Chʼol 56

Xkomon chik li ch’a’ajkilal reheb’ laj Santil Paab’anel

1843–1844

Moko xkomoneb’ ta sa’ li Iglees lix k’ihaleb’ li ke’wan rochoch nach’ rik’in Nauvoo. Naab’al reheb’ xik’ ke’ilok reheb’ laj Santil Paab’anel ut ke’ok chixyoob’ankil li ch’a’ajkilal choq’ reheb’.

Ke’ch’utla junjunq reheb’ sa’ ch’uut chi aj rahob’tesinel. Ke’xmaq’eb’ lix ketomq laj Santil Paab’anel ut ke’xk’ateb’ lix k’uuleb’aal xul ut li rochoch. Ke’xyal xminb’aleb’ ru laj Santil Paab’anel chi elk chaq Nauvoo. Eb’ li policia ut laj pleet ink’a’ ke’xrameb’ ru li ch’uut chi aj rahob’tesinel. Li gobernador ink’a’ kiraj xtenq’ankileb’ laj Santil Paab’anel.

Laj Jose Smith ak kixye reheb’ laj Santil Paab’anel sa’ Nauvoo naq te’xnumsi li ch’a’ajkilal. Kixnaw naq junaq kutan teneb’anb’ilaq sa’ xb’eeneb’ elk chaq Nauvoo ut xik sa’ jun najtil na’ajej b’ar maa’ani taach’i’ch’i’inq reheb’.

Laj Jose Smith kixb’aanu jun ch’utam rik’ineb’ li apostol ut junjunqeb’ chik li winq. Kixye reheb’ naq te’xtaw jun na’ajej b’ar wi’ te’q’axonq laj Santil Paab’anel wi te’teneb’aaq chi elk chaq Nauvoo.

Laj Jose kixtz’ileb’ rix li reetalil ch’och’. Eb’ li reetalil ch’och’ ke’xk’ut jun na’ajej rik’in ninqi tzuul ut eb’ li ru taq’a q’axal helhookeb’. Laj Jose kixnaw naq a’anaq jun chaab’il na’ajej choq’ reheb’ laj Santil Paab’anel.

Junjunqeb’ sa’ Nauvoo li ak komoneb’ sa’ li Iglees ke’ok chixtz’eqtaanankil. Xik’ ke’ilok re laj Jose Smith ut ke’raj xkamsinkil. Ke’xk’uub’ jun li hu re noticias ut ke’xtz’iib’a li yib’ ruhil aatin chirix laj Jose ut chirixeb’ laj Santil Paab’anel.

Eb’ laj jolominel sa’ Nauvoo ke’josq’o’ chirix li hu re noticias. Xb’aan naq kixpuktesiheb’ li tik’ti’, eb’ laj jolominel a’in ke’xk’oxla naq wankeb’ xliceens chixramb’al. Junjunqeb’ li winq xkoheb’ sa’ li kab’l k’uub’anb’il wi’ li hu re noticias ut ke’xk’ateb’ li hu re noticias ut ke’xsach li k’uub’leb’aal hu. Rik’in a’in q’axal wi’chik ke’josq’o’ laj xik’ ilonel re li Iglees.