Chʼol 32
Lix Iglees li Jesukristo sa’ Kirtland
1833–1834
Li Qaawa’ kixye naq laj Jose Smith chixsik’eb’ li winq li te’tenq’anq re chixjolominkil li Iglees. Eb’ li winq a’in te’wanq choq’ aj tenq’ aj k’ehol na’leb’ re laj Jose. Li Qaawa’ kixk’utb’esi naq laj Sidney Rigdon ut laj Frederick G. Williams te’ok choq’ laj tenq’ aj k’ehol na’leb’ a’in.
Sa’ li marzo re 1833, laj Jose Smith kixk’ojob’ lix tenq’ aj k’ehol na’leb’ sa’ jun loq’laj ch’utam sa’ Kirtland, Ohio. Laj Jose ut eb’ lix tenq’ aj k’ehol na’leb’ a’aneb’ li xb’een Xb’eenil Awa’b’ejil re li Iglees.
Anajwan li yo’yookil profeet a’an laj jolominel re li Iglees. A’an rochb’eeneb’ lix tenq’ aj k’ehol na’leb’ a’aneb’ li Xb’eenil Awa’b’ejil re li Iglees.
Li Jesus kixye re laj Jose Smith naq eb’ laj Santil Paab’anel tento te’xkab’la xkomon chik li kab’l re li Iglees. Li kab’l q’axal nim xwankil a’anaq jun li santil ochoch sa’ Kirtland. Eb’ laj Santil Paab’anel tento ajwi’ te’xkab’la jun k’uub’leb’aal hu ut jun na’ajej te’k’anjelaq wi’ li Xb’eenil Awa’b’ejil.
Eb’ laj Santil Paab’anel ke’ab’in chiru li Qaawa’ ut ke’xtikib’ xkab’lankil li Santil Ochoch re Kirtland. Ch’a’aj li k’anjel, ut chixjunileb’ laj Santil Paab’anel teneb’anb’ileb’ chi tenq’ank.
Rik’in naq yoo chi k’ihank li Iglees, li Jesus kixye re laj Jose Smith naq tixsik’ xkomon chik aj jolominel. A’an kixye naq lix yuwa’ laj Jose chi’ok choq’ yuwaʼbʼejil aj kʼanjel sa’ li Iglees. Jun yuwa’b’ejil aj k’anjel naxk’e li xnimal ru osob’tesink reheb’ laj Santil Paab’anel. Anajwan wankeb’ li yuwa’b’ejil aj k’anjel sa’ lix k’ihaleb’ li oqech re li Iglees.
Li Jesus kixye ajwi’ re laj Jose naq chixsik’ kab’laju li winq re te’k’anjelaq sa’ jun taqenaqil ch’utam. Li wankeb’ sa’ li taqenaqil ch’utam a’aneb’ li taqenaqil aj tij sa’ li Tijonelil re Melkisedek. Jun reheb’ lix k’anjel, a’an xtenq’ankil xtuqub’ankil yalaq paay chi ch’a’ajkilal neke’wakli sa’ li Iglees.
Sa’ febrero re 1834, laj Jose Smith kixk’uub’ li xb’een oqech re li Iglees. Jun oqech a’an jun ch’uut chi komon, juntaq’eet li na’ajej wankeb’ wi’. Chixjunileb’ laj Santil Paab’anel sa’ Kirtland ke’wan sa’ li xb’een oqech.
Anajwan, wankeb’ k’iila mil li oqech sa’ li Iglees.