Chʼol 28
Li Profeet aj Jose naxik Missouri wi’chik
Marzo–mayo re 1832
Laj Jose Smith kixk’ul jun k’utb’esinb’il na’leb’ sa’ wi’ li Jesus kixye naq eb’ laj Santil Paab’anel chanchaneb’ lix kok’al. Toj yookeb’ chi tzolok. Li Jesus kixye naq che’saho’q sa’ xch’ool ut che’b’antioxinq. A’anaq aj jolominel reheb’.
Li Jesus kixye naq kiraj naq eb’ laj Santil Paab’anel te’xch’olaniheb’ li neb’a’. Kiraj naq te’wotzoq li jun rik’in li jun chik ut naq te’xtenq’a rib’ chirib’ileb’ rib’.
Moko najt ta chik chirix naq laj Jose Smith kixk’ul li k’utb’esinb’il na’leb’ a’in, a’an rochb’een junjunqeb’ li ramiiw xkoheb’ wi’chik Missouri. Eb’ laj Santil Paab’anel sa’ Missouri ke’saho’ sa’ xch’ooleb’ chirilb’al.
Laj Jose kixpatz’ reheb’ laj Santil Paab’anel naq te’wulaq sa’ jun ch’utam re naq taaruuq tixye reheb’ resil li k’utb’esinb’il na’leb’.
Chirix xraqik li ch’utam, li Qaawa’ kixk’e jun chik li k’utb’esinb’il na’leb’ re laj Jose. Sa xch’ool li Jesus rik’in naq eb’ laj Santil Paab’en ke’xkuy xmaak chirib’ileb’ rib’. Xb’aan naq ke’xb’aanu chi jo’kan, kixye naq a’an tixkuyeb’ xmaak.
Sa’ li k’utb’esinb’il na’leb’ a’in li Jesus kixk’e ajwi’ jun ak’ chaq’rab’ reheb’ laj Santil Paab’anel. A’an kixye naq kixk’e reheb’ li ch’och’ re Sion, ut naq tento te’xwotz li ch’och’ chirib’il rib’. Chixjunileb’ tento taawanq li ajb’il reheb’. Li Qaawa’ kixpatz’ ajwi’ naq eb’ laj Santil Paab’anel te’xchaab’ilob’resieb’ lix maatan ut te’roksiheb’ choq’ re xchaab’ilal li Iglees.
Chirix xraqik li ch’utam, laj Jose kirula’aniheb’ laj Santil Paab’anel sa’ naab’aleb’ li k’aleb’aal. Sa xch’ool chiruheb’ li kutan a’in. A’an kixraheb’ laj Santil Paab’anel.
Sa’ jalan chik li k’utb’esinb’il na’leb’ li kik’ule’ xb’aan laj Jose naq wan chaq Missouri, li Qaawa’ kixye naq eb’ li b’eelomej tento te’rileb’ li rixaqil. Eb’ li na’b’ej yuwa’b’ej tento te’rileb’ li ralal xk’ajol.
Li Qaawa’ kixye ajwi’ naq eb’ laj Santil Paab’anel tento te’rileb’ li ixq li maak’a’eb’ xb’eelom. Eb’ laj Santil Paab’anel tento ajwi’ te’rileb’ li kok’al li maak’a’eb’ xna’ xyuwa’.
Li Jesus kixye naq eb’ laj Santil Paab’anel tento te’xk’e li tzakemq ut jalan chik li k’a’aq re ru re li obiisp re tixk’e sa’ jun li k’uuleb’aal kab’l. Kixye naq li obiisp tento taaroksi li k’a’ru wan sa’ li k’uuleb’aal kab’l re xtenq’ankileb’ li neb’a’.
Chirix naq laj Jose Smith kixchoy xk’anjel sa’ Missouri, a’an rochb’een li Obiisp Whitney ke’xchap xb’e toj Kirtland. Xkoheb’ sa’ b’eleb’aal.
Sa’ jun kutan ke’xeb’esiik li kawaay ut jo’kan ke’ok chi aanilak.
Laj Jose kipisk’ok chirix li b’eleb’aal, a’b’an ink’a kitoche’. Li Obiisp Whitney kipisk’ok chirix li b’eleb’aal ut kitoche’ li roq.
Laj Jose Smith ut li Obiisp Whitney ke’kana sa’ jun ochochnal. Li Obiisp Whitney kihilan chiru kaahib’ xamaan. Laj Jose kikana rochb’een toj reetal naq kik’ira li roq.
Naq wankeb’ sa’ li ochochnal, kik’eeman li b’an li nakamsin sa’ xtzakemq laj Jose. Q’axal kiyajer.
Laj Jose kixpatz’ re li Obiisp Whitney naq tixk’e re jun li osob’tesink. Li Obiisp Whitney kiroksi lix wankil li tijonelil re rosob’tesinkil laj Jose, ut a’an kik’ira.
Laj Jose kixb’antioxi re li Dios naq kixk’irtesi. Naq laj Jose ut li Obiisp Whitney ak k’irtesinb’ileb’ chi us choq’ re li b’eek, xkoheb’ sa’ rochoch rik’in xjunkab’aleb’.