Chʼol 9
Xk’uub’lajik lix Iglees li Jesukristo
6 xb’e li po abril re 1830
Laj Jose Smith kiwan rochoch sa’ li k’aleb’aal Fayette sa’ li estado Nueva York. Li Jesus kixye re laj Jose naq ak xwulak xq’ehil naq taak’ojob’amanq wi’chik lix Iglees sa’ ruchich’och’. Kixye re laj Jose naq tixk’uub’ li Iglees.
Sa’ li 6 xb’e li po abril re 1830, laj Jose kixb’aanu jun ch’utam re xk’uub’ankil li Iglees. Laj Oliver Cowdery, laj Hyrum Smith, laj David Whitmer, ut laj Peter Whitmer ke’k’ulun re xtenq’ankil. Ak kub’enaqeb’ xha’ chixjunileb’. Jalaneb’ chik ke’k’ulun ajwi’ sa’ li ch’utam.
Eb’ li winq ke’tijok chiru li qaChoxahil Yuwa’. Laj Jose kixk’ojob’ laj Oliver choq’ xb’eenil sa’ li Iglees. Toja’ naq laj Oliver kixk’ojob’ laj Jose.
Laj Jose ut laj Oliver ke’rosob’tesi li loq’laj wa’ak. Ke’xk’e reheb’ li winq.
Laj Jose ut laj Oliver ke’xk’e ruq’eb’ sa’ xb’eeneb’ li junjunq chi winq re xk’ojob’ankil choq’ komon sa’ lix Iglees li Jesukristo ut ke’xk’e reheb’ li maatan re li Santil Musiq’ej.
Laj Jose ut laj Oliver ke’xk’ojob’ junjunqeb’ chik li winq sa’ li tijonelil. Eb’ li winq a’in q’axal sa sa’ xch’ooleb’. Ke’xye naq neke’xra li Dios ut ke’aatinak chirix chanru naq osob’tesinb’ileb’ xb’aan.
Li Jesus kixk’e jun k’utb’esinb’il na’leb’ re laj Jose Smith sa’ li ch’utam. Li Jesus kixye naq laj Jose a’an jun profeet. Jun tz’aqal profeet na’aatinak sa’ xk’ab’a’ li Jesus.
Chirix li ch’utam, naab’aleb’ ke’kub’e xha’, jo’ lix na’ ut lix yuwa’ laj Jose Smith. K’a’jo’ xchaab’ilal li kutan a’an! Wan wi’chik lix Iglees li Jesukristo sa’ ruchich’och’.