chixjunil li ruchich’och’. Tento te’xtzoleb’ li kristiaan li jalok k’a’uxl chirix lix maakeb’, ut tento te’xkub’siheb’ xha’ ut te’xk’e reheb’ li maatan re li Santil Musiq’ej.
Li Jesus kixye naq te’osob’tesiiq laj k’amol aatin wi te’k’anjelaq chi anchaleb’ xch’ool. Eb’ li anjel te’tenq’anq reheb’, ut li qaChoxahil Yuwa’ tixk’e reheb’ li ajb’il chiruheb’.
Kiraqe’ li k’utb’esinb’il na’leb’. Laj Jose ut eb’ laj k’amol aatin saheb’ xch’ool chixnawb’al xkomon chirix li tijonelil. Ke’raj roksinkil li tijonelil chi tiik ru.
Sa’ jun k’utb’esinb’il na’leb’ li kichal moqon, li Jesus kixye re laj Jose chanru naq eb’ li winq tento te’roksi li tijonelil. Maajo’q’e te’roksi li tijonelil re taqlank sa’ maa’usilal malaj re hob’ok. Li Dios k’a’ajwi’ tixk’e lix wankil li tijonelil reheb’ li winq tiikeb’ xch’ool.
Eb’ li winq tento te’roksi li tijonelil rik’in rahok ut chaab’il ch’oolej. Eb’ li neke’ab’in re li Santil Musiq’ej junelik taawanq lix wankil li tijonelil rik’ineb’.