Chʼol 19
Li Xkab’ Xk’ulunik li Jesukristo
Ke’wan junjunqeb’ sa’ Kirtland, Ohio li ink’a’ ke’raj xtzolb’al li evangelio. Ke’wan ajwi’ li ke’tik’ti’i’ik chirixeb’ laj Santil Paab’anel re xramb’aleb’ xb’e li jun ch’ol chik chixtzolb’al li evangelio.
Tzolʼlebʼ ut Sumwank 45, xtiklajik li tasal
Li Jesus kixye re laj Jose Smith naq sa’ junpaat chik taak’ulunq wi’chik sa’ ruchich’och’. Naq maji’ taak’ulunq, chixjunileb’ sa’ ruchich’och’ tento te’rab’i li evangelio. Tento naq chaab’ilaqeb’ sa’ xk’anjeleb’ jo’ laj k’amol aatin eb’ laj Santil Paab’anel ut naq te’k’anjelaq chi anchaleb’ xmetz’ew re xwotzb’al li evangelio.
Naq kiwan li Jesus sa’ ruchich’och’, kixye reheb’ lix apostol li k’a’ru taak’ulmanq naq maji’ taak’ulunq wi’chik.
Li Jesus kixye reheb’ lix apostol naq li santil ochoch sa’ Jerusalen taasache’q. Lix tenamiteb’ aj Judio te’jek’imanq sa’ xyanqeb’ naab’aleb’ li tenamit, ut naab’al reheb’ te’kamsiiq. Te’wanq k’iila pleet. Ink’a’ te’xra rib’ li kristiaan, ut te’risi chaq xch’ooleb’ rik’in li Dios. Te’wanje’q li xuwuajel yajel, rahilal, ut li hiik. Taaq’ojyino’q ru li saq’e, ut taakik’o’q ru li po, ut te’t’anje’q chaq eb’ li chahim sa’ choxa.
Jun na’leb’ aajel ru li taak’ulmanq re xkawresinkil xb’e lix xk’ulunik li Jesus sa’ ruchich’och’, a’an lix k’ojlajik wi’chik lix Iglees. Li Jesus kixye naq li evangelio k’ojob’anb’il wi’chik a’an chanchan jun saqen sa’ xyi li aak’ab’.
Naab’al li na’leb’ yeeb’ileb’ resil xb’aan li Jesus ak uxb’ileb’. Jalan chik li na’leb’ okeb’ re chi uxk ut wankeb’ xkomon chik li toj te’uxq.
Naq te’uxq a’in, li ani tiikeb’ xch’ool te’xnaw naq k’ulunk chaq re li Jesus. Te’raj naq taak’ulunq. Naab’aleb’ laj Judio te’sutq’iiq Jerusalen. Te’rab’i li evangelio.
Eb’ laj Santil Paab’anel tiikeb’ xch’ool te’xyiib’ li ak’ tenamit Sion, b’ar kolb’ileb’ wi’. Ink’a’ te’xpleeti rib’ chirib’ileb’ rib’. Sahaq xch’ooleb’ ut te’xb’icha li b’ich re sahil ch’oolejil. Li ani ink’a’ tiik xch’ool ink’a’ taaruuq taaxik Sion.
Li Jesus taak’ulunq sa’ ruchich’och’ sa’ jun choql q’axal xlemtz’unkil ru. Eb’ li tiikeb’ xch’ool te’ril. Chixjunileb’ li tiikeb’ xch’ool li ak kamenaqeb’ te’wakliiq chi yo’yo. Te’xk’ul li Jesus sa’ li choql ut rochb’een te’k’ulunq sa’ ruchich’och’.
Li Jesus taak’ulunq Jerusalen. Taaxaqliiq sa’ xb’een jun nimla tzuul aran, ut li tzuul tixjach rib’ sa’ xyi. Te’chenchotq li choxa ut li ch’och’. Eb’ laj maak te’sache’q.
Li tenamit sa’ Jerusalen te’ril li Jesus ut te’xpatz’, “K’a’ru li k’ob’olal a’in sa’ laa wuq’ ut sa’ laa woq?” A’an tixye: “Laa’in li Jesus li kik’ehe’ chiru krus. Laa’in li Ralal li Dios.” Toja’ ut naq te’yaab’aq li kristiaan xb’aaneb’ xmaak ut te’raho’q sa’ xch’ool xb’aan naq kirahob’tesiik li Jesus.
Q’axal te’saho’q sa’ xch’ool chirilb’al li Jesus eb’ li tiikeb’ xch’ool. Chixjunil li ruchich’och’ taak’eemanq reheb’. Laj Satanas ink’a’ taaruuq taaraaleheb’. Eb’ li kok’al te’nimanq chi maak’a’ li maak. Li Jesus taawanq sa’ xyanqeb’ chiru 1,000 chihab’ ut taawanq choq’ xReyeb’.
Li Jesus kixye re laj Jose Smith naq chixtaqlaheb’ laj k’amol aatin re xyeeb’al reheb’ chixjunil naq te’xjal xk’a’uxl ut te’xkawresi rib’ choq’ re li Xkab’ Xk’ulunik. Li Jesus kixye naq eb’ laj Santil Paab’anel tento ajwi’ te’xkawresi rib’. Tento te’tijoq, te’kuyuq sa’, ut sa’ komonil te’xtzoleb’ li chaq’rab’.
Li Jesus kixk’e rib’ sa’ aatin rik’in laj Santil Paab’anel naq wi te’jiloq rik’in, a’an taajiloq rik’ineb’. Kixye naq tento te’tijoq, ut kixxaqab’ aatin naq li Dios tixsumeheb’.
Eb’ laj Santil Paab’anel tento te’xb’aanu li jo’ k’ihal te’ruuq re xtenq’ankil li Jesus. Naq junaq naxtenq’a li Jesus, na’ok jo’ chanru a’an. Chi jo’kan kawresinb’ilaq choq’ re li Xkab’ Xk’ulunik.