Chʼol 37
Laj jolominel re li tijonelil
Febrero–marzo re 1835
Laj Jose Smith kixpatz’ chiruheb’ li winq re lix Teepal Sion naq te’chalq sa’ jun ch’utam aajel ru sa’ Kirtland, Ohio. Laj Jose kixye reheb’ li winq naq li Jesus kiraj naq te’b’oqe’q li Kab’laju chi Apostol re tenq’ank sa’ xjolominkil li Iglees.
Li Qaawa’ kixye re laj Oliver Cowdery, laj David Whitmer, ut laj Martin Harris naq te’xsik’eb’ ru li apostol. Sa’ li ch’utam, laj Oliver, laj David, ut laj Martin ke’osob’tesiik xb’aan li Xb’eenil Awa’b’ejil re li Iglees. Toja naq’ ke’tijok sa’ komonil ut ke’xsik’eb’ ru kab’laju li winq chaab’ileb’ xch’ool.
Li kab’laju li winq ke’xaqab’aak choq’ apostol. Xb’oqb’aleb’ li apostol. A’an jun reheb’ li k’anjel q’axal nim xwankil sa’ lix k’ojob’anb’il wi’chik lix Iglees li Qaawa’.
Eb’ li apostol aajeleb’ ru jo’ laj jolominel sa’ li Iglees. Neke’xnaw naq li Jesus a’an aj Kolol qe. Neke’xk’ut li evangelio chiru chixjunil li ruchich’och’.
Chirix junjunq kutan, jalaneb’ chik li winq ke’b’oqe’ choq’ laj jolominel sa’ li Iglees. Laj Setenta kiyeeman reheb’. Eb’ laj Setenta neke’tenq’an reheb’ li apostol.
Sa’ jun kutan wankeb’ sa’ jun ch’utam li Kab’laju chi Apostol. Yookeb’ chixkawresinkil rib’ chi xik sa’ taqlanb’il k’anjel, ut ke’raj tenq’aak xb’aan li qaChoxahil Yuwa’.
Eb’ li apostol ke’xpatz’ re laj Jose naq taatijoq re xkulb’al jun k’utb’esinb’il na’leb’ li tixtenq’aheb’ sa’eb’ xtaqlanb’il k’anjel. Li Jesus kixk’e jun xnimal ru k’utb’esinb’il na’leb’ re laj Jose Smith ut eb’ li apostol, sa’ wi’ kixye reheb’ resil li tijonelil.
Tzolʼlebʼ ut Sumwank 107, xtiklajik li tasal
Li tijonelil a’an xwankil li Dios. A’an li wankil q’axal nim sa’ ruchich’och’. Li Dios naxk’e li tijonelil reheb’ li winq tiikeb’ xch’ool. Eb’ li winq li neke’xk’ul li tijonelil k’eeb’ileb’ xliceens chixjultikankil li evangelio, chixb’aanunkil li k’ojob’anb’il k’anjel, ut chi wank choq’ laj jolominel sa’ li Iglees.
Wankeb’ wiib’ li tijonelil sa’ li Iglees. Jun reheb’, a’an li Tijonelil re Melkisedek, nawb’il ajwi’ ru jo’ li xnimal ru tijonelil. Wan li Tijonelil re Melkisedek rik’in li Awa’b’ej re li Iglees, eb’ lix tenq’ aj k’ehol na’leb’, li Kab’laju chi Apostol, ut eb’ laj Setenta.
Li Awa’b’ej re li Iglees a’an jun xprofeet li Dios. A’an naxye qe li naraj li Jesus naq taqab’aanu. Wankeb’ lix tenq’ aj k’ehol na’leb’ li neke’tenq’an re. Li profeet ut lix tenq’ aj k’ehol na’leb’ a’aneb’ li Xb’eenil Awa’b’ejil re li Iglees.
Eb’ li taqenaqil aj tij wank ajwi’ li Tijonelil re Melkisedek rik’ineb’. Naab’al reheb’ laj jolominel sa’eb’ li oqech ut li teep a’aneb’ taqenaqil aj tij. Sa’ xyanqeb’ wan li awa’b’ej re li oqech, li obiisp, ut li ani wan sa’ li taqenaqil ch’utam.
Eb’ li winq li k’ojob’anb’ileb’ choq’ xb’eenileb’ wank ajwi’ rik’ineb’ li Tijonelil re Melkisedek. Eb’ li xb’eenil neke’xtzoleb’ li komon sa’ li Iglees ut neke’xk’aak’aleheb’.
Eb’ li xb’eenil b’oqb’ileb’ ajwi’ chi xik sa’ taqlanb’il k’anjel re xjultikankil li evangelio chiru chixjunil li ruchich’och’.
Chixjunileb’ li winq li wan rik’ineb’ li Tijonelil re Melkesidek neke’ru chirosob’tesinkil li ras riitz’ineb’. Neke’ru ajwi’ chixk’eeb’al reheb’ li Santil Musiq’ej.
Li tijonelil jun chik, a’an li Tijonelil re Aaron, li nawb’il ajwi’ ru jo’ li xka’ch’inal ru tijonelil. Sa’ li Tijonelil re Aaron wankeb’ li opiis re obiisp, laj tij, laj tzolonel, ut laj tenq’anel. Eb’ laj tij neke’ru chi kub’sink ha’, chirosob’tesinkil li loq’laj wa’ak, ut chixtenq’ankileb’ li xb’eenil.
Eb’ laj tzolonel neke’xkawresi li loq’laj wa’ak. Neke’k’anjelak jo’ aj tzolol ochochnal ut neke’xtenq’aheb’ li komon sa’ li Iglees chixb’aanunkil li us sa’ xyu’ameb’.
Eb’ laj tenq’anel neke’xjek’i li loq’laj wa’ak. Neke’xk’ul ajwi’ li mayej re li kuyuk sa’ ut neke’xtenq’a li obiisp.
Li Jesus kixye naq chixjunileb’ li winq’ li wan rik’ineb’ li tijonel tento te’xtzol li k’a’ru naraj li Dios naq te’xb’aanu. Wi te’k’anjelaq chi anchaleb’ xmetz’ew, li qaChoxahil Yuwa’ taarosob’tesiheb’.