Chʼol 44
Li lajetqil
Julio re 1838
Li Qaawa’ ak kixye re laj Jose Smith naq li komon sa’ li Iglees tento te’xtoj li lajetqil. Naq wan sa’ Far West, Missouri laj Jose, kitijok re xpatz’b’al jarub’ tento te’xtoj laj Santil Paab’anel choq’ lajetqil. Li Qaawa’ kixk’utb’esi naq eb’ laj Santil Paab’anel tento te’xtoj jun xlajetq raqal chixjunil li k’a’ru wan reheb’.
Tzolʼlebʼ ut Sumwank 119, xtiklajik li tasal
Wi ta ke’xk’ul lajeb’ tumin, te’xtoj raj jun tumin choq’ lajetqil. Wi ta ke’xk’ul jun cient tumin, te’xtoj raj lajeb’ tumin.
Wan chik xkomon chanru ke’xtoj wi’ li lajetqil eb’ laj Santil Paab’anel. Ke’xq’axtesi lix lajetq raqal lix k’iijik li ke’raw sa’ xch’och’eb’. Ke’xq’axtesi ajwi’ lix lajetq raqal lix kaxlan ut lix jar paay chi xulil. Ke’xtoj ajwi’ lix lajteqil rik’in li leech ut li k’a’ru re che’ nak’uxman
Li lajteqil na’oksiman re xkab’lankil ut xtusub’ankil li santil ochoch, li ch’utleb’aal kab’l, ut xkomon chik li kab’l re li Iglees. Li lajetqil na’oksiman ajwi’ re xtenq’ankil li k’anjel re xjultikankil li evangelio. Jo’kan ajwi’, na’oksiman re xjaltesinkil ru ut xpuktesinkil li loq’laj hu ut xkomon chik lix jar paay chi huhil li Iglees.
Li lajetqil na’oksiman ajwi’ re xtenq’ankileb’ li komon sa’ li Iglees. Li lajetqil ut jalaneb’ chik li mayej neke’oksiman re xloq’b’al tzakemq ut t’ikr choq’ re li maak’a’ wankeb’ re.
Li Qaawa’ naraj naq chiqajunjunqal naqatoj xtz’aqalil li qalajetqil. Naqak’e li qalajetqil re li Obiisp. A’an naxtaqla chaq rik’in lix jolomil li Iglees, b’ar li profeet ut xkomon chik aj jolominel re li Iglees neke’tijok re xnawb’al chanru taa’oksimanq.
Li qaChoxahil Yuwa’ naxk’e xninqal ru osob’tesink reheb’ laj Santil Paab’anel li neke’xtoj li lajetqil. Eb’ laj Santil Paab’anel li ink’a’ neke’xtoj li lajteqil ink’a’ te’ruuq te’xk’ul li osob’tesink a’in. Li Santil Hu naxye naq eb’ laj Santil Paab’anel li ink’a’ neke’xtoj li lajetqil, yookeb’ chi elq’ak chiru li Dios.