Chʼol 21
Jun k’utb’esinb’il na’leb’ re q’axonk Missouri
Mayo–junio re 1831
Laj Jose Smith ki’el chaq Nueva York ut kiq’axon Kirtland, Ohio. Kixpatz’ reheb’ laj Santil Paab’anel li toj wankeb’ Nueva York naq te’q’axonq Ohio, ut ke’ab’in chiru.
Li Jesus kixye re laj Jose naq eb’ laj Santil Paab’anel sa’ Ohio tento te’xwotz xch’och’eb’ rik’ineb’ laj Santil Paab’anel li yookeb’ chi elk chaq Nueva York. Laj Leman Copley naab’aleb’ lix ch’och’, ut kixk’e rib’ sa’ aatin naq tixwotzeb’. Junjunqeb’ laj Santil Paab’anel ke’kana sa’ lix ch’och’.
A’b’anan laj Leman Copley kixq’et lix yeechi’ihom. Ink’a’ chik kiraj naq laj Santil Paab’anel re Nueva York te’xk’ul lix ch’och’. Kixmineb’ ru chi elk chaq sa’ xch’och’, ut maab’ar chik li ch’och’ te’wanq wi’.
Tzolʼlebʼ ut Sumwank 54, xtiklajik li tasal
Laj Newel Knight a’an laj jolominel reheb’ li ch’uut aj Santil Paab’anel a’in. Ink’a’ kixnaw k’a’ru tixb’aanu, jo’kan naq koxxpatz’ xtenq’ankil rik’in laj Jose Smith.
Tzolʼlebʼ ut Sumwank 54, xtiklajik li tasal
Laj Jose Smith kitijok, ut li Qaawa’ kixye re naq lix ch’uut aj Santil Paab’anel tento te’xik Missouri.
Rub’elaj relikeb’ laj Santil Paab’anel a’in sa’ Kirtland, ki’uxman jun ch’utub’aj-ib’. Ke’ch’utla chiru oxib’ kutan. Li Qaawa’ kixk’e junjunqeb’ xnimal ru k’utb’esinb’il na’leb’ re laj Jose Smith.
Li Qaawa’ kixye re laj Jose naq tixk’ojob’ li xb’een taqenaqil aj tij sa’ li Iglees. Wan rik’ineb’ li taqenaqil aj tij li Tijonelil re Melkisedek. Naab’al reheb’ laj jolominel re li Iglees ke’k’ojob’aak choq’ taqenaqil aj tij.
Tzolʼlebʼ ut Sumwank 52, xtiklajik li tasal
Li Qaawa’ kixye naq junjunq reheb’ li winq tento te’xik Missouri sa’ taqlanb’il k’anjel. Tento te’xjultika li evangelio sa’ xb’eenikeb’. Naq kiraqe’ li ch’utub’aj-ib’, eb’ laj k’amol aatin ke’xchap xb’e toj sa’ Missouri.
Li Qaawa’ kixye re laj Jose naq li ch’utub’aj-ib’ re li Iglees li taachalq, taa’uxmanq sa’ Missouri. Kixye re laj Jose ut reheb’ li ramiiw naq te’xik aran. Li Jesus kixyeechi’i reheb’ naq tixk’ut chiruheb’ b’ar te’xyiib’ li tenamit Sion.
Tzolʼlebʼ ut Sumwank 52:1–5 (chi’ilmanq ajwi’ Tz. ut S 42:62)