Chʼol 65

Lix Iglees li Jesukristo sa’ li kutan a’in

Ak numenaqeb’ k’iila chihab’ chalen chaq lix tijlajik li Iglees sa’ Fayette, Nueva York. Q’axal kiniman li Iglees chiruheb’ li chihab’ a’an. Sa’ 1830 kitikla rik’in yal waqib’ li komon.

Chalen chaq 1830, eb’ laj k’amol aatin taqlanb’ileb’ chaq chiru chixjunil li ruchich’och’ re xjultikankil li evangelio. Wankeb’ li ke’rab’i li raatineb’ laj k’amol aatin ut ke’xjunaji rib’ rik’in li Iglees. Sa’ li kutan anajwan, k’iila millon li komon sa’ li Iglees neke’tawman chiru chixjunil li ruchich’och’. Naab’al li aatinob’aal li neke’roksi. Us ta jalaneb’ li na’ajej neke’tawman wi’ li komon, juntaq’eet li Iglees. Saheb’ xch’ool chi wank choq’ komon sa’ li Iglees.

Eb’ li yo’yookil profeet toj neke’xb’eresi Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Neke’xk’ul li k’utb’esinb’il na’leb’ rik’in li Jesukristo.

Naq eb’ li komon sa’ li Iglees neke’xtaaqeheb’ li profeet, q’axal wi’chik xchaab’ilaleb’ ut xsahilaleb’ xch’ool. Kawresinb’ileb’ chik li rochoch ut lix junkab’al. Neke’xwotz li evangelio rik’in li jun ch’ol chik. Neke’xtenq’aheb’ li rech kab’al ut jalaneb’ chik li neke’raj xtenq’ankil.

Li komon sa’ li Iglees neke’xtaaqe ajwi’ li profeet rik’in naq neke’wulak sa’ li santil ochoch. Yiib’anb’ileb’ li santil ochoch chiru chixjunil li ruchich’och’ xb’aan li Iglees. Eb’ li komon neke’wulak sa’ li santil ochoch re xtzolb’al chanru te’ok jo’chanru li Jesus. Neke’xk’ul li loq’laj k’ojob’anb’il k’anjel ut neke’xk’uub’ li sumwank rik’in li Dios. Li santil ochoch a’an li junaj chi na’ajej te’ruuq te’sumlaaq wi’ li komon choq’ re li yu’am a’in ut li junelik q’e kutan. Noko’osob’tesiik sa’ k’iila paay ru rik’in li wank choq’ komon sa’ lix Iglees li Qaawa’. Tento naq toob’antioxinq xb’aan li osob’tesink a’in. Naru toob’antioxinq rik’in li ab’ink chiruheb’ xchaq’rab’ li Dios ut xtenq’ankil li qas qiitz’in.